ပြည်တွင်းကုန်သွယ်မှုသတင်း

   ရွှေတောင်မြို့နယ်၏ ဒေသထွက်အစားအစာများထဲတွင် ရေဥသည် တစ်ခုပါဝင်သောအစားအစာဖြစ်ပါသည်။ ရေဥသည် ရေသန့်ကန်များတွင် အလေ့ကျပေါက်ရောက်ပြီး ရေမှော်များနှင့်အတူ ပေါက်ရောက်တတ်သဖြင့် ဆယ်ယူရာ၌ ရေမှော်များကိုဖယ်ရှား၍ စကာများဖြင့် ဆယ်ယူရပါသည်။  ရေဥများကို (၅)ရက် (သို့) တစ်ပတ်ကြာလျှင် တစ်ကြိမ်ဆယ်ယူရပါသည်။ ရေဥသည် အအေးကြိုက်ပြီး အပူကိုကြောက်သောကြောင့် နွေရာသီတွင် အထွက်နည်းတတ်ပါသည်။ မိုးရာသီတွင် အထွက်အများဆုံးဖြစ်ပြီး ဆောင်းရာသီတွင် ပုံမှန်သာပေါက်ရောက်ကြပါသည်။ ဆယ်ယူပြီးသောရေဥများကို သန့်စင်အောင် ရေဖြင့်ပြန်လည်ဆေးကြောပြီး ပီနံအိတ်ထဲသို့ထည့်ကာ တစ်ညခန့်ရေစစ်ထားရပါသည်။ ရေစစ်ပြီးသောရေဥများကို ပြန်လည်ဖြန့်ထားရပြီး ဖြန့်ထားသောအချိန်များတွင် ရေဥများသည် လေသလပ်တတ်သဖြင့် အညိုရောင်သို့ပြောင်းသွားလျှင် ပြန်လည်မွှေပေးလိုက်သောအခါ အစိမ်းရောင်အဖြစ်ပြောင်းလဲသွားပါသည်။ ရေဥသည် နုလျှင်အလုံးသေးငယ်၍ ချက်၍စားလျှင် အရည်ပျော်လွယ်ပြီး ရင့်လျှင် ချက်ပြုတ်စားရာ၌ သင့်တော်ပါသည်။ ရေဥကိုချက်၍ စားသောအခါတွင် အိုးချခါနီးတွင် ရှောက်ရွက်လေးများကို ပါးပါးလှီးထည့်၍စားပါကလည်း အလွန်ကောင်းကြောင်းသိရပါသည်။ အလှမွေးငါးများကို မွေးမြူသူများကလည်း ရေဥကို ငါးစာအဖြစ်ကျွေးရန်ဝယ်ယူကြပါသည်။ ရေဥကို ဈေးကွက်တင်၍ရောင်းချရာတွင် နယ်မြို့များနှင့် ရန်ကုန်မြို့သို့ တင်ပို့မည်ဆိုပါက ရေဥကိုသေသေချာချာထုပ်ပိုးပြီး ရေခဲပုံးများတွင် ရေခဲများထည့်၍ ပို့ဆောင်ကြပါသည်။ ဈေးနှုန်းအနေဖြင့် ရေဥတစ်ပြည်လျှင် ဖောက်သည်ဈေးမှာ ရေဥသန့်လျှင်  (၇၀၀)ကျပ် မှ(၈၀၀)ကျပ်အထိရှိပြီး လက်ကားဈေးမှာ နို့ဆီဘူးတစ်ဘူးလျှင် (၁၀၀)ကျပ်မှ (၁၅၀) ကျပ်အထိရောင်းချကြောင်းသိရပါသည်။

     ရေဥသည် သဘာဝမှရရှိသော အစားအစာတစ်မျိုးဖြစ်သဖြင့် ဆယ်ယူ၍ရောင်းချလျှင် ဈေးဖိုးကာမိသဖြင့် တချို့သူများက ဆယ်ယူ၍ရောင်းချကြောင်းသိရပါသည်။

DOCA(ပဲခူး)

        ၂၀၂၃ ဩဂုတ်လတွင် ကရင်ပြည်နယ်နယ်၌ သွင်းအားစုမြေဩဇာအချို့ ဈေးနှုန်းအနည်းငယ်တက်ခဲ့ကြောင်း သိရသည်။

     ၂၀၂၃ ခုနှစ် ဇူလိုင်လနောက်ဆုံးအပတ်တွင် ဖြစ်ပေါ်ခဲ့သောဈေးနှုန်းနှင့် ယခုလ ဒုတိယအပတ်အတွင်း ဖြစ်ပေါ်ခဲ့သောဈေးနှုန်းများ နှိုင်းယှဉ်ချက်အရ 15-15-15 ၅၀ ကီလိုတစ်အိတ် လျှင် ယခင် ၁၃၅၀၀၀ ကျပ် မှ ၁၄၅၀၀၀ ကျပ်ဖြင့် တစ်အိတ်လျှင် ၁၀၀၀၀ ကျပ်ဖြင့်လည်းကောင်း၊ ရွှေကောမတ် 20-12-12  ၅၀ကီလို တစ်အိတ်လျှင် ယခင် ၁၁၀၀၀၀ကျပ်မှ ယခု ၁၁၅၀၀၀ ကျပ်ဖြင့် တစ်အိတ်လျှင် ၅၀၀၀ ကျပ်ဖြင့်လည်းကောင်း၊ THAI ၅၀ကီလိုတစ်အိတ်လျှင် ၇၅၀၀၀ကျပ်မှ ၈၅၀၀၀ ကျပ်ဖြင့် တစ်အိတ်လျှင် ၅၀၀၀ ကျပ်ဖြင့်လည်းကောင်း၊  ပုလဲသာရွှေနဂါး ၅၀ကီလို တစ်အိတ်လျှင် ယခင် ၇၃၀၀၀ ကျပ်မှ  ယခု ၇၈၀၀၀ ကျပ်ဖြင့် တစ်အိတ်လျှင် ၅၀၀၀ ကျပ်ဖြင့်လည်းကောင်း အသီးသီး ဈေးတက်ခဲ့ပြီး ဂျစ်ဆန်၊ ဆိုက်ပါ၊ အလန်း 15W၊ ဆာလဖာတို့မှာ ဈေးနှုန်းတည်ငြိမ်လျက်ရှိကြောင်း သိရသည်။

DOCA(ကရင်)

(၂၂.၈.၂၀၂၃)ရက်နေ့အတွက်  တိုင်းဒေသကြီး/ပြည်နယ်များ၏ စပါးဆန်ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ပြုစုထားမှုကို အောက်ပါ .pdf file တွင် ဝင်ရောက်ကြည့်ရှုနိုင်ပါသည် -

  မွန်ပြည်နယ်၊ စားသုံးသူရေးရာဦးစီးဌာန၊ မုဒုံမြို့နယ်တာဝန်ခံသည် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးဦးစီးဌာနတို့နှင့်ပူးပေါင်း၍ (၁၇-၈-၂၀၂၃) ရက်နေ့တွင်    မုဒုံမြို့နယ်၊ မြို့မဈေးအနောက်ဘက်၌  စားသောက်ကုန်ပစ္စည်းများကို ဒေသခံပြည်သူများအား စိုက်ပျိုး၊ မွေးမြူ၊ ထုတ်လုပ်၊ ဖြန့်ဖြူးသူများ၏ ဈေးနှုန်းသက်သာစွာရောင်းချပေးနေမှုအား ကြည့်ရှုစစ်ဆေးခဲ့ကြောင်းသိရှိရပါသည်။

   ထိုသို့ရောင်းချပေးရာတွင် ဆန်တစ်ပြည်လျှင် (၂၅၀၀) ကျပ်၊ ဝက်သားတစ်ပိဿာလျှင် (၁၃၅၀၀) ကျပ်၊ အမဲသားတစ်ပိဿာလျှင် (၁၃၀၀၀) ကျပ်၊ ကြက်သားတစ်ပိဿာလျှင် (၁၀၀၀၀) ကျပ်၊ ပုစွန်တစ်ပိဿာလျှင် (၂၀၀၀၀) ကျပ်၊ ဆိတ်သားတစ်ပိဿာလျှင် (၂၁၀၀၀) ကျပ်၊ ဆီတစ်ပိဿာလျှင် (၅၀၀၀) ကျပ်၊ ကြက်ဥတစ်လုံးလျှင် (၂၅၀) ကျပ်၊ ငါးတန်တစ်ပိဿာလျှင် (၄၅၀၀) ကျပ်၊ ငါးမြစ်ချင်းတစ်ပိဿာလျှင် (၇၄၀၀) ကျပ်၊ ပလာတူးနှင့် ငါးဖမ်းမတစ်ပိဿာစီလျှင် (၄၀၀၀) ကျပ်၊ ငါးနှပ်တစ်ပိဿာလျှင် (၂၅၀၀) ကျပ်နှင့် ဟင်းသီးဟင်းရွက်အမျိုးမျိုးတို့ကိုရောင်းချပေးခဲ့ကြောင်း သတင်းရရှိပါသည်။

DOCA(မွန်)

    မကွေးတိုင်းဒေသကြီး၊ သရက်ခရိုင်၊ သရက်မြို့နယ်တွင် ပတ်ဝန်းကျင်ကျေးရွာများဖြစ်ကြသော အင်းမငယ်၊ ပေါက်ပင်၊ စခန်းကြီး၊ အုန်းပင်လှ၊ ပျဉ်ထောင်၊ မြွေးပွေး၊ ကျောက်အိုင်စသည့် ကျေးရွာများမှ မိုးတွင်းကာလတွင် ချောင်းကြို၊ မြောင်းကြား၊ လျှိုကြားတွင်ပေါက်ရောက်လျက်ရှိသော ဝါးရုံတော၊ ဝါးပင်များမှ ထွက်ရှိသော မျှစ်များကို မျှစ်ပြုတ်တစ်မျိုး၊ မျှစ်ဆပ်တစ်မျိုး၊ မျှစ်ချဉ်တစ်မျိုး အမျိုးမျိုး ပြုလုပ်၍ ဈေးကွက်အတွင်းသို့ ရောင်းချလျက်ရှိပါသည်။ ပေါ်ဦးပေါ်စ မျှစ်ပြုတ်(၁)ပိဿာလျှင် ကျပ်(၈၀၀၀)နှုန်းဖြင့် စတင်ရောင်းချလျက်ရှိရာ ယခုအချိန်တွင် မျှစ်များ လှိုင်လှိုင်ပေါ်ထွက်လာပြီဖြစ်၍ ၂၀၂၃ခုနှစ် ဩဂုတ်လ (ဒုတိယပတ်)တွင် မျှစ်ပြုတ် (၁)ပိဿာလျှင် (၁၅၀၀မှ ၁၂၀၀) ဈေးဖြင့်လည်းကောင်း၊ မျှစ်စပ်(၁)ပိဿာလျှင် ကျပ်(၁၈၀၀မှ ၁၅၀၀) ဈေးဖြင့်လည်းကောင်း ရောင်းချရပြီး ဈေးကွက်အနေဖြင့် မြို့ပေါ်ရှိဈေးများသို့ရောင်းချလျက်ရှိကြောင်း၊ စားသုံးသူပြည်သူများအနေဖြင့် ဈေးနှုန်းသက်သာစွာဖြင့် ဝယ်ယူစားသုံးရပါကြောင်းနှင့် ရောင်းချသူများအနေဖြင့်လည်း ဝင်ငွေအသင့်အတင့်ရရှိပါကြောင်း အင်းမငယ်ကျေးရွာမှ မျှစ်ရောင်းချသူ ဒေါ်ခင်စမ်းထံမှ သိရှိရပါသည်။

   ထို့ပြင် ၎င်းကျေးရွာများမှ ပေါ်ဦးပေါ်စမန်ကျည်းသီးစိမ်းများ စတင်ပေါ်ထွက်လျက်ရှိရာ မန်ကျည်းသီးစိမ်း (၁)ပိဿာလျှင် ကျပ်(၇၅၀၀)ဈေးဖြင့် မြို့ပေါ်ရှိဈေးများသို့ ရောင်းချရပါကြောင်းလည်း ကျောက်အိုင်ကျေးရွာမှ မန်ကျည်းသီးစိမ်းရောင်းချသူဒေါ်အေးထံမှ သိရှိရပါသည်။

DOCA(မကွေး)