ပြည်တွင်းကုန်သွယ်မှုသတင်း

             ယခုတစ်ပတ် ပြည်ပဲဈေးကွက်အတွင်း ပြည်ပဝယ်လက်ပဲများထဲတွင် ပဲတီစိမ်းနှင့် ပဲစင်းငုံသီးနှံ ပဲသစ်ဝင်ရောက်မှု လျော့နည်းပြီး အရောင်းအဝယ်ဖြစ်မှုမှာလည်း အေးလျက်ရှိခဲ့ရာ ပြည်တွင်းဝယ်လက် ပဲသီးနှံ များမှာဖြင့် ပုံမှန်ဝင်ရောက်နေပြီး အရောင်းအဝယ်မှာလည်း သွက်နေသည်ကိုတွေ့ရှိရပါသည်။ ကုလားပဲနှင့် ပဲကြီးသီးနှံများမှာ ပြည်ဈေးကွက်သို့ တစ်ရက်လျှင်အိတ်၁၀၀/၂၀၀ကျော်ဝင်ရောက်ခဲ့ပြီး ဝယ်လိုအားအနေဖြင့် ဒေသတွင်းပဲခွဲစက်သမားများနှင့် ပဲကြော်ဖိုလုပ်ငန်းသမားများ အဓိကဝယ်ယူနေကြသည့်အတွက် အဝယ်ရှိသလောက်ရောင်းချမှုများလည်းရှိသလို ရန်ကုန်လိုင်းသမားများလည်း ပုံမှန်ဝယ်ယူနေကြသည်ဟု သိရှိရပါသည်။

         ကုလားပဲသီးနှံဈေးမှာ တစ်တင်း ၄၃၀၀၀ ကျပ်မှ ၄၅၅၀၀ ကျပ်ဖြင့် အရောင်းအဝယ်ဖြစ်ခဲ့ပြီး ယခင်နှစ် ကာလပေါက်ဈေးထက် ဈေးပိုရခဲ့ပြီး ပဲကြီးသီးနှံမှာ ယခုနှစ် ဈေးသိသိသာသာ ဈေးကောင်းရရှိခဲ့သောကြောင့် ပဲတစ်တင်းကျပ် ၆သောင်းနီးပါး ရရှိခဲ့ပါသည်။ ရွှေကျွန်းတစ်တင်း ၆၂၀၀၀ကျပ်၊ ကမ်းနားတစ်တင်း ၅၉၀၀၀ ကျပ်တို့ဖြင့် အသီးသီး ရောင်းဝယ်ခဲ့ကြပြီး ထောပတ်နှင့် ပဲနီပြားသီးနှံများမှာ ယခုနှစ် ဈေးကောင်းရလျက်ရှိကာ ထောပတ်ပဲတစ်တင်း ၄၃၀၀၀ ကျပ်၊ ပဲနီပြားတစ်တင်း ၅၀၀၀၀ ကျပ်တို့ဖြင့် လက်လီသမားများ နေ့စဉ်ပုံမှန်အဝယ်ရှိပြီး လက်ကားသမားများမှာလည်း အဝယ်ရှိခဲ့၍ တစ်ရက်အိတ် ၅၀ ကျော်ရောင်းဝယ်မှု ဖြစ်လျက်ရှိကြောင်း သိရှိရပါသည်။

           ထောပတ်သီးနှံများ ပဲအဝင်နည်း၍ အရောင်းအဝယ်ဖြစ်မှုအနေဖြင့် လက်လီသမားများသာ အမြဲဝယ်ယူမှုရှိ၍ တစ်ရက်အိတ် ၂၀ ကျော် ပုံမှန်ရောင်းဝယ်မှုဖြစ်ခဲ့ပြီး ပဲဈေးနှုန်းများမှာ တစ်တင်းကျပ် ၈၆၀၀၀ဖြင့် ပဲဈေးကွက်အတွင်း ဈေးအမြင့်ဆုံးရရှိခဲ့သာ သီးနှံဖြစ်ခဲ့ပြီး နှစ်စဉ်ဈေးကောင်းရရှိခဲ့သော သီးနှံအမျိုးအစားထဲတွင် ပါဝင်နေခဲ့ပါသည်။

           ပဲသီးနှံဈေးကွက်ထဲတွင် ပဲသီးနှံအားလုံးလိုလို ယခုနှစ်တွင် ဈေးကောင်းရရှိခဲ့ပြီး ပြည်ပဝယ်လက်ပဲများ သိသိသာသာ ဈေးကောင်းရရှိခဲ့၍ ပြည်တွင်းဝယ်လက်ပဲများလည်း ဈေးကောင်းရရှိသောနှစ်ဖြစ်ကြောင်း သိရှိရပါသည်။

DOCA(ပဲခူး)

           ပဲခူးတိုင်းဒေသကြီး၊  စားသုံးသူရေးရာဦးစီးဌာန၊ ပြည်ခရိုင်သည် စားသုံးသူကာကွယ်ရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးတိုးတက်စေရန်နှင့် ပုဂ္ဂလိကကဏ္ဍဖွံ့ဖြိုးတိုးတက်‌စေရေးလုပ်ငန်းများကိုပါ ဆောင်ရွက်လျှက်ရှိရာ ကဏ္ဍအလိုက်အသင်းအဖွဲ့၊ အစုအဖွဲ့၊ ဇုန်၊  ကုန်စည်ဒိုင်များဖွဲ့စည်း၍ အသင်းအဖွဲ့များ၊ အစုအဖွဲ့များ၊ဇုန်များ၊ ကုန်စည်ဒိုင်များအား ကုန်သွယ်မှုဆိုင်ရာ သတင်းအချက်အလက်များဖြန့်ဖြူးပေးခြင်း၊ သက်ဆိုင်ရာဌာနများ၏ လုပ်ငန်းဆောင်ရွက်မှုများကို သိရှိစေခြင်း၊ ကုန်သွယ်မှုဆိုင်ရာ အခက်အခဲများနှင့် လိုအပ်ချက်များ ဖြည့်ဆည်းဆောင်ရွက်ပေးခြင်းဖြင့် ပုဂ္ဂလိကဏ္ဍဖွံ့ဖြိုးတိုးတက်ရေးနှင့် ကုန်သွယ်မှုဆိုင်ရာ ဖွံ့ဖြိုးတိုးတက်ရေးအတွက် ပူးပေါင်းချိတ်ဆက်ဆောင်ရွက်လျက် ရှိပါသည်။

            နိုင်ငံတော်အနေဖြင့် ဆီထွက်သီးနှံကဏ္ဍဖွံ့ဖြိုးတိုးတတ်စေရန် စီစဉ်ဆောင်ရွက်လျှက်ရှိသဖြင့် ပဲခူးတိုင်းဒေသကြီးမှ ၂၀၂၂-၂၀၂၃ခုနှစ်၊ နေကြာသီးနှံတိုးချဲ့စိုက်ပျိုးနိုင်ရေး အထွေထွေအုပ်ချုပ်ရေးဦးစီးဌာနနှင့် စိုက်ပျိုးရေးဦးစီးဌာနတို့ပူးပေါင်း၍ နေကြာသီးနှံမိုး၊ဆောင်း(၈၅၈၁၇)ဧကစိုက်ပျိုးရန် လျှာထားဆောင်ရွက်လျက်ရှိပြီး ပြည်ခရိုင်အနေဖြင့် ၂၀၂၁-၂၀၂၂ခုနှစ်၊ ဆောင်းနေကြာစိုက်ဧကမှာ (၄၅၉)ဧကစိုက်ပျိုးနိုင်ခဲ့ပါသည်။ ပြည်ခရိုင်ဦးစီးမှူးရုံးအနေဖြင့် ၂၀၂၂-၂၀၂၃ခုနှစ်၊ နေကြာသီးနှံစိုက်ပျိုးဧက ပေါ်မူတည်၍ နေကြာစိုက်တောင်သူအစုအဖွဲ့များအား စိုက်ပျိုးရေးဦးစီးဌာနနှင့် ညှိနှိုင်းပူးပေါင်း၍ ဖွဲ့စည်းဆောင်ရွက်သွားမည်ဖြစ်ကြောင်း သိရှိရပါသည်။

DOCA(ပဲခူး)

             ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်ဦးစီးမှူး ဦးဇော်မင်း၊ ဒု-ခရိုင်ဦးစီးမှူး ဦးအောင်ဇော်ဦးနှင့် ဝန်ထမ်းများသည် ဓနုဖြူမြို့နယ်၏ မြို့နယ်တာဝန်ခံ ဦးဝင်းမင်းစိုးလိုက်ပါ၍ ဓနုဖြူမြို့နယ်၏ ဆန်၊ စပါးကဏ္ဍ ဖွံ့ဖြိုးတိုးတက်ရေးအတွက် (၂၅.၄.၂၀၂၂) နေ့တွင် ကွင်းဆင်းဆောင်ရွက်ခဲ့ပါသည်။

            အဆိုပါ ကွင်းဆင်းဆောင်ရွက်မှုတွင် ဓနုဖြူမြို့နယ်သည် ကျေးရွာအုပ်စု (၆၃) အုပ်စုရှိပြီး၊ မိုးစပါး၊ နွေစပါးများ စိုက်ပျိုးထုတ်လုပ်လျှက် ရှိပါသည်။ များသောအားဖြင့် မနောသုခ၊ ဆင်းသုခ၊ GW11 ၊ ရက် ၉၀၊ ထွန်းပု၊ ပခန်း စပါးများ စိုက်ပျိုးပြီး Gold Delta ကုမ္ပဏီမှ လယ်ယာကဏ္ဍ ဖွံ့ဖြိုးတိုးတက်ရေးအတွက် သွင်းအားစုပံပိုးခြင်း၊ နည်းပညာပံပိုးခြင်း၊ အရည်အသွေးမြှင့်ထုတ်လုပ်သောစပါးများကို ဈေးကောင်းပေးဝယ်ယူ၍ ခေတ်မှီစက်ကရိယာများဖြင့် ကြိတ်ခွဲထုတ်လုပ်ပြီး၊ ပြည်ပတင်ပို့လျှက်ရှိကြောင်း ကုမ္ပဏီတာဝန်ရှိသူတစ်ဦး၏ ပြောကြားချက်အရ သိရှိရပါသည်။

            ဆက်လက်၍ ဆန်စက်များသို့ ကွင်းဆင်းရာတွင် မိဘဂုဏ်ရည်ဆန်စက်ပိုင်ရှင် ဦးမျိုးဆက်နှင့် တွေ့ဆုံဆွေးနွေးရာ မိမိစက်သို့ နေ့စဉ် စပါးတင်း (၅၀၀၀) ခန့် ဝယ်ယူရရှိကြောင်း၊ ယနေ့ စပါးပေါက်ဈေးမှာ စပါးတင် (၁၀၀) လျှင် (၇၅၀၀၀၀) (ခုနှစ်သိန်း ငါးသောင်း ကျပ်ဖြင့် အရောင်းအဝယ်တွင် ကျယ်နေကြောင်းနှင့် မိမိဆန်စက်မှာ ခေတ်မှီဆန်စက်အဖြစ် တိုးမြှင့်ပြီး၊ ရန်ကုန်သို့ နေ့စဉ်ဆန်အလတ်စ တန်(၄၀) ခန့် နေ့စဉ် တင်ပို့လျှက်ရှိပါကြောင်း၊ ရန်ကုန် ကုမ္ပဏီဈေးကွက်၊ ဘုရင့်နောင် ဈေးကွက်မှသည် ပြည်ပဈေးကွက်ဆီသို့ ကုမ္ပဏီမှ တဆင့် ဈေးကွက် ရရှိနေကြောင်း ဆွေးနွေးတင်ပြပါသည်။

            မအူပင်ခရိုင်ဦးစီးမှူး ဦးဇော်မင်းက လယ်သမားများ မျိုးကောင်း၊ မျိုးသန့်စပါးများရရှိနိုင်ရေး စပါးများဝယ်ယူမှု၊ သယ်ယူမှုအဆင်ပြေစေရေး၊ ဈေးကွက်ရရှိမှုကို ထိမ်းသိမ်းရန် ပြည်ပဈေးကွက် တိုးတက်လာစေရန် ဌာနမှချိတ်ဆက်ပေးနိုင်မည့် အခြေအနေများကို အပြန်အလှန် ဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)

             သင်္ကြန်အခါကာလပြီးချိန်တွင် ဝယ်လက်ဝယ်ယူမှု နည်းပါးသွားသောကြောင့် ပြည်‌ဈေးကွက်တွင် မြေပဲဆံများအနည်းငယ်ကျဆင်းလာသည်ဟု သိရှိရပြီး မြေပဲဆံများကို ကံမ ၊ မင်းတုန်းနှင့် ရခိုင်ပြည်နယ်  တောင်ကုတ်မြို့မှ တနေ့လျှင်မြေပဲဆံအိတ် (၈၀၀/၉၀၀) ခန့်ဝင်‌ရောက်မှုရှိကြောင်း သိရှိရပါသည်။ ဝင်ရောက်လာသောမြေပဲဆံများထဲမှ ဆီဆံကိုရွေးပြီး ‌ရွေးဆံအဖြစ် မြို့တွင်းဆီစက်များက အဝယ်ရှိ၍ လုံးဆံ  (အနီ) ကိုပဲကြော်ဖိုသမားများက အဝယ်ရှိပါသည်။ လုံးဆံ (အဖြူ) ကို မြဝတီဘက်သို့ တင်ပို့ရန် ဝယ်လက်များ အဝယ်ရှိသော်လည်း ဝယ်လိုအားနည်းပြီး ဝင်ရောက်မှုများနေသဖြင့် ဈေးပြန်ကျလာသည်ဟု သိရှိရပါသည်။ယခုအပတ်တွင် မြေပဲဆံဈေးများမှာ ဆီဆံ  (အဖြူ) တစ်ပိဿာလျှင် ၃၄၀၀ ကျပ်၊ ဆီဆံ (အနီ) တစ်ပိဿာလျှင် ၃၂၀၀ ကျပ်နှင့် လုံးဆံ(အဖြူ) တစ်ပိဿာလျှင် ၃၇၀၀ကျပ် ၊ လုံးဆံ (အနီ) တစ်ပိဿာလျှင် ၃၆၀၀ကျပ်ဖြင့် ပြည်စျေးကွက်တွင် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(ပဲခူး)

       သင်္ကြန်ပြီးစအချိန်ဖြစ်၍ ပြည်စျေးကွက်သို့ နှမ်းသီးနှံများ ဝင်ရောက်မှုမရှိဘဲ လက်ကျန်လှောင်နှမ်းများဖြင့်သာ အရောင်းအဝယ်ဖြစ်လျှက်ရှိပါသည်။ နှမ်းနီကို မြို့တွင်း ဆီစက်များက အဝယ်ရှိပြီး နှမ်းနက်နှင့် စမုံနက် နှမ်းကို မန္တလေးဝယ်လက်များက အဝယ်ရှိသည့်အတွက် ပုံမှန်အရောင်းအဝယ်ဖြစ်လျက်ရှိပါသည်။ နှမ်းသီးနှံမှာ အရောင်းအဝယ်ပုံမှန် ဖြစ်လျက်ရှိသလို စျေးနှုန်းမှာလည်း သင်္ကြန်မတိုင်မီ စျေးအတိုင်း ငြိမ်နေသည်ဟု သိရပါသည်။ နှမ်းစျေးများမှာ ယခင်စျေးအတိုင်း နှမ်းနီ (၃)တင်း တစ်အိတ်လျှင် ၁၅၀၀၀၀ ကျပ် ၊ နှမ်းနက် (၃)တင်း တစ်အိတ်လျှင် ၁၈၀၀၀၀ကျပ်နှင့် စမုံနက်နှမ်း (၃)တင်း တစ်အိတ်လျှင် ၂၀၀၀၀၀ ကျပ်စျေးဖြင့် တစ်နေ့လျှင် အိတ် ၃၀၀/၄၀၀ ခန့် အရောင်းအဝယ်ဖြစ်ကြောင်း သိရှိရပါသည်။

           နှမ်းသီးနှံနည်းတူ အာလူးသည်လည်း စျေးငြိမ်လျက်ရှိပါသည် ။ ရှမ်းပြည်နယ်အောင်ပန်းမှ ရှမ်းအာလူးနှင့် မန္တလေးမှ တရုတ်အာလူးများ ပြည်စျေးကွက်သို့ ရက်ခြားအဝင်ရှိပြီး တစ်ပတ်လျှင် အိတ် ၁၅၀မှ ၃၀၀ အတွင်း အဝင်ရှိသည့်အတွက် အရောင်းအဝယ်ဖြစ်မှုမှာ သင်္ကြန်မတိုင်ခင်ကာလများက အလှူများရှိ၍  အရောင်းသွက်ခဲ့ပြီး ယခုရက်ပိုင်းတွင် ဒေသတွင်းလုပ်ငန်းရှင်များနှင့်  လက်လီသမားများ အဝယ်ရှိသည့်အတွက် အရောင်းအဝယ်ပုံမှန် ဖြစ်လျက်ရှိပါသည်။ စျေးကွက်အတွင်း ပစ္စည်းပြတ်လပ်မှုမရှိခြင်းကြောင့် ရှမ်းအာလူးစျေးနှုန်းမှာ ယခုအပတ် လက်ကားစျေး တစ်ပိဿာလျှင် ကျပ် ၁၅၀၀-၁၈၀၀ ၊ လက်လီစျေး ကျပ် ၂၂၀၀-၂၄၀၀ စျေးဖြစ်ပြီး တရုတ်အာလူးမှာ တစ်ပိဿာလျှင် လက်ကားစျေး ကျပ် ၁၈၀၀ ၊ လက်လီစျေး ကျပ် ၂၀၀၀ဖြစ်၍ စျေးငြိမ်လျက်ရှိကြောင်း သိရှိရပါသည်။

DOCA(ပဲခူး)