ပြည်တွင်းကုန်သွယ်မှုသတင်း

    ပြည်ခရိုင်အနေဖြင့် မိုးနှမ်း များကို ဇွန်လဆန်းပိုင်း တွင် စတင် စိုက်ပျိုးပြီး ဩဂုတ်လတွင် စတင်ထွက်ပေါ်လာသဖြင့် ရိတ်သိမ်းခဲ့ပါသည်။ မိုးနှမ်းတစ်ဧက လျှင် စိုက်ပျိုး ထုတ်လုပ် ကုန်ကျ စရိတ်အနေဖြင့် ပျမ်းမျှ(၆၀၀၀၀၀)ကျပ် ခန့် ကုန်ကျပြီး အတွက်နှုန်း အနေဖြင့် (၁၀)တင်းနှုန်း ထွက်ရှိကြောင်း သိရှိရပါသည်။ ယခုအချိန်ဖြစ်သော အောက်တိုဘာလ ဒုတိယအပတ်တွင် နှမ်းနက် တစ်တင်းလျှင်ရောင်းဈေးမှာ (၂၀၀၀၀၀)ကျပ်ဖြင့် ရောင်းချခဲ့သဖြင့် တစ်ဧက ပျမ်းမျှအကျိုး အမြတ် အနေဖြင့် (၁၄)သိန်းကျပ်ခန့်ရရှိသည်ဟု သိရပါသည်။

   မိုးနှမ်းစိုက်တောင်သူများများအနေဖြင့် ယခင်နှစ်တွင် စိုက်ပျိုးထုတ်လုပ် ကုန်ကျစရိတ် အနေဖြင့် တစ်ဧကလျှင် (၅၀၀၀၀၀)ကျပ်ဝန်းကျင် ကုန်ကျ၍ အတွက်တင်းမှာ (၈)တင်းခန့် ထွက်ရှိပါသည်။ တစ်တင်းရောင်းဈေးအနေဖြင့် (၁၀၅၀၀၀)ကျပ်ရရှိသဖြင့် တစ်ဧက အကျိုးအမြတ် မှာ (၃၄၀၀၀၀)ကျပ်သာ ရရှိကြောင်း သိပါသည်။ ယခုနှစ်တွင် ကုန်ကျစရိတ်များပေမယ့် အထွက် နှုန်းကောင်း၊ ဈေးနှုန်းကောင်းသဖြင့် အမြတ်အစွန်းများ ပိုမိုရရှိလာတာဖြစ်ကြောင်း သိရပါ သည်။ ထို့ကြောင့် နောက်နှစ်များတွင်လည်း မိုးနှမ်းစိုက်ဧကကို တိုး၍စိုက်ပျိုးသွားမည်ဖြစ်ကြောင်း သိရပါသည်။

DOCA(ပဲခူး)

  ပဲခူးတိုင်းဒေသကြီး၊ ပြည်ခရိုင်၊ ရွှေတောင်မြို့နယ်၊ ကြို့ကုန်းအုပ်စု၊ ကြို့ကုန်းကျေးရွာနေ ဦးဇော်ဇော်သိန်း၏ ငွေနှင်းမှိုစိုက်ပျိုးထားရှိမှုအား သွားရောက်လေ့လာခဲ့ရာ ငွေနှင်းမှိုပျိုးထုပ် (၁)ထုပ်လျှင် (၇၀၀)ကျပ်ဖြင့် အထုတ် (၁၀၀၀)စိုက်ပျိုးထားပါသည်။ ငွေနှင်းမှိုမှာ ရာသီမရွေး ပွင့်သောမျိုးဖြစ်ပြီး တစ်ထုတ်လျှင် (၃)လအကြာ ခူးဆွတ်နိုင်ပါသည်။ မျိုးထုတ်များရောက်ရှိပြီး  ရေလောင်းပေးရသည်။ မှိုထုတ်(၁)ထုတ်လျှင်  (၃၀)ကျပ်သားခန့်ထွက်ရှိပြီး (၃)လကြာခူးရသည်။ ယခင်နှစ်က မှိုစိုက်ပျိုးရန် အဆောက် အဦစရိတ်မှာ (၁၄)သိန်းခန့်ကုန်ကျပြီး ယခုနှစ်တွင် အအောက်အဦအတွက် ကုန်ကျစရိတ်မရှိပါ။ တစ်ရက်လျှင် (၈)သိန်းခန့်ထွက်ရှိပြီး ဒိုင်မှ အိမ်အရောက် တစ်ပိဿာ (၅၀၀၀)ကျပ်ဖြင့် လာရောက်ဝယ်ယူရပါသည်။ အကျိုးအမြတ်အားဖြင့် တစ်လလျှင် (၁၀)သိန်းခန့်ရှိပြီး စုစုပေါင်း ကျပ် (၁၅)သိန်းခန့် ပတ်ဝန်းကျင်ရှိနိုင်ကြောင်း သိရပါသည်။

DOCA(ပဲခူး)

  ပဲခူးတိုင်းဒေသကြီး၊ ရွှေတောင်မြို့နယ်၊ မီးလောင်အုပ်စု၊ အင်္ဂလှိုင်ဂန်ကျေးရွာရှိ တောင်သူ ဦးတင်အောင်၏ တိုင်ထောင်ပဲစိုက်ခင်းသို့ (၁၃.၁၀.၂၀၂၅)ရက်နေ့၊ နံနက် (၁၀:၀၀)နာရီတွင် သွားရောက် ကွင်းဆင်းလေ့လာခဲ့ပါသည်။ မြားနီမျိုးဖြစ်သော တိုင်ထောင်ပဲများကို စက်တင်ဘာလ အတွင်း စတင်စိုက်ပျိုး၍ အောက်တိုဘာ၊ ဒုတိယပတ်တွင် စတင်ခူးဆွတ်ရပါသည်။ စိုက်ဧက(၁) ယောက်စိုက်ဖြစ်ပြီး တိုင်အရေအတွက်မှာ ၅၀၀ ကျော်ရှိပါသည်။ တစ်ခါခူးဆွတ်လျှင် အတောင့် ၃၅၀၀ ကျော်ခူးဆွတ်ရောင်းချရပါသည်။ ရွာမှ ပွဲစားများမှ တစ်ထောင့်လျှင် (၁၀)ကျပ်နှုန်းဖြင့် လာရောက်ဝယ်ယူပြီး ရန်ကုန်မြို့သို့ တင်ပို့ရောင်းချကြပါသည်။ စတင်စိုက်ပျိုးချိန်မှ ခူးဆွတ်ချိန်ထိ စုစုပေါင်း ကုန်ကျစရိတ်မှာ (၃)သိန်းခန့်ရှိပြီး အကျိုးအမြတ်မှာ ခန့်မှန်း(၆)သိန်းကျော်ရရှိနိုင် ကြောင်း သိရှိရပါသည်။

DOCA(ပဲခူး)

 ရန်ကုန်တိုင်းဒေသကြီး၊တွံတေးခရိုင်၊ကွမ်းခြံကုန်းမြို့နယ်၊စားသုံးသူရေးရာဦးစီးဌာနမှမြို့နယ်တာဝန်ခံနှင့် ဝန်ထမ်းများသည် ရန်ကုန်တောင်ပိုင်းခရိုင်ဦးစီးမှူးရုံး၏ ညွှန်ကြားချက်နှင့် အညီ အခြေခံစားသောက်ကုန်ဈေးနှုန်းများကို စာရင်းကောက်ယူ၍ အပတ်စဉ်တင်ပြလျှက်ရှိရာ  အောက်တိုဘာလ(၂၂)ရက်နေ့၊ နံနက်(၀၈:၃၀)နာရီအချိန်တွင် ကွမ်းခြံကုန်းမြို့နယ် စည်ပင်သာ ယာဈေးအတွင်းသို့ ပူးပေါင်း၍ ကွင်းဆင်းစိစစ်ခဲ့ကြောင်း သိရှိရသည်။

          ထိုသို့ ကွင်းဆင်းစာရင်းကောက်ယူခြင်းဆောင်ရွက်ရာတွင် ကွမ်းခြံကုန်းမြို့နယ် စည်ပင် သာယာရေးအဖွဲ့ ဈေးတာဝန်ခံ ကျန်းမာရေးမှူး-၃ ဦးထွန်းထွန်း၊ စားသုံးသူရေးရာဦးစီးဌာန မြို့နယ်တာဝန်ခံ ဒေါ်နွယ်နွယ်အေးနှင့် ဌာနခွဲစာရေး ဦးတင်ထွန်းဦးတို့ ပူးပေါင်း၍ မြို့မဈေး အတွင်း အခြေခံစားသောက်ကုန်များ ရောင်းချသော ဒေါ်မိုးစန္ဒာ ကုန်စုံဆိုင်၊ ဒေါ်မာမာစိုး ကုန်စုံ ဆိုင်၊ ဒေါ်ရီရီသန်း ကုန်စုံဆိုင်တို့မှ စားအုန်းဆီတစ်ပိဿာလျှင် (၇၁၀၅)ကျပ်၊ မြေပဲဆီတစ်ပိဿာ လျှင်(၂၂၀၀၀)ကျပ်၊ ကြက်သွန်နီဆိုဒ်စုံ တစ်ပိဿာလျှင်(၁၅၀၀မှ ၂၂၀၀)ကျပ်ထိ၊ ကြက်သွန်ဖြူ ရှမ်းစတစ်ပိဿာလျှင်(၈၀၀၀မှ ၁၀၀၀၀)ကျပ်ထိ၊ ငရုပ်တောင့်ရှည် တစ်ပိဿာလျှင် (၁၄၀၀၀မှ ၁၅၀၀၀)ကျပ်ထိ၊ မန်းကျည်းသီးမှည့် တစ်ပိဿာလျှင် (၁၄၀၀၀)ကျပ်၊ အိုင်အိုဒင်းဆားတစ်ထုပ် လျှင် (၈၀၀)ကျပ်၊ ကုလားပဲခြမ်းတစ်ပိဿာလျှင် (၆၅၀၀)ကျပ်၊ သကြားတစ်ပိဿာလျှင် (၅၀၀၀) ကျပ်၊ အာလူးတစ်ပိဿာလျှင် (၇၅၀၀မှ ၈၀၀၀)ကျပ်ထိ အသီးသီးအရောင်းအဝယ် ဖြစ်လျှက် ရှိကြောင်း သိရသည်။

       ယခင်တစ်ပတ်နှင့် ယခုတစ်ပတ်ဈေးနှုန်း နှိုင်းယှဉ်ရာတွင် အာလူးဈေးအနည်းငယ် မြင့်သည်မှလွဲ၍ ကျန်သော အခြေခံစားသောက်ကုန်ဈေးနှုန်းများ ပြောင်းလဲမှုမရှိကြောင်း အာလူးရောင်းအားကောင်း၍ အဝယ်လိုက်လာခြင်းကြောင့် ရန်ကုန်မှဝယ်ယူတင်သွင်းသည့် ဈေးနှုန်းမြှင့်လာခြင်းကြောင့် ဖြစ်ကြောင်း လုပ်ငန်းရှင်များ ပြောကြားချက်အရ သိရှိရပါသည်။

DOCA(ရန်ကုန်)

   ပြည်ဈေးကွက်အတွင်း ငွေနှင်းမှုန်မှိုသည် တစ်နှစ်ပတ်လုံးထွက်ရှိသည့် မှိုအမျိုးအစားဖြစ်ပြီး ပြည်မြို့ပေါ် ရပ်ကွက်အစုံနှင့် နယ်ဘက်၊ ရွာဘက်နေရာစုံတို့တွင် တစ်ပိုင်တစ်နိုင် စိုက်ပျိုးရောင်းချကြကြောင်း သိရှိရသည်။ ပြည် လက်လီဈေးများသို့ တစ်ပတ်လျှင် နေ့စဉ် (၈)ပိဿာ၊ အချိန် (၂၀)ခန့်အဝင်ရှိပြီး ဈေးကွက်အတွင်း အဝင်ရှိသလောက် အရောင်းအဝယ် ဖြစ်ကြောင်းသိရသည်။ ငွေနှင်းမှုန်မှိုကို ကန်စွန်းရွက်နှင့်ရော၍ ကြော်စားခြင်းဖြင့်လည်းကောင်း၊ ငရုတ်သီးစိမ်း၊  မျှင်ငပိနှင့် အစပ်ဟင်းချက်၍လည်းကောင်း၊ ချက်ပြုတ်စားသောက်ကြပြီး သတ်သတ်လွတ်သမားများ အတွက်လည်း အကြိုက်တွေ့စေမဲ့ဟင်းလျာတစ်မျိုးဖြစ်ပါသည်။ ဈေးနှုန်းများမှာ ငွေနှင်းမှုန်မှို (၁၀)ကျပ်သားလျှင် ယခင်နှစ်တွင် (၆၀၀ - ၈၀၀)ကျပ်နှုန်းမှ ယခုနှစ်တွင် ကျပ် (၁၀၀၀-၁၂၀၀)နှုန်းဖြင့် ရောင်းချကြောင်းသိရပါသည်။

DOCA(ပဲခူး)