ပြည်တွင်းကုန်သွယ်မှုသတင်း

    ၁၆.၆.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-

   တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ပြုစုတင်ပြအပ်ပါသည်။

       ဧရာဝတီတိုင်း‌ဒေသကြီး၊ စားသုံးသူရေးရာဦးစီးဌာန၊ကျိုက်လတ်မြို့နယ်တာဝန်ခံနှင့်ဝန်ထမ်းတို့သည်၂၀၂၃ခုနှစ်၊ ဇွန်လ(၆)ရက်နေ့၊ နံနက်(၁၁:၀၀)နာရီအချိန်တွင် ကျိုက်လတ်မြို့MSMEsလုပ်ငန်းဖွံ့ဖြိုး ရေးအတွက် ငါးရံ့ခြောက်ဖုတ်လုပ်ငန်းရှင်အသင်းနှင့် မြို့နယ်တာဝန်ခံရုံးတွင်တွေ့ဆုံခဲ့ကြပါသည်။

        ထိုသို့ဆွေးနွေးရာတွင်ရောင်းဝယ်ဖောက်ကားမှုအခြေအနေ၊ ဈေးနှုန်းအခြေအနေ၊ ဖြစ်ပေါ်နေသောအခက်အခဲများအား ဆွေးနွေးကြရာ ငါးရံ့ခြောက်ဖုတ်လုပ်ငန်းရှင်တစ်ဦးမှ ဆွေးနွေးရာတွင်  ကုန်ကြမ်းဝယ်ယူရာတွင် ယခင်နှစ်ကုန်ကြမ်းဝယ်ဈေးမှာ (၁၀၀၀၀နှင့်၈၀၀၀)ကျပ်ဈေးဖြင့်ဝယ်ယူခဲ့ပြီး  ယခုနှစ်တွင်(၁၅၀၀၀နှင့်၂၀၀၀၀)ကျပ်ဈေးရှိကြောင်း၊ ယခင်နှစ်(ငါးခွဲခ-အလုပ်သမားခ)၅၀၀၀ကျပ်  ပေးရပြီး ယခုနှစ်အလုပ်သမားခ (၁၀၀၀၀)ကျပ်ပေးရကြောင်း ကုန်ကြမ်းဝယ်ယူရာတွင် ဒေးဒရဲ၊ ဖျာပုံ၊ ဘိုကလေး၊ မအူပင်မြို့များမှ ဝယ်ယူရပြီး ကုန်ကြမ်းအချိန်(၁၀)ကို ကုန်ချော(၁)ပိဿာထွက်ရှိကြောင်း၊   ယခင်နှစ်က ငါးရံ့ခြောက်(၅)ကျပ်သား တစ်ဘူးကို(၅၀၀၀)ကျပ်ဖြစ်ပြီး၊ ယခုနှစ်(၆၀၀၀) ကျပ် ဖြစ်ကြောင်းယခင်နှစ်(၁၀)ကျပ်သားတစ်ဘူးကို(၁၀၀၀၀)ကျပ်ဖြစ်ပြီးယခုအခါ (၁၀)ကျပ်သားတစ်ဘူးကို (၁၂၀၀၀) ကျပ်ဖြင့်ရောင်းရပါကြောင်း ၊ယခင်နှစ်များလို ရောင်းအားမကောင်းပါကြောင်း တက်ရောက်လာသူလုပ် ငန်းရှင်မှဆွေးနွေးခဲ့ပါသည်။

          စားသုံးသူရေးရာဦးစီးဌာနမှမြို့နယ်တာဝန်ခံမှလည်း လုပ်ငန်းရှင်များအနေဖြင့် ထုတ်လုပ်မှုကုန်  ကျစရိတ်များ လျော့နိုင်သမျှလျော့အောင်ကြိုးစားထုတ်လုပ်နိုင်ရေးနှင့် တွက်ချေကိုက်သောလုပ်ငန်းများဖြစ်စေရေးကုန်အညွှန်းအမှတ်အသား ပြည်စုံစွာပါရှိနိုင်ရေးတို့အတွက် မိမိတို့ဌာနအနေဖြင့်လုပ်ငန်းရှင် များ၏လိုအပ်ချက်များအား ကူညီဆောင်ရွက်သွားဖြစ်မည်ဖြစ်ကြောင်း ဆွေးနွေးပြောကြားခဲ့သည်ဟု သတင်းရရှိပါသည်။

DOCA(ဧရာဝတီ)

     ကယားပြည်နယ်၊လွိုင်ကော်မြို့အတွင်းရှိ ကျေးရွာများတွင် မေလအတွင်း၌ ရွာသွန်းခဲ့ သောမိုးကြောင့် မိုးမျှော်နေသောတောင်သူများမှာ မိုးမြေပဲများကို စတင်စိုက်ပျိုးနိုင်ခဲ့ကြသည်။ မြေပဲသီးနှံသည် ရေမြေဒေသရာသီ ကွဲပြားခြားနားသော အခြေအနေအမျိုးမျိုးမှာ ဖြစ်ထွန်း နိုင်သော သီးနှံတစ်မျိုးဖြစ်သည်။ ဒေသနှင့်ကိုက်ညီဖြစ်ထွန်းသည့်  မျိုးကိုရွေးချယ်အသုံးပြု ရန်ဖြစ်သည်။ အပင်ပေါက် ၈၀ ရာခိုင်နှုန်းနှင့်အထက်ရှိသည့် မျိုးကိုစိုက်ပျိုးသင့်သည်။ အထွက် နှုန်းကောင်းမွန်သည့် မျိုးများကို သုတေသနပြု ထုတ်ဝေထားသည်။ ဆင်းပဒေသာ-၆၊ ဆင်းပ ဒေသာ-၇၊ ဆင်းပဒေသာ-၁၁၊ မျိုးများကို ကျယ်ကျယ်ပြန့်ပြန့် စိုက်ပျိုးလျက်ရှိကြောင်း သိရပါ သည်။ ယခုအခါ ဆင်းပဒေသာ-၁၂နှင့်ဆင်းပဒေသာ-၁၃ စသည့် အခြားမျိုးသစ်များကိုလည်း စိုက်ပျိုးနိုင်ပြီးဖြစ်ပါသည်။ မိုးရာသီတွင် ပထမမိုးရွာပြီးနောက် ချက်ချင်းမြေပဲကို စိုက်ပျိုးနိုင် သည်။

   ဆည်ရေသောက်ဒေသတွင် ဧပြီလမှစ၍ စိုက်ပျိုးလျက် ရှိကြပါသည်။ မိုးမြေပဲသီးနှံကို  နှစ်စဉ်မေလနှင့်ဇွန်လများတွင် မြေပဲသီးနှံကို စတင်စိုက်ပျိုးကြပြီး စက်တင်ဘာလနှင့် အောက်တိုဘာလတို့တွင်   ရိတ်သိမ်းထွက်ပေါ်နိုင်သည်။ တောင်သူများမှာ  မိမိတို့၏မြေယာဖြစ်ထွန်းမှု၊  ရာသီဥတုအခြေအနေနှင့် တိရစ္ဆာန်များဖျက်ဆီးစားသောက်မှု အခြေအနေများ အပေါ်မူတည်၍ စိုက်ပျိုးကြသည်။  နေရာဒေသနှင့် မြေအခြေအနေပေါ်မူတည်၍ တချို့မှာ ပင်ပြားပဲမျိုးကို စိုက်ကျင်းဖော်၍ စိုက်ပင်တစ်ကျင်းလျှင် မြေပဲဆံစေ့ ၄၊ ၅ စေ့နှုန်းဖြင့် ထည့်သွင်းစိုက်ပျိုးကြပြီး တချို့မှာလည်း ပင်ထောင်မျိုးကို တန်းဆွဲ၍စိုက်ပျိုးမှုများ လည်းရှိ သည်။ ကျေးရွာများအနေဖြင့် ပင်ထောင်မျိုးများကို အတန်းဆွဲ၍ အတန်းချစိုက်ပျိုးကြပြီး မိုးမြေပဲနှင့်အတူ ပဲစင်းငုံသီးနှံကိုလည်း မြေပဲစိုက်တန်း လေးတန်းလျှင် ပဲစင်းငုံတစ်တန်းဖြင့် သီးညှပ်ထည့်သွင်းစိုက်ပျိုးကြသည်။ အစစအရာရာ ဈေးနှုန်းများမြင့်တက်နေပြီး စိုက်ပျိုးမှုတွင် လည်း ထည့်သွင်းရသည့်သွင်းအားစုဈေးနှုန်းများကြီးမားသည့်အတွက်  ရာသီဥတုကောင်းမွန်စေရန်နှင့် သီးနှံပေါ်ချိန်မှာလည်း ဈေးနှုန်းဈေးကွက်များ ကောင်းရန်မျှော်လင့်ကြောင်း ချိကယ် ကျေးရွာ မြေပဲစိုက်တောင်သူတစ်ဦးကပြောသည်။ ၂၀၂၂ ခုနှစ် ပဲစိုက်ရာသီတွင် မျိုးပဲဈေးနှုန်း အနေဖြင့် ပဲဆံတစ်ပြည်လျှင် ကျပ် ၅၀ဝ၀၊ အတောင့်တစ်တင်းလျှင် ကျပ် ၂၅၀ဝ၀ ဝန်းကျင် သာရှိခဲ့ပြီး ၂၀၂၃ ခုနှစ်တွင် မျိုးပဲဆန်တစ်ပြည်လျှင် ကျပ် ၇၀ဝ၀၊ အတောင့် တစ်တင်းလျှင် ကျပ် ၄၀ဝ၀ဝ ဝန်းကျင်များရှိကြောင်း  ချိကယ်ကျေးရွာမှ ‌မြေပဲစိုက်တောင်သူများထံမှ သိရှိရသည်။

DOCA(ကယား)

 မိတ္ထီလာခရိုင်အတွင်း ၂၀၂၃ခုနှစ်၊ ဇွန်လဆန်း၌ ဈေးကွက်အတွင်းဖြစ်ပေါ်နေသော လယ်ယထွက်ကုန်သီးနှံဈေးနှုန်းများအရ ယခုနှစ်တွင် မနောသုခဆန်တစ်အိတ်လျှင် (၇၅၀၀၀) ကျပ်၊ ပဲတီစိမ်းတစ်တင်းလျှင် (၈၀၀၀၀) ကျပ်၊ ပဲစင်းငုံတစ်တင်းလျှင် (၈၀၀၀၀) ကျပ်၊ နှမ်းနက်တစ်တင်းလျှင်  (၈၀၀၀၀) ကျပ်၊ ကြက်သွန်နီတစ်ပိဿာလျှင် (၁၈၀၀) ကျပ်မှ (၂၀၀၀) ကျပ်ထိ၊ ငရုတ်တစ်ပိဿာလျှင်  (၁၃၀၀၀) ကျပ်၊ ဝါသီးနှံတစ်ပိဿာလျှင်  (၂၈၀၀) ကျပ်ဖြင့် အရောင်းအဝယ်ဖြစ်လျက်ရှိပြီး ယခင်နှစ်တွင် မနောသုခဆန်တစ်အိတ်လျှင် (၅၅၀၀၀) ကျပ်၊ ပဲတီစိမ်းတစ်တင်းလျှင် (၆၀၀၀၀) ကျပ်၊ ပဲစင်းငုံတစ်တင်းလျှင် (၇၅၀၀၀) ကျပ်၊ နှမ်းနက်တစ်တင်းလျှင်  (၆၀၀၀၀) ကျပ်၊ ကြက်သွန်နီတစ်ပိဿာလျှင်  (၃၀၀) ကျပ်မှ (၃၅၀ )ကျပ်ထိ၊ ငရုတ်တစ်ပိဿာလျှင်  (၆၀၀၀) ကျပ်၊ ဝါသီးနှံတစ်ပိဿာလျှင်  (၂၅၀၀) ကျပ်စျေးသာရှိခဲ့ပြီး ယခင်နှစ်နှင့် ယခုနှစ် ကာလတူဈေးနှုန်းတို့ကိုနှိုင်းယှဉ်လျှင် သီးနှံစျေးနှုန်းများမှာ အသီးသီးမြင့်တက်လာသဖြင့် တောင်သူများအတွက် အကျိုးအမြတ်ရရှိ၍ ယခုနှစ်၏ မိုးရာသီတွင် သီးနှံများပိုမိုစိုက်ပျိုးမည်ဖြစ်ကြောင်း တောင်သူများထံမှ သိရပါသည်။

DOCA(မန္တလေး)