ပြည်တွင်းကုန်သွယ်မှုသတင်း

            တနင်္သာရီတိုင်းဒေသကြီး၊ ထားဝယ်ခရိုင်တွင် စိုက်ပျိုးရေးကို အခြေခံ၍ သီးနှံမျိုးစုံအား စိုက်ပျိုးသည့်ဒေသဖြစ်သည်။ ငရုတ်သီးကိုရာသီအလိုက် စိုက်ပျိုးကြသည်။

            ငရုတ်သီးအစိုဈေးနှုန်းအနေဖြင့် ယခင်နှစ်တွင် တစ်ပိဿာ၄၅၀၀ မှ ၅၀၀၀ ကျပ်ဝန်းကျင်ရှိခဲ့ရာ ယခုကာလ ပေါက်ဈေးမှာ ကျပ် ၆၀၀၀ မှ ၇၀၀၀ ထိ ဈေးနှုန်းများဖြင့် အရောင်းအဝယ် ဖြစ် နေ ကြောင်း သိရှိရသည်။ ငရုတ်သီးအခြောက် ဈေးနှုန်းအနေဖြင့် ယခင်နှစ်တွင် တစ်ပိဿာ ၁၀၀၀၀ မှ ၁၂၀၀၀ ကျပ် ဝန်းကျင်ရှိခဲ့ရာ ယခုကာလပေါက်ဈေးမှာ ကျပ် ၁၄၀၀၀ မှ  ၁၆၀၀၀ ဈေးနှုန်း များ ရှိ ကြောင်း သိရှိရသည်။ ယခုအချိန်အခါတွင်  ငရုတ်စိုက်ခင်းများ၌ အဖူးအပွင့် ဝေဝေဆာဆာဖြင့် အောင်မြင်ဖြစ်ထွန်းလျက်ရှိရာ တောင်သူများအနေဖြင့် ယခုကာလ ပေါက်ဈေးနှင့်ဆိုလျှင် အကျိုး အမြတ်ရရှိနိုင်ကြောင်း ငရုတ်စိုက်တောင်သူတစ်ဦး၏ ပြောပြချက်အရ သိရှိရပါသည်။

DOCA(တနင်္သာရီ)

              ဗမာခရမ်းချဉ်သီးဆိုသည်မှာ မြန်မာနိုင်ငံတွင် စိုက်ပျိုးသည့်ရာသီပေါ်ခရမ်းချဉ်သီး အမျိုး အစားတစ်ခု ဖြစ်ပြီး အရသာရှိတဲ့အပြင် အာဟာရဓာတ်ကြွယ်ဝသည်။

            ထားဝယ်မြို့ရှိ စည်ပင်သာယာဈေးတွင် ဗမာခရမ်းချဉ်သီး လက်လီတစ်ပိဿာ လျှင်(၅၀၀) ကျပ်မှ (၁၀၀၀)ထိ‌ရောင်းချလျက်ရှိပါသည်။ ဗမာခရမ်းချဉ်သီးများသည် ရာသီဥတုနှင့်မြေဆီလွှာ အခြေအနေပေါ်မူတည်၍ အရည်အသွေးကောင်းမွန်ပြီး ဈေးကွက်တွင် ဝယ်ယူမှုများပြားလျက်ရှိသည်။ ယခုအချိန်တွင် ဗမာခရမ်းချဉ်သီးများ လှိုင်လှိုင်ထွက်ပေါ်ချိန်ဖြစ်သောကြောင့် ဈေးကွက်တွင် ဝယ်ယူစားသုံးမှု များပြားလျက် ရှိကြောင်းသိရှိရပါသည်။

DOCA(တနင်္သာရီ)

            တနင်္သာရီတိုင်းဒေသကြီး၊ ထားဝယ်မြို့သည် စိုက်ပျိုးရေးလုပ်ငန်းများဖြစ်သည့် ရာသီစာသီးနှံများနှင့် စားဖိုဆောင်သီးနှံများကိုလည်း စိုက်ပျိုးကြသည်။ယခုအခါ ထားဝယ်မြို့ပေါ်ကျေးရွာနှင့် အခြားသောကျေးရွာများတွင် ကန်စွန်းရွက်များကို စိုက်ပျိုးကြကြောင်း၊ ကန်စွန်းရွက်များကို ကမ်းနား ဈေးနှင့်အခြားဈေးငယ်များတွင်ရောင်းချကြောင်း၊ ၂၀၂၅ ခုနှစ်၊ မတ်လ တတိယပတ်အတွင်း ကန်စွန်းရွက်(၁)စည်းလျှင်(၄၀၀)ကျပ်၊ ကန်စွန်းရွက်(၃)စည်းလျှင်(၁၀၀၀)ကျပ်ဖြင့်ရောင်းချကြောင်း  ကန်စွန်းရွက်များကို  အိမ်ရှင်မများဟင်းချက်ရာတွင်လည်းကောင်း၊ စားသောက်ဆိုင်များနှင့် အထောင်းစုံရောင်းသည့်ဆိုင်များမှ ဝယ်ယူကြသဖြင့်ကန်စွန်းရွက်များ အရောင်းအဝယ်သွက်လျက်ရှိကြောင်းကုန်စိမ်းရောင်းချသူတစ်ဦးထံမှ သိရှိရပါသည်။

DOCA(တနင်္သာရီ)

 စစ်ကိုင်းတိုင်းဒေသကြီး၊ မုံရွာမြို့နယ်ရှိ ကျေးရွာများ၌ သီးနှံမျိုးစုံ စိုက်ပျိုးလျက်ရှိပြီး မြေအမျိုးအစားမရွေး ဖြစ်ထွန်းအောင်မြင်ပြီး စိုက်ပျိုးရန်လွယ်ကူသော နှစ်ရှည်ပင် သီးနှံတစ်မျိုး ဖြစ်သည့် ကီလိုမာလကာသီးကို ဘုမ္မနိုးကျေးရွာတွင် စီးပွားဖြစ် တစ်ပိုင်တစ်နိုင် စိုက်ပျိုးကြကြောင်း သိရသည်။

        ၎င်းကီလိုမာလကာမျိုးအနေဖြင့် ၇-၈ လသားအရွယ်ရှိ ကိုင်းကူးပျိုးပင်များကို ပျိုးပင်ကြီး တစ်ပင် လျှင် (၂၀၀၀)ကျပ်၊ အသေးတစ်ပင်လျှင် ၁၀၀၀ ကျပ်မှ ၁၅၀၀ ပေးဝယ်ရပြီး  အစိုဓာတ် ကောင်းမွန်စွာ ရရှိသည့် စက်တင်ဘာလနှင့် အောက်တိုဘာလများတွင် စိုက်ပျိုးကြကြောင်း၊ စိုက်ပျိုးမှုအနေဖြင့် ပင်ခြား တန်းခြား ၈ ပေ အကွာဖြင့် စိုက်ဧက တစ်ဧကလျှင် ကီလိုမာလကာပင် ၃၅၀ ခန့် စိုက်ပျိုး ရကြောင်း၊ စိုက်ပျိုးမှုကုန်ကျစရိတ်အနေဖြင့် မြေဘောင်တင်ခြင်း၊ မြေပြုပြင်ခြင်း၊ မျိုး၊ သွင်းအားစု၊ ရေတင်သွင်းခြင်း၊ လုပ်သားခအပါအဝင် တစ်ဧကလျှင် စုစုပေါင်း ငွေကျပ် သိန်း ၅၀ ခန့် ကုန်ကျကြောင်း၊ ကီလိုမာလကာပင် စိုက်ပျိုးပြီး အသီးကင်းချိန်တွင် အားဆေး၊ ပိုးသတ်ဆေး (၂) ကြိမ်ဖျန်းပေးရပါကြောင်း၊ အသီးများ ပေးသီးအရွယ်အစားခန့် ရှိပါက စက္ကူ အကြည် အိတ်ဆွတ်ပေးရပါကြောင်း၊ အပင်ငယ်ချိန်တွင် တစ်လလျှင် ရေ(၂)ကြိမ်၊ ဆောင်းရာသီတွင် (၁) ကြိမ်၊ နွေရာသီတွင် ရေလောင်း၊ ရေသွင်းခြင်းဖြင့် အပင်များကို ပြုစုပေးပါက တစ်နှစ်သား အရွယ်ခန့်တွင် အသီးများကို စတင်ခူးဆွတ်နိုင်ပြီး ကီလိုမာလကာသီးများကို တစ်နှစ်ပတ်လုံး ရရှိနိုင်ကြောင်း၊ အထွက်နှုန်းအနေဖြင့် မြေအနေ အထားနှင့် အပင်ဖြစ်ထွန်း အောင်မြင်မှုအပေါ် မူတည်၍ တစ်နှစ်လျှင် ကီလိုမာလကာ တစ်ပင်အတွက် ပျမ်းမျှ အလုံးရေ ၁၀၀-၁၂၀ ခန့် ထွက်ရှိရာ  တစ်ဧက အတွက် ပျမ်းမျှအလုံးရေ ၃၅၀၀၀ မှ ၄၀၀၀၀ လုံး ထွက်ရှိကြောင်း၊ မတ်လတတိယအပတ်တွင် ကီလိုမာလကာသီး လက်ကားဗြွန်ရောင်းရဈေး ကျပ် ၃၀၀-၃၅၀ နှုန်းဖြင့် ရောင်းချရပြီး  လက်လီရောင်းချလျှင် တစ်လုံး(၅၀၀) ကျပ်ဖြင့် ရောင်းချရပါကြောင်း၊ တစ်နှစ်လျှင် ကီလိုမာလကာ သီးတစ်ဧက ဗြွန်ရောင်းရငွေမှာ ကျပ် ၁၀၀ သိန်းခန့်ရရှိပြီး အကျိုးအမြတ်အနေဖြင့် ကျပ်( ၅၀)  သိန်းကျော်ရရှိပါကြောင်း၊ ဈေးကွက်အနေဖြင့် ဒေသတွင်းနှင့် စိုက်ခင်းသို့ ပွဲစားများမှ ဖောက်သည် လာယူခြင်း၊ မုံရွာသစ်သီးဆိုင်များသို့ တင်ပို့ရောင်းချကြကြောင်း သိရသည်။

DOCA(စစ်ကိုင်း)

           ပုသိမ်မြို့ပေါ်တွင် ပြည်တွင်းဈေးကွက် ဝယ်လိုအားရှိသော ကံ့ကော်ပန်းခြောက်များကို ကံ့ကော်ပန်းပွင့်ချိန် မတ်လမှစတင်၍ ဝယ်ယူလျက်ရှိပြီး မေလအထိသာ အရောင်းအဝယ်ဖြစ်ကြောင်း ကံ့ကော်ပန်းခြောက်များကို သာပေါင်းမြို့နယ်၊ ချောင်းသာ၊ ဟိုင်းကြီးကျွန်းနှင့် ပုသိမ်မြို့ပေါ်မှ လာရောက်ရောင်းချလျက် ယခင်နှစ်က ကံ့ကော်ပန်းခြောက် တစ်ပိဿာကို ကျပ် ၁၅၀၀/၂၀၀၀ နှုန်းဖြင့် ပုသိမ်မြို့ပေါ် အဝယ်ဒိုင်မှဝယ်ယူလျက်ရှိပြီး ပြည်တွင်းဈေးကွက် အသုံးပြုရန် ရန်ကုန်မြို့သို့ တင်ပို့ ရောင်းချလျက်ရှိကြောင်း သိရသည်။

             ကံ့ကော်ပင်က လေထုကိုသန့်စင်ပေးသလို ကံ့ကော်ပန်း၊ အရွက်နှင့်အခေါက်အားလုံးက ဆေးဖက်ဝင်ကြောင်း ကျန်းမာရေးနှင့်ပတ်သက်၍ ကံ့ကော်ပန်းခြောက်ကို အသုံးပြုရာတွင် အဖျား သက်သာစေရန် ကံ့ကော်ပန်းပြုတ်ရည် အသုံးပြု၍ရသလို ပန်းအခြောက်မှုန့်ကိုလည်း အသုံးပြုနိုင်ကြောင်း၊ ကံကော်ဝတ်ဆံကိ သနပ်ခါးထဲထည့်၍ လိမ်းပါက ဝက်ခြံ၊ အမာရွတ်တွေ သက်သာစေပြီး အသားအရေလှပနိုင်ကြောင်း၊ အစာချေစနစ်ကောင်းမွန်စေရန်၊ အသက်ရှုလမ်းကြောင်း ကောင်းမွန်စေရန်၊ ဝမ်းကိုက်ဝေဒနာ၊ အဆစ်ရောင်နာ၊ လေးဖက်နာ၊ ဆီးရောဂါဝေဒနာ၊ အရေပြားယားယံ၊ အသားအရောင်မညီတာ စသည့်ရောဂါများအတွက် မြန်မာ့တိုင်းရင်းဆေးဖော်စပ်ရာတွင် ကံ့ကော်ပန်းခြောက်ကို အမျိုးမျိုးထည့်သွင်းအသုံးပြုလျက်ရှိပြီး မြန်မာ့ရိုးရာသနပ်ခါးဘူးများတွင်လည်း သဘာဝအမွှေးအနံရရှိစေရန် ကံကော်ပန်းခြောက်ကိုထည့်သွင်းအသုံးပြုလျက်ရှိကြောင်းနှင့် ယခုနှစ်တွင် တစ်ပိဿာလျှင် ၃၀၀၀ ကျပ်နှုန်းဖြင့် ဝယ်ယူလျက်ရှိပြီး ယခင်နှစ်ထက် ဈေးနှုန်းပိုမိုရရှိကြောင်း ဈေးကွက် မှသိရှိရပါသည်။

DOCA(ဧရာဝတီ)