ပြည်တွင်းကုန်သွယ်မှုသတင်း

     ယခုကာလသည် လမြတ်ဝါဆို အချိန်သမယဖြစ်သည့်အလျောက် ကျွန်မတို့ ဗုဒ္ဓဘာသာ မြန်မာလူမျိုးများအနေဖြင့် ဘုရားအမှူးရှိသော သံဃာတော်မြတ်များအား ဝါဆိုသင်္ကန်း ဆက်ကပ်  လှူဒါန်းမှု ပြုကြသည့် ကာလဒါန အလှူပြုကြချိန်ဖြစ်ပါသည်။ ဝါဆိုသင်္ကန်းကပ်လှူခြင်းဖြင့် “ဝါဆိုသင်္ကန်း၊ လှူဒါန်းသူမှာ သောတာပန်အလား မခြားတူစွာ၊  အပါယ်ဘေးက ကင်းဝေးလို့သာ  ကောင်းလေစွ၊ ဒါနအကျိုးမှာ။ ဝါဆိုသင်္ကန်း လှူဒါန်းသူမှာ ရုပ်ရည်လှပ ဖြစ်ရမှန်စွာ၊ ပုဆိုးဝတ်စား ပေါများလို့သာ နိဗ္ဗာနန်း စံမြန်းရပေမှာ” အဆိုပါ စာအတိုင်းရရှိသော အကျိုးများလှပါသည်။ သို့ပါ၍ အလှူရေစက် လက်နှင့်မကွာ လှူဒါန်းလိုကြသော ကျွန်မတို့ ဗုဒ္ဓဘာသာဝင်များအနေဖြင့် ဝါဆိုသင်္ကန်းများကို နှစ်စဉ်ဝါဆိုလမတိုင်မီကာလမှ စတင်ကာ ဆက်ကပ်လှူဒါန်းမှုများ ပြုကြသလို သီတင်းကျွတ်လပြည့်ကျော် (၁) ရက်နေ့မှ တန်ဆောင်မုန်းလပြည့်နေ့အထိ ကထိန်သင်္ကန်းများလည်း ဆက်ကပ်လှူဒါန်းကြပါသည်။သို့ပါ၍ ယခုကာလသည် ဝါတွင်းကာလ ဝါဆိုသင်္ကန်း ကပ်လှူသည့် အချိန်ဖြစ်သောကြောင့် မြတ်စွာဘုရားရှင်အား အာရုံပြု၍ မိမိနေအိမ်ရှိဘုရား ဆင်းတုတော်များအား ဝါဆိုသင်္ကန်းကပ်လှူမှုရှိကြသလို ဆရာတော်၊ သံဃာတော်များအားလည်း ဝါဆိုသင်္ကန်းများ ကပ်လှူမှုပြုကြသည့်အားလျော်စွာ ယခုကာလ သင်္ကန်းပရိက္ခရာဆိုင်များ အားလုံးလိုလိုတွင် ဝယ်ယူလှူဒါန်းလိုသူများ ကြိတ်ကြိတ်တိုး ဝယ်ယူနေကြသည်ကို တွေ့ရပါသည်။

          ဒါကြောင့် ပြည်မြို့ရှိ သင်္ကန်းပရိက္ခရာဆိုင်များတွင်လည်း ဝါဆိုသင်္ကန်း ဝယ်ယူလှူဒါန်း လိုသူများအနေဖြင့် သင်္ကန်းအပြင် ခြင်းများဖြင့်ပါ လှူဖွယ်အစုံထည့်၍ ရောင်းချမှုအပေါ် ဝယ်ယူသူများ များပြားလျက်ရှိကြပါသည်။ သင်္ကန်းဈေးနှုန်းများအနေဖြင့် အရည်အသွေးလိုက်၍ ဈေးကွာခြားမှုများရှိကြကာ တစ်စုံလျှင် ကျပ် ၂ သောင်းကျော်မှစ၍ သိန်းဂဏန်းကျော်အထိ ဈေးအမျိုးမျိုးဖြင့် ရောင်းဝယ်လျက်ရှိကြပါသည်။ စီဝိုင်စီ သင်္ကန်းတစ်စုံလျှင်  ၂၂၀၀၀ ကျပ်နှင့် အထက်၊ အင်ဒိုမာတင် သင်္ကန်းတစ်စုံလျှင်   ၂၅၀၀၀ ကျပ်နှင့်အထက်၊ ကိုရီးယားရိုင်ဖယ် အမျိုးအစား သင်္ကန်းတစ်စုံလျှင် ၂၈၀၀၀ ကျပ်နှင့်အထက်၊ ချည်ပေါင်းသား သင်္ကန်းတစ်စုံလျှင် ၃၀၀၀၀ ကျပ်နှင့်အထက်၊ ရိုင်ဖယ်မာတင် အမျိုးအစား သင်္ကန်းတစ်စုံလျှင် ၄၅၀၀၀ ကျပ်နှင် အထက်၊ ဂျပန်လီနင် အမျိုးအစား သင်္ကန်းတစ်စုံလျှင် ၅၅၀၀၀ ကျပ်နှင့်အထက်၊  ချည်သားစစ်စစ် ၁၀၀%  အမျိုးအစား သင်္ကန်းတစ်စုံလျှင် ၇၀၀၀၀ ကျပ်နှင့်အထက်၊ အမေရိကန် ချည်ပိုး/ဝါးပိုး အမျိုးအစား သင်္ကန်းတစ်စုံလျှင် ၁၅၀၀၀၀ ကျပ်နှင့်အထက်၊ ဝါးပိုးချည် သင်္ကန်းအမျိုးအစား သင်္ကန်းတစ်စုံလျှင် ၂၂၀၀၀၀ ကျပ်နှင့်အထက် စသည်ဖြင့် ပစ္စည်းအရည်အသွေး ပေါ်မူတည်၍ ဈေးနှုန်းများ ကွာခြားမှုရှိကြပါသည်။ လှူဒါန်းသူများအနေဖြင့်  မိမိတတ်နိုင်သည့်  ငွေပမာဏအပေါ် မူတည်၍  ဝယ်ယူမှုများရှိကြသည့်အတွက်  သင်္ကန်းအမျိုးအစား အစုံရောင်းချရကြောင်း သိရပါ သည်။ သင်္ကန်းအပြင် ဝါဆိုဖယောင်းတိုင်နှင့် အခြားလှူဖွယ်ပစ္စည်းများအား ခြင်းများဖြင့် ထည့်သွင်းထုတ်ပိုးရောင်းချမှုများလည်းရှိကြပါသည်။ အဆိုပါ ခြင်းများမှာ တစ်ခြင်းလျှင် ငွေကျပ်  ၂၉၀၀၀/ ၃၀၀၀၀ ကျပ်ကျော်မှစ၍ သိန်းဂဏန်းကျော်အထိ   သင်္ကန်းအမျိုးအစားနှင့် အခြားလှူဖွယ်ပစ္စည်းအမျိုးအစားပေါ်မူတည်၍ ဈေးနှုန်းကွားခြားမှုရှိကြကာ ဝယ်ယူလှူဒါန်းလိုသူများအနေဖြင့်  မိမိတတ်နိုင်သည့် ငွေပမာဏအလိုက် ဝယ်ယူကြသည့်အတွက် ပြည်မြို့ရှိ သင်္ကန်း ပရိက္ခရာဆိုင်များတွင် ယခုလအတွင်း ဝါဆိုသင်္ကန်းရော သင်္ကန်းခြင်းများပါ အရောင်းအဝယ်သွက်နေခဲ့ကြောင်း သိရှိရပါသည်။

DOCA(ပဲခူး)

   ပဲခူးတိုင်းဒေသကြီး၊ တောင်ငူမြို့နယ်ရှိ အရှေ့ဆင်ကျေးရွာအုပ်စု၊ အနောက်ဆင်ကျေးရွာအုပ်စု၊ ကမ်းနီကျေးရွာအုပ်စု၊ ဒိုးအင်းကျေးရွာအုပ်စုများတွင် ဆီထွက်သီးနှံတစ်မျိုးဖြစ်သည့် မိုးနှမ်းများကို ရိတ်သိမ်းနေပြီဖြစ်ပါသည်။ သက်ဆိုင်ရာဌာနမှ ရရှိသော စာရင်းများအရ တောင်ငူမြို့နယ်တွင် ၂၀၂၃-၂၀၂၄ ဘဏ္ဍာနှစ်အတွင်း မိုးနှန်း ၃၇၈၉ ဧက စိုက်ပျိုးထားကြောင်း သိရပါသည်။

       တောင်ငူမြို့နယ်အတွင်း ဖြတ်သန်းစီးဆင်းသော စစ်တောင်းမြစ်ရေသည် ဩဂုတ်လ ၁၁ ရက်နေ့အထိ တောင်ငူမြို့၌ အမြင့်ဆုံးရေမှတ်မှာ ၃၉၀ စင်တီမီတာသာရှိသဖြင့် နှမ်းခင်းများပျက်စီး ခြင်းမရှိဘဲ စိုက်ဧကအားလုံး အောင်မြင်စွာ ရိတ်သိမ်းနိုင်ခဲ့ပြီးဖြစ်ပါသည်။ တောင်ငူမြို့၌ စစ်တောင်း မြစ်၏ စိုးရိမ်ရေမှတ်မှာ ၆၀၀ စင်တီမီတာ ဖြစ်ပါသည်။

     ကျေးရွာရှိ လုပ်သားများမှာ နှမ်းရိတ်၊ နှမ်းစည်းလိုက်ကြသဖြင့် ဝင်ငွေရရှိကြပါသည်။ တစ်ရက်လုပ်ခ ၇၀၀၀ ကျပ် ရရှိပါသည်။ ဝါးလုံးတန်းထားသည့်နေရာများတွင် ရိတ်ထားသည့်နှမ်းကို စည်း၍ ဝါးလုံန်းတန်းကိုမှီလျက် ထောင်ထားပြီး နေပူလှန်းရပါသည်။ (၇)ရက်မှ (၁၀)ရက်ခန့်အထိ နေလှန်းပြီးပါက မိုးကာခင်း၍ ခါချရပါသည်။ ယခုနှစ်တွင် မိုးနှမ်းကောင်းသည့် အကွက်များ၌ တစ်ဧက ၁၅ တင်းခန့် ထွက်ရှိနိုင်ကြောင်း သိရပါသည်။

     နှမ်းစိုက်ပျိုးစဉ်က မျိုးနှမ်းတစ်ပြည်လျှင် ၈၅၀၀ ကျပ် ဝယ်ယူရကြောင်း၊ ယခုနှမ်းပေါ်ချိန်တွင် နှမ်း တစ်တင်းလျှင် ၉၅၀၀၀ ကျပ် ဈေးပေါက်ကြောင်း၊ နှမ်းစိုက်တောင်သူများအနေဖြင့် စားသုံးဆီအတွက် ဖူလုံသလို ပိုလျှံသည်များကို ရောင်းချခြင်းအားဖြင့် ဝင်ငွေလည်းရရှိပါကြောင်း အနောက်ဆင်ကျေးရွာမှ နှမ်းစိုက်တောင်သူ ဦးတင်သန်း၏ ပြောကြားချက်အရ သိရပါသည်။

DOCA(ပဲခူး)

    သာယာဝတီခရိုင်အတွင်းရှိ မြို့နယ်များတွင် ယခုအခါတွင် နွေစပါးများအားလုံး ရိတ်သိမ်း  ပြီးစီးခဲ့ရာ သာယာဝတီမြို့နယ် စိုက်/ရိတ်ဧက (၄၄၉၈၆)၊ လက်ပံတန်းမြို့နယ် စိုက်/ရိတ်ဧက (၁၂၈ ၇၃) ၊ မင်းလှမြို့နယ် စိုက်/ရိတ်ဧက (၁၀၉၆၄)၊ မိုးညိုမြို့နယ် စိုက်/ရိတ်ဧက (၁၉၇)၊ အုတ်ဖို မြို့နယ် စိုက်/ရိတ် ဧက (၉၉၉၆)၊ ကြို့ပင်ကောက်မြို့နယ် စိုက်/ရိတ် ဧက (၈၂၆၈)၊ စုစုပေါင်း စိုက်/ ရိတ်ဧက (၈၇၂၈၄) ကို ပျမ်းမျှ အထွက်တင်းနှုန်း (၉၅.၈၆) နှုန်းဖြင့်ထွက်ရှိခဲ့သဖြင့် ခရိုင်ချုပ်  အထွက်တင်း စုစုပေါင်း (၈၃၆၆၈၂၁ ) တင်းထွက်ရှိကြောင်း ခရိုင်မြေစာရင်းဌာနစာရင်းများအရ သိရှိရပါသည်။

    ၂၀၂၃-၂၀၂၄ ခုနှစ် ၊ သာယာဝတီခရိုင် ၊ မိုးစပါးစိုက်ပျိုးပြီးစီးမှု အနေဖြင့် ယခုအခါတွင် မိုးစပါးများ စိုက်ပျိုးပြီးစီးခဲ့ပြီး ဖြစ်ပါသည်။ သာယာဝတီမြို့နယ် စိုက်ဧက (၁၀၃၆၅၉)၊ လက်ပံတန်း မြို့နယ် စိုက်ဧက(၁၀၁၈၃၈)၊ မင်းလှမြို့နယ် စိုက်ဧက (၇၆၁၄၁)၊ မိုးညိုမြို့နယ် စိုက်ဧက (၄၈၈၆၀)၊ အုတ်ဖိုမြို့နယ် စိုက်ဧက (၁၀၀၃၇၄)၊ကြို့ပင်ကောက်မြို့နယ် စိုက်ဧက (၈၆၈၂၅)၊ ခရိုင်ချုပ် မိုးစပါး စိုက်ဧက စုစုပေါင်း (၅၁၇၆၉၇) စိုက်ပျိုးပြီးစီးခဲ့ပါသည်။ သာယာဝတီခရိုင် မိုးစပါးလျာထား စိုက်ဧက   (၅၁၇၅၁၀) ဧက လျာထားခဲ့သော်လည်း အမှန် စိုက်ဧက (၅၁၇၆၉၇) ဧက၊ ၁၀၀.၀၄% စိုက်ပျိုးနိုင်ခဲ့သဖြင့် လျာထားဧကအပေါ် (+) ၁၈၇ ဧကပို၍ စိုက်ပျိုးနိုင်ခဲ့ကြောင်း ခရိုင်မြေစာရင်း   ဌာနစာရင်းများအရ သိရှိရပါသည်။

DOCA(ပဲခူး)

     မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့ပေါ်၌ ၂၀၂၃ခုနှစ်၊ ဩဂုတ်လ (ပထမပတ်) တွင် အရောင်းအဝယ်ဖြစ်လျက်ရှိသော စားသုံးဆီဈေးနှုန်းများမှာ ပဲဆုံဆီလက်ကား (၁)ပိဿာလျှင် (၁၄၅၀၀)ကျပ်၊ လက်လီ(၁)ပိဿာလျှင် (၁၅၀၀၀)ကျပ်၊ နှမ်းဆီလက်ကား(၁)ပိဿာလျှင် (၁၀၀၀၀) ကျပ်၊ လက်လီ (၁)ပိဿာလျှင် (၁၁၀၀၀)ကျပ်၊ နှမ်းရောဆီလက်ကား(၁)ပိဿာလျှင် (၉၀၀၀)ကျပ်၊ လက်လီ(၁)ပိဿာလျှင် (၉၆၀၀)ကျပ်၊ စားအုန်းဆီလက်ကား(၁)ပိဿာလျှင် (၈၀၀၀)ကျပ်၊ လက်လီ (၁)ပိဿာလျှင် (၈၄၀၀)ကျပ်၊ နေကြာဆီလက်ကား(၁)ပိဿာလျှင် (၁၂၀၀၀)ကျပ်၊ လက်လီ(၁) ပိဿာလျှင် (၁၂၅၀၀)ကျပ်ဈေးဖြင့် အရောင်းအဝယ်ဖြစ်လျက်ရှိပါသည်။

     ယခင်ဇူလိုင်လ(စတုတ္ထပတ်)ဈေးနှုန်းနှင့်နှိုင်းယှဉ်ရမည်ဆိုလျှင် ယခုဩဂုတ်လ(ပထမပတ်) တွင် အခြားစားသုံးဆီဈေးနှုန်းများမှာ ဈေးငြိမ်လျက်ရှိပြီး စားအုန်းဆီမှာ အတက်ဈေးဖြင့် အရောင်းအဝယ်ဖြစ်လျက်ရှိကြောင်း ဝယ်ယူစားသုံးသူများထံမှသိရှိရပါသည်။

    ပခုက္ကူမြို့ရှိ စားသုံးသူများသည် မြေပဲဆီကိုသာအဓိကစားသုံးမှုများပြီး လုပ်ငန်းရှင်များကလည်း မြေပဲဆံ၊ မြေပဲဆီများကို ထုတ်လုပ်ရောင်းဝယ်ဖောက်ကားလျက်ရှိပြီး မြန်မာနိုင်ငံနေရာဒေသအနှံ့အပြားသို့ မြေပဲဆီများကို ထုတ်လုပ်တင်ပို့ရောင်းချဖြန့်ဖြူးလျက်ရှိကြောင်းသိရှိရသည်။

DOCA(မကွေး)

     ယခုသြဂုတ်လ ဒုတိယပတ်တွင် ညောင်လေးပင် မြို့မဈေးရှိ ဟင်းသီးဟင်းရွက်များ၏ ဈေးနှုန်းများမှာ ငရုတ်သီးစိမ်းမှာ တစ်ပိဿာလျှင် ၂၄၀၀ ကျပ် မှ ၂၆၀၀ ကျပ်ထိရှိပြီး ငရုတ်သီးခြောက်မှာ တစ်ပိဿာ ၁၄၅၀၀ ကျပ် ၊ ငရုတ်ခြောက်အပုမှာ တစ်ပိဿာ ၂၂၀၀၀ ကျပ်ထိရှိပါသည်။

      ခရမ်းချဉ်သီး တစ်ပိဿာလျှင် ၁၆၀၀ ကျပ်မှ ၁၈၀၀ ကျပ် ၊ ပန်းဂေါ်ဖီ တစ်ပွင့်လျှင် ၁၀၀ ကျပ် ၊ ပြောင်းဖူးအကြီး  တစ်ဖူးလျှင် ၂၀၀ ကျပ်မှ ၃၅၀ ကျပ် ၊ ဂျင်း တစ်ပိသာလျှင် ၄၉၀၀ ကျပ်မှ ၅၀၀၀ကျပ်အထိရှိပြီး မန်ကျည်းမှည့် တစ်ပိဿာလျှင် ၃၀၀၀ ကျပ်မှ ၃၂၀၀ ကျပ် ၊ မုန်လာဥနီ တစ်ပိဿာလျှင် ၃၀၀၀ ကျပ်မှ ၅၀၀၀ ကျပ် ၊ ပဲတောင့်ရှည် တစ်စည်းမှာ ၂၅၀ ကျပ်မှ ၄၀၀ ကျပ်အထိ ရှိသည်ဟု သိရှိရပါသည်။

      ကန်စွန်းရွက် တစ်စည်းလျှင် ၁၀၀ ကျပ်မှ ၂၀၀ ကျပ် ၊ ချဉ်ပေါင်ရွက် တစ်စည်းလျှင် ၁၀၀ ကျပ် ၊ အာလူး တစ်ပိဿာလျှင် ၃၀၀၀ ကျပ်မှ ၃၂၀၀ ကျပ် ၊ အိုးမုန်ညှင်း တစ်စည်းလျှင် ၃၀၀ ကျပ်ရှိပြီး ၂စည်းယူလျှင် ၅၀၀ ကျပ်ထိရောင်းချနေကြောင်း သိရှိရပါသည်။

DOCA(ပဲခူး)