ပြည်တွင်းကုန်သွယ်မှုသတင်း

    ၆.၁၂.၂၀၂၃ ရက်နေ့တွင်  တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။

   ပဲခူးတိုင်းဒေသကြီး၊ နတ်တလင်းခရိုင်၊ နတ်တလင်းမြို့နယ်အတွင်း၌ ဆောင်းသီးနှံမျိုးစုံစိုက်ပျိုးထုတ်လုပ်လျက်ရှိပါသည်။  ယခုကဲ့သို့ဆောင်းရာသီကာလတွင်   စိုက်ပျိုးထုတ်လုပ်သည့်တောင်သူများ ဝယ်ယူသုံးစွဲချိန်လည်းဖြစ်ပါသည်။

      ၂၀၂၃ ခုနှစ်၊ နိုဝင်ဘာလ တတိယပတ်တွင် နတ်တလင်းမြို့နယ်၌ဖြစ်ပေါ်ခဲ့သော ဓာတ်မြေဩဇာနှင့် ပိုးသတ်ဆေးဈေးနှုန်းများမှာ ရွှေနဂါး ယူရီးယား(လုံးသေး) (၅၀ကီလို) တစ်အိတ်လျှင် (၇၈၀၀၀)ကျပ်၊ သံကွင်းတံဆိပ် တီစူပါ (တရုတ်) (၅၀-ကီလို)တစ်အိတ်လျှင် (၁၁၀၀၀၀)ကျပ်၊ Top One ရွှေနဂါးယူရီးယား (၅၀)ကီလိုတစ်အိတ်လျှင် (၉၀၀၀၀)ကျပ်၊  ရွှေပွား ၁၅;၁၅;၁၅ (၅၀-ကီလို)တစ်အိတ်လျှင် (၁၂၀၀၀၀)ကျပ်၊ ပိုတက် ဂျာမနီ (၅၀-ကီလို)တစ်အိတ်လျှင် (၁၂၀၀၀၀)ကျပ်ဖြင့်ရောင်းဝယ်နေကြောင်း သိရှိရပါသည်။

DOCA(ပဲခူး)

  ပဲခူးတိုင်းဒေသကြီး၊ နတ်တလင်းခရိုင်၊ သဲကုန်းမြို့နယ်၊ ပုတီးကုန်း၊ ဝက်ပုတ်ဒေသများတွင်     ဟင်သီးဟင်းရွက်ဆောင်းသီးနှံစိုက်ပျိုးထုတ်လုပ်သော တောင်သူများနှင့်တွေ့ဆုံကာ သီးနှံများ၏  ဈေးကွက်ဈေးနှုန်းအခြေအနေများနှင့် ရာသီပေါ်သီးနှံများ၏ စိုက်ပျိုးထွက်ရှိမှုများနှင့်ပတ်သက်၍ တွေ့ဆုံမေးမြန်းခဲ့ပါသည်။

    ၂၀၂၃ခုနှစ်၊  နိုဝင်ဘာလ တတိယပတ်တွင် မြင်းခွာရွက်တစ်စည်းလျှင် (၂၀၀)ကျပ်၊ သခွားသီးတစ်လုံးလျှင်  (၃၀၀)ကျပ်၊ ရုံးပတီသီးတစ်တောင့်လျှင် (၁၇)ကျပ်၊ ပဲတောင့်ရှည်တစ်တောင့်လျှင် (၁၀)ကျပ်၊ ခရမ်းကြွပ်သီး တစ်လုံးလျှင် (၁၀)ကျပ်ဖြင့်ရောင်းချရပြီး ယခင်လနှင့်နှိုင်းယှဉ်ပါက ဈေးပိုမို ရရှိပြီး ဆောင်းဦးကာလသီးနှံများ ဈေးကောင်းရ၍ တွက်ခြေကိုက်ကြောင်းသိရှိရပါသည်။

DOCA(ပဲခူး)

   တောင်ငူမြို့နယ်တွင် ထန်းပင်ထန်းတောများပေါများစွာရှိရာ မိရိုးဖလာထန်းလျက်လုပ်ငန်းကိုလည်း တစ်နိုင်တစ်ပိုငလုပ်ကိုင်ကြသူများရှိပါသည်။ တောင်ငူမြို့နယ်၊ ဆင်ဆိပ်ကျေးရွာအုပ်စု၊ ပက်တန်းကျေးရွာရှိ တစ်နိုင်တစ်ပိုင်ထန်းလျက်လုပ်ငန်းဖြင့် မိသားစုအပိုဝင်ငွေရရှိလျက်ရှိပါသည်။ ထန်းလျက်ကို ထန်းရည်အချိုဖြင့်ချက်ရကြောင်း သိရှိရပါသည်။ 

   ထန်းပင်ပေါ်မှချချချင်းတွင် ထန်းရည်အိုး ၇အိုးမှ ၈အိုးခန့်ထန်းရည်အချိုများကိုသန့်စင်ပြီး မိုးဗြဲဒယ်တစ်လုံး၌ထည့်ပြီး မီးပြင်းပြင်းနှင့် ပွက်လာသည့်အထိကျိုပေးပြီး သမအောင်မွှေပေးရပါသည်။ တပြိုင်တည်းတွင် မိုးဗြဲဒယ်သုံးလေးလုံးခန့်ကျိုချက်ပါသည်။ အရည်ပျစ်လာ၍ ထန်းလျက်သားကျသည့်အခါ မီးဖိုပေါ်မှချပြီး ယောက်မကြီးနှင့်ကော်၍ ဓားဖြင့် သုံးမြှောင့်ပုံ အတုံးချွန်ချွန်ပုံစံခုတ်ပေးရပါသည်။

    တောင်ငူထန်းလျက်၏ထူးခြားချက်မှာ အခြားဒေသထန်းလျက်များကဲ့သို့ အလုံးမဟုတ်ဘဲ သုံးမြှောင့်ပုံအတုံးချွန်ချွန်လေးများဖြစ်ပါသည်။ တစ်ဒယ်လျှင် ထန်းလျက် တစ်ပိဿာခွဲခန့်ရကြောင်းသိရပါသည်။ ယခုအခါတွင် ထန်းလျက်တစ်ပိဿာလျှင် ၅၀၀၀ကျပ်ဖြင့်ရောင်းချကြသည်။

  ထန်းရည်ကျိုစဉ်တွင် အုန်းသီးရောကျို၍ အုန်းထန်းလျက်အဖြစ်လည်းကောင်း၊ ဆီးသီးမှုန့်ရောကျို၍ ဆီးထန်းလျက်အဖြစ်လည်းကောင်း ထုတ်လုပ်ကြပါသည်။ အုန်းထန်းလျက်နှင့် ဆီးထန်းလျက်များကို တစ်ပိဿာလျှင် ၇၀၀၀ကျပ်ဖြင့်ရောင်းချကြောင်းသိရှိရပါသည်။

DOCA(ပဲခူး)

    တောင်ငူခရိုင်၊ ဖြူးမြို့တွင် အခြေခံစားသောက်ကုန်များဖြစ်သော ၂၀၂၃ခုနှစ်၊ နိုဝင်ဘာလ နောက်ဆုံးပတ်တွင် မြေပဲဆီမှာ တစ်ပိဿာလျှင် ၁၅၀၀၀ကျပ်ဖြင့် ဈေးနှုန်းအနည်းငယ်ကျပြီး စားအုန်းဆီမှာ တစ်ပိဿာလျှင် ၅၅၀၀ကျပ်ဖြင့် ရောင်းချလျက်ရှိပါသည်။

     ကြက်သွန်နီမှာ နိုဝင်ဘာ တတိယအပတ်တွင် အရွယ်အစားအလိုက် တစ်ပိဿာလျှင် ၃၀၀၀ကျပ်မှ ၄၀၀ကျပ်၊ အာလူးမှာ တစ်ပိဿာလျှင် ၂၅၀၀ကျပ်မှ ၃၀၀၀ကျပ်အထိဖြင့် ဈေးနှုန်းတည်ငြိမ်နေပြီး ကြက်သွန်ဖြူမှာ တစ်ပိဿာလျှင် ၁၀၀၀၀ကျပ်မှ ၁၄၀၀၀ကျပ်အထိဖြင့် ဈေးနှုန်းအနည်းငယ်ကျဆင်းခဲ့ပါသည်။

    ငရုတ်သီးခြောက်မှာ ယခင်နိုဝင်ဘာလ တတိယပတ်တွင် တစ်ပိဿာလျှင် ၁၅၀၀၀ကျပ်မှ ၁၆၀၀၀ကျပ်အထိရှိခဲ့ရာမှ ယခုနိုဝင်ဘာလ နောက်ဆုံးပတ်တွင် တစ်ပိဿာလျှင် ၁၂၀၀၀ကျပ်မှ ၁၅၀၀၀ကျပ်အထိဖြင့် ဈေးနှုန်းအနည်းငယ်ကျဆင်းခဲ့ပါသည်။

      ကုလားပဲခြမ်းမှာ ယခုနိုဝင်ဘာလ နောက်ဆုံးပတ်တွင် တစ်ပိဿာလျှင် ၆၂၀၀ကျပ်ဖြင့် ဈေးနှုန်းတည်ငြိမ်နေပြီး ကုလားပဲလုံးမှာ တစ်ပိဿာလျှင် ၄၅၀၀ကျပ်မှ ၅၀၀၀ကျပ်အထိဖြင့် ဈေးနှုန်းအနည်းငယ်မြင့်တက်ခဲ့ပါသည်။  မြေပဲဆံ (အနီ)မှာ တစ်ပိဿာလျှင် ၇၀၀၀ကျပ်၊ မြေပဲဆံ(အဖြူ)မှာလည်း တစ်ပိဿာလျှင် ၇၀၀၀ကျပ်ဖြင့် ဈေးနှုန်းအနည်းငယ်ကျဆင်းခဲ့ကြောင်းသိရပါသည်။

DOCA(ပဲခူး)