မြန်မာနိုင်ငံဆန်စပါးလုပ်ငန်းများဖွံ့ဖြိုးတိုးတက်စေရေး၊ ပြည်တွင်းစားသုံးမှုဖူလုံစေရေး နှင့် အရည်အသွေးပြည့်မီသော ဆန်များကြိတ်ခွဲထုတ်လုပ်၍ပြည်ပသို့ တင်ပို့နိုင်ရေးတို့အတွက် ဆန်စပါးကြိတ်ခွဲထုတ်လုပ်ရောင်းဝယ်မှုလုပ်ငန်းများသည် လွန်စွာမှအရေးပါလှပါသည်။ မည်သည့်လုပ်ငန်းမဆို စည်းလုံးညီညွတ်သော အစုအဖွဲ့များ၊ အသင်းအဖွဲ့များ၊ (သို့မဟုတ်) အဖွဲ့အစည်း များဖြင့် လုပ်ကိုင်ဆောင်ရွက်ပါက ပိုမိုအောင်မြင်နိုင်မည်ဖြစ်ပါသည်။ သို့ဖြစ်ပါ၍ ညောင်ဦးဒေသ ရှိဆန်စပါးလုပ်ငန်းများဖွံ့ဖြိုးတိုးတက်၍ စားသုံးသူပြည်သူများနေ့စဉ်လိုအပ် လျက်ရှိသော ဆန်များကို ဈေးနှုန်းမှန်ကန်စွာဖြင့် အလွယ်တကူဝယ်ယူနိုင်စေရေး၊ စပါး စိုက်ပျိုးသောတောင်သူလယ်သမားများ ဈေးနှုန်းဈေးကွက်မှန်ကန်စွာဖြင့် ရောင်းချနိုင်စေရေးနှင့် တဖက်မှလည်း အရည်အသွေး ပြည့်မီသောဆန်များကြိတ်ခွဲထုတ်လုပ်၍ ပြည်ပသို့တင်ပို့နိုင် ရေးတို့အတွက် အထောက်အကူဖြစ်စေနိုင်မည့်် ညောင်ဦးမြို့နယ်ဆန်စပါးလုပ်ငန်းရှင်များ အသင်းကိုဖွဲ့စည်းခဲ့ပါသည်။
စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ညောင်ဦး ခရိုင်ဦးစီးမှူးရုံးမှ ဦးသန်းစိုး(လက်/ညွှန်မှူး)ဦးဆောင်မှုဖြင့် (၅.၇.၂၀၂၄)ရက်နေ့၊ နံနက် ၁၀:၀၀ နာရီအချိန်တွင် ညောင်ဦးမြို့နယ်ရှိ ဆန်လက်လီ/လက္ကားရောင်းချသူများ၊ ဆန်စက်လုပ်ငန်းရှင် များဖြင့် အဖွဲ့ဝင်(၂၆)ဦးပါဝင်သော ညောင်ဦးမြို့နယ်ဆန်စပါးလုပ်ငန်းရှင်များအသင်းကို စားသုံးသူရေးရာဦးစီးဌာန၊ ညောင်ဦးခရိုင်ဦးစီးမှူးရုံးတွင် အောင်မြင်စွာဖွဲ့စည်းနိုင်ခဲ့ပါသည်။ အသင်းဖွဲ့ စည်းခြင်းအခမ်းအနားသို့ ညောင်ဦးခရိုင်/မြို့နယ် စီမံအုပ်ချုပ်ရေးအဖွဲ့ဝင်များ၊ ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ ခရိုင်ဦးစီးမှူး၊ စက်မှုကြီးကြပ်ရေးနှင့် စစ်ဆေးရေးဦးစီးဌာနမှ ခရိုင်ဦးစီးမှူး၊ အသေးစားစက်မှုလက်မှုလုပ်ငန်းဦးစီးဌာနမှ ခရိုင်ဦးစီးမှူးနှင့်ဆန်လက်လီ/လက္ကားရောင်း ချသူများ၊ ဆန်စပါးနှင့်ဆန်စက်လုပ်ငန်းရှင်များ စုစုပေါင်း( ၃၇)ဦး တက်ရောက်ခဲ့ကြောင်းသိရှိရပါသည်။
DOCA(မန္တလေး)