ဓနုဖြူ ဆန်လက်လီအရောင်းဆိုင်များအား သတ်မှတ်ရည်ညွှန်းဈေးအတိုင်းရောင်းချမှုရှိ/ မရှိ ပူးပေါင်းအဖွဲ့ဖြင့် ကွင်းဆင်းစစ်ဆေး

   ဧရာဝတိုင်းဒေသကြီး၊ မအူပင်ခရိုင်၊ ဓနုဖြူမြို့မြို့နယ်၌ ၈.၇.၂၀၂၄ ရက်နေ့၊ နံနက်ပိုင်းက သတ်မှတ်ရည်ညွှန်းစျေးဖြင့် ရောင်းချရေးအတွက် ကုန်ဈေးနှုန်းတည်ငြိမ်ကျဆင်းရေး ပူးပေါင်းအဖွဲ့ဖြင့် လက်လီ လက်ကားဆန်ဆိုင် (၁၂)ဆိုင်အား ကွင်းဆင်းစစ်ဆေးခဲ့ကြသည်။

အဆိုပါ ကွင်းဆင်းစစ်ဆေးမှုတွင် စားသုံးသူရေးရာဦးစီးဌာန မြို့နယ်ဦးစီးမှူး ဦးဝင်းမင်းစိုးက ရောင်းချသူ ဆန်လက်လီ/ လက်ကားလုပ်ငန်းရှင်များကို ဓနုဖြူမြို့နယ်အတွင်း ဆန်ပြတ်လပ်မှုမရှိစေရေး ဆန်ဆိုင်များက ဆန်ဝယ်ယူမှုအခြေအနေနှင့် ဆန်ရောင်းချမှုအခြေအနေတို့ကို မေးမြန်းခဲ့ပြီး လုပ်ငန်းရှင်များက မိမိတို့ ဆန်ဆိုင်တွင်ပဲ မြန်မာနိုင်ငံဆန်စပါးအသင်းချုပ်က ထုတ်ပြန်ထားသော သတ်မှတ်ရည် ညွှန်းဈေးအပေါ် သယ်ယူခ၊လုပ်သားခ ပေါင်း၍ အနည်းဆုံးသက်သောသောဈေးဖြင့် ရောင်းချရန်၊ တန်းစီဝယ်ယူခြင်းထက် ပုံမှန်ဆိုင်တွင်လိုအပ်သောအချိန်၌ ဝယ်ယူနိုင်ရန်ကို စီစဉ်ဆောင်ရွက်ကြရန်၊ ဈေးနှုန်းမြှင့်တင်ရောင်းချခြင်း၊ ဈေးကစားရန် ဆန်ကို သိုလှောင်ထားခြင်းမပြုလုပ်ရန်၊ လုပ်ငန်းရှင်အား အသိပေးပြောကြားခဲ့သည်။

အဆိုပါ ပူးပေါင်းအဖွဲ့သည် ဆန်ရောင်းချသူများ၏ ဆန်တနေ့ရောင်းချနိုင်မှုပမာဏ၊ ဆန်ဝယ်ယူမှု ဒေသနှင့် နေရပ်လိပ်စာ၊ လက်ရှိဆန်ရောင်းချမှုနှင့် သိုလှောင်ထားမှုလက်ကျန် အိတ်အရေအတွက်၊ ဆန်အမျိုး အစား အလိုက်ဈေးနှုန်း လုပ်ငန်းလိုင်စင်များ၊ ဆန်အမျိုးအစားစစ်မှန်စေရေးနှင့် ဆန်အလေးချိန် ပြည်/ တင်း/၂၄ပြည်အိတ်၊ ၁၂ပြည်အိတ်၊ ၃ပြည်အိတ်များကို ပြည့်ဝစွာချိန်တွယ်ရောင်းချမှုကို စုံစမ်းစစ်ဆေး ကြည့်ရှုဆောင်ရွက်ခဲ့ကြပြီး စျေးနှုန်းမြှင့်တင်၍ ရောင်းချခြင်းမပြုရန်တို့ကို သတိပေးမှာကြားခဲ့ပြီး၊ ကုန်ဈေးနှုန်း တည်ငြိမ်ကျဆင်းရေးအဖွဲ့မှအသွင်ယူစစ်ဆေးသည့်အခါ သတ်မှတ်ရည်ညွှန်း ဈေးဖြင့် ရောင်းချမှု မရှိကြောင်း စစ်ဆေးတွေ့ရှိပါက ထိရောက်စွာအရေးယူနိုင်သည့် အကြောင်းကို အသိပေးပြောကြားခဲ့ကြောင်း သတင်းရရှိပါသည်။

DOCA(ဧရာဝတီ)