ပြည်တွင်းကုန်သွယ်မှုသတင်း

   ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်ရှိဈေးကွက်များတွင်ရုံးပတီသီး ရှားပါး၍ ဈေးကောင်းရလျက်ရှိသည်။ ရုံးပတီပင်ကိုစိုက်ပျိုးပြီး(၄၅)ရက်အကြာတွင် ခူးဆွတ်ရောင်းချ၍ ရပြီး သက်တမ်းအားဖြင့် (၃)လကြာမြင့်သည်အထိခူးဆွတ်နိုင်ပါသည်။ ယခင်ကရုံးပတီသီးဈေးကွက်၊ ဈေးနှုန်းများအနေဖြင့်ကုန်စိမ်းပွဲစားများက စိုက်ခင်းထဲထိဆင်း၍ဝယ်ယူကြ၍ တစ်တောင့်လျှင် လက်ကားဈေး (၈)ကျပ်နှုန်းဖြင့်ရောင်းချကြောင်းသိရပါသည်။

   ယခုရုံးပတီသီး ပြည်ဈေးကွက်မှာ လက်လီဈေးတစ်တောင့်လျှင် (၄၀)ကျပ်နှုန်းဖြင့် ရောင်းချလျက်ရှိပြီး အတောင့်(၁၀၀)လျှင် ၄၀၀ကျပ်၊ (၅)တောင့်လျှင် (၂၀၀)ကျပ် အထိ ရောင်းချလျက်ရှိပြီး များသောအားဖြင့် ရွှေတောင်မြို့နယ်ရှိရွာများမှ ရုံးပတီသီးစိုက်ပျိုးသူများထံမှ အများဆုံးတင်သွင်းလျက်ရှိကြောင်း သိရှိရပါသည်။

DOCA(ပဲခူး)

         ပြည်ခရိုင်၊ ပြည်မြို့နယ်ရှိ မှော်ဇာကျေးရွာအုပ်စုတွင် စပါး၊ပဲ၊ပြောင်းတို့ကို အဓိကထား စိုက်ပျိုး ကြသလို ဟင်းသီးဟင်းရွက်ဖြစ်သော သခွားသီးကိုလည်းစိုက်ပျိုးကြပါသည်။ သခွားသီးကို မိုးသခွားသီး နှင့် ‌ဆောင်းသခွားသီးဟူ၍နှစ်မျိုးကိုရာသီအလိုက်စိုက်ပျိုးကြပါသည်။ သခွားသီးကို မြေအမျိုးမျိုးတွင် စိုက်ပျိုးနိုင်သော်လည်းနုန်းမြေ၊ သဲနုန်းမြေ၊ နုန်းစနယ်မြေများတွင် ပိုမိုဖြစ်ထွန်းပါသည်။ မိုးသခွားသီးကို မိုးရာသီဖြစ်သော မေလနှင့်ဇွန်လတို့တွင် စိုက်ပျိုးကြသလို ဆောင်းသခွားသီးကိုဆောင်းရာသီဖြစ်သော အောက်တိုဘာလနှင့်နိုဝင်ဘာလတို့တွင် စိုက်ပျိုးကြ ပါသည်။ သခွားသီးတစ်ဧကစိုက်ပျိုးလျှင် သခွားသီး အလုံးရေ(၂)ထောင် ကျော်ထွက်ရှိသည် ဟုသိရှိရပါသည်။

          ပြည်မြို့နယ်အတွင်းရှိဈေးကွက်များတွင် သခွားသီးများကို အချိန်မရွေး ရောင်းချနေသော် လည်း ယခုအချိန်ဖြစ်သော မိုးတွင်းကာလတွင် မိုးသခွားများပေါ်ချိန်ဖြစ်ပေမယ့် စိုက်ခင်းများတွင် ရေများဝင်ရောက်မှုရှိသဖြင့် ထွက်ရှိမှုနည်း၍ သခွားသီးဈေးများအနည်းငယ်မြင့်တက်လာပါသည်။ သခွားသီးဈေးနှုန်းအနေဖြင့် ယခင်နှစ်က အသေးတစ်လုံးလျှင် (၅၀-၁၀၀)ကျပ်ရှိခဲ့ပြီး  သုပ်၍စားရသောအရွယ်တစ်လုံးလျှင် (၂၅၀-၃၀၀)ကျပ်ရှိခဲ့ပြီး ယခုနှစ်တွင် သခွားသီးအသေးတစ်လုံးလျှင်(၂၀၀-၂၅၀)ကျပ်ရှိပြီး သုပ်၍စားရသောအရွယ်တစ်လုံးလျှင် (၈၀၀)ကျပ်ဖြင့် ဈေးကွက်အတွင်း ရောင်းချ နေကြကြောင်းသိရှိရပါသည်။

DOCA(ပဲခူး)

    မြက်မျိုးရင်းဝင် အပင်တစ်မျိုးဖြစ်ပြီး အကြီးဆုံးနဲ့ အရှည်ဆုံးသော မြက်မျိုးရင်းဝင် အပင် တစ်မျိုးဖြစ်ပြီး ၎င်းကိုရက်သတ္တနှစ်ပတ် အရွယ်မတိုင်ခင် အမြင့်တစ်ပေ မပြည့်ခင်မှာ ခူးဆွတ်ထားတဲ့ ဝါးပင်ရဲ့ သားတက်လေးတွေပဲ ဖြစ်ပါသည်။ စားလိုက်ရင် ခပ်ကြွပ်ကြွပ်လေးနဲ့ စားကောင်းပြီး ထမင်း မြိန်စေပါသည်။ ယခုလို မိုးဉီးကျကာစ ကာလတွင် မျှစ်စို့လေးတွေ ပေါက်တဲ့အချိန်ဖြစ်ပြီး ရာသီစာ လည်းဖြစ် အိမ်ရှင်မများအတွက်လည်း ရာသီပေါ်ဟင်းလျာကောင်း တစ်မျိုးလည်းဖြစ်ပါသည်။ ပေါက်ခါစ မျှစ်စို့သည်နုသည်။ ချိုသည့်အရသာရှိသည်။ မျှစ်မှာလည်း အမျိုးအစား အများကြီး ရှိပါသည်။  လွယ်ကူစွာ ချက်ပြုတ်နိုင်တဲ့ ဟင်းလျာဖြစ်တာကြောင့် မျှစ်ကိုနှစ်ခြိုက်စွာ စားသုံးကြပါ သည်။ မျှစ်ကို အမျိုးမျိုး လုပ်စားနိုင်ပါသည်။ မျှစ်သည် အာဟာရဓါတ်များစွာပါပြီး မျှစ်ကြိုက်တဲ့ သူများအတွက် ကြော်ပဲစားစား၊ သုပ်ပဲစားစား၊ ဟင်းချို အဖြစ်ချက်သောက်တာ၊ အသားတစ်မျိုးမျိုးနဲ့ ကြော်စားနိုင်သည့်အပြင်  ပြုတ်၍လည်း ငပိရည်နဲ့တို့ စားကျပြီး  ကျန်းမာရေးအတွက်လည်း လွန်စွာ အထောက်အကူပြုလှပါသည်။ စားသုံးသူ ပြည်သူများအနေဖြင့် အမြင်လှအောင် မျှစ်ကိုအရောင် ဆိုးထားသည့် တားမြစ်ဆေးဆိုးထားသည့် မျှစ်များကို ရှောင်၍စားသုံးစေချင်ပါသည်။ ပေါ်ဦးပေါ်ဖျား ဖြစ်သည့် မျှစ်နုကို ပြည်မြို့အနီးတဝှိက် ရှိကျေးရွာများမှ အလေ့ကျပေါက်သော မျှစ်နုများကို ပြည်မြို့ မြို့မစည်ပင်သာယာဈေးကြီးနှင့် အခြား ဈေးများတွင် ရောင်းချလျက်ရှိပြီး ရာသီပေါ်ဖြစ်သည့်အတွက် ဈေးကောင်းရပြီး အရောင်း အဝယ်ဖြစ် ကြောင်းသိရပါသည်။ မျှစ်နုတစ်ပိဿာလျှင် (၁၁၀၀၀) ကျပ်ထိ ဈေးကောင်းရပြီး လက်လီဝယ်စားသူ အတွက် မျှစ်တစ်ဆယ်သားလျှင် ကျပ် (၁၂၀၀) ပေးဝယ်ရကြောင်း သိရှိရပါသည်။

DOCA(ပဲခူး)

    မန္တလေးတိုင်းဒေသကြီး ၊ ကျောက်ဆည်ခရိုင်တွင် ဆီထွက်သီးနှံမျိုးစုံ စိုက်ပျိုးလျက်ရှိရာ နေကြာသီးနှံကိုလည်း တောင်သူများမှ သီးထပ်သီးညှပ်စိုက်ပျိုးသည့်အပြင် သီးသန့်ဧကအလိုက် စိုက်ပျိုးလျှက်ရှိပါသည်။ ၂၀၂၅-၂၀၂၆ဘဏ္ဍာနှစ်တွင် ခရိုင်အတွင်း၌ နေကြာ(မိုး) စိုက်ပျိုးမှုအနေဖြင့် ကျောက်ဆည်မြို့နယ်တွင်(၆)ဧက၊ စဉ့်ကိုင်မြို့နယ်တွင်(၁၆၄၇) ဧက၊စုစုပေါင်း(၁၆၅၃)ဧကစိုက်ပျိုး ထားရှိကြောင်း၊ ခရိုင်ကြေးတိုင်နှင့်မြေစာရင်းဦးစီးဌာန၏ စာရင်းများအရသိရှိရပါသည် ။ နေကြာ (မိုး)စိုက်ပျိုးမှု(၁)ဧက ကုန်ကျစရိတ်အနေဖြင့် မျိုး၊သွင်းအားစု၊လုပ်သားခအပါအဝင်(၂၅၀၀၀၀)ကျပ် ခန့်ကုန်ကျကြောင်း၊နေကြာ(မိုး)ကို မတ်လနှင့်ဧပြီလများတွင် စတင်စိုက်ပျိုးကြပြီး ယခုအချိန်တွင် နေကြာပင်များ အောင်မြင်ဖြစ်ထွန်းလျှက်ရှိကြောင်း ၊ ယခင်နှစ် နေကြာဈေးနှုန်းအနေဖြင့် တစ်တင်းလျှင်(၃၄၀၀၀/-)ကျပ် ဈေးနှုန်းရှိခဲ့ပြီး ယခုနှစ်တွင် နေကြာများ ထွက်ပေါ်ခြင်းမရှိသေးသော်လည်း နေကြာတစ်တင်းလျှင်(၆၀၀၀၀/-)ကျပ်ဈေးနှုန်းများဖြင့် အရောင်းအဝယ်ဖြစ်နေကြောင်း ၊ နေကြာများထွက်ပေါ်ချိန်တွင် အထွက်နှုန်းနှင့်ဈေးနှုန်းကောင်းမွန်ပါက အကျိုးအမြတ် ပိုမိုရရှိမည်ဖြစ် ကြောင်း နေကြာစိုက်ပျိုးသော တောင်သူတစ်ဦး၏ ပြောကြားချက်အရသိရှိရပါသည်။

DOCA(မန္တလေး)

     မန္တလေးတိုင်းဒေသကြီး ၊ ကျောက်ဆည်ခရိုင်သည် သီးနှံမျိုးစုံအောင်မြင်ဖြစ်ထွန်းလျက်ရှိရာ ၎င်းသီးနှံများအနက် ပဲတီစိမ်း(မိုး)ကို ၂၀၂၅-၂၀၂၆ ဘဏ္ဍာနှစ်တွင် ကျောက်ဆည်မြို့နယ်တွင် (၃၂၉၆)ဧက စိုက်ပျိုးပြီးစီးပြီဖြစ်ကြောင်း ခရိုင်ကြေးတိုင်နှင့်မြေစာရင်းဦးစီးဌာန၏ စာရင်းများအရ သိရှိရပါသည်။ ပဲတီစိမ်း(မိုး)ကို မတ်လနှင့်ဧပြီလများတွင် စတင်စိုက်ပျိုးကြပြီး ဇွန်လနှင့်ဇူလိုင်လများတွင် စတင်ခူးဆွတ်ရကြောင်း သိရှိရပါသည်။ စိုက်ပျိုးရာတွင် မျိုးအနေဖြင့် ကျောက်စိမ်းမျိုးနှင့် ရေဆင်း(၁၁)မျိုးကိုအများဆုံးစိုက်ပျိုးကြပြီး တစ်ဧကလျှင် မျိုးစေ့(၅-၆)ပြီခန့် ကုန်ကျကြောင်း ၊ ပဲတီစိမ်းမျိုးဈေးနှုန်းအနေဖြင့် တစ်ပြီလျှင် (၈၀၀၀)ကျပ်ဈေးနှုန်းဖြင့် ဝယ်ယူ စိုက်ပျိုးရပြီး တစ်ဧက ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် ၊ စုစုပေါင်း(၃၀၀၀၀၀/-) ကျပ်ခန့် ကုန်ကျကြောင်း၊ ယခုအချိန်တွင် ပဲတီစိမ်းအပင်များ အောင်မြင်ဖြစ်ထွန်းလျက်ရှိကြောင်း၊ ယခင်နှစ် ဈေးနှုန်းအနေဖြင့်ပဲ တီစိမ်းတစ်တင်းလျှင်(၅၅၀၀၀)ကျပ် ဈေးနှုန်းရှိခဲ့ပြီး  အထွက်နှုန်းအနေဖြင့် (၁၁-၁၂)တင်းခန့်ထွက်ရှိကြောင်း အကျိုးအမြတ်အနေဖြင့် (၃၀၀၀၀၀)ကျပ် မြတ်ခဲ့ကြောင်း၊ ယခုနှစ် တွင်ပဲတီစိမ်းများ ထွက်ပေါ်ခြင်းမရှိသေးသော်လည်း ပဲတီစိမ်းတစ်တင်းလျှင်(၇၀၀၀၀)ကျပ်ဈေးနှုန်း များဖြင့် အရောင်းအဝယ်ဖြစ်နေကြောင်း ၊ ပဲတီစိမ်းထွက်ပေါ်ချိန်တွင် အထွက်နှုန်းနှုန်းနှင့်ဈေးနှုန်း ကောင်းမွန်ပါက အကျိုးအမြတ်ပိုမိုရရှိမည်ဖြစ်ကြောင်း ၊ ပဲတီစိမ်း စိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)