ပြည်တွင်းကုန်သွယ်မှုသတင်း

    ပဲခူးတိုင်းဒေသကြီး၊ ကျောက်တံခါးမြို့နယ်၊  ဇီးကုန်းကျေးရွာတွင် ခြင်း၊ တောင်း၊ စကောနှင့် စကာများရက်လုပ်လျက်ရှိပါသည်။ ရွာနေပြည်သူများသည် ခြင်း၊ တောင်း၊ စကောနှင့်စကာများကိုရက်လုပ်ပြီး အသက်ဝမ်းကြောင်းပြုနေသော ရွာတစ်ရွာလည်းဖြစ်ပါသည်။ ထိုအရာများကိုယက်လုပ်ရာတွင် ဝါးကို ကုန်ကြမ်းအဖြစ်အသုံးပြုကြပါသည်။

     ကြက်သောင်းဝါး၊ တင်းဝါးနှင့်ဝါးလတ်ဟူသော ဝါးသုံးမျိုးဖြင့်ရက်လုပ်ရပါသည်။ ထိုးဝါးများကို မြို့ချောင်းမှ ကျောက်တံခါးမြို့နယ်ရှိ ဝါးဆိုင်များသို့တင်သွင်းပြီး ထိုမှတစ်ဆင့် ဝယ်ယူရပါသည်။ ခြင်းကိုပြုလုပ်ရာတွင် ကြက်သောင်းဝါးနှင့် ဝါးလတ်တို့ဖြင့်ရက်လုပ်ရပါသည်။ခြင်းကိုရက်လုပ်ရာတွင် ဝါးကိုနှီးဖြစ်အောင်ဖျာပြီး အစိုရက်၍ အပြားသေးအောင်လုပ်ပြီး တဇောင်းထိုးရပါသည်။ ဝါးအကြီး ၅လုံးလျှင် ခြင်းအလုံး ၂၀လုံးထွက်ပါသည်။

     တောင်းကိုရက်လုပ်ရာတွင် ဝါးကိုနှီးအတည့်ဖျာပြီး နေလှန်း၍ခြောက်လျှင် ရက်လုပ်၍ရပါသည်။ ဝါးအကြီး ၅လုံးလျှင် တောင်းဝိုင်းအလုံး ၂၀လုံးထွက်ပါသည်။ စကောရက်လုပ်ရာတွင် ဝါးကိုနှီးဖြစ်အောင်ဖျာပြီး နေလှန်း၍ ခြောက်လျှင် ရက်လုပ်ရပြီး ဝါးအကြီး ၂လုံးလျှင် စကော ၁၅ချပ်ရပါသည်။ ဇကာကိုရက်လုပ်ရာတွင် ဝါးကိုနှီးဖြစ်အောင်ဖျာပြီး အစိုရက်၍ ဝါးကြီး ၂လုံးလျှင် ဇကာ ၁၅ချပ်ရပါသည်။ တစ်ရက်လျှင် ခြင်း ၁၀လုံး၊ တောင်း ၁၀လုံး၊ စကော ၁၀ချပ်နှင့် စကာ ၂၀ချပ်တို့ကိုရက်လုပ်နိုင်ပါသည်။

     ရောင်းချရာတွင် ခြင်းနှင့်တောင်းတို့ကို အရွယ်အစားအလိုက် (၁) လုံးလျှင် ၁၆၀၀ကျပ်မှ ၂၅၀၀ကျပ်အထိရောင်းချနေပြီး စကော (၁) ချပ်လျှင် ၁၂၀၀ကျပ်ဖြင့်ရောင်းချလျက်ရှိပါသည်။ ရွာမှထွက်သော ခြင်း၊ တောင်း၊ စကောနှင့် စကာတို့ကို ဒေသအတွင်းကျေးရွာမှ မှာယူပြီး ကျောက်တံခါးမြို့နယ်အတွင်း နီးစပ်ရာဒေသများ၊  ဖြူးမြို့နယ်နှင့် ညောင်းလေးပင်မြို့နယ်များတွင်လည်းရောင်းချလျက်ရှိပါသည်။ ခြင်း၊ တောင်း၊  စကောနှင့်စကာများမှာ လက်ရာများသေသပ်ပြီး နှုတ်ခမ်းသားများမှာလည်း ဝါးကိုပါးပါးလေးခွဲ၍ ကွပ်ထားသည့်အတွက် သုံးလေးနှစ်အသုံးခံ၍ ဝယ်ယူသူများမှာ အထူးနှစ်သက်ကြကြောင်းသိရှိရပါသည်။

DOCA(ပဲခူး)

     ပဲခူးတိုင်းဒေသကြီး၊  နတ်တလင်းခရိုင်၊ သဲကုန်းမြို့နယ်၊ ပုတီးကုန်းနယ်မြေပတ်ဝန်းကျင်ရှိ ဒေသများတွင် မိုးဦးကာလ၌ စိုက်ပျိုးကြသောရွှေဖရုံသီးများလှိုင်လှိုင်ထွက်ရှိနေပါသည်။ ပုတီးကုန်းနယ်မြေအတွင်း ကျေးရွာအုပ်စု (၆) အုပ်စု၊ ကျေးရွာပေါင်း (၂၀) တို့၏ အားထားစိုက်ပျိုးသောသီးနှံဖြစ်ပါသည်။ ရာသီချိန်သီးနှံဖြစ်သောကြောင့် ဒေသတွင်းစားသုံးမှုသာမက အခြားဒေသများသို့လည်းတင်ပို့ရောင်းချလျက်ရှိရာ ရွှေဖရုံသီးအကြီးတစ်လုံးလျှင် (၃၅၀၀) ကျပ်၊ အလတ်တစ်လုံးလျှင် (၂၇၀၀) ကျပ်၊ အသေးတစ်လုံးလျှင် (၁၃၀၀) ကျပ် ဈေးနှုန်းတို့ဖြင့်ရောင်းချလျက်ရှိပါသည်။

     ရွှေဖရုံသီးများအား စံတော်ဦးကားများဖြင့် နေ့စဉ် ဒညင်းကုန်းဈေးနှင့် သီရိမင်္ဂလာဈေးများသို့ သယ်ယူပို့ဆောင်ကာ အရောင်းအဝယ်ဖြစ်နေကြကြောင်းနှင့် ရွှေဖရုံစိုက်ပျိုးသောတောင်သူများနှင့် ကုန်စိမ်းဒိုင်များမှာ အကျိုးအမြတ်များရရှိကြောင်းသိရှိရပါသည်။

DOCA(ပဲခူး)

(၇-၈-၂၀၂၃) ရက်နေ့တွင် တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်းနှင့် ပဲစဉ်းငုံ တစ်တန်ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ပြုစုထားမှုကို လေ့လာရှုနိုင်ပါသည် -

     မကွေးတိုင်းဒေသကြီး၊ အောင်လံမြို့ဈေးကွက်အတွင်းသို့ ၂၀၂၃ခုနှစ် ဇူလိုင်လ(ဒုတိယပတ်)တွင် မိုးပဲတီစိမ်းအသစ်များ စတင်ဝင်ရောက်လာကာ (၂၀)ပိဿာ (၁)တင်းလျှင် ကျပ်(၅၃၅၀၀မှ ၅၅၀၀၀)ဖြင့် ဈေးကွက် စတင်ဖွင့်လှစ်ပြီး တရုတ်မှ အဝယ်သွက်လျက်ရှိသည့်အတွက်  မန္တလေးဈေးကွက်မှ အမြင့်ဈေးပေး၍ ဝယ်ယူမှုရှိကြောင်း သိရှိရပါသည်။

      ရန်ကုန်၊ မန္တလေးဝယ်လက်များမှ (တတိယပတ်)အတွင်း ပစ္စည်းအရည်အသွေး ကောင်း၊ သင့်၊ ညံ့အပေါ်မူတည်၍ ဝယ်ယူခဲ့ကြရာ ကျပ်(၅၅၀၀၀မှ ၅၇၀၀၀-၅၉၀၀၀-၆၂၅၀၀)ထိ တရိပ်ရိပ် တက်လာပြီး ဝယ်လက်များမှ ဝယ်ယူခဲ့ကြပါသည်။ နေ့စဉ်ပျမ်းမျှ(၁)တင်းခွဲအိတ် အိတ်ရေ(၁၀၀၀)ခန့် မှ (၃၀၀၀)ခန့် အထိ အရောင်းအဝယ်ဖြစ်ခဲ့ပါသည်။ ဇူလိုင်လ (၂၆/၂၇)ရက်နေ့တို့တွင် ဈေးပြန်လည် အေးကာ ကျပ်(၆၂၅၀၀မှ ၆၀၀၀၀)အထိ ဝယ်လက်များမှဈေးချ၍ ဝယ်ယူကြသော်လည်း အရောင်း ပွဲစား/ တောင်သူများမှကျဈေးအပေါ် ငွေလိုအပ်သလောက်သာရောင်းချ၍ ဈေးကွက်ပြန်လည် ဦးမော့လာမည့်အချိန်ထိ စောင့်ဆိုင်းရောင်းချနေကြကြောင်းသိရှိရပါသည်။ ယခုနှစ်တွင် မိုးရွာသွန်းမှု လိုအပ်ချက်ရှိနေကာ နေသာချိန်များ၍ ပဲတီစိမ်းစိုက်တောင်သူအများစု ပဲအထွက်နှုန်းကျဆင်း နိုင်ဖွယ်ရှိကြောင်း ကျေးရွာတောင်သူများထံမှ သိရှိရပါသည်။ ယခု ၂၀၂၃ခုနှစ်တွင် ပဲတီစိမ်း စိုက်ဧက (၅၉၂၁၁)လျာထားဧကပေါ်တွင် (၄၆၈၁၉)ဧက စိုက်ပျိုးပြီးစီးကြောင်းလည်း စိုက်ပျိုးရေးဦးစီးဌာနမှ သိရှိရပါသည်။

DOCA(မကွေး)

    ၂၀၂၃ ခုနှစ် ဇူလိုင်လ စတုတ္ထအပတ်အတွင်း မုံရွာမြို့နယ်အတွင်း အခြေခံစားကုန်များဖြစ်သော ရွှေဘိုပေါ်ဆန်းဆန်တစ်ပြည် (၅၀၀၀) ကျပ်၊ ဧရာမင်းဆန်တစ်ပြည် (၄၅၀၀)  ကျပ်ဖြင့် အရောင်းအဝယ်ဖြစ်လျက်ရှိပါသည်။ စားအုန်းဆီ တစ်ပိဿာလျှင် (၈၆၀၀) ကျပ်၊ မြေပဲဆီ တစ်ပိဿာလျှင် (၁၃၅၀၀)ကျပ်၊ နှမ်းဆီ တစ်ပိဿာလျှင် (၁၂၀၀၀) ကျပ်တို့ဖြင့် အရောင်းအဝယ် ဖြစ်လျက်ရှိပါသည်။ ကြက်သွန်နီ လက်လီတစ်ပိဿာလျှင် (၂၀၀၀) ကျပ်မှ (၂၂၀၀) ကျပ်ထိ၊ ကြက်သွန်ဖြူ လက်လီ (ဗမာ) တစ်ပိဿာလျှင် (၉၅၀၀) ကျပ်မှ (၁၀၀၀) ကျပ်ထိ၊ ကြက်သွန်ဖြူ (ရှမ်း) တစ်ပိဿာ လျှင် (၇၅၀၀) ကျပ်မှ (၈၀၀၀) ကျပ်ထိ၊ ကြက်သွန်ဖြူ(ကြူကုတ်) တစ်ပိဿာ လျှင် (၈၅၀၀)ကျပ်မှ (၉၀၀၀) ကျပ်ထိ၊ ချင်းတက်တစ်ပိဿာလျှင် (၅၀၀၀) ကျပ်မှ (၆၀၀၀) ကျပ်ထိ၊ ငရုတ်ခြောက်အမျိုးအစားအလိုက်  (၁၄၀၀၀)  ကျပ် မှ (၁၅၀၀၀) ကျပ်ထိ၊ အာလူးတစ်ပိဿာလျှင် (၂၉၀၀) ကျပ် မှ (၃၀၀၀) ကျပ်ထိ၊ ခရမ်းချဉ်သီး တစ်ပိဿာလျှင် (၂၁၀၀) ကျပ်မှ (၂၃၀၀)ကျပ် တို့ဖြင့် အရောင်းအဝယ်ဖြစ်လျက် ပါသည်။

     ကြက်ဥလက်လီဈေးနှုန်းမှကြီး တစ်လုံး (၃၀၀) ကျပ်၊ သေးတစ်လုံး (၂၅၀) ကျပ်၊ ဘဲဥ(ကြီး) တစ်လုံး (၄၀၀) ကျပ်၊ သေးတစ်လုံး (၃၅၀) ကျပ်ရှိသည်။ မုံရွာမြို့၏ သား/ ငါးဈေးနှုန်းမှ ကြက်သား (CP) တစ်ပိဿာလျှင် ( ၁၂၀၀၀) ကျပ်မှ  (၁၃၀၀၀) ကျပ်ထိ ၊ ကြက်သား (ဗမာ) တစ်ပိဿာလျှင် (၁၄၀၀၀) ကျပ်၊ ဝက်သား တစ်ပိဿာလျှင် (၁၉၀၀၀) ကျပ်မှ (၂၀၀၀၀) ကျပ်ထိ၊ အမဲသား တစ်ပိဿာလျှင် (၁၈၀၀၀) ကျပ်မှ (၁၉၀၀၀)ကျပ်ထိ၊ ငါးမြစ်ချင်း  တစ်ပိဿာလျှင် (၈၀၀၀) ကျပ်၊ ငါးကြင်း တစ်ပိဿာလျှင် (၁၀၀၀၀) ကျပ် တို့ဖြင့် အရောင်းအဝယ်ဖြစ်နေကြောင်း သိရပါသည်။

    ဇူလိုင်လ စတုတ္ထအပတ်အတွင်း အခြေခံစားကုန်ဈေးနှုန်းများနှင့် ယခင်အပတ်ဈေးနှုန်းများ နှိုင်းယှဉ်လျှင် ရွှေဘိုပေါ်ဆန်းဆန်တစ်ပြည် (၇၀၀) ကျပ်၊ ဧရာမင်းဆန်တစ်ပြည် (၄၀၀)  ကျပ်ဖြင့် စားအုန်းဆီ တစ်ပိဿာလျှင် (၉၀၀) ကျပ်၊ ကြက်သွန်ဖြူ(ဗမာ) တစ်ပိဿာလျှင် (၁၅၀၀) ကျပ်၊  ဈေးတက်လျက်ရှိပြီး ကျန်အခြားအခြေခံစားကုန်ဈေးနှုန်းများ ကွာဟမှုမရှိကြောင်း မုံရွာမြို့နေဈေး ရောင်းချသူများထံမှ သိရှိရပါသည်။

DOCA(စစ်ကိုင်း)