ပြည်တွင်းကုန်သွယ်မှုသတင်း

    ယခုအခါ မြန်မာနိုင်ငံအတွင်းသို့ မုတ်သုံလေဝင်ရောက်လာပြီး မိုးပုံမှန်ရွာသွန်းနေပြီဖြစ်သဖြင့် အုတ်တွင်းမြို့နယ်အတွင်းရှိ ကျေးရွာများမှ တောင်သူလယ်သမားများမှာ မိုးစပါးစိုက်ပျိုးရန် မြေပြုပြင်နေကြပြီး ကြဲခင်းစိုက်တောင်သူများအနေဖြင့် ယခုအခါတွင် စပါးကြဲနေပြီဖြစ်ပါသည်။

    ဆင်းသုခစပါးမျိုးကို အစိုက်များကြပါသည်။ တစ်ဧကလျှင် စပါး၃တင်းကြဲရပါသည်။ မျိုးစပါးတစ်တင်းလျှင် ၂၈၀၀၀ကျပ်ရှိပါသည်။ မြေပြုပြင်ရာတွင် ထွန်နှစ်စပ်ထွန်ပေးရပါသည်။ စပါးတစ်ဧကအတွက် ထွန်ယက်ခ ၁၃၀၀၀၀ကျပ်၊ လုပ်သားခ ၁၁၀၀၀ကျပ်နှင့် သွင်းအားစုတန်ဖိုးကုန်ကျငွေမှာ ၂၁၀၀၀ကျပ်ရှိပါသည်။

 စပါးပင်များပေါက်လာပြီးသည့်နောက်တွင် သွင်းအားစုများထပ်မံလိုအပ်မည်ဖြစ်သဖြင့် ဓာတ်မြေဩဇာဖိုး၊ ပေါင်းသတ်ဆေးဖိုး၊ ပိုးသတ်ဆေးဖိုးနှင့်  လုပ်သားခများ ထပ်မံကုန်ကျဦးမည်ဖြစ်ကြောင်း ညောင်ခြေထောက်ကျေးရွာမှ လယ်ဧက ၂၀လုပ်ကိုင်သူ၏ပြောပြချက်အရ သိရပါသည်။

DOCA(ပဲခူး)

    တောင်ငူမြို့တွင် ပန်းသီး၊ ပန်းသစ်တော်သီး၊ သခွားသီးနှင့် နာနတ်သီးတို့မှာ ပြီးခဲ့သည့်နွေရာသီ ဧပြီလဈေးနှုန်းထက် အတက်အကျအနည်းငယ်သာရှိပါသည်။ စပျစ်သီးမှာ နှစ်ဆခန့်ဈေးတက်သွားပြီး နာနတ်သီးမှာ မိုးဦးရာသီတွင် ပေါများသောကာလဖြစ်သဖြင့် ဈေးကျသွားပါသည်။

    ပန်းသီးမှာ အကြီးနှင့် အသေးနှစ်မျိုးရှိရာ အလုံးအကြီးအသေးပေါ်မူတည်၍ ပန်းသီးအကြီးမှာ တစ်လုံးလျှင် ၂၀၀၀ကျပ်မှ ၃၀၀၀ကျပ်ထိ၊ ပန်းသီးအသေးမှာ တစ်လုံးလျှင် ၈၀၀ကျပ်မှ ၁၂၀၀ထိ၊ ပန်းသစ်တော်သီးမှာ တစ်လုံးလျှင် ၂၅၀၀ကျပ်မှ ၃၀၀၀ကျပ်ထိ၊ သခွားမွှေးသီးမှာ တစ်လုံးလျှင် ၂၅၀၀ကျပ်မှ ၃၀၀၀ကျပ်ထိရှိပါသည်။

     လိမ္မော်သီးမှာ သင်္ကြန်ကာလတွင် တစ်ပိဿာလျှင် ၇၀၀၀ကျပ်ရှိခဲ့ရာမှ ယခုအခါတွင် တစ်ပိဿာလျှင် ၈၀၀၀ကျပ်မှ ၁၀၀၀၀ကျပ်ထိရှိ၍ ဈေးနှုန်းအနည်းငယ်တက်လာပါသည်။ စပျစ်သီးမှာ သင်္ကြန်ကာလတွင် တစ်ပိဿာလျှင် ၇၀၀၀ကျပ်မှ ၉၀၀၀ကျပ်ထိရှိခဲ့ရာမှ ယခုအခါတွင် ၂၅ကျပ်သားလျှင် ၆၀၀၀ကျပ်၊ တစ်ပိဿာလျှင် ၂၀၀၀၀ကျပ်ဖြင့် ဈေးနှုန်းမြင့်တက်လာပါသည်။

   နာနတ်သီးမှာ သင်္ကြန်ကာလတွင် တစ်လုံးလျှင် ၂၀၀၀ကျပ်ရှိခဲ့ရာမှ ယခုအခါ မိုးဦးကာလသည် နာနတ်သီးပေါများသည့်ကာလဖြစ်သဖြင့် တစ်လုံးလျှင် ၈၀၀ကျပ်မှ ၁၀၀၀ကျပ်ထိသာရှိတော့သဖြင့် ဈေးနည်းထက်ဝက်ခန့်ကျဆင်းကြောင်း သိရပါသည်။

DOCA(ပဲခူး)

   ယခု မိုးဦးစအချိန်အခါတွင် ရာသီစာအဖြစ် ဒရင်ကောက်ညွန့်လေးများမှာ အလွန်ပင်စား၍ကောင်းပါသည်။ ဒရင်ကောက်ညွန့်များသည် လူသိနည်းခြင်းနှင့်ရှားပါးခြင်းကြောင့် ဈေးကွက်အတွင်းတွင် အခြားဟင်းရွက်များထက် ဈေးအနည်းငယ်ပို၍ပေးရပါသည်။

    တောင်ပေါ်ဒေသများတွင် အများဆုံးပေါက်ရောက်ပြီး ချောင်းရှိသောဒေသများတွင်လည်းပေါများပါသည်။ ဟင်းသီးဟင်းရွက်ဆိုင်များတွင် ဒရင်ကောက်ညွန့်များကို တစ်စည်းလျှင် ၅၀၀ကျပ်မှ ၁၀၀၀ကျပ်ထိရောင်းချပါသည်။

     ဒရင်ကောက်ညွန့်များကို ကြော်၍ဖြစ်စေ၊ သုပ်၍ဖြစ်စေ၊ အခြားအသားငါးများနှင့်ရော၍ ဖြစ်စေ ချက်ပြုတ်စားသောက်ကြပါသည်။ အရသာမှာ အခြားအရွက်များနှင့်မတူဘဲ စား၍အလွန်ကောင်းသောကြောင့် လူကြိုက်များ၍ ရောင်းအားကောင်းသောဟင်းရွက်ဖြစ်ကြောင်း သိရပါသည်။

DOCA(ပဲခူး)

     ပြည်မြို့နယ်အတွင်းရှိ ဈေးများအတွင်းတွင် ဝါစေ့လေးများကို ညှောက်ဖောက်၍ ရရှိလာသော ဝါစေ့ပင်ပေါက်လေးများရောင်းချနေသည်ကို တွေ့ရှိရပါသည်။ ဝါပင်များကို ပြည်ခရိုင်အတွင်းရှိ ပေါက်ခေါင်းမြို့နယ်တွင် အဓိကထား၍ စီးပွားဖြစ်စိုက်ပျိုးလျက်ရှိပြီး ပြည်မြို့နယ် အနီးတဝိုက်ရှိ ဝက်ထီးကန်မြို့နှင့် ပေါင်းတလည်မြို့တို့တွင်လည်း စိုက်ပျိုးကြပါသည်။ ''ဝါစေ့ပင်ပေါက်"၏အရသာမှာ စိမ့်သောအရသာရှိပါသည်။ ဆူးပုပ်ရွက်၊ ပိန္နဲသီးများနှင့် ရော၍လည်းကောင်း၊ ကြော်ချက်အရည် သောက်ချက်၍လည်းကောင်း၊ ကြက်သွန်ဖြူ၊ ငရုတ်ကောင်းများဖြင့် ဟင်းခါးချက်၍ စားသုံးပေးခြင်းဖြင့် အမျိုးသမီးများခံစားရလေ့ရှိသော သွေးဆုံးကိုင်ဝေဒနာများကိုလည်း သက်သာစေပါသည်။ ဝါစေ့တစ်ပိဿာလျှင် (၁၂၅၀)ကျပ်ခန့်၊ ဝါစေ့ပင်ပေါက်များကို တစ်ပိဿာလျှင် (၂၀၀၀)ကျပ်ခန့် ရောင်းချရပြီး ဝါစေ့တစ်ပိဿာလျှင် ဝါစေ့ပင်ပေါက် (၂)ပိဿာ ခန့်ထွက်ရှိသောကြောင့် ဝါစေ့ပင်ပေါက် တစ်ပိဿာရောင်းချရလျှင် (၁၃၇၅)ကျပ်ခန့် အကျိုးအမြတ်ရရှိကြောင်း သိရပါသည်။

DOCA(ပဲခူး)

      သံပုရာသီးတွင် နွေသံပုရာနှင့် မိုးသံပုရာဟု (၂)မျိုးရှိရာ နွေသံပုရာသည် နွေရာသီဖြစ်သော မတ်လတွင် အသီးများစတင်သီးပြီး ဧပြီလနှင့် မေလတွင် စတင်ခူးဆွတ်ရပါသည်။ မိုးသံပုရာမှာ မိုးရာသီဖြစ်သော ဇွန်လမှစ၍ အောက်တိုဘာလအထိ အသီးအထွက်အလှိုင်ဆုံးအချိန်ဖြစ်ပါသည်။ နွေသံပုရာသည် အလုံးသေးငယ်ပြီး အထွက်နှုန်းနည်းသလောက်၊ မိုးသံပုရာသည် အလုံးချောပြီး သီးနှုန်းအားကောင်းပါသည်။

      လူတို့သည် သံပုရာသီးကို နေ့စဉ်တစ်မျိုးမဟုတ်တစ်မျိုး စားသုံးကြပါသည်။သံပုရာသီးမှာ နှစ် ပတ်လည်ထွက်ရှိပါသည်။ နွေရာသီတွင်သီးသောအသီးမှာ တန်ဖိုးမြင့်သော်လည်း ဝယ်ယူစားသုံးကြပါသည်။ သံပုရာသီးကို ကျန်းမာရေးအရအသုံးပြုသလို အသုပ်မျိုးစုံပြုလုပ်ရာတွင်လည်း အသုံးပြုကြပါသည်။ နွေသံပုရာသီးဈေးနှုန်းများမြင့်တက်လာရခြင်းမှာ အထွက်နှုန်းနည်းပြီး စားသုံးမှုများသဖြင့် ဈေးနှုန်းများမြင့်တက်လာရခြင်း ဖြစ်ပါသည်။

    သံပုရာသီးကို ပြည်မြို့အနီးတဝိုက်ရှိ ကျေးရွာများတွင် တော်တော်များများ စိုက်ပျိုးကြပါသည်။ သံပုရာပင်သည် နှစ်ရှည်ပင်ဖြစ်သည့်အတွက် တစ်ခါစိုက်ပျိုးပြီးရုံဖြင့် ထိုင်စားရသော သီးနှံ ဖြစ်ပါသည်။ သံပုရာပင်ကို တစ်ချို့မှာ အိမ်ခြံဝန်းထဲတွင် တစ်နိုင်တစ်ပိုင် စိုက်ပျိုးကြသလို စီးပွား ဖြစ်လည်း စိုက်ပျိုးကြပါသည်။ သံပုရာသီးကို တစ်ခါစိုက်ပျိုးထားလျှင် တစ်နှစ်ပတ်လုံး ဝင်ငွေများရရှိသဖြင့် မိသားစုစားစရိတ်ရရှိသလို အပိုဝင်ငွေများလည်း ရရှိနိုင်ပါသည်။ သံပုရာပင် တစ်ပင်လျှင် ထွက်ရှိသောပျမ်းမျှအသီးနှုန်းမှာ (၅၀-၁၀၀)အထိ ထွက်ရှိကြောင်း သိရပါသည်။

    ပြည်ဈေးကွက်သို့ ယခုအချိန်တွင် ဝင်ရောက်ရောင်းချသော သံပုရာသီးများမှာ နွေသံပုရာသီး များဖြစ်ပြီး အနီးတဝိုက်ရှိကျေးရွာများမှ လာရောက်ရောင်းချကြောင်း သိရပါသည်။ နွေသံပုရာသီး ဈေးနှုန်းများအနေဖြင့် တစ်လုံးလျှင် အလုံးချောပါက (၁၀၀-၁၅၀)ကျပ်အထိ ရောင်းချ ကြောင်း သိရပါသည်။ နွေရာသီတွင် ဈေးပိုရသော နွေသံပုရာသီးကို ရေသွင်းပြီးစိုက်ပျိုးနိုင်ပါက အမြတ်အစွန်းပိုမိုရရှိလာနိုင်မှာဖြစ်ပါသည်။ ပြည်ဈေးကွက်မှတစ်ဆင့် ရန်ကုန်မြို့ရှိ ကုန်စိမ်းဈေးကွက်များအပြင် နယ်မြို့များသို့လည်း တင်ပို့ရောင်းချကြောင်း သိရပါသည်။

     ထို့ကြောင့် သံပုရာပင်စိုက်ပျိုးသော တောင်သူများအနေဖြင့် စိုက်ပျိုးရာတွင် လွယ်ကူပြီး စိုက်ပျိုးစရိတ်လည်း သက်သာ၍ နှစ်ပတ်လည်ဝင်ငွေများရရှိလာသဖြင့် ဧကများပိုမိုတိုးချဲ့၍ စိုက်ပျိုးလာမည်ဆိုပါက နေ့စဉ်၊ လစဉ်ဝင်ငွေများရရှိနိုင်ပြီး အပိုဝင်ငွေများလည်း ရရှိလာ၍ လူနေမှုအဆင့် အတန်းမြင့်မားလာနိုင်မှာဖြစ်ပါကြောင်း ရေးသားလိုက်ရပါသည်။

DOCA(ပဲခူး)