ပြည်တွင်းကုန်သွယ်မှုသတင်း

   တမူးနယ်စပ်ကုန်သွယ်ရေးစခန်းအနေဖြင့်  ၂၀၂၃-၂၀၂၄ ဘဏ္ဍာနှစ်အတွက် ကုန်သွယ်မှုလျာထားချက်မှာပို့ကုန်ပမာဏ အမေရိကန်ဒေါ်လာသန်းပေါင်း(၁၄.၀၀၀)၊ သွင်းကုန်ပမာဏ အမေရိကန်ဒေါ်လာသန်းပေါင်း(၆.၅၀၀)၊  စုစုပေါင်း ကုန်သွယ်မှုပမာဏ အမေရိကန်ဒေါ်လာသန်း (၂၀.၅၀၀) ဖြစ်ပါသည်။ တမူးနယ်စပ်ကုန်သွယ်ရေးစခန်းမှ အိန္ဒိယနိုင်ငံသို့  ကုန်သွယ်မှုအနေဖြင့် ၂၀၂၃ခုနှစ်၊ ဧပြီလမှ မေလအထိ ပို့ကုန်ပမာဏ အမေရိကန်ဒေါ်လာသန်း(၀.၈၁၈)၊ သွင်းကုန်ပမာဏ အမေရိကန်ဒေါ်လာသန်း (၀.၁၅၀)၊ စုစုပေါင်းကုန်သွယ်မှုပမာဏ အမေရိကန်ဒေါ်လာသန်း (၀.၉၆၈) ဆောင် ရွက်နိုင်ခဲ့သဖြင့် (၂)လတာ လျာထားချက်အပေါ်  (၃၂.၂၇)% သာ ဆောင်ရွက်နိုင်ခဲ့ကြောင်း တမူးနယ်စပ်ကုန်သွယ်ရေးစခန်း၏ စာရင်းများအရ သိရပါသည်။

  ပို့ကုန်အနေဖြင့် (၂၇.၅.၂၀၂၃ မှ ၂.၆.၂၀၂၃)ရက်နေ့အထိ စီးကရက်အရေအတွက်အားဖြင့် တန်(၉၈.၆၅၆)၊ တန်ဖိုးအားဖြင့် အမေရိကန်ဒေါ်လာသန်း (၀.၂၁၁)၊  နန့်ဖာလုံကုန်စုံ တန်ဖိုးအားဖြင့် အမေရိကန်ဒေါ်လာသန်း(၀.၀၁၅)၊ စုစုပေါင်းတန်ဖိုးအားဖြင့် အမေရိကန်ဒေါ်လာသန်း(၀.၂၂၆) တင် ပို့နိုင်ခဲ့ပါကြောင်း၊ (၃.၆.၂၀၂၃ မှ ၉.၆.၂၀၂၃)ရက်နေ့အထိ နန့်ဖာလုံကုန်စုံ တန်ဖိုးအားဖြင့် အမေရိကန်ဒေါ်လာသန်း(၀.၀၁၈) တင်ပို့နိုင်ခဲ့ပါကြောင်း၊ သွင်းကုန်အနေဖြင့် (၂၇.၅.၂၀၂၃ မှ ၂.၆.၂၀၂၃) ရက်နေ့အထိ ဆံပင် အရေအတွက်အားဖြင့် တန် (၄.၂၃၀)၊ တန်ဖိုးအားဖြင့် အမေရိကန်ဒေါ်လာသန်း (၀.၀၁၆)တင်သွင်းနိုင်ခဲ့ပြီး ယခုအပတ်တွင် တင်သွင်းနိုင်ခဲ့ခြင်းမရှိပါကြောင်း၊ ပို့ကုန်အ‌နေဖြင့် ယခင်ပတ်ကထက် အမေရိကန်ဒေါ်လာသန်း (၀.၂၀၈) လျော့နည်းတင်ပို့နိုင်ခဲ့ပါပြီး သွင်းကုန်အနေဖြင့် ယခုအပတ်တွင် တင်သွင်းနိုင်ခဲ့ခြင်း မရှိသောကြောင့် ယခင်ပတ်ကထက် အမေရိကန်ဒေါ်လာသန်း (၀.၀၁၆) လျော့နည်းတင်သွင်းနိုင်ခဲ့ပါကြောင်း  တမူးနယ်စပ်ကုန်သွယ်ရေးစခန်းမှ လေ့လာသိရှိရပါသည်။

DOCA(စစ်ကိုင်း)

    မြန်မာနိုင်ငံစက်သုံးဆီ တင်သွင်း/သိုလှောင် ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ တိုင်းဒေသကြီး၊ ပြည်နယ်အလိုက် မြို့ကြီးများ၏ စက်သုံးဆီ ရည်ညွှန်းလက်ကားဈေးနှုန်းများအား နေ့စဉ်ထုတ်ပြန်ပေးလျက်ရှိသည့် အပြင် စက်သုံးဆီအရောင်းဆိုင်များအနေဖြင့် စက်သုံးဆီ တင်သွင်း/သိုလှောင်ဖြန့်ဖြူးခြင်းလုပ်ငန်း ကြီးကြပ်ရေး ကော်မတီမှ ထုတ်ပြန်လျက်ရှိသည့် ရည်ညွှန်းလက်လီဈေးနှုန်းအပေါ်အခြေခံ၍ ရောင်းချခြင်းရှိ/မရှိ၊ အချိန်အတွယ်နှင့် အလေးချိန် မှန်ကန်မှုရှိ/မရှိ ကွင်းဆင်းစစ်ဆေးခြင်းနှင့် ခရိုင်အတွင်းရှိ စက်သုံးဆီအရောင်းဆိုင်များသို့ နေ့စဉ်ချိတ်ဆက်၍ အရောင်းဆိုင်များအားလုံး၏ တစ်လီတာရောင်းဈေးနှုန်းများကို နေ့စဉ်တင်ပြခြင်းတို့ကို ဆောင်ရွက်လျက်ရှိပါသည်။

     ရွှေဘိုမြို့တွင် စက်သုံးဆီဆိုင် (၁၉)ဆိုင် ပုံမှန်ဖွင့်လှစ်ရောင်းချလျက်ရှိပြီး ၂၀၂၃ခုနှစ်၊ ဇွန်လ၊ ပထမပတ်တွင် ရောင်းချခဲ့သော စက်သုံးဆီဈေးနှုန်းများမှာ ဓာတ်ဆီ(92) တစ်လီတာလျှင် (၂၀၇၅)ကျပ်၊ ဓာတ်ဆီ(95) တစ်လီတာလျှင် (၂၂၅၀)ကျပ်၊ ဒီဇယ်(ရိုးရိုး) တစ်လီတာလျှင် (၂၀၀၅)ကျပ်၊ ဒီဇယ်(ပရီမီယမ်) တစ်လီတာလျှင် (၂၀၉၀)ကျပ်ဖြစ်ကြောင်းသိရသည်။

     ယခု ဇွန်လဒုတိယပတ်တွင် စက်သုံးဆီဈေးနှုန်းများမှာ ဓာတ်ဆီ(92) တစ်လီတာလျှင် (၂၀၆၀)ကျပ်၊ ဓာတ်ဆီ(95) တစ်လီတာလျှင် (၂၂၂၅)ကျပ်၊ ဒီဇယ်(ရိုးရိုး) တစ်လီတာလျှင် (၁၉၅၀)ကျပ်၊ ဒီဇယ်(ပရီမီယမ်) တစ်လီတာလျှင် (၂၀၃၅)ကျပ်ဖြင့် ရောင်းချလျက်ရှိသောကြောင့် ဇွန်လပထမအပတ်နှင့် နှိုင်းယှဉ်ပါက ဒုတိယပတ်တွင် ပထမပတ်အောက် ဓာတ်ဆီ(92) တစ်လီတာလျှင် (၁၅)ကျပ်၊ ဓာတ်ဆီ(95) တစ်လီတာလျှင် (၂၅)ကျပ်၊ ဒီဇယ်(ရိုးရိုး) တစ်လီတာလျှင် (၅၅)ကျပ်၊ ဒီဇယ်(ပရီမီယမ်) တစ်လီတာလျှင် (၅၅)ကျပ် စသည်ဖြင့် ဈေးနှုန်းများအနည်းငယ်ကျဆင်းကြောင်း စက်သုံးဆီအရောင်းဆိုင်များမှ သတင်းရရှိသည်။

DOCA(စစ်ကိုင်း)

   သနပ်ဖက်သည် မြန်မာနိုင်ငံတစ်ဝှမ်းတွင် သောက်သုံးနေသည့် ဆေးပေါ့လိပ်၏ လိပ်ထားသည့် သစ်ရွက်ဖြစ်သည်။ သနပ်ဖက်ကို လွန်ခဲ့သောနှစ်ပေါင်း ၁၀၀ ကျော်က မြန်မာနိုင်ငံ ကိုလိုနီခေတ်လက်အောက်ကျရောက်သည့် အချိန်တွင် စတင်လုပ်ကိုင်လာသည်ဟု သိရပါသည်။ သနပ်ဖက် လုပ်ငန်းသည် ရှမ်းပြည်နယ်၏ အဓိကလုပ်ငန်းတစ်ရပ်ဖြစ်ပြီး တော၊တောင်များကို ရှင်းလင်းပြီး သနပ်ဖက်ပင်များကို စိုက်ပျိုးကြသည်။သနပ်ပင်တစ်ခြံလျှင် အပင်ရေ ၅၀ မှ ၄၀၀၀ အထိ စိုက်ပျိုးကြသည်။ရေမဝပ်သော တောင်ခါးပန်းများတွင် စိုက်ပျိုးကြပြီး ပြာသို၊ တပို့တွဲလများတွင် မြေရှင်း မီးရှို့၍ ကဆုန်လတွင် မြေဆွကာ မျိုးကြဲကြသည်။ အပင်ပေါက်ကလေးများ နှစ်တောင်ထွာခန့် ရှိသောအခါ နုတ်၍ မူလပင်မြစ်ရှည်တစ်ခုသာထား၍ ဘေးသို့ဖြာထွက်နေသော အမြစ်များ ဖြတ်တောက်ပြီးလျှင် တစ်ပင်နှင့်တစ်ပင် ၂ ပေခန့် ခြား၍ စိုက်ပျိုးကြသည်။ သနပ်ပင်များ စိုက်ပျိုးရာတွင် မြေဩဇာထည့်ပေးခြင်း၊ မြေဆွပေးခြင်း၊ ပေါင်းပင် မြက်ပင်များ နုတ်ပေးခြင်းတို့ကို ပြုလုပ်နိုင်လျှင် အပင်ပိုသန်ကြောင်း သိရှိရပါသည်။

     အပင်များ အပေါ်တက်၍ အကိုင်းအခက်များ ဝေဖြာလာသောအခါ ပင်မကိုင်းကြီး နှစ်ကိုင်း၊ သုံးကိုင်းသာချန်၍ ကျန်ကိုင်းများကို ရှင်းပေးရပြီး အရွက်များပိုးမစားစေရန် ပိုးသတ်ဆေး အကြိမ်ကြိမ်ဖျန်းပေးရသည်။ အပင်ဖြစ်ထွန်းလျှင် သုံးနှစ်သားမှစ၍ အရွက်များ ခူးရပြီး စိုက်ပျိုးသည့် မြေမ ကောင်းလျှင် လေးနှစ်သားမှ အရွက်များ ခူးဆွတ်ရကြောင်း သိရှိရပါသည်။ သနပ်ပင်တစ်ပင်လျှင် အရွက်ရေ ၃၀ မှ၄၀အထိ ထွက်သည်။ သနပ်ဖက်ကို ဝါဆို၊ ဝါခေါင်၊ တောင်သလင်းလများတွင် ခူးရပြီး တစ်နှစ်လျှင် လေးကြိမ်ခူးရကြောင်း သိရှိရပါသည်။

     သနပ်ဖက်ကို ဆေးလိပ်လိပ်ရာတွင် အရွက်အစိမ်းတိုင်း အသုံးမပြုရကြောင်းလည်း သိရှိရပါသည်။ ပထမဦးစွာ အရွက်မှောက်၍ အကြောကလေးများကို တစ်ရွက်ချင်းသင်ပေးရသည်။အကြော သင်ပြီးသားဖက်များကို  မြေလုံမီးဖိုရှည်ကြီးပေါ်၌ တင်ထားသော အပတ်ဝိုင်းထားသည့် ဒယ်ပြားထဲ ထည့်၍ လှော်ရသည်။ တစ်ဖိုတွင် ၁၀ ဒယ်မှ ၁၂ ဒယ်အထိရှိပြီး တစ်ဒယ်တွင် ဖက်ရွက်၁၅ ရွက်ခန့်စီ ကာ အပေါ်မှ သဲထုပ်ဖိ၍ လှော်ရသည်။ လှော်ပြီးသားဖက်ရွက်များကို အကြီးအသေးခွဲခြားပြီး သေသေချာချာ ကျကျနနထုပ်ပိုးပြီးပါက ပွဲရုံများသို့ သနပ်ဖက် တစ်ပိဿာချိန်လျှင် ဖက်ရွက်အ သေးကျပ် ၆၀၀၀ နှင့် ဖက်ရွက်အကြီး ကျပ် ၇၀၀၀ ရောင်းချရကြောင်း သိရပါသည်။ တစ်နှစ်လျှင် သနပ်ဖက် ပိဿာချိန် ၁၂၀၀ ခန့်အထိ ထွက်ရှိကြောင်းလည်းသိရပါသည်။ သနပ်ဖက်ကို  မြန်မာနိုင်ငံအနှံအပြားရှိ ဆေးပေါ့လိပ်လုပ်ကိုင်သည့်မြို့များသို့ ပြန်လည်ရောင်းချပြီး ရှမ်းပြည်နယ် (တောင်ပိုင်း) နမ့်စန်၊ ပင်လောင်း၊ ဆီဆိုင်၊ ဟိုပုံး၊ တောင်ကြီး၊ ရပ်စောက်၊ ပင်းတယစသည့် မြို့နယ်များတွင် စိုက်ပျိုးကြကြောင်း သိရှိရပါသည်။

DOCA(ရှမ်း)

   ခရဲသီး(ခ)ဖရဲသီးသည် (၁)နှစ်မှာ (၁)ခါသာ စိုက်ပျိုး၍ ရသော ရာသီစာဖြစ်ပါသည်။ ခရဲသီး စိုက်ရာတွင် ရေဝပ်သောနေရာမှလွဲ၍ မြေအမျိုးအစားမရွေးစိုက်၍ရကြောင်း၊ ကုန်းမြေများကို အဓိကထား၍ စိုက်ကြကြောင်း၊ ခရဲသီးများကို တပေါင်းလတွင် စ၍စိုက်ကြပြီး ကဆုန်လများတွင် ခူးဆွတ်ကြကြောင်း၊ ခရဲစိုက်ပျိုးရာတွင် ကျင်းတူး၍ စိုက်ပျိုးရကြောင်း၊ အပင်ခြား (၅)တောင်ပတ်လည် ထား၍ (၁)ကျင်းကို ခရဲမျိုးစေ့ (၃)စေ့မှ (၅)စေ့ထိ စိုက်ပျိုးကြောင်း သိရှိရပါသည်။

   ခရဲသီးသည် မြေပြင်တွင် သီးသောအသီးဖြစ်၍ အသီးချောစေရန်၊ အသီးဆွတ်ရန်နှင့် ရှာရ လွယ်ကူစေရန်အတွက် အများစုမှာ (၁)ကျင်းလျှင် (၃)စေ့ခန့်သာ စိုက်ပျိုးကြောင်း၊ ခရဲစိုက်သည့် ကျင်းကို (၃)ရက်၊ (၄)ရက်ခြား (၁)ခါ ရေလောင်းပေးရကြောင်း၊ အပင်(၃)လက်မ အရွယ်ရောက်ပါက  (၁)ပင်နှင့် (၁)ပင်ကို မြက်များ၊ ပေါင်းများ မထစေရန် ပေါင်းရှင်း၊ မြက်ရှင်းပေးရကြောင်း၊ ရာသီဉတု ပေါ်မူတည်၍ ရေဖျန်းရာတွင်လည်း ရေဖျန်းပိုက်နှင့် ဖျန်း၍ရကြောင်း၊ အပင်အားဆေးဖျန်းရကြောင်း၊ အသီးကင်းဝင်ပါက အသီးအားဆေးများ ဖျန်းရကြောင်း သိရှိရပါသည်။

   ခရဲသီး စိုက်ပျိုးရာတွင် စိုက်သည့်အချိန်နှင့် အသီးသီးပြီး ခူးဆွတ်၍ရသောအချိန်ထိ အချိန် (၂)လသာ ကြာမြင့်ကြောင်း၊ အသီးစခူးသည့်အချိန်မှစ၍ နေ့တိုင်းခူးဆွတ်ရကြောင်း၊ မခူးဘဲ ထားပါ က အသီးသည် အကြောတင်း၍ ရင့်သွားကြောင်း၊ ရင့်သွားသည့် အသီးများကို ဝါသည် အထိထား၍  အစေ့ကို နေပူလှမ်းကာ နောက်နှစ်အတွက် မျိုးစေ့အဖြစ်ပြန်၍ အသုံးပြုကြောင်း၊ ကျန်သည့် အသီးများကို အချဉ်တည်၍ ခရဲချဉ်အဖြစ်ပြန်၍ ရောင်းချချကြောင်း၊ ကျင်း (၁၀၀)စိုက် လျှင်  ခရဲသီး အလုံးရေ (၄၀၀)ခန့် ထွက်ရှိကြောင်း၊ ခရဲသီးခူးဆွတ်ရာတွင် လုပ်သား (၂)ဦးမှ (၃)ဦး ခူးဆွတ်ရ ကြောင်း သိရှိရပါသည်။

   လက်ရှိအချိန်တွင် ခရဲသီးလက်ကားဈေးနှုန်းမှာ (၁)လုံးလျှင် (၂၀ဝိ/-)ကျပ်ဈေးဖြင့် ရောင်းချကြောင်း၊ အလုံးအကြီးအသေးနှင့် ခရဲသီးထွက်ရှိသည့်ပေါ်မူတည်၍ (၁၀၀ဝိ/-)ဖိုး ဝယ်ယူ လျှင် (၆)လုံးမှ (၇)လုံးထိ ရောင်းချကြောင်း သိရှိရပါသည်။ ခရဲသီးကို မျှစ်ဖြင့် ချက်စား၍ သော်လည်းကောင်း၊ အသားဟင်းများနှင့် ချက်စား၍သော်လည်းကောင်း၊ အတို့အမြုပ်ဖြင့်ပြုလုပ်၍ သော်လည်းကောင်း ၊ အချဉ်တည်၍သော်လည်းကောင်း စားသုံးကြပါသည်။ ခရဲသီး၏ အရသာမှာ ချို၍ အသီးမှာ နူးညံ့သဖြင့် ထမင်းမြိန်စေသော ဟင်းတစ်ခွက်ဖြစ်သည့်အပြင် နွေသီးနှံနှင့် နွေစပါးများ မပေါ်ခင် ကြားကာလတွင် ရောင်းချရသည့်အသီးဖြစ်၍  စိုက်ပျိုးသည့် တောင်သူများ တစ်ဖက်တစ်လမ်းမှ ဝင်ငွေရသည့် လုပ်ငန်းဖြစ်သဖြင့် ခရဲသီးများကို တွင်တွင်ကျယ်ကျယ် စိုက်ပျိုးသင့်ကြောင်း အကြံပြုရေးသားလိုက်ရပါသည်။

DOCA(စစ်ကိုင်း)

     ၁၇.၆.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-