ပြည်တွင်းကုန်သွယ်မှုသတင်း

     စစ်ကိုင်းတိုင်းဒေသကြီး၊ ရွှေဘိုခရိုင်၌ ၂၀၂၃ခုနှစ်၊ ဩဂုတ်လ၊ စတုတ္ထအပတ်တွင် နွေစပါးနှင့် ဆန်ဈေးနှုန်းများမှာ ယခင်အပတ်ဈေးနှုန်းများတိုင်း ဈေးနှုန်းငြိမ်လျက်ရှိကြောင်း၊ ဩဂုတ်လ၊ စတုတ္ထအပတ်တွင် ၂၀၂၃ခုနှစ်ထွက် နွေစပါး ရွှေဝါထွန်းစပါး တင်း(၁၀၀)လျှင် (၁၉၀၀၀၀ဝိ/)ကျပ်နှင့် ဆန်တစ်အိတ်လျှင် (၈၀၀၀ဝိ/-)ကျပ်ဈေးနှုန်းဖြင့် ယခင်အပတ်ဈေးနှုန်းများအတိုင်း အရောင်းအဝယ်ဖြစ်လျက်ရှိကြောင်းသိရသည်။

   ယခင်နှစ်ကာလတူတွင် ရွှေဝါထွန်းစပါး တင်း(၁၀၀)လျှင် (၁၀၀၀၀၀ဝိ/-)ကျပ်နှင့် ဆန်တစ်အိတ်လျှင် (၄၀၀၀ဝိ/-)ကျပ်သာပေါက်ဈေးရှိခဲ့သဖြင့် ယခင်နှစ်ကာလတူနှင့် အရောင်း အဝယ်ဖြစ်သည့်ဈေးနှုန်းတို့ကိုနှိုင်းယှဉ်ပါက ယခုနှစ်တွင် ယခင်နှစ်ကာလတူထက် ရွှေဝါထွန်းစပါး တင်း(၁၀၀)လျှင် (၉၀၀၀၀ဝိ/-)ကျပ်နှင့် ဆန်တစ်အိတ်လျှင် (၄၀၀၀ဝိ/-)ကျပ်ဈေးနှုန်းမြင့်တက်ခဲ့ကြောင်း၊ ယခုအပတ်တွင် ဆန်တစ်အိတ်ဈေးနှုန်းနှင့် စပါးဈေးနှုန်းများမှာ ယခင်အပတ်နည်းတူ ဈေးငြိမ်နေသော်လည်း ဆန်အိတ်များမှာ ပုံမှန်အတိုင်း အရောင်းအဝယ်ဖြစ်လျက်ရှိပြီး ကုန်ကြမ်းဖြစ်သည့်စပါးမှာ ဈေးသာရှိပြီး ရောင်းချမှုအနည်းငယ်သာရှိကြောင်း ဆန်စက်ပိုင်နှင့် ကုန်သည်များထံမှ သတင်းရရှိပါသည်။

DOCA(စစ်ကိုင်း)

    မုံရွာမြို့တွင် အိမ်ဆောက်ပစ္စည်းအရောင်းဈေးကွက်၌ ဩဂုတ်လ (စတုတ္ထပတ်) တွင် သံချောင်းလုံးနှင့် ဘိလပ်မြေများမှာ အရောင်းအဝယ်ပုံမှန်ရှိနေကြောင်းသိရှိရသည်။ သံချောင်းလုံး ၃မူးတစ်တန်လျှင် ကျပ်၁၇၃၀၀၀၀၊ ၅မူးတစ်တန်လျှင် ကျပ်၁၆၂၀၀၀၀၊ ၆မူးတစ်တန်လျှင် ကျပ် ၁၇၀၀၀၀၀ဈေးဖြင့် အရောင်းအဝယ်ဖြစ်ခဲ့ကြောင်း၊ ဘိလပ်မြေဈေးကွက်၌ ကြံ့နှစ်ကောင်တစ်အိတ်လျှင် ကျပ်၉၄၀၀၊ အပါချီတစ်အိတ်လျှင် ကျပ်၉၂၀၀၊ Crown တစ်အိတ်လျှင် ကျပ်၉၅၀၀ဈေးနှုန်းဖြင့် အရောင်းအဝယ်ဖြစ်နေကြောင်းကို မုံရွာမြို့ရှိ အိမ်ဆောက်ပစ္စည်းရောင်းဝယ်ရေးဆိုင်များမှ စုံစမ်းသိရှိရသည်။

     မုံရွာမြို့ရှိ ဓာတ်မြေဩဇာဈေးကွက်မှာ ယခုဩဂုတ်လ (စတုတ္ထပတ်) တွင် အာမို(၁၅:၁၅:၁၅) ၅၀ကီလိုဂရမ်ပါ တစ်အိတ်လျှင် ကျပ်၁၅၃၀၀၀၊ နိုက်ထရိုဖော်စကာ(ဩဘာ) ၅၀ကီလိုဂရမ် တစ်အိတ်လျှင် ကျပ်၁၅၆၀၀၀နှင့် ပန်းဖူး(ရွှေပျား ) ၅၀ကီလိုဂရမ်ပါ တစ်အိတ်လျှင် ကျပ်၈၈၀၀၀ဈေးနှုန်းများဖြင့် အရောင်းအဝယ်ဖြစ်နေကြောင်းသိရပါသည်။ ယခင်အပတ်နှင့်နှိုင်းယှဉ်လျှင် ဆောက်လုပ်ရေးပစ္စည်းများဖြစ်သော သံချောင်းလုံးဈေးနှုန်းများမြင့်တက်၍ ဘိလပ်မြေဈေးနှုန်းမှာ အနည်းငယ်ကျဆင်းသွားကြောင်း၊ စိုက်ပျိုးရေး‌ဆေးဈေးနှုန်းများမှာ အနည်းငယ်မြင့်တက်လျက်ရှိကြောင်း အိမ်ဆောက်ပစ္စည်းရောင်းဝယ်ရေးဆိုင်များနှင့် စိုက်ပျိုးရေးဆေးဆိုင်များမှသိရှိရပါသည်။

DOCA(စစ်ကိုင်း)

    စစ်ကိုင်းတိုင်းဒေသကြီး၊ မုံရွာမြို့နယ်တွင် ငှက်ပျောတိုးချဲ့စိုက်ပျိုးလာကြပြီး  မိမိတို့အိမ်ခြံဝင်းအတွင်း တစ်နိုင်တစ်ပိုင်အနေဖြင့်လည်းကောင်း၊ အပိုဝင်ငွေရရှိရန်အတွက်လည်းကောင်း စီးပွားဖြစ်စိုက်ပျိုးကြကြောင်းသိရသည်။

    ဒေသတွင်းဖီးကြမ်းငှက်ပျော(ရိုးရိုး)နှင့် ဖီးကြမ်း(ကျောက်စိမ်း) စသည့် မျိုး(၂)မျိုးကိုသာအများဆုံးစိုက်ပျိုးကြပြီး ငှက်ပျောသားပေါက်များကို တစ်ပင်လျှင် ၃၅၀ကျပ်နှုန်းဖြင့် ကနီမြို့နယ်မှ ဝယ်ယူစိုက်ပျိုးကြောင်း၊ စိုက်ပျိုးပုံမှာ တစ်ဧကလျှင် အပင်ရေ(၈၀၀)ခန့်စိုက်ပျိုးကြောင်း၊ မစိုက်မီ ထယ်နှစ်စပ်ထိုး၍ တစ်ပင်နှင့်တစ်ပင်အကြား ၉ပေခန့်အကွာအဝေးဖြင့် ရေသွင်းစိုက်ပျိုးကြောင်း၊ စိုက်ပင် ၁၅ရက်သားတွင် အရွက်မထွက်သည့်အပင်များကို ထိပ်ဖွင့်ပြီး ၂၀ရက်သားတွင် အပင်မပေါက်သည်များကို ဖာထေး၍ ၃၅ရက်သားတွင် ရိုလာစက်ဖြင့် ပေါင်းသတ်ပေးပြီး ၄၅ရက်သားတွင် ထယ်တစ်စပ်ထိုးကာ ရေသွင်းပေးရကြောင်း၊ ငှက်ပျောစိုက်ပင် (၁၀)လသားအထိ တစ်လလျှင် တစ်ကြိမ် ထယ်တစ်စပ်ထိုး၊ ရေတစ်ကြိမ်သွင်းပြီး သားပင်များကို တံစဉ်ဖြင့် ထိပ်ဖြတ်ပေးရကြောင်း၊ ငှက်ပျောပင်(၁၃)လသားအရွယ်တွင် ၎င်းအပင်အားလုံးမှာ အခိုင်ထွက်ပြီး တစ်ပင်လျှင် တစ်ခိုင်၊ တစ်ခိုင်လျှင် (၁၀) ဖီးခန့်ပါရှိပြီး ရောင်းတန်းဝင်သည့်ငှက်ပျောဖီး(၅)ဖီးရယူကြောင်း၊ မြေဆီမြေသားကောင်းမွန်မှုနှင့် ရေရရှိမှုအပေါ်မူတည်၍ (၅)နှစ်မှ (၇)နှစ်ခန့်အထိ ရောင်းတန်းဝင်ငှက်ပျောခိုင်များထွက်ရှိကြောင်း၊ ထွက်ရှိသောငှက်ပျောများကို မြို့ပေါ်ရှိကုန်သည်များက ခြံအရောက် တစ်ဖီးလျှင် (၁၀၀၀-၁၂၀၀) ကျပ်နှုန်းဖြင့် လာရောက်ဝယ်ယူကြပြီး မြို့တွင်းလက်လီဈေးများတွင် ပြန်လည်ရောင်းချမှုများရှိသောကြောင့် ငှက်ပျောစိုက်တောင်သူများအနေဖြင့် ဈေးကောင်းရရှိပြီး တွက်ခြေကိုက်ကာ အဆင်ပြေနေကြကြောင်းသိရပါသည်။

DOCA(စစ်ကိုင်း)                                                       

    အောင်လံကုန်စည်ဒိုင်တွင် နှမ်းဈေးကွက်အနေဖြင့် (၄၅)ပိဿာဝင် (၁)အိတ်လျှင်  ယခင်အပတ် (၁၆-၈-၂၀၂၃)ရက်နေ့တွင် နှမ်းနက်(စမုံ)မှာ ကျပ်(၂၉၀၀၀၀-၃၁၀၀၀၀)ဖြစ်ခဲ့ပြီး ယခုအပတ် (၂၃-၈-၂၀၂၃) ရက်နေ့တွင် ကျပ်(၃၁၀၀၀၀-၃၅၀၀၀၀)ဖြစ်၍ ကျပ်(၂၀၀၀၀-၄၀၀၀၀) ဈေးမြင့်ခဲ့ပြီး နှမ်းနီမှာ ယခုအပတ်တွင် ကျပ်(၃၁၀၀၀၀)ဈေးနှုန်းရှိခဲ့ပါသည်။ အရောင်းအဝယ်ပမာဏအနေဖြင့် နှမ်းနက်(စမုံ) (၁၉၀၀)အိတ်၊ နှမ်းနီ (၂၃၀)အိတ်တို့ အရောင်းအဝယ်ရှိခဲ့ပါကြောင်း အောင်လံကုန်စည်ဒိုင်မှသိရှိခဲ့ရပါသည်။

     ပဲမျိုးစုံဈေးကွက်တွင် မတ်ပဲမှာ (၂၀)ပိဿာဝင် (၁)တင်းလျှင် ယခင်အပတ်တွင် ကျပ်(၇၅၀၀၀)ဖြစ်ခဲ့ပြီး ယခုအပတ်တွင် ကျပ်(၇၆၅၀၀)ဖြစ်၍ ကျပ်(၁၅၀၀)ဈေးမြင့်ခဲ့ကြောင်း၊ ကုလားပဲ(H-L)(၁)တင်းလျှင် ယခင်အပတ်တွင် ကျပ်(၉၁၀၀၀)ဖြစ်ခဲ့ပြီး ယခုအပတ်တွင် ကျပ်(၉၂၀၀၀)ဖြစ်၍ ကျပ်(၁၀၀၀)ဈေးမြင့်ခဲ့ကြောင်း၊ ကုလားပဲ(မြကြေး)(၁)တင်းလျှင် ယခင်အပတ်တွင် ကျပ်(၉၀၀၀၀)ဖြစ်ခဲ့ပြီး ယခုအပတ်တွင် ကျပ်(၉၂၀၀၀)ဖြစ်၍ ကျပ်(၂၀၀၀)ဈေးမြင့်ခဲ့ကြောင်း၊ ပဲကြီး(၁)တင်းလျှင် ယခင်အပတ်တွင် ကျပ်(၉၄၀၀၀-၉၅၀၀၀)ဖြစ်ခဲ့ပြီး ယခုအပတ်တွင် ကျပ်(၉၅၀၀၀-၉၉၀၀၀)ဖြစ်၍ ကျပ်(၁၀၀၀-၄၀၀၀) စသည်ဖြင့် အသီးသီးဈေးမြင့်ခဲ့ပါသည်။ ပဲတီစိမ်းမှာ ယခင်အပတ်တွင် ကျပ်(၅၂၀၀၀-၅၆၀၀၀)ဖြစ်ခဲ့ပြီး ယခုအပတ်တွင် ကျပ်(၄၅၀၀၀-၅၃၀၀၀)ဖြစ်၍ ကျပ်(၇၀၀၀ မှ ၃၀၀၀အထိ) ဈေးလျော့ခဲ့ပြီး အရောင်းအဝယ်ပမာဏအနေဖြင့် (၃၀)ပိဿာဝင်အိတ်များဖြင့် မတ်ပဲ (၂၈၀)အိတ်၊ ကုလားပဲ(H-L)(၅၅၀)အိတ်၊ ကုလားပဲ(မြကြေး)(၄၀၀) အိတ်၊ ပဲကြီး (၃၅၀)အိတ်၊  ပဲတီစိမ်း(၄၅၀)အိတ်တို့ အရောင်းအဝယ်ရှိခဲ့ပါသည်။

    မြေပဲလုံးဆံဖြူမှာ (၁)ပိဿာလျှင် ယခင်အပတ်တွင် ကျပ်(၇၃၅၀)ဖြစ်ခဲ့ပြီး ယခုအပတ်တွင် ကျပ်(၇၄၀၀)ဖြစ်၍ ကျပ်(၅၀)ဈေးမြင့်ခဲ့ကြောင်း၊ သီးနှံအသစ်များအဖြစ် ပဲစဉ်းငုံနီ၊ မြေပဲလုံးဆံနီ၊ မြေပဲတောင့်အစိုတို့ထွက်ရှိလာပြီး ယခုအပတ်တွင် ပဲစဉ်းငုံနီ (၂၀)ပိဿာဝင် (၁)တင်းလျှင် ကျပ်(၁၁၃၀၀၀)၊ မြေပဲလုံးဆံနီ (၁)ပိဿာလျှင် ကျပ်(၉၄၀၀)၊ မြေပဲတောင့်အစို (၁)တင်းလျှင် ကျပ်(၂၃၀၀၀ မှ ၂၅၀၀၀)အထိဈေးနှုန်းဖြစ်ပေါ်လျက်ရှိပြီး အရောင်းအဝယ်ပမာဏအနေဖြင့် (၃၀)ပိဿာဝင် အိတ်များဖြင့် ပဲစဉ်းငုံနီ(၃၀၀)အိတ်၊ မြေပဲလုံးဆံနီ(၁၂၅)အိတ်၊ မြေပဲလုံးဆံဖြူ (၅၅၀)အိတ်၊ မြေပဲတောင့်အစို တင်း(၃၀၀၀)ခန့်အရောင်းအဝယ်ရှိခဲ့ပါကြောင်းနှင့် နှမ်း၊ ပဲမျိုးစုံသီးနှံများအား ရန်ကုန်မြို့နှင့် မန္တလေးမြို့များသို့ တင်ပို့ရောင်းချရပါကြောင်း အောင်လံကုန်စည်ဒိုင်မှသိရှိရပါသည်။

DOCA(မကွေး)

    ခရမ်းချဉ်သီးကို ကယားပြည်နယ်၊ လွိုင်ကော်မြို့နယ်ရှိ မိုင်းလုံးရပ်ကွက် ၊ မှုံပြာ၊ လင်ဖုံကျေးရွာတွင်လည်း စိုက်ပျိုးထွက်ရှိပြီး အခြားဒေသ  ပင်လောင်း၊  အောင်ပန်းမြို့များမှလည်း မှာယူ ရောင်းချလျက်ရှိပါသည်။

    ယခု ဩဂုတ်လတတိယပတ်တွင် ဈေးကွက်အတွင်းဖြစ်ပေါ်နေသော ခရမ်းချဉ်သီးဈေးနှုန်းမှာ တစ်ပိဿာလျှင်(၂၀၀၀)ကျပ် ဈေးဖြင့်အရောင်းအဝယ်ဖြစ်လျက်ရှိပြီး  ဩဂုတ်လဒုတိယပတ်တွင် ခရမ်းချဉ်သီးဈေးနှုန်းမှာ တစ်ပိဿာ(၁၃၀၀)ကျပ်ဖြင့် ရောင်းချခဲ့ရာ ဩဂုတ်လ ဒုတိယပတ်နှင့် တတိယပတ်ဈေးနှုန်းကို နှိုင်းယှဉ်ကြည့်လျှင် ခရမ်းချဉ်သီး တစ်ပိဿာ (၇၀၀) ကျပ်ခန့်မြင့်တက်လာကြောင်း နောင်ယားဈေးရှိ ခရမ်းချဉ်သီးရောင်းချသော ဈေးသည်တစ်ဦးထံမှ သိရပါသည်။

DOCA(ကယား)