ပြည်ပကုန်သွယ်မှုသတင်းများ

ထိုင်းနိုင်ငံသည် ယခင်နှစ်၌ အမေရိကန်ဒေါ်လာ ၄.၉ ဘီလီယံ (ဘတ်ငွေ ၁၆၈ ဘီလီယံ) တန်ဖိုးရှိသည့် သစ်သီးဝလံတန်ချိန်ပေါင်း ၂.၁၇သန်းကို တရုတ်နိုင်ငံသို့ တင်ပို့ခဲ့ရာ ၂၀၂၁ ခုနှစ်ကထက် ၃.၇၂% တိုးတက်ခဲ့ကြောင်း၊ တရုတ်နိုင်ငံ၏ ယခင်နှစ် သစ်သီးဝလံတင်သွင်းမှုတန်ဖိုး စုစုပေါင်းသည် ဒေါ်လာ ၁၄.၆ ဘီလီယံ (ဘတ်ငွေ ၅၀၀.၈ ဘီလီယံ) ရှိသဖြင့်  ထိုင်းနိုင်ငံ၏ တင်ပို့မှုမှာ  သုံးပုံတစ်ပုံခန့် ပါဝင်လျက်ရှိကြောင်းဖြင့် ထိုင်းနိုင်ငံအစိုးရအဖွဲ့ ပြောရေးဆိုခွင့်ရှိသူ Mr. Anucha Burapachaisri က ဧပြီလ ၂၂ ရက်နေ့တွင် ပြောကြားခဲ့သည်။

ဗီယက်နမ်နိုင်ငံမှ ဆန်တင်ပို့သည့် ဈေးနှုန်းများသည် ယခုသီတင်းပတ်တွင် ၂ နှစ်အတွင်း အမြင့်ဆုံးသို့ ခုန်တက်ခဲ့ခြင်းက ရောင်းလိုအားကျဆင်းလာမှုအပေါ် ထိပ်တန်းဝယ်လက်များ၏စိုးရိမ်မှုကို ပိုမိုတိုးပွားလာစေကြောင်း သိရှိရသည်။

လွန်ခဲ့သည့် ရက်သတ္တပတ်တွင် ဗီယက်နမ်နိုင်ငံ၏ ဆန်ကွဲ ၅% ပါဝင်သော ဆန် ၁ တန်၏ဈေးနှုန်းမှာ အမေရိကန်ဒေါ်လာ ၄၆၅ မှ ၄၇၀ အကြားရှိရာမှ ဒေါ်လာ ၄၉၅ မှ ၅၀၀ အကြား ဈေးနှုန်းသို့ တိုးမြှင့် ကမ်းလှမ်းမှုများရှိရာ ၂၀၂၁ ခုနှစ် ဧပြီလတွင် နောက်ဆုံးတွေ့ရရှိခဲ့သည့် ဈေးနှုန်းအဆင့်နှင့် တူညီလျက်ရှိသည်။

     အိန္ဒိယနိုင်ငံ၏ ပဲမျိုးစုံတင်သွင်းမှုတန်ဖိုးမှာ ၄ နှစ်ဆက်တိုက် မြင့်တက်ခဲ့ပြီးနောက် ၂၀၂၂-၂၀၂၃ ဘဏ္ဍာနှစ်တွင် ကျဆင်းခဲ့ပါသည်။ အိန္ဒိယနိုင်ငံ၊ ကူးသန်းရောင်းဝယ်ရေးနှင့် စက်မှုဝန်ကြီးဌာန၏ ၂၀၂၂-၂၀၂၃ ဘဏ္ဍာနှစ်အတွက် ပြည်ပကုန်သွယ်မှု ကနဦးခန့်မှန်းစာရင်းများအရ ပဲမျိုးစုံတင်သွင်းမှုမှာ တန်ဖိုးအားဖြင့် ရူပီးငွေ ၁၅၇၈၀.၇၃ ကုဋေရှိပြီး ယခင်နှစ်တင်သွင်းမှုတန်ဖိုး ရူပီး ၁၆၆၂၇.၅၈ ကုဋေနှင့် နှိုင်းယှဉ်ပါက ၅.၀၉% ကျဆင်းခဲ့ကြောင်း၊ အမေရိကန်ဒေါ်လာငွေတန်ဖိုးအရမူ ယခုနှစ် ပဲမျိုးစုံတင်သွင်းမှုသည် ဒေါ်လာ ၁.၉၄ ဘီလီယံရှိပြီး ယခင်နှစ် တင်သွင်းမှုတန်ဖိုး ဒေါ်လာ ၂.၂၂ ဘီလီယံအောက် ၁၂.၇၉% လျော့နည်းခဲ့ခ

အိန္ဒိယနိုင်ငံတွင် စားသုံးဆီဝယ်ယူတင်သွင်းသူများသည် နှစ်ပေါင်းများစွာကာလအတွင်း ပထမဆုံးအကြိမ်အနေဖြင့် စားအုန်းဆီတန်ချိန် ၇၅၀၀၀ ဝယ်ယူမည့် စာချုပ်များကို ပယ်ဖျက်ခဲ့ပြီး နေကြာဆီနှင့် ပဲပုပ်ဆီတို့ကဲ့သို့ အဆင့်မြင့်စားသုံးဆီများကို ပြောင်းလဲရွေးချယ်လာကြသည်ဟု အိန္ဒိယဆီလုပ်ငန်းရှင် ၅ ဦးက ပြောကြားကြောင်း ရိုက်တာသတင်းဌာနက ဖော်ပြပါသည်။

ပြည်တွင်း၌ မတ်ပဲနှင့် ပဲစဉ်းငုံများ၏ သိုလှောင်ထားရှိမှု လက်ကျန်အခြေအနေများ သိရှိရန်အတွက် အိန္ဒိယစားသုံးသူရေးရာဦးစီးဌာနမှ  အကြီးတန်းအရာရှိ ၁၂ ဦးသည် ကာနာတကာ၊ မဒ္ဒရာ ပရာဒေ့ရှ်၊ မဟာရသျှတရနှင့် တမီနာဒူပြည်နယ်များရှိ ချန်နိုင်း၊ မွန်ဘိုင်း ဆိပ်ကမ်းမြို့များ အပါအဝင် နယ်မြေဒေသ ၁၀ ခုသို့ ၁၅-၄-၂၀၂၃ နေ့မှ စတင်သွားရောက်လျက် ပဲမျိုးစုံ သိုလှောင်ရောင်းဝယ်သူများနှင့် ဈေးကွက်များသို့ ကွင်းဆင်းလေ့လာခဲ့ကြပါသည်။