စိုက်ပျိုးမွေးမြူရေးထုတ်ကုန်များကို တိုးတက်ထုတ်လုပ်ခြင်းဖြင့် စိုက်ပျိုး/မွေးမြူရေး ထုတ်ကုန်များမှ ပြည်တွင်းကုန်သွယ်မှု ဖွံ့ဖြိုးတိုးတက်စေရေးအထောက်အကူဖြစ်စေရန်အတွက် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ပြည်နယ်ဦးစီးမှူးဦးသန်းဦးနှင့် ဘားအံခရိုင်ဦးစီးမှူး ဦးမျိုးဝင်းနိုင်တို့သည် ၇-၇-၂၀၂၃ရက်နေ့၊ (၁၁:၀၀) နာရီအချိန်တွင် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးတွင် ကရင်ပြည်နယ်၊လှိုင်းဘွဲ့မြို့နယ်မှ စိုက်ပျိုးမွေးမြူရေး လုပ်ငန်းရှင်များနှင့် တွေ့ဆုံဆွေးနွေးခဲ့ကြောင်း သိရသည်။
ထိုသို့တွေ့ဆုံဆွေးနွေးရာတွင် ပြည်နယ်ဦးစီးမှူး ဦးသန်းဦးက စိုက်ပျိုးမွေးမြူရေး လုပ်ငန်းများ အောင်မြင်ဖြစ်ထွန်းတိုးတက်စေရေး ဆောင်ရွက်ခြင်းဖြင့် ဒေသတွင်း စားနပ်ရိက္ခာ ဖူလုံစေနိုင်မည်ဖြစ်ကြောင်း၊ အလုပ်အကိုင်အခွင့်အလမ်းနှင့် ကုန်ထုတ်လုပ်မှုလုပ်ငန်းများ ဖွံဖြိုးတိုးတက်ကာ ဒေသဖွံဖြိုးတိုးတက်ရေးကိုလည်း အထောက်အကူဖြစ်မည်ဖြစ်ပါကြောင်း၊ ဒေသတွင်း တစ်ပိုင်တစ်နိုင်စိုက်ပျိုးထုတ်လုပ်မှသည် အစုအဖွဲ့ဖြင့် ပမာဏများများ တိုးချဲ့ဆောင်ရွက်နိုင်ပါက ဒေသတွင်းစားသုံးပိုလျှံမှုမှ ပြည်တွင်ကုန်သွယ်မှုအဖြစ်ပါ ထုတ်လုပ်ရောင်းချနိုင်မည် ဖြစ်ပါကြောင်း၊ ပြည်တွင်းကုန်သွယ်မှု ဖွံ့ဖြိုးအားကောင်းလာပါမှ ပြည်ပကုန်သွယ်မှုအထိပါ တိုးချဲ့မြှင့်တင်ဆောင်ရွက်နိုင်မည်ဖြစ်ပါကြောင်း ဆွေးနွေးခဲ့ပြီး စိုက်ပျိုး မွေးမြူရေးလုပ်ငန်းရှင် ဦးနေတိုးနှင့် ဦးတင်စိုးတို့မှ လက်ရှိဆောင်ရွက်လျက်ရှိသော စိုက်ပျိုး မွေးမြူရေးလုပ်ငန်း အခြေအနေများနှင့် လုပ်ငန်းလည်ပတ်ပုံ၊ တွက်ခြေကိုက်မှု ၊ အရှုံး/အမြတ်နှင့် လုပ်ငန်းဆောင်ရွက်ရာတွင် တွေ့ကြုံရသော အားသာချက်/အားနည်းချက်များကို ပြန်လည်ရှင်းလင်း ဆွေးနွေးခဲ့ပြီး ပြည်နယ်ဦးစီးမှူးမှ စိုက်ပျိုးမွေးမြူရေးလုပ်ငန်းများ ဖွံ့ဖြိုးတိုးတက်၍ ကုန်ထုတ်လုပ်ငန်းများ တိုးတက်မြင့်မားလာစေရေးအတွက် ဌာနမှဆောင်ရွက်လျက်ရှိသည့် ပြည်တွင်းကုန်သွယ်ရေးဖွံ့ဖြိုးရေးဆိုင်ရာ လုပ်ငန်းများနှင့် လုပ်ငန်းရှင်များအနေဖြင့် လိုအပ်လျက်ရှိသော နည်းပညာ၊ ငွေကြေးအရင်းအနှီးနှင့် မြေလိုအပ်ချက်များအပေါ် နိုင်ငံတော်မှ နိုင်ငံစီးပွားမြှင့်တင်ရေး ကဏ္ဍမှ ကူညီဆောင်ရွက်ပေးနေသည့် အခြေအနေများကိုလည်းကောင်း ၊ ကုန်သွယ်မှုဆိုင်ရာ အခက်အခဲများရှိပါက ကူညီဖြေရှင်းပေးနိုင်ရန်အတွက် မိမိတို့ဌာနမှ ဆောင်ရွက်လျက်ရှိသော SME HELP DESK CENTER ဖွင့်လှစ်၍ကူညီဆောင်ရွက်ပေးနေမှု အခြေအနေများကိုလည်းကောင်း ပြန်လည်ဆွေးနွေးခဲ့သည်။
စိုက်ပျိုးမွေးမြူရေးလုပ်ငန်းရှင် ဦးနေတိုးနှင့် ဦးတင်စိုးတို့သည် တိရစ္ဆာန်အစားအစာ နေဗီယာမြက်နှင့် ဝက်မွေးမြူရေးလုပ်ငန်းများကို ကရင်ပြည်နယ်၊ ဘားအံမြို့၊ရွှေဂွန်းကျေးရွာတွင် စွန့်ဦးတည်ထွင် စတင်လုပ်ကိုင်ခဲ့ကြသူများဖြစ်ပြီး ယခုအခါ နေဗီယာမြက်စိုက်ပျိုးမှုနှင့် အသားတိုးဝက်လုပ်ငန်းများကို ဒေသခံများ လိုက်ပါဆောင်ရွက်နိုင်ရေးအတွက် မျိုး၊ သားပေါက်နှင့် တိရစ္ဆာန်အစားအစာများ ပံ့ပိုး၍ စည်းရုံးဆောင်ရွက်ခဲ့ရာ ယခုအခါ ဒေသခံစိုက်မွေး တောင်သူ ၂၅ ဦးခန့် လိုက်ပါဆောင်ရွက်၍ အကျိုးအမြတ်ရရှိလျက်ရှိကြောင်း သိရသည်။
DOCA(ကရင်)