ပြည်တွင်းကုန်သွယ်မှုသတင်း

ကျောက်ဆည်ခရိုင်အတွင်း သီးနှံမျိုးစုံစိုက်ပျိုးဖြစ်ထွန်းပြီး ဆီထွက်သီးနှံများဖြစ်သော နှမ်း၊ နေကြာ၊ မြေပဲများအပြင် စျေးကွက်ဝယ်လိုအားရှိပြီး ကျွဲ၊နွားစာပါဖူလုံသော နှံစားပြောင်းသီးနှံကို လည်းစိုက်ပျိုလျှက်ရှိပါသည်။ မြစ်သားမြို့နယ်တွင် ဇူလိုင်လဆန်းပိုင်းမှစတင်၍ နှံစားပြောင်းသီးနှံ စိုက်ဧက(၄၄၄)ဧက စိုက်ပျိုးပြီးစီးပြီးဖြစ်ကြောင်း သက်ဆိုင်ရာဌာန၏ စာရင်းများအရသိရှိရပါသည်။ မြို့နယ်အတွင်း အများဆုံးစိုက်ပျိုးသောရွာများမှာ ကြောင်ပန်းကုန်းရွာ၊ မကျည်းကန်ရွာ၊ ရိုးကန်ရွာ နှင့် ရစ်ကန်ရွာများတွင် အများဆုံးစိုက်ပျိုးကြကြောင်း၊ စိုက်ပျိုးရာတွင် မျိုးအနေဖြင့် တိုးနီမျိုးများကို အများဆုံး စိုက်ပျိုးကြကြောင်း၊ စိုက်ပျိုးမှုအနေဖြင့် မျိုး(၄)ပြည်စိုက်ပျိုးရပြီး၊ (၁)ပြည်လျှင်(၂၀၀၀/-) ကျပ်ဖြင့် ဝယ်ယူရကြောင်း၊ စိုက်ပျိုးမှုအနေဖြင့် ထယ်စနစ်ဖြင့် စိုက်ကြောင်းဆွဲ အစေ့ချ၊ အတန်း လိုက်စိုက်ပျိုးရကြောင်း၊ စိုက်ပျိုးမှု(၁)ဧက ကုန်ကျစရိတ်အနေဖြင့် မျိုး၊သွင်းအားစု၊ လုပ်သားခ အပါအဝင် စုစုပေါင်း(၃၀၀၀၀၀/-)ကျပ်ခန့်ကုန်ကျကြောင်း ၊ ဇူလိုင်လဆန်းတွင် စတင် စိုက်ပျိုးပြီး နိုဝင်ဘာလတွင် စတင်ထွက်ရှိမည်ဖြစ်ကြောင်း ၊ ယခင်နှစ် အထွက်နှုန်းအနေဖြင့် (၂၅-၃၀) တင်းခန့် ထွက်ရှိကြောင်း၊နှံ စားပြောင်း တစ်တင်းစျေးနှုန်းအနေဖြင့်(၃၀၀၀၀/-) ကျပ်ဖြင့် ရောင်းဝယ်ခဲ့သော ကြောင့် စိုက်ပျိုးစရိတ်နှုတ်ပြီး (၄၅၀၀၀၀/-)ကျပ်ခန့် မြတ်ကြောင်း၊ ယခုလက်ရှိ နှံစားပြောင်း စျေးနှုန်းအနေဖြင့် တစ်တင်းလျှင်(၃၀၀၀၀/-)ကျပ်ဖြင့်ရောင်းဝယ်လျှက်ရှိပြီး ထွက်ပေါ်ချိန်တွင် တောင်သူများမှ ပွဲရုံများသို့ တိုက်ရိုက်တင်ပို့‌ရောင်းချကြပြီး ပွဲရုံများမှတဆင့် မန္တလေး၊ ရန်ကုန်မြို့ များသို့ တင်ပို့ရောင်းချလျှက်ရှိကြောင်း၊နှံ စားပြောင်း စိုက်ပျိုးခြင်းဖြင့် စီးပွားဖြစ်ဝင်ငွေတိုးရုံသာမက ကျွဲ၊ နွားစာပါ ဖူလုံသောကြောင့် တောင်သူများတိုးချဲ့စိုက်ပျိုးသင့်ပါကြောင်း ရေးသားတင်ပြအပ်ပါသည်။ DOCA(မန္တလေး)

မန္တလေးတိုင်းဒေသကြီး၊ ကျောက်ဆည်ခရိုင်အတွင်းတွင် သီးနှံမျိုးစုံကို ရာသီအလိုက် စိုက်ပျိုး ကြပြီး၊ စားဖိုဆောင်သီးနှံများအပြင် ဈေးကွက်ဝယ်လိုအားရှိသော ကွမ်းရွက်သီးနှံကိုလည်း စိုက်ပျိုး လာကြပါသည်။ ကွမ်းရွက်စိုက်ပျိုးမှုအနဖြင့် ခရိုင်အတွင်း (၅၈၂)ဧက စိုက်ပျိုးထားကြောင်း၊ သက်ဆိုင်ရာဌာန၏ စာရင်းများအရ သိရှိရပါသည်။ စိုက်ပျိုးမှု မျိုးအနေဖြင့် ကွမ်းနုဝါ၊ ကွမ်းစိမ်း၊ ကွမ်းကြွပ်မျိုးများဖြစ်ကြောင်း၊ အများဆုံးစိုက်ပျိုးသော မျိုးမှာကွမ်းနုဝါမျိုးများဖြစ်ပြီး စိုက်ပျိုးမှု ပုံစံမှာ အနွယ်ပင်ဖြစ်သောကြောင့် တိုင်ထောင်၊ ခြံခတ်၍ စိုက်ပျိုးရပြီး လေဝင် လေထွက်မှုနှင့် လေဒဏ်ခံနိုင်ရန်အတွက် အုန်းလက်များကာပေးရကြောင်း၊ တစ်ဧက ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၂၀၀၀၀၀၀/-) ကျပ်ခန့် ကုန်ကျကြောင်း၊ အများဆုံး စိုက်ပျိုးသော ရွာများမှာ သံရွာ၊ ရှေ့သပြေသာရွာ၊ ရဲကြီးရွာနှင့် ရွာခိုင်ကြီး ရွာများတွင် အများဆုံး စိုက်ပျိုးကြကြောင်း၊ ကွမ်းစိုက်ပျိုးမှုအနေဖြင့် တစ်နှစ်ပတ်လုံးတွင် မိုးရာသီ စိုက်ပျိုးပါက အပင် အသေအပျောက်နည်းပြီး စိုက်ပျိုးပင်အားလုံး ရှင်သန်နိုင်ကြောင်း၊ စိုက်ပျိုးပြီး (၃)လအကြာတွင် စတင်ခူးဆွတ်နိုင်ပြီးဖြစ်ကြောင်း၊ ကွမ်းခြံတစ်ဧကတွင် တစ်ထောင်ပင် စိုက်ပျိုးပါက တစ်ပတ်လျှင် အချိန် (၁၅-၂၀)ပိဿာအထိ ထွက်ရှိကြောင်း၊ တစ်လကို နှစ်ကြိမ်သာခူးဆွတ်ကြောင်း၊ မိုးနှင့်နွေများ တွင် ကွမ်းရွက်အထွက်အားကောင်းပြီး ဆောင်းတွင်းပိုင်းတွင် အထွက်နည်းကြောင်း၊ ကွမ်းခြံတစ်ခြံ စိုက်ပျိုးထားလျှင် (၅-၆)နှစ်အထိ ခူးဆွတ်ရောင်းချ၍ရကြောင်း၊ ကွမ်းဈေးနှုန်းအနေဖြင့် ကွမ်းနုဝါ အချော တစ်ပိဿာလျှင် လက်ကားဈေး (၃၀၀၀/-)ကျပ်၊ အလတ်တစ်ပိဿာလျှင် (၂၀၀၀/-)ကျပ်၊ အသေးတစ်ပိဿာလျှင် (၁၀၀၀/-)ကျပ် ဈေးများဖြင့် ရောင်းဝယ်လျက်ရှိပြီး၊ ကွမ်းအရော လက်ကား တစ်ပိဿာလျှင် (၂၀၀၀/-)ကျပ်ဖြင့် ရောင်းဝယ်လျက်ရှိကြောင်း၊ ကွမ်းရွက်များကို ခြင်းများဖြင့် ထည့်ကာ ကွမ်းပွဲရုံများသို့ တိုက်ရိုက် တင်ပို့ရောင်းချရကြောင်း၊ ထွက်ရှိမှုအနေဖြင့် တစ်နှစ်လျှင် ပျမ်းမျှပိဿာ (၁၃၂၀)ခန့် ထွက်ရှိကြောင်း၊ တစ်နှစ်ကို စိုက်ပျိုးစရိတ်နုတ်ပြီး (၆၄၀၀၀၀/-)ကျပ်ခန့် မြတ်ကြောင်း၊ ကွမ်းသက်တမ်းကြာရှည်အောင်နှင့် အထွက်နှုန်းမကျအောင် သွင်းအားစုများ ထည့်သွင်း ပေးရကြောင်း၊ ကွမ်းဈေးနှုန်းအတက်အကျရှိသောကြောင့် ဈေးကောင်းရချိန်တွင် အကျိုးအမြတ် ပိုမို ဖြစ်ထွန်းပြီး ဈေးနှုန်းကျဆင်းချိန်တွင်လည်း အရင်းမရှုံးသော သီးနှံဖြစ်သောကြောင့် ကွမ်းစိုက်ပျိုး ခြင်းဖြင့် စီးပွားဖြစ်ဝင်ငွေတိုးကြောင်း ကွမ်းစိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။ DOCA(မန္တလေး)

မန္တလေးတိုင်းဒေသကြီး၊ ကျောက်ဆည်ခရိုင်တွင် သီးနှံမျိုးစုံစိုက်ပျိုးဖြစ်ထွန်းလျက်ရှိပြီး ယခုလို မိုးတွင်းကာလတွင် တောင်ပေါ်ဒေသနှင့် တောင်တန်းများတွင် မျှစ်များထွက်ပေါ်လျက်ရှိရာ မြစ်သား မြို့နယ်၊ ရွာခိုင်ကြီကျေးရွာနှင့် မြင်းရွာကြီးကျေးရွာများတွင် မျှစ်များစတင်ထွက်ရှိလျက်ရှိရာ မျှစ်များ ကို ရွှေတောင်ဦးတောင်နှင့် အနီးတဝိုက်ရှိ ဝါးပင်ပေါက်ရောက်ရာ တောများသို့ သွားရောက် ချိုးယူ၍ ရောင်းချလျက်ရှိရာ မိသားစုစားဝတ်နေရေးအတွက် အပိုဝင်ငွေများရရှိကြောင်း၊ ယခင်နှစ် မျှစ်စိမ်း ဈေးနှုန်းအနေဖြင့် တစ်ပိဿာလျှင် (၁၂၀၀/-)ကျပ်ဖြင့် ရောင်းချခဲ့ရပြီး၊ ယခုလက်ရှိ ပေါက်ဈေး အနေဖြင့် မျှစ်စိမ်းတစ်ပိဿာလျှင် (၂၀၀၀/-)ကျပ်ထိ ရောင်းချခဲ့ရသောကြောင့် မျှစ်ချိုး ရောင်းချသူ များ အဆင်ပြေလျက်ရှိကြောင်း၊ တစ်ရက်လျှင်လူတစ်ဦး မျှစ်စိမ်းဆယ်ပိဿာခန့် ချိုးယူ၍ရကြောင်း၊ ချိုးယူလာသော မျှစ်များကို မျှစ်ဒိုင်သို့ သွင်း၍ရောင်းချလျက်ရှိကြောင်း၊ မျှစ်ဒိုင်များမှတစ်ဆင့် မျှစ်များကို ပြုတ်၍ နီးစပ်ရာဈေးနှင့် ဆိုင်ကယ် ကယ်ရီသမားများသို့ ပြန်လည်ရောင်းချကြကြောင်း၊ မျှစ်ပြုတ်တစ်ပိဿာလျှင် လက်ကား (၂၅၀၀/-)ကျပ်ဖြင့် ရောင်းချပေးပြီး၊ လက်လီတစ်ပိဿာလျှင် (၃၀၀၀/-)ကျပ်ဖြင့် ပြန်လည်ရောင်းချကြောင်း၊ မျှစ်ကို အတို့အမြုပ်အဖြစ် စာသုံးကြသလို အချဉ် ရည်ဟင်း၊ စားတော်ပဲနှင့် မျှစ်ကြော်တို့ကိုလည်း စားသုံးကြကြောင်း၊ မျှစ်ဖြိုင်ဖြိုင်ပေါ်ချိန်တွင် ဈေးနှုန်းကျဆင်းပါက အိမ်ရှင်မများမှ ရေရှည်စားသုံးရန်အတွက် မျှစ်များကို အခြောက်ခံ၍ သိမ်းဆည်းထားကြောင်း၊ မျှစ်စားသုံးခြင်းဖြင့် အူလမ်းကြောင်းကို ကောင်းမွန်စေပြီး ဝမ်းချုပ်မှုကို ကာကွယ်ပေးကြောင်း လေ့လာသိရှိရပါသည်။ DOCA(မန္တလေး)

တောင်ပို့မှိုဟု ဆိုသည့်အတိုင်း တောင်ပို့ရှိရာ မြေအောက်ခြကောင်ရှိသော နေရာများတွင် မိုးဖြိုင်ဖြိုင်ရွာသွန်းသည်နှင့် ပေါက်ရောက်တပ်ပါသည်။ တောင်ပို့မှိုသည် ဈေးကောင်းရသော အစား အစာတစ်မျိုးဖြစ်ကြောင်း၊ တောင်ပို့မှိုကိုတွေ့လျှင် တူရွင်း၊ ပေါက်ပြားများဖြင့် တူးယူခြင်းမပြုပဲ လက်ဖြင့်မှိုများအား နုတ်ယူပါက နောင်နှစ်များတွင်လည်း ၎င်းနေရာ၌ တောင်ပို့မှိုများ ပြန်လည် ထွက်လာကြောင်း၊ ရှေးလူကြီးများ၏ ပြောစကားများတွင် လေ့လာမှတ်သား သိရှိရပါသည်။ ကန့်ဘလူမြို့မဈေးတွင် စိုက်ပျိုးထုတ်လုပ်ရောင်းချသော စိုက်ပျိုးရေးမှို၊ ကောက်ရိုးမှို စသောမှိုများနည်းတူ သဘာဝတောင်ပို့မှိုများ ရောင်းချလျက်ရှိကြောင်း၊ တောင်ပို့မှိုသည် ရာသီဥတု အချိန်အခါနှင့် ပေါက်ရောက်သည့်အတွက် ရှားပါး၍ဈေးကောင်းရကြောင်း၊ ၂၀၂၅ ခုနှစ်၊ ဇွန်လ စတုတ္ထပတ်အတွင်း တောင်ပို့မှို(၁၀)ဖူးပါတစ်စည်းလျှင် (၂၈၀၀)ကျပ်နှင့် တစ်ပိဿာလျှင်(၃၅၀၀၀ မှ ၄၀၀၀၀)ကျပ်အထိ ဈေးကောင်းရရှိနေကြောင်း၊ တောင်ပို့မှိုသည် မိုးဦးကာလတွင် သဘာဝအတိုင်း ထွက်ရှိလာသောမှိုဖြစ်၍ ကျေးလက်နေပြည်သူများ အရင်းမစိုက်ရပဲ မိသားစုဝင်ငွေရရှိ နေကြောင်း သိရှိရပါသည်။ Doca(စစ်ကိုင်း)

စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနသည် စားသုံးသူကာကွယ်ရေးလုပ်ငန်းမျာ ဆောင်ရွက်လျက်ရှိသလို စားသုံးသူများ နေ့စဉ်ဝယ်ယူသုံးစွဲလျက်ရှိသည့် အခြေခံစားသောက်ကုန် များ၏ ဈေးနှုန်း၊ဈေးကွက်အခြေအနေများကို လေ့လာ၍ အပတ်စဉ်၊ လစဉ် အထက်အဆင့်ဆင့်သို့ တင်ပြဆောင်ရွက်လျက်ရှိကြောင်း သိရသည်။ ကန့်ဘလူမြို့နယ်တွင် ရောင်းချလျက်ရှိသည့် ခရမ်းချဉ်သီးများကို မန္တလေးမြို့မှ ဝယ်ယူရ ကြောင်း၊ ၂၀၂၅ ခုနှစ် ၊ ဇွန်လ စတုတ္ထပတ်အတွင်း ကန့်ဘလူမြို့မဈေးတွင် ရောင်းချနေသော ခရမ်းချဉ်သီးဈေးနှုန်းများမှာ ထိုင်ဝမ်အလုံးကြီး(၁)ပိဿာလျှင် (၆၀၀၀)ကျပ်၊ (၁၀)ကျပ်သားလျှင် (၆၀၀)ကျပ်နှင့် အလုံးသေးတစ်ပိဿာလျှင် (၅၇၀၀)ကျပ်ဖြင့်ရောင်းချကြောင်း၊ ခရမ်းချဉ်သီးကို အိမ်ရှင်မများ၊ စားသောက်ဆိုင်များ နှင့်ထမင်းဆိုင်များမှ ဝယ်ယူအသုံးပြုကြကြောင်း၊ ခရမ်းချဉ်သီး ရောင်းချသူထံမှ သိရှိရသည်။ Doca(စစ်ကိုင်း)