မကွေးတိုင်းဒေသကြီး၊ မင်းဘူးခရိုင်၊ ပွင့်ဖြူမြို့နယ်၊ မြို့နယ်အထွေထွေအုပ်ချုပ်ရေးဦးစီးဌာန၊ အစည်းအဝေးခန်းမ၌ (၂၉.၆.၂၀၂၄)ရက်နေ့၊ နံနက်(၁၀:၀၀)နာရီအချိန်တွင် မြို့နယ်ကုန်ဈေးနှုန်း တည်ငြိမ်ရေးအဖွဲ့နှင့် မြို့နယ်ဆန်၊ စပါးကုန်သည်များနှင့်အတူပူးပေါင်း၍ ဒေသခံပြည်သူများအား သက်သာသောဈေးဖြင့် ဝယ်ယူရရှိစေရန်အတွက် ဆန်ဈေးနှုန်းတည်ငြိမ်မှုရှိစေရန် လုပ်ငန်းညှိနှိုင်း ဆွေးနွေးဆောင်ရွက်ခဲ့ကြောင်း သိရှိရပါသည်။
အဆိုပါဆွေးနွေးပွဲသို့ မြို့နယ်ကုန်ဈေးနှုန်းတည်ငြိမ်ရေးအဖွဲ့ဥက္ကဌ၊ မြို့နယ်စားသုံးသူရေးရာ ဦးစီးဌာနမှ မြို့နယ်တာဝန်ခံနှင့်အတူ ဆန်စပါးကုန်သည်အသင်းဥက္ကဌအပါအဝင် ဆန်စပါးကုန်သည် (၇၅)ဦး တက်ရောက်ခဲ့ပြီး မြို့နယ်တာဝန်ခံ ဒေါ်ဌေးဌေးဝင်းက စားသုံးသူပြည်သူများ သက်သာသောဈေးဖြင့် ဆန်များဝယ်ယူရရှိစေရန်အတွက် သင့်တင့်မျှတသောဈေးနှုန်းဖြင့် ရောင်းချပေးရန်၊ မြန်မာနိုင်ငံဆန်စပါးအသင်းချုပ်မှ ဇွန်လအတွင်းသတ်မှတ်ထားသော ဆန်အမျိုးအစားအလိုက် ရည်ညွှန်ဈေးနှုန်းများအား အမြတ်(၁၀)% နှင့် သယ်ယူစရိတ်လုပ်သားခပေါင်းပြီး ပွင့်ဖြူမြို့နယ်တွင် ဧရာပဒေသာဆန်တစ်ပြည်လျှင် ကျပ်(၄၈၀၀)ဖြင့် လည်းကောင်း၊ ဧည့်မထအုပ်စု ဆန်တစ်ပြည်လျှင် ကျပ် (၃၀၀၀)ဖြင့်လည်းကောင်း သတ်မှတ်ပေးထားခဲ့ပြီးဖြစ်ပါသဖြင့် ၎င်းဈေးနှုန်းများအတိုင်း ရောင်းချပေးကြပါရန်နှင့် သတ်မှတ်ရည်ညွှန်းဈေးနှုန်းများအား ဖြန့်ဝေပေးခဲ့ကြောင်း သိရှိရပါသည်။
DOCA(မကွေး)