ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ် ဆားမလောက်ကျေးရွာ စိုက်ဘဏ်ရုံး နေရာ၌ (၃.၆.၂၀၂၄)ရက်နေ့ နံနက်(၁၀:၀၀)နာရီအချိန်တွင် တောင်သူစပါးအထွက်တိုးစေရန်နှင့် စားသုံးသူအခွင့်အရေး သိရှိနားလည်ပြီး စပါးစိုက်ပျိုးရာတွင် စိုက်ပျိုးရေးသုံးကုန်စည်များကို ရွေးချယ်ဝယ်ယူ အသုံးပြုတက်စေရန် ရည်ရွယ်၍ စိုက်ပျိုးရေးဦးစီးဌာန၊ စားသုံးသူရေးရာဦးစီးဌာန၊ မြေစာရင်းဦးစီးဌာန တို့ပူးပေါင်း၍ အသိပညာပေးခြင်းနှင့် အသိပညာပေးလက်ကမ်းစာစောင်များ ဖြန့်ဝေ ဟောပြောဆွေးနွေးကြောင်း သိရသည်။
အသိပညာပေးဟောပြောဆွေးနွေးရာတွင် ညောင်တုန်းမြို့နယ်ဦးစီးမှူး ဦးအောင်လွင်က တောင်သူများအား ကျဲခင်းစိုက်ပျိုးစနစ်အစား အစေ့ချစိုက်ပျိုးနည်းစနစ် ပြောင်းလဲစိုက်ပျိုးခြင်းဖြင့် စပါးအထွက် တိုးနှုန်းမြင့်မားမည့် နည်းလမ်းများအကြောင်း၊ မျိုးအသုံးနည်းလာပြီး စပါးအထွက်တိုးကာ ပင်ပွားနည်းတိုး၍ အပင်ကြီးထွားနှုန်းလည်း ကောင်းမွန်ကြောင်း၊ လက်ရှိကာလ စပါးဈေးနှုန်း အစေ့ချစိုက်ပျိုးနည်းစနစ်သည် တစ်တင်းပိုထွက်ပါက တောင်သူအကျိုးပိုတိုးမည် ဖြစ်ကြောင်းကိုလည်းကောင်း၊ စားသုံးသူကာကွယ်ရေး အသိပညာပေးလုပ်ငန်းစဉ် တစ်ဖက်အရလည်း စားသုံးသူအခွင့်အရေးကိုသိရှိနားလည်ထားရန်လိုအပ်ပြီး၊ စပါးစိုက်ပျိုးရေးနှင့် ပတ်သက်၍ လိုအပ်ချက်ဖြစ်သော ကုန်စည်၊ ကုန်ကြမ်းများ ဝယ်ယူသည့်အခါ ကုန်အညွှန်းအမှတ်အသားနှင့် မိမိ၏ စားသုံးသူအခွင့်အရေး စိတ်ကြိုက်ရွေးချယ်ခွင့်ကို နည်းစနစ်မှန်ကန်စွာ အသုံးချတက်မည်ဖြစ်ကြောင်း၊ တောင်သူများအနေဖြင့် စားသုံးသူအခွင့်အရေးနှင့် ပတ်သက်၍ သိရှိလိုပါက စားသုံးသူရေးရာဦးစီးဌာန၏ callcenter 1535 သို့ ရုံးချိန်အတွင်းဆက်သွယ်မေးမြန်းနိုင်ကြောင်းကို ထပ်လောင်း အသိပညာပေးဟောပြောခဲ့ပါသည်။ ဟောပြောပွဲသို့ တောင်သူ(၁၈၀)ဦးတက်ရောက်ခဲ့ကြပြီး သိရှိလိုသည်များကို အပြန်အလှန်ဆွေးနွေးခဲ့ကြောင်း သိရပါသည်။
DOCA(ဧရာဝတီ)