ပြည်တွင်းကုန်သွယ်မှုသတင်း

          မန္တလေးတိုင်းဒေသကြီး၊ စစ်ကိုင်းတိုင်းဒေသကြီးနှင့် အခြားသောကြံစိုက်ပျိုးထွက်ရှိရာဒေသများမှ ၂၀၂၁ ခုနှစ် ဒီဇင်ဘာလလယ်နောက်ပိုင်းတွင် စတင်၍ မန္တလေးဈေးကွက်သို့ သကာရည် (ခေါ်) ပွက်သားအသစ်များ လှိုင်လှိုင်ဝင်ရောက်လာခြင်းကြောင့် မန္တလေးမြို့ရှိ သကြားနှင့်သကာရည် ဈေးကွက်တို့မှာလည်း အတက်အကျများစွာဖြင့် ရောင်းဝယ်လျက် ရှိပါသည်။ ၂၀၂၀ခုနှစ်တွင် ကိုဗစ်-၁၉ ရောဂါ ဖြစ်ပွားလာခြင်းကြောင့် သကြားအသုံးပြု ထုတ်လုပ်သည့် စားသောက်ကုန်နှင့်မုန့်လုပ်ငန်း၊ အဖျော်ယမကာလုပ်ငန်း၊ ယိုစုံလုပ်ငန်းများနှင့် ဖျော်ရည်လုပ်ငန်းများ အခိုက်အတံ့ ရပ်နားခဲ့ရပါသည်။ ၂၀၂၀ခုနှစ် ဒီဇင်ဘာလ စတုတ္ထအပတ်မှစ၍ သကြားဈေးများကျဆင်းခဲ့ပြီး ဈေးကွက်တွင် ခါသကြား၁ပိဿာလျှင် ၈၀၀-၈၂၀ကျပ်၊ ပေါင်းသကြား၁ပိဿာလျှင် ၈၈၀-၉၀၀ကျပ်ဖြင့်သာရောင်းဝယ်နိုင်ခဲ့ပြီး၊ ၂၀၂၁ခုနှစ် နိုဝင်ဘာလတွင် ခါသကြား၁ပိဿာလျှင် ၁၇၃၀-၁၇၅၀ကျပ်၊ ပေါင်းသကြား ၁ပိဿာလျှင် ၁၈၅၀-၁၉၀၀ကျပ်ထိ မြင့်တက်လာခဲ့ကြောင်း မန္တလေးမြို့ရှိ သကြားနှင့် သကာရည်ဒိုင်မှ သိရှိရပါသည်။ ထိုကဲသို့ မြင့်တက်ရခြင်းအကြောင်းမှာ ၂၀၂၀ခုနှစ်တွင် ကိုဗစ်-၁၉ ရောဂါ ဖြစ်ပွားမှုကြောင့် သကြားနှင့်သကာရည်တို့ဖြင့် လုပ်ကိုင်ရသော လုပ်ငန်းများ ခေတ္တရပ်နားခဲ့ရခြင်းကြောင့်  ကြံစိုက်တောင်သူများ အရှုံးပေါ်ခဲ့ခြင်းနှင့် ၂၀၂၁ခုနှစ်တွင် ကြံစိုက်တောင်သူများသည် ကြံစိုက်ပျိုးမည့်အစား မြေပဲ၊ နှမ်း စသည့် ဆီထွက်သီးနှံများအား အစားထိုး စိုက်ပျိုးလာခြင်းကြောင့် ယခင်နှစ်များထက် ကြံအထွက်နှုန်းနည်းပါးလာပါသည်။ ကြံထွက်နည်းပါးခြင်းကြောင့် ယခုနှစ်တွင်  ကြံတစ်တန်လျှင် ၆၅၀၀၀ကျပ်ဖြင့် ဝယ်ယူရပြီး၊ အလုပ်သမားခနှင့် သယ်ယူစရိတ်မြင့်တက်လာခြင်းတို့ကြောင့် ယခုနှစ် ဖေဖော်ဝါရီလ ပထမပတ်မှစ၍ ခါသကြား၁ပိဿာလျှင် ၁၇၀၀-၁၇၅၀ကျပ်၊ ပေါင်းသကြား၁ပိဿာလျှင် ၁၉၇၀-၂၀၀၀ကျပ်နှင့် သကာရည်၁ပိဿာလျှင် ၁၄၇၀-၁၄၉၀ကျပ်ထိ မြင့်တက်လာကြောင်း သိရှိရပါသည်။ ယခုနှစ်တွင် မြန်မာနိုင်ငံမှ ကြံထုတ်ကုန်ဖြစ်သော သကြားခွေများကို ထိုင်းနိုင်ငံသို့ စတင်တင်ပို့ရောင်းချနေပြီဖြစ်ကြောင်း လုပ်ငန်းရှင်တစ်ဦးထံမှ သိရှိရပါသည်။ နောက်ပိုင်းတွင် ကြံမှတန်ဖိုးမြှင့်ထုတ်ကုန်များ (Value Added Products) ပိုမိုထုတ်လုပ်လာနိုင်ပြီး ပြည်ပဈေးကွက်တင်ပို့ရန် အလားလာကောင်းများရှိလာသဖြင့် ကြံစိုက်တောင်သူများအနေဖြင့် ယခင်နှစ်ထက်ယခုနှစ်တွင် စိုက်ဧကများပိုမိုတိုးတက်စိုက်ပျိုးကြကြောင်း သက်ဆိုင်ရာဌာနစာရများအရ သိရှိရပါသည်။

စားသုံးသူရေးရာဦးစီးဌာန

မန္တလေးတိုင်းဒေသကြီး

        ၂၀၂၁-၂၀၂၂ ဘဏ္ဍာနှစ်တွင် ပဲခူးခရိုင်၊ သနပ်ပင်မြို့နယ်အတွင်း၌ နွေစပါး စိုက်ဧကများကို လျာထားချက်နှင့်အညီ စိုက်ပျိုးလျက်ရှိ ရာ မနောသုခ  (၁၅၆၄၃)ဧက ၊ ဆင်းသုခ (၁၀၈၁၃)ဧက ၊ ရက် ၉၀ (၂၉၇)ဧက ၊ သီးထပ်ရင် (၂၆၆၉)ဧက ၊ စုစုပေါင်း ၂၉၄၂၂ ဧက စိုက်ပျိုးထားရှိပြီး ဖေဖော်ဝါရီလဆန်းပိုင်းတွင် ရက် ၉၀ သက်ငယ်နွေစပါးများသည် ထောင်မင်းကျေးရွာ၊ ကျိုက်ပနိုင် လေးကျေးရွာ၊ ကျိုက်ပနိုင်ကြီးကျေးရွာ၊ ဖိုးခိုင်လေးကျေးရွာ ၊ ဖိုးခိုင်ကြီးကျေးရွာ ၊ ကျိုက်မဲ ကျေးရွာ များတွင် ထွက်ပေါ်နေပြီဖြစ်ကြောင်း သိရှိရပြီး စပါးအထွက်နှုန်းမှာ တစ်ဧကလျှင် တင်း ၉၀-၁၀၀-၁၁၀ခန့်ထွက်ရှိကြောင်း သိရှိရပါသည်။ အဆိုပါ နွေစပါးရိတ်ခြွေစက်ကျ စပါးအစိုတင်း (၁၀၀)ကို ဆန်စက်များအရောက် (၆၅၀၀၀၀)ကျပ်နှုန်းဖြင့် ဝယ်ယူနေပါကြောင်းနှင့် သယ်ယူပို့ဆောင်ခအနေဖြင့် အနီးအဝေး အလိုက် စပါးတစ်တင်းလျှင် ကျပ် ၂၀၀-၃၀၀-၄၀၀ အထိရှိကြောင်း သိရှိရပြီး စိုက်ပျိုးထားသည့် နွေစပါးမျိုး သက်တမ်းများအလိုက် တစ်ဆက်တည်းပေါ်ပေါက် လာတော့မည် ဖြစ်ကြောင်း သိရှိရပါသည်။

စားသုံးသူရေးရာဦးစီးဌာန(ပဲခူးတိုင်းဒေသကြီး)

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ၊ စားသုံးသူရေးရာဦးစီးဌာန၊ မကွေးတိုင်းဒေသကြီး ၊ မင်းဘူးခရိုင်ဦးစီးမှူးရုံးမှ စလင်းမြိုနယ်တာဝန်ခံ ဦးဆန်းလင်းမောင်နှင့် အဖွဲ့သည် ပြည်တွင်းကုန်သွယ်မှု ကဏ္ဍာဖွံဖြိုးတိုးတက်ရေးနှင့် ပြည်ပပို့ကုန်မြှင့်တင်နိုင်ရေး တိုင်း/ခရိုင်ဦးစီးမှူးတို့၏ လမ်းညွှန်ချက်ဖြင့် (၇.၂.၂၀၂၂)ရက်နေ့ ၊ နံနက်(၁၀:၀၀)နာရီအချိန်တွင် စလင်းမြို့နယ်၊ ဆင်ဖြူကျွန်းမြို့ ၊ ရေကြည်အုပ်စု ၊ ဧရာဝတီမြစ်အတွင်းရှိ ဧက(၄၀၀)ကျော်ရှိသော ကြက်ဟင်းခါးကျွန်းကျေးရွာတွင် ဘက်စုံစိုက်ပျိုးမွေးမြူရေးလုပ်ကိုင်လျက်ရှိသည့် “အောင်ခေတ်စံ” ကုမ္ပဏီ၏ လုပ်ငန်းရှင် ဦးအောင်နိုင်ဦးနှင့် တွေ့ဆုံမေးမြန်းခဲ့ရာ“အောင်ခေတ်စံ” ကုမ္ပဏီတွင် မွေးမြူရေးအနေဖြင့် ဒေသထွက်ခိုင်းနွားများကို မွေးမြူထုတ်လုပ်ကြောင်း၊ အဆိုပါ နွားမွေးမြူရေးခြံမှ မွေးမြူထားသော နွားအမျိုးအစားမှာ ‌ဒေသထွက်ရွှေနီ နိုင်ငံခြားစပ်မျိုးနွားများဖြစ်ပြီး ၂၀၁၈ ခုနှစ်မှစ၍ နွားမအကောင်ရေ (၅၀)ကောင်နှင့် နွားထီးလိုက် (၅)ကောင်ဖြင့် စတင်မွေးမြူခဲ့ပြီး ၂၀၁၅ တွင် (၄၀၀)ကျော်နှင့် ၂၀၁၈ ခုနှစ်တွင် နွားအကောင်ရေ (၇၀၀)ခန့်ထိ တိုးပွားလာခဲ့ကြောင်း၊ ၂၀၁၉ ခုနှစ်တွင် မြန်မာနိုင်ငံမှ ခိုင်းကျွဲ၊ နွားနှင့် သိုး၊ ဆိတ်တို့ကို အရှင်အတိုင်း ပြည်ပနိုင်ငံများသို့ တရားဝင် တင်ပို့ခွင့်ပြုခဲ့ရာ “အောင်ခေတ်စံ” နွားမွေးမြူ‌ရေး ကုမ္ပဏီမှ တရုတ်နိုင်ငံသို့ တစ်ခေါက်လျှင် နွားအကောင်ရေ (၁၀၀)ကောင်ဖြင့် (၃)ခေါက်၊ စုစုပေါင်း နွားကောင်ရေ (၃၀၀)ကောင် တင်ပို့ခဲ့ပြီး တိုင်းအတွင်း တောင်သူများသို့ ခိုင်းနွားမျိုးဖြန့်ဖြူးခြင်း ၊ နွား‌မွေးမြူရေးသမားများအား မွေးဖက်ပေးခြင်း ဆောင်ရွက်ခဲ့ရာ ယခုလက်ရှိခြံအတွင်း (၃၅၀)ကောင်ခန့် ကျန်ရှိကြောင်း သိရှိပါသည်။ ၎င်းမွေးမြူရေးခြံတွင် နွားနေရန်နှင့် အစာသိုလှောင်ရန်အတွက် အဆောက်အဦး (၅)လုံးနှင့် လူနေအဆောက်အဦး (၂)လုံးရှိကြောင်း၊ ၎င်းပိုင်မြေ (၂၁၃)ဧကတွင် နွားစားကျက်(၁၀)ဧကနှင့်  သီးနှံစိုက်ပျိုးခြင်းမပြုမီ လွှတ်ကျောင်းစနစ်ဖြင့် မွေးမြူဆောင်ရွက်လျှက်ရှိပါကြောင်း သိရှိရပါသည်။

          ခြံတွင်း အရွယ်ရောက်နွားမတစ်ကောင်လျှင် (၅)သိန်းမှ (၁၀)သိန်းနှင့် နွားထီးတစ်ကောင်လျှင် (၇)သိန်းမှ(၁၀)သိန်းထိ ရောင်းချရပြီး၊ မျိုးထိန်းနွားသိုး(၁)ကောင်လျှင် (၃၅)သိန်းအထိရှိသည့် စပ်မျိုးနွားထီး(၃)ကောင်ခန့်လည်း မွေးမြူထားကြောင်း၊ (၁)နှစ်လျှင် နွားအကောင်ရေ (၁၅၀-၁၈၀) ကောင် သားပေါက်ပါကြောင်း၊ နွားစာအဖြစ်  နေဗီယာမြက်  ၊ ကောက်ရိုး ၊ ပဲမှော် ၊ ဖွဲ့နုများ ကျွေးမွေးရပြီး နွားကျန်းမားရေးစောင့်ရှောက်မှုကို စလင်းမြို့နယ် ၊ မွေးမြူရေးနှင့်ကုသရေးဦးစီးဌာနမှ လိုအပ်သလို ကျန်းမာရေးစောင့်ရှောက်လျှက်ပေးလျက်ရှိသည့်အပြင် သာမန်ရောဂါများအတွက် ၎င်းကိုယ်တိုင် ဆေးထိုး၊ ဆေးတိုက်ပြုလုပ်ကြောင်း၊ နွားမွေးမြူရေးခြံမှရရှိသော နွားချေးကို စိုက်ပျိုးရေးအတွက် ပြန်လည်အသုံးပြုသဖြင့် သွင်းအားစုကုန်ကျစရိတ် များစွာမရှိကြောင်း သိရှိရပါသည်။

      ကုမ္ပဏီအနေဖြင့် မွေးမြူရေးနှင့်စိုက်ပျိုးရေးကို တွဲဖက်လုပ်ကိုင်လျက်ရှိရာ စိုက်ပျိုးမြေ (၂၁၃)ဧကပေါ်တွင် ယခုလက်ရှိ ဆောင်းသီးနှံများအဖြစ် ကြက်သွန်နီ  (၃၀)ဧက ၊ ကြက်သွန်ဖြူ (၁၀)ဧက ၊ အာလူး(၃၀)ဧက ၊ မတ်ပဲ(၅၀)ဧက ၊ စားတော်ပဲ (၁၅)ဧက ၊ ကုလားပဲ(၄၀)ဧက ၊ ပဲရင်း(၁၀)ဧက ၊ နွားစာအဖြစ် နေဗီယာမြက် (၁၀)ဧကစိုက်ပျိုးထားပြီး နွေနှမ်းနှင့် ပဲတီစိမ်းတို့အား စိုက်ပျိုးရန် စီစဉ်လျှက်ရှိကြောင်း သိရှိပါသည်။

          “အောင်ခေတ်စံ”မွေးမြူရေးနှင့်စိုက်ပျိုးရေးကုမ္ပဏီအနေဖြင့် နွားမွေးမြူရေးကို ကျယ်ကျယ် ပြန့်ပြန့်မွေးမြူသကဲ့သို့ စိုက်ပျိုးရေးတွင်လည်း သီးနှံမျိုးစုံစိုက်ပျိုးထားကြောင်း၊ စိုက်ပျိုးမွေးမြူရေး လုပ်ငန်းများအတွက် နေ့စားလုပ်သား/ အမြဲတမ်းလုပ်သားများ ခန့်ထားဆောင်ရွက်လျက်ရှိရာ ဒေသခံကျား/မ လုပ်သား (၈၀)ဦးအား အလုပ်အကိုင်အခွင့်အလမ်းများ ဖန်တီးပေးလျှက်ရှိသည့်အတွက် ၂၀၂၁ ခုနှစ်တွင် တိုင်းဒေသကြီးအစိုးရအဖွဲ့မှ ချီးမြှင့်သည့်  “မွေးမြူရေးဂုဏ်ထူးဆောင် ဆုတံဆိပ်”ကိုလည်း ရရှိခဲ့ကြောင်း သိရှိရပါသည်။ သို့ဖြစ်၍ တိုင်းဒေသကြီးအတွင်း စိုက်ပျိုးမွေးမြူရေးလုပ်ငန်းဖြင့် ဒေသတွင်း အလုပ်အကိုင်အခွင့်အလမ်းများ ဖန်တီးပေးကာ ပြည်ပသို့ သွားရောက်လုပ်ကိုင်မည့် လူ့စွမ်းအားအရင်းအမြစ်များ ပြုန်းတီးခြင်းမှ ကာကွယ်ရာရောက်မည်ဖြစ်ပါကြောင်း ဗဟုသုတတိုးပွားရေးအတွက် ရေးသားဖော်ပြအပ်ပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး

           စားသုံးသူရေးရာဦးစီးဌာန၊ မကွေးခရိုင်ဦးစီးမှူး ဦးမျိုးဝင်းဦးဆောင်သော ချောက်မြို့နယ် တာဝန်ခံနှင့် အဖွဲ့သည် (၆.၂.၂၀၂၂) နေ့ (၁၀:၃၀) နာရီတွင် ချောက်မြို့နယ် ဂွေးပင်ကျေးရွာရှိ ဆီးသီးအစို/အခြောက် အဝယ်ဒိုင်သို့ သွားရောက်တွေ့ဆုံကွင်းဆင်း၍ ဆီးသီးအစို/ အခြောက် ဝယ်ယူရရှိမှု၊ ပြန်လည်ရောင်းချမှုနှင့် ပြည်ပသို့ ဆီးဆံများတင်ပို့မှုအခြေအနေများအား ကိုဗစ်-၁၉ စည်းကမ်းချက်များနှင့်အညီ ကွင်းဆင်းဆောင်ရွက်ခဲ့ပါရာ ဆီးသီးအစို/အခြောက်အဝယ်ဒိုင်လုပ်ငန်းရှင်ဖြစ်သော ဦးဘိုဌေးအောင်၏ ပြောကြားမှုအရ ချောက်မြို့နယ်၊ ဂွေးပင်ကျေးရွာ၌ ဆီးသီးအဝယ်ဒိုင်(၈)ဦးခန့်ရှိပြီး ဆီးခွဲစက်(၂၅)လုံးခန့်ရှိကြောင်း၊ ၎င်း၏အဝယ်ဒိုင်တွင် လုပ်သား ကျား/မ(၇)ဦးရှိပြီး တရက်လျှင် အမျိုးသား(၁)ဦး(၅၀၀၀)နှုန်းနှင့် အမျိုးသမီး(၁)ဦးလျှင် (၄၀၀၀) နှုန်း ပေးချေရကြောင်း၊ ဆီးသီးအစို/ အခြောက်များကို ဇန်နဝါရီလမှစတင်၍ မေလအထိ ဝယ်ယူပြီး ဆီးသီးအစိုများကို (၁၂)ရက်ခန့်‌ နေလှမ်းရပါကြောင်း၊ ဂွေးပင်ကျေးရွာပတ်ဝန်းကျင်ရှိ သံဘို၊ ကိုးဆူ၊ သစ်ခြောက်ပင်၊ လေးပင်ကုန်း၊ လင်းတကိုင်း၊ သရက်ပင်၊ ညောင်ဇင်၊ ရွာမအစရှိသည့်ကျေးရွာများမှ  လယ်ယာခြံစည်းရိုး နယ်နိမိတ်အဖြစ်စိုက်ပျိုးထားသည့် ဆီးပင်များမှ  တောင်သူများအတွက် နှစ်စဉ်ဝင်ငွေရရှိနေကြောင်း၊ ယခင်နှစ်ကဆီးသီးအခြောက်(၂၀)ပြည် (၁)တင်းကို (၂၀၀ဝိ/-)ခန့် ၊ ဆီးသီးအစို (၂၀)ပြည် (၁)တင်းကို (၁၅၀ဝိ/-)နှုန်းဖြင့်သာ ဝယ်ယူရသော်လည်း  ယခုနှစ်တွင် ဆီးသီးအခြောက် (၂၀)ပြည် (၁)တင်းကို (၄၅၀ဝိ/-)၊ ဆီးသီးအစို(၂၀)ပြည်(၁)တင်းကို (၃၇၀ဝိ/-)နှုန်း ပေး၍ဝယ်ရပါကြောင်း၊ ဆီးသီးအစိုများကို ဝယ်ယူပြီး (၁၂)ရက်ခန့်နေလှမ်းမှသာ ဆီးသီးအ‌ခြောက်ရရှိပါကြောင်း၊ ဆီးသီးအခြောက်များကို ဆီးဖျော်ရည်ပြုလုပ်ရန် ပခုက္ကူမြို့၊ OK-1 ဆီးဖျော်ရည်စက်ရုံသို့ ရောင်းချရပြီး ရန်ကုန်ဆီးယိုလုပ်ငန်းသို့လည်း တင်ပို့ရပါကြောင်း၊ ဆီးသီးအစိုပြည်(၂၀)ကို နေလှမ်းပြီးပါက ဆီးသီးအခြောက် (၁၆)ပြည်သာ ပြန်လည်ရရှိပါကြောင်း၊ ဆီးဖျော်ရည်နှင့် ဆီးသီးယိုပြုလုပ်ရန် သန့်စင်ပြီး(ရှယ်) ဆီးသီး‌ခြောက် (၂၀)ပိဿာ တစ်အိတ်ကို (၁၃၀၀ဝိ/-)နှုန်း ပြန်လည်ရောင်းချရ ကြောင်း ၊  ဆီးသီးအချော (၁)တင်းကို ကြိတ်ခွဲပါက ဆီးဆံ(၂၀)သားခန့် ရရှိ၍ ဆီးခွဲခြမ်းကို ပဲကြော်၊ ပဲလှော်လုပ်ငန်းများသို့ တစ်တင်းလျှင် (၂၅ဝိ/- ၃၀ဝိ/-) ရောင်းချရကြောင်း၊ ဆီးဆံ(၁)ပိဿာကို (၂၂၅၀ဝိ/-)ခန့်ဖြင့် မန္တလေးသို့ တင်ပို့ရောင်းချကြောင်း၊ ၎င်းအနေဖြင့် နှစ်စဉ် ဆီးသီးအစို/ အခြောက်တင်း(၁၅၀၀၀)ခန့် ဝယ်ယူရရှိပြီး ဆီးဆံပိဿာ(၃၀၀၀) ခန့် ထုတ်လုပ်တင်ပို့နိုင်ကြောင်း၊ ယခုနှစ်တွင် အောက်တိုဘာလတွင် မိုးရွာသွန်းမှုများပြားသည့်အတွက် အပွင့်များကြွေကျသဖြင့် ဆီးသီးအထွက်နှုန်း နည်းသော်လည်း ဆီးသီးရောင်းစျေးမှာ ယခင်နှစ်ကထက် နှစ်ဆခန့်ရရှိသဖြင့် တောင်သူအပိုဝင်ငွေေတိုးလျှက်ရှိကြောင်း လေ့လာသိရှိရပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး

          ပဲခူးတိုင်းဒေသကြီး၊ ပဲခူးခရိုင်၊ သနပ်ပင်မြို့နယ်အတွင်းရှိ ကျေးလက်ဒေသများမှ ထွက်ရှိသော ဧည့်မထစပါးအမျိုးအစားများကို ရွှေဝါရောင် ကုမ္ပဏီမှ ဖိလစ်ပိုင်နိုင်ငံသို့ NIMBA အမှတ်တံဆိပ်ဖြင့် တင်ပို့ရန် သီးသန့်ဝယ်ယူ၍ သိုလှောင်လျက်ရှိကြောင်း သိရှိရပြီး စပါးများကို သနပ်ပင်မြို့ရှိ ချမ်းအေးဆန်စက် ၊ ရွှေနဒီဆန်စက်တို့မှ အရောင်းအဝယ်စာချုပ်များ ချုပ်ဆို၍ ကြိတ်ခွဲတင်ပို့လျက် ရှိကြောင်း သိရှိရပါသည်။ ၂၀၂၁ခုနှစ် နိုဝင်ဘာလမှစတင်၍ ၂၀၂၂ခုနှစ် ဇန်နဝါရီလအတွင်း ဖိလစ်ပိုင်နိုင်ငံသို့တင်ပို့ရန်အတွက် ဧည့်မထ ၅ % စူပါ (၅)ဆန် 25 kg အိတ် (၆၀၀၀၀)အိတ်အား  တစ်အိတ်လျှင် (၁၃၁၅၀) ကျပ်နှုန်းဖြင့် ရန်ကုန်မြို့ တောင်ဒဂုံ ၊ ရွှေလင်ပန်း ၊ ဘုရင့်နောင်ပွဲရုံများသို့ တင်ပို့ခဲ့ကြောင်း သိရှိရပါသည်။ ၂၀၂၂ခုနှစ် ဖေဖော်ဝါရီလအတွင်း ကုန်ကြမ်းအနေဖြင့်လည်း ဧည့်မထ ၂၅မှတ် ၊ ဆန်50 kg အိတ် (၂၀၀၀)အား ရန်ကုန်မြို့ရှိ သတ်မှတ်ထားသည့် နေရာသို့ အရောက် တစ်အိတ်လျှင် (၂၄၀၀၀)ကျပ်နှုန်းဖြင့် ပေးပို့ရန် စာချုပ်ချုပ်ဆိုထားကြောင်း သိရှိရပါသည်။ ယခုကဲ့သို့ နိုင်ငံခြားသို့ မြန်မာ့ဆန်များ ကုန်ချောအနေဖြင့်သာမက ကုန်ကြမ်းအနေဖြင့်လည်း တင်ပို့မှု အောင်မြင်လာသည်နှင့်အမျှ စပါးစိုက်တောင်သူများအနေဖြင့် ဝင်ငွေအခွင့်အလမ်းတိုးလာခြင်း၊ စက်ပိုင်များအနေဖြင့် ယခုနှစ်တွင် ကုမ္ပဏီမှ Export တင်ပို့မည့်အမှတ်တံဆိပ်များဖြင့် တိုက်ရိုက်ထည့်သွင်းသည့်အတွက် အိတ်လှယ်ခ ၊ အိတ်သွန်ခများ သက်သာလာကြောင်း သိရှိရပါသည်။

စားသုံးသူရေးရာဦးစီးဌာန(ပဲခူးတိုင်းဒေသကြီး)