ပြည်တွင်းကုန်သွယ်မှုသတင်း

          ကန့်ဘလူမြို့ မြို့မဈေးတွင်လည်းကောင်း၊ ရပ်ကွက်အတွင်းလှည့်လည်ရောင်းချသည့်ဈေးသည်များတွင်လည်းကောင်း ပြောင်းဖူးများကို အစိမ်းနှင့် အပြုတ်ဟူ၍ ရောင်းချလျက်ရှိသည်။ ပြောင်းဖူးများကို ကန့်ဘလူဒေသတွင်းမှလည်းကောင်း၊ ကားဘိုးကျေးရွာမှလည်းကောင်း ဝင်ရောက် လျက်ရှိသည်။

          နေ့စဉ်ရောင်းချလျက်ရှိသော ပြောင်းဖူးအမျိုးအစားမှာ ထိုင်ဝမ်ပြောင်းဖူးအမျိုးအစားဖြစ်ပြီး ပြောင်းဖူးပြုတ်ကို လူကြီးလူငယ်မရွေး သရေစာအဖြစ်စားသုံးကြသလို အိမ်ရှင်မများကလည်း ပြောင်းဖူးအစိမ်းကို ဟင်းချက်ရာတွင်လည်း ထည့်သွင်းချက်ပြုတ်ကြသည်။ ပြောင်းဖူးသည် ကျန်း မာရေးကို အထောက်အကူပြုသည့် ပိုတက်ဆီယမ်၊ သံဓာတ်၊ မဂ္ဂနီဆီယမ်၊ ဇင့်၊ ဖော့ဖရပ်စ်၊ ဖောလစ် အက်ဆစ်၊ ဗီတာမင်C၊ ဗီတာမင်B₁₂၊ ဗီတာမင်E၊ ဗီတာမင်Aနှင့် ဘီတာကယ်ရိုတင်းတို့ ပါဝင်သော ကြောင့် စားသုံးသင့်သော အစားအစာဖြစ်ပါသည်။

          ယခုအခါ ပြောင်းဖူးများကို ကန့်ဘလူမြို့မဈေးတွင် လက်လီ၊ လက်ကားရောင်းချနေသည့် လုပ်ငန်းရှင်တစ်ဦး၏ ပြောပြချက်အရ ပြောင်းဖူးအစိမ်းအကြီး (၁)ဖူးလျှင် (၅၀၀)ကျပ်၊ အသေး(၁) ဖူးလျှင် (၃၅၀)ကျပ်ဖြင့် ရောင်းချလျက်ရှိကြောင်း တစ်ဆင့်ဝယ်ယူပြီး ပြောင်းဖူးများကိုပြုတ်၍ ပြန်လည်ရောင်းချသူများသည် ပြောင်းဖူးပြုတ် အကြီး(၁)ဖူးလျှင် (၁၀၀၀)ကျပ်၊ အသေး (၁)ဖူးလျှင် (၈၀၀)ကျပ်ဖြင့် ရောင်းချလျက်ရှိကြောင်း သတင်းရရှိပါသည်။

DOCA(စစ်ကိုင်း)

         စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်သည် စိုက်ပျိုးရေးလုပ်ငန်းများ ဖြစ်သည့် စပါး၊ပဲမျိုးစုံနှင့် ဆီထွက်သီးနှံတို့ကို အဓိကစိုက်ပျိုးသည့်အပြင် ရာသီစာသီးနှံများနှင့် စားဖိုဆောင်သီးနှံများကိုလည်း စိုက်ပျိုးကြသည်။

       ယခုအခါ ကန့်ဘလူမြို့ပေါ်၊ နတ်ပေးကျေးရွာနှင့် အခြားသောကျေးရွာများတွင် နံနံပင်များ ကိုစိုက်ပျိုးကြကြောင်း၊ နံနံပင်များကို ကန့်ဘလူမြို့မဈေးတွင်ရောင်းချကြောင်း၊ ၂၀၂၅ခုနှစ်၊ မေလ ပထမပတ်အတွင်း နံနံပင်(၁)စည်းလျှင်(၂၀၀)ကျပ်၊ နံနံပင်(၃)စည်းလျှင် (၅၀၀)ကျပ်နှင့် နံနံပင်(၇) စည်းလျှင် (၁၀၀၀)ကျပ်ဖြင့်ရောင်းချကြောင်း၊ နံနံပင်များကို အိမ်ရှင်မများဟင်းချက်ရာတွင်လည်း ကောင်း၊ မုန့်ဟင်းခါးဆိုင်များနှင့် အသုပ်ဆိုင်များမှဝယ်ယူကြသဖြင့် နံနံပင်များအရောင်းအဝယ် သွက်လျက်ရှိကြောင်း မြို့မဈေးရှိ ကုန်စိမ်းရောင်းချသူတစ်ဦးထံမှ သိရှိရပါသည်။

DOCA(စစ်ကိုင်း)

     ပုဇွန်ခြောက်သည် မြန်မာနိုင်ငံတွင် အိမ်သုံးစားသောက်ကုန်အပြင် ရောင်းချလျက်ရှိပြီး အရသာရှိသော စားစရာတစ်ခုဖြစ်ပါသည်။ မြန်မာနိုင်ငံတွင် ပုဇွန်ခြောက်ကို မြစ်ချောင်း၊ အင်းအိုင် နှင့်ကမ်းရိုးတန်းဒေသများတွင် အများဆုံးဖမ်းဆီးထုတ်လုပ်သည်။ ပုဇွန်ခြောက်ထုတ်လုပ်မှုကို ဧရာဝတီတိုင်း၊ ရခိုင်ပြည်နယ်၊ မွန်ပြည်နယ်နှင့်တနင်္သာရီတိုင်းကဲ့သို့သော ပင်လယ်နှင့်နီးသော ဒေသများတွင် ပုဇွန်ခြောက်လုပ်ငန်းကို လုပ်ကိုင်ကြသည်။

      မြင်းခြံမြို့အတွင်းရှိ အေးမြသီတာဈေးတွင် ရောင်းချနေသော ပုဇွန်ခြောက်(အချို) လက်လီ ဈေးများမှာ အသေး ၁၀ ကျပ်သား(၁၂၀၀၀) ကျပ်၊ အလတ် ၁၀ ကျပ်သား(၁၄၀၀၀) ကျပ်နှင့် အကြီး ၁၀ ကျပ်သား (၁၉၀၀၀) ကျပ် ဈေးများဖြင့် အသီးသီးရောင်းချလျက်ရှိသည်။ ပုဇွန်ခြောက်တွင် ခန္ဓာကိုယ်အတွက်အရေးပါသော အာဟာရဓာတ်များကြွယ်ဝစွာပါဝင်ပြီး ကယ်လ်ဆီယမ်နှင့် သံဓာတ်ပါဝင်သောကြောင့် အရိုးနှင့်သွားများကို သန်မာစေခြင်း၊ သွေးအားနည်းရောဂါကို ကာကွယ် ပေးသည်။ ပုဇွန်ခြောက်ကို ဟင်းချိုပြုလုပ်ရာတွင် အခြေခံအဖြစ် အသုံးပြုကြပြီး ငါးပိရည်တွင် ပုဇွန်ခြောက်ထည့်ကာ ငံပြာရည်အဖြစ် စားသုံးလေ့ရှိသလို ပုဇွန်ဘာလချောင်ကြော်၊ ပုဇွန်ငံပြာရည် ကြော် စသည်ဖြင့် အမျိုးမျိုးစားသုံးကြကြောင်း၊ အိမ်ရှင်မများအနေဖြင့် ပုဇွန်ခြောက်ဝယ်ယူသည့် အခါ ကျန်းမာရေးအတွက် သင့်တော်၍ လတ်ဆတ်သော ပုဇွန်ခြောက်များကို ဝယ်ယူစားသုံးသင့် ပေသည်။

DOCA(မန္တလေး)

ဝါးတန်းဆန်စပါးကုန်စည်ဒိုင်သို့ (၅.၅.၂၀၂၅) မှ (၈.၅.၂၀၂၅) နေ့ထိ ဆန်ဝင်ရောက်မှု စာရင်းများမှာ ဧရာဝတီတိုင်းဒေသကြီး ဖျာပုံ၊ မြောင်းမြ၊ ဘိုကလေး၊ လပွတ္တာ၊ မော်ကျွန်း၊ ကျိုက်လတ်၊ ဟင်္သာတ၊ ဓနုဖြူ၊ ပန်းတနော်၊ ညောင်တုန်း၊ အဖျောက်၊ အသုတ်မြို့နယ်များမှ ကြားပျံ (၄၃၆၇) အိတ်၊ ပေါ်ဆန်းမွှေး (၂၉၁၉၁) အိတ်၊ ပေါ်ကျွဲ (၁၀၈၄၅) အိတ်၊ ဧည့်မထ (၁၁၀၇၇၄) အိတ်၊ ဆန်ကွဲ (၁၈၉၈၀) အိတ် ဝင်ရောက်ခဲ့ပြီး ပဲခူးတိုင်း (အရှေ့) ကျောက်တံခါး၊ ညောင်လေးပင်၊ ဖြူးမြို့နယ်များမှ ဧည့်မထ (၆၃၃၆) အိတ် နှင့် ပဲခူးတိုင်း (အနောက်) မြို့နယ်များဖြစ်သော သာယာဝတီ၊ သုံးဆယ်၊ လက်ပံတန်း၊ ကြို့ပင်ကောက်မြို့နယ်များမှ ဧည့်မထ (၂၈၄၃၁) အိတ်၊ ငစိန် (၁၂၉၅) အိတ်နှင့် ရန်ကုန်တိုင်း ပြင်ပမြို့နယ်များဖြစ်သော ကော့မှူး၊ လက်ခုတ် ကုန်း၊ ပျော်ဘွယ်၊ တိုက်ကြီး၊ ခရမ်း၊ သုံးခွ၊ ဥက္ကံ မြို့နယ်များ မှ ဧည့်မထ (၁၈၅၀၀) အိတ်တို့ဝင်ရောက်မှုရှိကြောင်း ဝါးတန်း ဆန်စပါးကုန်စည်ဒိုင်၏ ပြောကြားချက်အရ သိရှိရပါသည်။

DOCA(ရန်ကုန်)

              မန္တလေးပဲမျိုးစုံစျေးကွက်သို့ ဝင်ရောက်လျက်ရှိသည့် ပဲယဉ်းသီးနှံမှာ ပြည်တွင်းစားသုံးမှုနှင့် ပြည်ပသို့တင်ပို့ရောင်းချသည့်စျေးကွက်ဝင်ပဲအမျိုးအစားဖြစ်ပါတယ်။ မန္တလေးတိုင်းဒေသကြီး သည်ပဲသီးနှံမျိုးစုံစိုက်ပျိုးမှုများပြားသည့်တိုင်းတစ်ခုဖြစ်ပြီး၊ ၂၀၂၄-၂၀၂၅ခုနှစ် ပဲယင်းသီးနှံအပါ အဝင်ပဲမျိုးစုံစိုက်ပျိုးမှုမှာ (၁၀၁၉၄၇၇)ဧက ဖြစ်ကြောင်း သိရပါတယ်။ မန္တလေးစျေးကွက် သို့ မန္တလေးတိုင်းဒေသကြီး၊စစ်ကိုင်းတိုင်းဒေသကြီး၊မကွေးတိုင်းဒေသကြီးနှင့်ရှမ်းပြည်နယ်တို့မှထွက် သည့်ပဲယဉ်းသီးနှံများဝင်ရောက်ကြောင်း သိရပါသည်။ မန္တလေးပွဲစား၊ ကုန်သည်၊ စက်ပိုင်များ မဟာကထိန်တော်အသင်းတွင် ၂၀၂၅ခုနှစ် မတ်လပထမပတ်အတွင်း ဖြစ်ပေါ်လျက်ရှိသော ပေါက် စျေးမှာ ၃တင်းဝင်တစ်အိတ်လျှင် ပဲယင်း(ကြီး/လတ်)(သစ်)  ၂၂၀၀၀၀ ကျပ်နှင့် ၂၂၅၀၀၀ ကျပ်၊ ပဲယင်း(သေး)(သစ်) ၂၂၀၀၀၀ ကျပ်နှင့် ၂၂၅၀၀၀ ကျပ်၊ ပဲယင်း(နီ) ၂၅၅၀၀၀ ကျပ်၊ တစ်ပိဿာ စျေးမှာ ပဲယင်း(ကြီး/လတ်)(သစ်) ၃၆၆၇ ကျပ်နှင့် ၃၇၅၀ ကျပ်၊ ပဲယင်း(သေး)(သစ်) ၃၆၆၇ ကျပ်နှင့် ၃၇၅၀ ကျပ်၊ ပဲယင်း(နီ) ၄၂၅၀ ကျပ်တို့ဖြစ်ပြီး၊  ယခင်နှစ်ကာလတူစျေးမှာ ၃တင်းဝင် တစ်အိတ်လျှင် ပဲယင်း(ကြီး)(သစ်) ၁၃၀၀၀၀ ကျပ်နှင့် ၁၃၃၀၀၀ ကျပ်၊ တစ်ပိဿာစျေးမှာ ပဲယင်း (ကြီး)၂၁၆၇ကျပ် နှင့် ၂၂၁၇ ကျပ် ဖြစ်ပေါ်ခဲ့ကြောင်းသိရပါသည်။ ယခုနှစ်စျေးနှင့် ယခင်နှစ် စျေးနှိုင်းယှဉ်ပါကပဲယင်းတစ်ပိဿာလျှင် ၁၅၃၃ ကျပ်စျေးပိုမိုရရှိကြောင်း သိရပါသည်။ စျေးကွက်အတွင်း ပဲယင်းဝင်ရောက်မှု ပမာဏပေါ်မူတည်၍ ရက်အလိုက်ပေါက်စျေးအနည်းငယ်ပြောင်းလဲမှုရှိကြောင်း သိရှိရပါသည်။

DOCA(မန္တလေး)