ဖျာပုံခရိုင်စားသုံးသူရေးရာဦးစီးဌာနမှ ခရိုင်ဦးစီးမှူးဦးထွေးသိမ်း၊ မြို့နယ်တာဝန်ခံ ဦးမင်းဇော်နှင့်ဝန်ထမ်းများသည် ဖျာပုံမြို့နယ် နောက်မီးကျေးရွာ ကျေးရွာအုပ်ချုပ်ရေးမှူးရုံးတွင် ၂၀၂၂ခုနှစ်၊ဇန်နဝါရီလ (၃)ရက်နေ့နံနက်(၁၀:၀၀)နာရီတွင် ရေထွက်ပစ္စည်းလုပ်ငန်းရှင်(၃၀)ဦးနှင့်တွေ့ဆုံ၍ ရေထွက်ပစ္စည်းများဖွံ့ဖြိုးတိုး တက်စေရေးဆွေးနွေးခဲ့ကြောင်းသိရသည်။
အဆိုပါတွေ့ဆုံပွဲတွင် ခရိုင်ဦးစီးမှူးက ဖျာပုံခရိုင်ကို ရောက်ရှိလာသည်မှာ သုံးလခန့်သာရှိသော်လည်း နောက်မီးကျေးရွာသည် ရေလုပ်ငန်းရှင်များနေထိုင်သည့် ပင်လယ်ကမ်းခြေရွာဖြစ်ပြီး ရေထွက်ကုန်ပစ္စည်းများ ရှာဖွေထုတ်လုပ်ပေးနေသောဒေသဖြစ်သည့်ကို ကြားသိထားပါကြောင်း၊နောက်မီးကျေးရွာအဝင်တစ်လျှောက်တွင် ငါးခြောက်ဆင်များ၊ ငါးပိကြိတ်စက်များ၊ ငါးဖမ်းရေယာဉ်များတွေ့ရပြီး ငါးပိ၊ ငါးခြောက်ရနံ့များကိုလည်း ယဉ်ပါးစွားခံစားရသဖြင့် အကြားနှင့်အမြင်ထပ်တူရှိပါကြောင်း၊ရေလုပ်ငန်းရှင်များ လက်ရှိလုပ်ငန်းလည်ပတ်နေမှုအခြေအနေနှင့် အခက်အခဲများ၊ အလုပ်သမားခန့်ထားမှုအခြေအနေများ Covid-19 Fund ချေးငွေရရှိထားမှုအား အသုံးပြုမှုအပေါ် အရှုံးအမြတ် အခြေအနေနှင့် ရှေ့ဆက်လက်ဆောင်ရွက်မည့် အစီအစဉ်များအား ဆွေးနွေးကြပါသည်။
ဆက်လက်၍ မြို့နယ်တာဝန်ခံက ဒေသထုတ်ကုန်လုပ်ငန်းများ ဖွံ့ဖြိုးတိုးတက်လာစေရန် နိုင်ငံတော်မှချေးငွေများထုတ်ပေးထားမှုအပေါ် အခွင့်အရေးတစ်ရပ်အနေဖြင့် အကျိုးရှိစွာအသုံးပြုစေချင်ပါကြောင်း ရေထွက်ပစ္စည်းများဖြစ်သည့် ငါး၊ ငါးခြောက်၊ ရေကျိုငါးပိ၊ မျှင်ငါးပိ၊ ပုစွန်ခြောက်နှင့် ငံပြာရည်များထွက်သည့်ဒေသဖြစ်၍ မိရိုးဖလားအတိုင်းသမရိုးကျမလုပ်ပဲ တန်ဖိုးမြှင့်ထုတ်ကုန်များထုတ်လုပ်ပြီး ပြည်တွင်းသာမက ပြည်ပဈေးကွက်သို့ ထိုးဖောက်နိုင်ရန် ကြိုးစားဆောင်ရွက်ကြစေလိုကြောင်း၊ နည်းပညာအနေဖြင့် သက်ဆိုင်ရာဌာနများနှင့် ချိတ်ဆက်ဆောင်ရွက်ပေးနိုင်ပါကြောင်း၊ ကုန်ထုတ်လုပ်ရာ အရည်အသွေးကောင်းမွန်းပြီး ထုပ်ပိုးမှုများကအစ ဆန်းသစ်ပြီး ဈေးကွက်ယှဉ်ပြိုင်နိုင်ရန်လုပ်ဆောင်ဖို့လိုကြောင်း၊ထုတ်လုပ်မှုတွင် သန့်ရှင်းသပ်ရပ်စွာ ထုတ်လုပ်ရန်နှင့် ဈေးကွက်တင်ပို့ရာတွင်လည်း စားသုံးသူကာကွယ်ရေးဥပဒေနှင့်ကိုက်ညီစွာဖော်ပြရန်နှင့် ထုတ်ကုန်လုံခြုံစိတ်ချရမှုရှိစေရေး ဆောင်ရွက်ကြရန်လိုကြောင်း အကျယ်တဝင့်ပြောကြားပါသည်။
ထိုနောက် တက်ရောက်လာသူလုပ်ငန်းရှင်များက သိလိုသည်များ မေးမြန်းမှုအပေါ်တာဝန်ရှိသူများက ပြန်လည်ဖြေကြားပြီးနောက် ခရိုင်ဦးစီးမှူးက စားသုံးသူကာကွယ်ရေးဥပဒေစာအုပ်များနှင့် လက်ကမ်းစာစောင်များအား ဝေငှပေးခဲ့ကြောင်းသတင်းရရှိပါသည်။
စားသုံးသူရေးရာဦးစီးဌာန
ဧရာဝတီတိုင်းဒေသကြီး