စားသုံးသူပြည်သူအများ၏ အကျိုးစီးပွားကို အစဉ်အလေးထားရင်း ပြည်သူများအား ဝန်ဆောင်မှုပေးနေသည့် စားသုံးသူရေးရာဦးစီးဌာနသည် (၁-၄-၂၀၁၆) ရက်နေ့မှစတင်၍ တောင့်တင်းခိုင်မာစွာတည်ရှိနေခဲ့ပါသည်။ တိုင်းနဲ့ပြည်နယ် (၁၄) ခုနှင့် နေပြည်တော်ကောင်စီပါဝင်သော ရွှေရောင်လွှမ်းသည့်အမိမြန်မာနိုင်ငံတော်ကြီးသည် သာယာ၀ပြောဖွံ့ဖြိုးတိုးတက်သည့် နိုင်ငံတော်ကြီးတစ်ခုတည်ဆောက်နိုင်ရန် မိမိတစ်ဦးတစ်ယောက်တည်းအတွက်မဟုတ်ဘဲ ပတ်ဝန်းကျင်အတွက်ပါ အကျိုးပြုနိုင်မည့် စနစ်ကျသောကိုယ်ပိုင်လွတ်လပ်ခွင့်နှင့် တွေးခေါ် လုပ်ဆောင်နိုင်ခွင့်များရှိသင့်ပါသည်။ ထို့ကြောင့် လူမျိုးဘာသာ၊ ဆင်းရဲချမ်းသာမရွေး လူတန်းစားအလွှာအသီးသီး ရယူပိုင်ဆိုင်သိရှိနားလည်သင့်သော အခွင့်အရေးတစ်ခုဖြစ်သည့် စားသုံးသူအခွင့်အရေးများနှင့် နိုင်ငံသားတိုင်း ကျေပွန်သင့်သောစားသုံးသူ၏တာဝန်များအား တိုင်းနှင့်ပြည်နယ်အနှံ့အပြားရှိ မြို့ရွာများပါမကျန် အနယ်နယ်အရပ်ရပ်မှ ပြည်သူများအားလုံးသိရှိနားလည်လာစေရန်အတွက် အတ္တဟိတမပါဝင်ဘဲ ပရဟိတကိုသာရှေးရှုကာ စားသုံးသူရေးရာဦးစီးဌာနမှ ဝန်ထမ်းများအနေဖြင့် ဦးလည်မသုန်ကြိုးပမ်းဆောင်ရွက်လျက်ရှိပါသည်။
မြန်မာနိုင်ငံရှိပြည်သူတိုင်း လုံခြုံစိတ်ချရသောကုန်စည်/ဝန်ဆောင်မှုများအရယူနိုင်စေရေး၊ စားသုံးသူပြည်သူများဘေးကင်းလုံခြုံမှုအပြည့်အဝရရှိစေရေး၊ မိမိတို့၏အခွင့်အရေးနှင့်တာဝန်များကို အပြည့်အဝသိရှိနားလည်ကျေပွန်နိုင်စေရေးတို့အတွက် စားသုံးသူရေးရာဦးစီးဌာနမှ ဝန်ထမ်းများသည် အသိပညာပေးဟောပြောပွဲလုပ်ငန်းစဉ်များ၊ စစ်ဆေးရေးအရာရှိများခန့်အပ်ကာ စားသုံးသူကာကွယ်ရေးဥပဒေ ၂၀၁၉၊ အခန်း (၁၈) နှင့် မြန်မာနိုင်ငံစားသုံးသူကာကွယ်ရေးကော်မရှင်က ထုတ်ပြန်ထားသည့် (၂/၂၀၁၉) နှင့်အညီ ကုန်စည်များအား ကြပ်မတ်စစ်ဆေးဆောင်ရွက်နေသည့် ဈေးကွက်စောင့်ကြည့်စစ်ဆေးခြင်းလုပ်ငန်းစဉ်များ၊ စားသုံးသူပြည်သူများအနေဖြင့် ကုန်စည်/ဝန်ဆောင်မှုနှင့်စပ်လျဉ်း၍ ဆုံးရှုံးနစ်နာမှုတစ်စုံတစ်ရာဖြစ်ပွားလာပါကလည်း စားသုံးသူရေးရာဦးစီးဌာနတိုင်းတွင် ဖွင့်လှစ်ထားရှိသည့် စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (CICC) သို့တိုင်ကြားနိုင်သည့်ပုံစံ၊ တိုင်ကြားနိုင်သည့်လိပ်စာနှင့် တိုင်ကြားနိုင်သည့်ဖုန်းနံပါတ်များအားလည်းသိရှိလာစေရန် လုပ်ဆောင်နေသောလုပ်ငန်းစဉ်များကို အားသွန်ခွန်စိုက် တွန်းတွန်းတိုက်တိုက်လုပ်ဆောင်လျက်ရှိပါသည်။ ဝိသမလောဘသား စီးပွားရေးလုပ်ငန်းရှင်များအကြား စားသုံးသူပြည်သူများအနေဖြင့် ဆားတို့ခံထားရသည့်တီကောင်များပမာမဖြစ်စေရေး ပြည်သူနှင့်တာဝန်ရှိသူ၊ တာဝန်ရှိသူနှင့်ပြည်သူအချင်းချင်းရိုင်းပင်ကူညီလျက် စိတ်ဝမ်းလက်ညီဆောင်ရွက်ကြမည်ဆိုလျှင် နိုင်ငံတစ်ဝှမ်းတွင် ပွင့်သောပန်းတိုင်းလန်းဆန်းစေမည်ဖြစ်ပါသည်။ စားသုံးသူဟူသောစကားလုံး၏အနက်ကို သေသေချာချာတိတိကျကျမသိရှိပါက တွေဝေစဉ်းစားစရာများပင်ဖြစ်ပေလိမ့်မည်။ “ပြည်သူတိုင်းသည် စားသုံးသူဖြစ်သည်။ စားသုံးသူတိုင်းတွင် စားသုံးသူအခွင့်အရေးရှိသည်” ဟူသောဆောင်ပုဒ်မှာ စားသုံးသူရေးရာဦးစီးဌာန၏ ဆောင်ပုဒ်တစ်ခုဖြစ်သည်။ ထိုဆောင်ပုဒ်ကိုကြည့်ခြင်းအားဖြင့် ကမ္ဘာပေါ်ရှိလူသားတိုင်းသည် စားသုံးသူများဖြစ်ကြသည်ဟု ရှင်းလင်းစွာသိရှိနိုင်ပေသည်။
နိုင်ငံတစ်နိုင်ငံဖွံ့ဖြိုးတိုးတက်ရန် စားသုံးသူအရေးအရာကိစ္စရပ်များသည် အရေးကြီးသောကဏ္ဍတစ်ခုအဖြစ်ပါဝင်ပါသည်။ လူ့လောက၏ လူမှုဘဝတွင် နေမှု၊ ထိုင်မှု၊ စားမှု၊ သောက်မှု၊ ဝန်ဆောင်မှုရယူသုံးစွဲမှုဟူသော အမှုကိစ္စများနှင့်မလွတ်ကင်းနိုင်ပေ။ နိစ္စဓူဝကြုံတွေ့နေရသည့် အရေးကိစ္စများပင်ဖြစ်ပေသည်။ စားသုံးသူပြည်သူများ နေ့စဉ် ထိတွေ့ရယူသုံးစွဲနေရသောကုန်စည်/ ဝန်ဆောင်မှုများနှင့်စပ်လျဉ်း၍ စံချိန်စံညွှန်းပြည့်မီရေး၊ ကျန်းမာရေးနှင့်ညီညွတ်ရေး၊ အရည်အသွေးပြည့်မီရေးဟူသောကဏ္ဍများတွင် တာဝန်ရှိသူများမှာ ကျွန်ုပ်တို့စားသုံးသူရေးရာဦးစီးဌာနမှ ဝန်ထမ်းများဖြစ်သော်ငြားလည်း စားသုံးသူပြည်သူများအနေဖြင့်လည်း မိမိတို့၏အခွင့်အရေးနှင့်တာဝန်များကို တတ်သိနားလည်ထားဖို့ရန်လည်းလိုအပ်ပေသည်။ စားသုံးသူရေးရာဦးစီးဌာနသည် ထိုအခွင့်အရေးနှင့်တာဝန်များအား ၂၀၁၉ခုနှစ်၊ မတ်လ (၁၅) ရက်နေ့တွင် ထုတ်ပြန်ထားသည့် စားသုံးသူကာကွယ်ရေးဥပဒေ၊ အခန်း (၉) တွင် ဖော်ပြပါရှိပြီးဖြစ်ပါသည်။ စားသုံးသူအခွင့်အရေးမှာ (၈) ချက်ရှိ၍ တာဝန်မှာ (၄) ချက်ရှိပါသည်။ စားသုံးသူအခွင့်အရေးများမှာ -
(က) စားသုံးသူများအတွက် ကုန်စည် (သို့) ဝန်ဆောင်မှုနှင့်စပ်လျဉ်း၍ အခြေခံလိုအပ်ချက်များပေါ်တွင် စိတ်ကျေနပ်မှုရရှိစေခြင်း၊
(ခ ) ကုန်စည် (သို့) ဝန်ဆောင်မှုကို ဘေးအန္တရာယ်ကင်းရှင်းစွာအသုံးပြုခွင့်ရှိခြင်း၊
(ဂ ) ကုန်စည် (သို့) ဝန်ဆောင်မှုကို ရွေးချယ်ဝယ်ယူအသုံးပြုရာတွင် လိုအပ်သောသတင်းအချက်အလက်များကို ပြည့်စုံမှန်ကန်စွာသိရှိခွင့်နှင့် ပြေစာ (သို့) အထောက်အထားရယူခွင့်ရှိခြင်း၊
(ဃ) ဈေးကွက်အတွင်းရှိ ကုန်စည် (သို့) ဝန်ဆောင်မှုနှင့်စပ်လျဉ်း၍ စားသုံးသူစိတ်ကြိုက် ရွေးချယ်ဝယ်ယူနိုင်ခွင့်ရှိခြင်း၊
(င ) စားသုံးသူနစ်နာဆုံးရှုံးမှုနှင့်စပ်လျဉ်းသည့်ကိစ္စရပ်များတွင် ရှင်းလင်းတင်ပြခွင့်နှင့် တိုင်ကြားခွင့်ရရှိနိုင်စေခြင်း၊
(စ ) ကုန်စည် (သို့) ဝန်ဆောင်မှုကို ဝယ်ယူအသုံးပြုခြင်းကြောင့် ဖြစ်ပေါ်လာသည့် နစ်နာဆုံးရှုံးမှုနှင့်စပ်လျဉ်း၍ ကုစားခွင့်ရရှိခြင်း၊
(ဆ) ကုန်စည် (သို့) ဝန်ဆောင်မှုနှင့်စပ်လျဉ်းသည့် အသိပညာဗဟုသုတများ၊ အခွင့်အရေးများနှင့် လိုအပ်သောအချက်အလက်များကို သိရှိလေ့လာနိုင်ခွင့်ရှိခြင်း၊
(ဇ ) ပစ္စုပ္ပန်တွင်သာမက အနာဂတ်မျိုးဆက်များအတွက်ပါ ကောင်းမွန်သာယာသည့် လူနေမှုအဆင့်အတန်းနှင့် ပတ်ဝန်းကျင်တွင် နေထိုင်နိုင်ခွင့်ရရှိစေခြင်းတို့ဖြစ်ပြီး
စားသုံးသူ၏ တာဝန်များမှာ -
(က) ကုန်စည် (သို့) ဝန်ဆောင်မှုနှင့်စပ်လျဉ်းသည့် သတင်းအချက်အလက်နှင့် လမ်းညွှန် ချက်များအတိုင်း လိုက်နာဆောင်ရွက်ခြင်း၊
(ခ ) ကုန်စည် (သို့) ဝန်ဆောင်မှုကို ရွေးချယ်ဝယ်ယူရာတွင် သဘောတူညီထားသည့် တန်ဖိုးနှင့်အညီ ပေးချေခြင်း၊
(ဂ ) စီးပွားရေးလုပ်ငန်းရှင်အပေါ် ထိခိုက်နစ်နာစေရန်ရည်ရွယ်၍ မဟုတ်မမှန်စွပ်စွဲပြောဆိုမှုပြုလုပ်မှုတို့ကို ရှောင်ကြဉ်ခြင်း၊
(ဃ) အငြင်းပွားမှုကို ညှိနှိုင်းဖြေရှင်းနေစဉ် လူထုဆက်သွယ်ရေးနည်းလမ်းများဖြင့်ဖြစ်စေ၊ အခြားနည်းလမ်းများဖြင့်ဖြစ်စေ သက်ဆိုင်ရာစီးပွားရေးလုပ်ငန်းရှင်အပေါ် ထိခိုက်နစ်နာစေရန် မဟုတ်မမှန်ပြောဆိုခြင်း၊ ရေးသားခြင်းနှင့် ပြုမူခြင်းတို့ကိုရှောင်ကြဉ် ခြင်း စသည်တို့ဖြစ်ပါသည်။
စားသုံးသူရေးရာဦးစီးဌာနသည် ဌာန၏မျှော်မှန်းချက်၊ ရည်မှန်းချက်များကို ပြီးမြောက်အောင်မြင်စွာဆောင်ရွက်နိုင်စေရန်ရည်ရွယ်၍ အမျိုးသားစားသုံးသူကာကွယ်ရေးအစီအစဉ်များချမှတ်ကာ (၂၀၂၁ခုနှစ်မှ ၂၀၂၅အထိ) (၅) နှစ်တာစီမံကိန်းကာလကို အဓိကလုပ်ငန်းစဉ် (၅) ရပ်ချမှတ်ရေးဆွဲထားသည်ကို ကြည့်ခြင်းအားဖြင့် စားသုံးသူရေးရာဦးစီးဌာနအား အများပြည်သူများသိရှိစေရန်၊ စားသုံးသူကာကွယ်ရေးဆိုင်ရာဆောင်ရွက်မှုများအပေါ် ပိုမိုအသိအမှတ်ပြုလာစေရန် ကောင်းမွန်သောအုပ်ချုပ်မှု၊ စီမံခန့်ခွဲမှုများနှင့်အတူ မှန်ကန်သောသတင်းအချက်အလက်များဖြန့်ဝေပေး၍ စားသုံးသူပြည်သူများ၏နစ်နာဆုံးရှုံးမှုများအား ကုစားပေးနိုင်သည့် မွန်မြတ်သည့်စိတ်ထားရှိသည့် ဝန်ထမ်းကောင်းများအဖြစ် စားသုံးသူပြည်သူများ၏ ယုံကြည်ကိုးစားမှုရရှိလာစေရန် အစဉ်ကြိုးပမ်း ဆောင်ရွက်သွားရမည်ဖြစ်ပါကြောင်း ရေးသားတင်ပြလိုက်ရပါသည်။
DOCA(မကွေး)