ပြည်တွင်းကုန်သွယ်မှုသတင်း

ပဲခူးတိုင်းဒေသကြီး ၊ နတ်တလင်းခရိုင်အတွင်းရှိ  နတ်တလင်း၊ ပေါင်းတည်၊ ဇီးကုန်း၊ သဲကုန်း မြို့နယ်များတွင်း ဆောင်းသီးနှံ ပဲမျိုးစုံကို စိုက်ပျိုးကြရာ ၂၀၂၄-၂၀၂၅ ဘဏ္ဍာနှစ်တွင် နတ်တလင်းခရိုင် အနေဖြင့် မတ်ပဲစိုက်ပျိုးမှု ၁၉၁၁၅၇-ဧက စိုက်ပျိုးနိုင်ခဲ့ပြီး ရေဆင်း-၄၊ ရေဆင်း-၅၊ ရေးဆင်း-၇၊ TBL – 9 မျိုးများကို စိုက်ပျိုးကြောင်း  သက်ဆိုင်ရာ ဦးစီး ဌာနက သိရပါသည်။

ပေါင်းတည်မြို့နယ် ဝဲကြီးကျေးရွာတွင် ရေဆင်း-၅ မျိုးကို စိုက်ပျိုးပြီး တစ်ဧက ကို   ၁၇တင်းနှုန်းခန့် ထွက်ရှိ၍ ယခုနှစ်တွင်ရာသီဥတု အခြေအနေကြောင့် ယခုနှစ်ကထက် အထွက်နှုန်း အနည်းငယ် လျော့နည်းခဲ့ကြောင်း စိုက်ပျိုးစရိတ်ကုန်ကျမှု အနေဖြင့် မျိုး၊ ထွန်ယက်ခ၊ သွင်းအားစု၊ ချွေလှေ့ခ၊ အလုပ်သမားခ အပါအဝင်  စုစုပေါင်း ငွေကျပ် (၇၉၀၀၀၀) ကုန်ကျပါကြောင်း၊ ယခုနှစ်  သီးနှံပေါ်ချိန်တွင် မတ်ပဲ ပိဿာ (၂၀)တစ်တင်း ငွေကျပ် (၉၃၀၀၀)နှုန်းရှိသဖြင့် တစ်ဧကအကျိုး   အမြတ်အနေဖြင့် ငွေကျပ် (၇၉၁၀၀၀)ရရှိပါကြောင်းနှင့် ထွက်ရှိလာသော သီးနှံများကို ဒေသတွင်း ပွဲရုံများတွင်ရောင်းချကြောင်း မတ်ပဲစိုက် တောင်သူတစ်ဦးထံမှသိရပါသည်။

DOCA(ပဲခူး)

ခွေးတောက်ပင် (အသံထွက် ဂွေးတောက်ပင်)သည် သဘာဝ အလျောက်ပေါက်ရောက်တဲ့ နွယ်ပင်အမျိုးအစားဖြစ်ပြီး ပင်စည်လုံး၍ အခေါက်တွင် အညိုရောင်အဖုအစက်များ၊ မြောင်းလေးများ ပါရှိပါသည်။ အရွက်ကတော့ နှလုံးပုံရှိသည့် အကွက်များ   ရွက်ဆိုင်ထွက်ပြီး၊ ရွက်ထိပ်ချွန်ပါတယ်။ မြန်မာ နိုင်ငံအနှံ့အပြားတွင် အများအပြားတွေ့ရသည်။ အသီးသည် အတောင့်ဖြစ်၍ ကြက်သွေးရောင် ရှိသည်။ အရွက်ကို စိမ်းလဲ့လဲ့ အရောင်ရှိသော ဆိုးဆေးမျိုးလုပ်နိုင်၏။ ထိုဆိုးဆေးသည် ဆေးခိုင်သည့် လက္ခဏာ မရှိချေ။ ခွေးတောက်သားသည် ခိုင်မာ၍ လေးလံသည်။ ခွေးတောက်ရွက်သည် ခါးသက်သောအရသာ ရှိ၍ လူတို့ ချက်ပြုတ်စားသောက်ကြပါသည်။

          နှစ်ရင့်ခွေးတောက်ပင်များ အသီးသီးချိန်၌ ရင့်ချိန်တွင်ခူး၍ အစေ့ထုတ်ယူ၍ စိုက်ပျိုးနိုင် ပါသည်။ ခွေးတောက်ပင်ကို စီးပွားဖြစ် ပျိုးထောင်စိုက်ပျိုးခြင်းနှင့် ကိုင်းဖြတ်ပျိုးယူစိုက်ပျိုးခြင်း နည်းလမ်းများ ဖြင့်လည်း စိုက်ပျိုးနိုင်ပါသည်။ သုံးလသားအရွယ်မှစ၍ အညွန့်များကို စတင်ခူးဆွတ် နိုင်ပြီး အညွန့်ထွက် မှုကောင်းလျှင် (၃)ရက်လျှင် တစ်ကြိမ်ခူးဆွတ်နိုင်ပါသည်။ အညွန့်များထွက် စေရန် ခူးသည့်ချိန်၌ အောက်ခြေတွင်ရှိသော နှစ်တက်သုံးတက်လောက်ကို ချန်၍ညှပ်ပေးပါက အကိုင်းအခက် အများအပြား ထွက်လာပြီး အညွန့်များများရမည်ဖြစ်ပါသည်။ ယခုပြည်မြို့ရှိ ဈေးကွက်တွင် ခွေးတောက်ရွက်တစ်စည်း လျှင် အစည်းအကြီး/ အသေးပေါ်မူတည်၍ ကျပ် (၂၀၀) မှ ကျပ် (၃၀၀)အထိရှိကြောင်းသိရှိရပါသည်။

DOCA(ပဲခူး)

          မြန်မာနိုင်ငံအနှံ့အပြားတွင် သဘာဝအလျှောက်ပေါက်ရောက်ပြီး အလွယ်တကူရှာဖွေ တွေ့ရှိနိုင်သည့် ဆေးဖက်ဝင်အပင်တစ်မျိုးကို ပြောပါဆိုလျှင် ပင်စိမ်းကို ပြောရမည်ဖြစ်ပါသည်။ ပင်စိမ်းပင်သည်စိုက်ပျိုးရလွယ်ကူသည်။ နေရာဒေသ၊ ရေမြေမရွေး ပေါက်ရောက် နိုင်သည်။ တစ်ကြိမ်စိုက်လျှင်ပွားသည်။ များလာသည်။ ကျန်းမာရေးအတွက်စားသုံးကြသည်။ ပင်စိမ်းပင် များမှန်သမျှအနံ့ပြင်းသည်။ အရွက်သည်ရွက်ဆိုင်ထွက်၍အပွင့်သည် စင်္ကြာပုံရှိသည်။ ပင်စိမ်းပင်ကို စိုက်ပျိုးမြေမရှိသော မြို့ပြတိုက်ခန်းနေသူများပင် ပန်းအိုး၊ သေတ္တာခွံများဖြင့်စိုက်ပျိုးနိုင်သည်။ မြန်မာနိုင်ငံတွင် ပင်စိမ်းမွှေး၊ ပင်စိမ်းဖြူ(ဟင်းစားပင်စိမ်း)၊ ပင်စိမ်းနက်၊ ပင်စိမ်းညို၊ ပင်စိမ်းကြီးတို့ ပေါက်ရောက်ကြသည်။ ပင်စိမ်းပင်သည် အပူပိုင်းဒေသတွင် ပိုမို၍စိုက်ပျိုးဖြစ်ထွန်းသော ဆေးဘက် ဝင်ဆေးပင်ဖြစ်သည်။ ပင်စိမ်းပင်သည် ဓာတ်မြေဩဇာလည်းထူးကဲ ကျွေးရန်မလို၊ အပင်ပြုစုမှု လည်း လိုအပ်မှုနည်းပါးသည့်အပင်မျိုးဖြစ်ပါသည်။ စီးပွားဖြစ်စိုက်လျှင်မူ ပေါင်းရှင်း၊ မြေဆွ၊ မြေဩဇာ ကျွေးပေးနိုင်လျှင်ပိုကောင်းပါသည်။ ပြည်မြို့ပေါ်နှင့် အနီးတဝိုက်ရှိကျေးရွာများတွင် စိုက်ပျိုးကြပြီး ဈေးနှုန်းမှာ တစ်စည်းလျှင် (၁၀၀-၂၀၀)ကျပ်ရှိပါသည်။

DOCA(ပဲခူး)

          မြန်မာနိုင်ငံတွင် ဖရဲသီးကို ဒေသအနှံ့အပြား၌စိုက်ပျိုးကြပြီး ဖရဲသီးအများဆုံးစိုက်ပျိုးသော ဒေသများမှာ ပဲခူးတိုင်းဒေသကြီး၊ မန္တလေးတိုင်းဒေသကြီး၊ ရန်ကုန်တိုင်း‌ဒေသကြီး၊ စစ်ကိုင်းတိုင်း ဒေသကြီးစသည့်ဒေသများတွင် စိုက်ပျိုးကြပါသည်။ ဖရဲသီးသည် ကျန်းမာရေးအတွက် အလွန် ကောင်းမွန်သော ရာသီစာအသီးတစ်မျိုးဖြစ်ပါသည်။ ဖရဲသီးသည် ယခင်က နွေအခါမှသာပေါ်သော ရာသီစာဖြစ်သော်လည်း ယခုအခါတွင် ရာသီအားလုံး၌စိုက်ပျိုးကြပါသည်။

          ဖရဲသီးများကို ဝယ်ယူရာတွင် အလုံးအကြီး၊ အလတ်၊ အသေးခွဲ၍ ဝယ်ယူရခြင်းများ ရှိပါသည်။ ပဲခူးတိုင်းဒေသကြီး၊ ပြည်မြို့နယ်၊ ဈေးကြီး၌ ၂၀၂၅ခုနှစ်၊ မတ်လဒုတိယအပတ်တွင် ဖရဲသီးအကြီး တစ်လုံးလျှင် (၅၀၀၀)ကျပ်၊ အလတ်တစ်လုံးလျှင် (၄၀၀၀)ကျပ်၊ အသေးတစ်လုံးလျှင် (၃၀၀၀)ကျပ် ဖြင့် ရောင်းချနေကြောင်း သိရှိရပါသည်။

DOCA(ပဲခူး)

          ပဲခူးတိုင်းဒေသကြီး၊ ပြည်ခရိုင်၊ ရွှေတောင်မြို့နယ်၊ မင်းတဲကျွန်းကွက်သစ်တွင် ကန်စွန်းဥ စိုက်ပျိုးခြင်းအား သွားရောက်လေ့လာခဲ့ပါသည်။ ကန်ဇွန်းဥစိုက်ပျိုးရန်အတွက် ပျိုးပင်ထုံးများ ဝယ်ယူစိုက်ပျိုးရပြီး ပျိုးပင်ထုံး (၁)ထုံးတွင် အပင်ရေ (၃၅၀-၄၀၀)အထိရှိ၍ (၁)ထုံးလျှင် (၇၅၀၀)ကျပ် ပေးရပါသည်။ သွားရောက်ကွင်းဆင်းသောကန်စွန်းဥစိုက်ခင်းတွင် (၁၅)ထုံး စိုက်ပျိုးထားပြီး (၂)လခွဲကြာလျှင် တူးဖော်လို့ရ ပြီဟု သိရပါသည်။ ကန်စွန်းဥများထွက်ပေါ်ချိန်တွင် ပိဿာ (၃၅၀-၄၀၀)ပတ်ဝန်းကျင် ခန့်ထွက်ရှိသည်ဟုသိရပါသည်။ ထွက်ရှိသည့် ကန်ဇွန်းဥများကို ပြည်၊ ဥသျှစ်ပင်၊ ရွှေတောင်ဈေးများ ဖောက်သည်သမားများကလာရောက်ဝယ်ယူပြီး ဈေးနှုန်းမှာ တစ်ပိဿာ လျှင် (၁၃၀၀)ကျပ်ပေးရပါသည်။ စိုက်ပျိုးသည့်အချိန်တွင် ပျိုးထုံးများကို တယ်ထိုးပြီးအခင်းတွင် စိုက်ပျိုးလိုက်ယုံဖြစ်ပြီး ရေလောင်းခြင်း၊ မြေဩဇာကျွေးခြင်း၊ ပိုးသတ်ဆေးဖျန်းခြင်းစသည့် သွင်းအားစု ကုန်ကျစရိတ်မရှိပါ၊ အကျိုးအမြတ်အားဖြင့် (၃)သိန်း၊ (၃)သိန်းခွဲ ပတ်ဝန်းကျင်ရှိကြောင်း သိရပါသည်။

DOCA(ပဲခူး)