စားသုံးသူရေးရာဦးစီးဌာနအနေဖြင့် လုပ်ငန်းတာဝန်တစ်ရပ်ဖြစ်သော ပြည်တွင်းကုန်သွယ်မှု မြှင့်တင်ရေးလုပ်ငန်းများ ဆောင်ရွက်ရန်အတွက် စစ်ကိုင်းခရိုင်ဦးစီးမှူးနှင့် ဝန်ထမ်းများသည် ဇန်နဝါရီလ ၆ ရက်နေ့က စစ်ကိုင်းမြို့၌ ခေါက်ဆွဲစက် ၂၆ စက်ရှိသည့်အနက် ပါရမီရပ်ကွက်ရှိ စိန်ကြည်ခေါက်ဆွဲစက်လုပ်ငန်းရှင်အား သွားရောက်တွေ့ဆုံခဲ့ပါသည်။
ခေါက်ဆွဲလုပ်ငန်းကို ၁၉၉၀ ခုနှစ်က မတည်ရင်းနှီးငွေ ကျပ်သိန်း(၁၀၀၀)ဖြင့် စတင်ခဲ့ကြောင်း၊ ယခု တစ်လလျှင် ကုန်ကြမ်း ဂျုံ ၃၀ ပိဿာဝင် အိတ် ၈၀၀ ကိုအသုံးပြု၍ ကုန်ချော ပိဿာ ၂၄၀၀၀ ခန့် ထွက်ရှိနေကြောင်း၊ လုပ်သားအင်အား ကျား ၂၀ ဦးနှင့် မ ၆၀ ဦး စုစုပေါင်း ၈၀ ဦးအား အလုပ်အကိုင် အခွင့်အလမ်းများ ပေးထားနိုင်ကြောင်း၊ ကုန်ကြမ်းကို မန္တလေးမြို့မှ ဝယ်ယူပြီး ထွက်ရှိသည့် ကုန်ချော ဂျုံခေါက်ဆွဲများကို စစ်ကိုင်းတိုင်းဒေသကြီးအတွင်းနှင့် ကချင်ပြည်နယ်၊ ရှမ်းတောင်၊ မန္တလေးတိုင်း၊ ရန်ကုန်တိုင်း၊ မကွေးတိုင်း၊ ပဲခူးတိုင်းနှင့် ဧရာဝတီတိုင်းဒေသကြီးများသို့ ဖြန့်ဖြူးရောင်းချလျက်ရှိကြောင်း၊ FDA လုပ်ငန်းလိုင်စင်ရပြီး ဖြစ်၍ ပြည်ပသို့ တင်ပို့ရောင်းချရန် မျှော်မှန်းထားကြောင်း၊ ခေါက်ဆွဲစက်များအနေဖြင့် ခေတ်မီ ထုပ်ပိုးနည်းစနစ်များနှင့် ခေတ်မီ စက်ကိရိယာများ၊ နည်းပညာများ ပိုမိုတိုးတက်လာပါက အရည်အသွေး အဆင့်အတန်းမြင့်မားသော နိုင်ငံတကာဈေးကွက်ဝင် ကုန်ချောများထုတ်လုပ်လာနိုင်မည်ဟု စိန်ကြည်ခေါက်ဆွဲစက်လုပ်ငန်းရှင် ဦးရန်ရီဆထံမှ သိရှိခဲ့ရပါသည်။
စားသုံးသူရေးရာဦးစီးဌာန
စစ်ကိုင်းတိုင်းဒေသကြီး