ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ်အတွင်းရှိ ဓါတ်မြေဩဇာ အရောင်းဆိုင်များ၌ မြေဩဇာအိတ်များထဲတွင် အရည်အသွေးနိမ့် မြေဩဇာများထည့်သွင်းပြီး တုပရောင်းချနေမှုရှိ၊ မရှိ စီးပွားရေးလုပ်ငန်းရှင်များအား ကွင်းဆင်း စစ်ဆေးခြင်းကို (၅.၈.၂၀၂၄)ရက်နေ့ ၊နံနက် (၁၀:၀၀) နာရီအချိန်က စားသုံးသူရေးရာဦးစီးဌာနနှင့် သက်ဆိုင်ရာတာဝန်ရှိသူများမှ အဆိုပါအရောင်းဆိုင်များသို့ ကွင်းဆင်းဆောင်ရွက်ခဲ့သည်။
ထိုသို့ကွင်းဆင်းဆောင်ရွက်မှုကို စားသုံးသူရေးရာဦးစီးဌာန၊ မြို့နယ်အထွေထွေအုပ်ချုပ်ရေးဦးစီးဌာန မြို့နယ်စည်ပင်သာယာရေးအဖွဲ့ မြို့နယ်စိုက်ပျိုးရေးဦးစီးဌာနနှင့် သက်ဆိုင်ရာ တာဝန်ရှိသူများမှ ညောင်တုန်းမြို့နယ် ဓါတ်မြေဩဇာ အရောင်းဆိုင် (၆)ဆိုင်၌ ဈေးနှုန်း သက်သာသော အရည်အသွေးနိမ့် မြေဩဇာများကို ပြည်တွင်းသုံး အိတ်ခွံများဖြင့် ပြန်လည်ထုပ်ပိုးပြီး အခြားဓါတ်မြေဩဇာများ ထည့်သွင်း၍ ဈေးကွက်ထဲတွင် ဖြန့်ဖြူး ရောင်းချနေခြင်းရှိ၊ မရှိတို့ကို စစ်ဆေးခြင်း၊ သတ်မှတ်ရည်ညွှန်းဈေးဖြင့် ဆိုင်များတွင် ရောင်းချခြင်း ရှိ/မရှိကို စီးပွားရေးလုပ်ငန်းရှင်များအား သွားရောက်ကွင်းဆင်းစစ်ဆေးခဲ့ကြသည်။
စားသုံးသူရေးရာဦးစီးဌာန၊ ညောင်တုန်းမြို့နယ်ဦးစီးမှူး ဦးအောင်လွင်နှင့် ဝန်ထမ်းများသည် စိုက်ပျိုးရေးသုံး ပစ္စည်းဓါတ်မြေဩဇာနှင့် ပိုးသတ်ဆေး ရောင်းချသော ဆိုင်ပိုင်ရှင်များအား သက်ဆိုင်ရာ ဌာနကတားမြစ်ပိတ်ပင်ထားသော ဓါတ်မြေဩဇာနှင့် ပိုးသတ်ဆေးများ ရောင်းချခြင်း မပြုရန်၊ တရားဝင် မှတ်ပုံတင်ထားသောဓါတ်မြေဩဇာနှင့်ပိုးသတ်ဆေးများ တင်သွင်း ရောင်းချရန်၊ စိုက်ပျိုးသူတောင်သူများ ဘေးကင်းလုံခြုံမှုရှိစေရန် သုံးစွဲပုံအညွှန်းကို မြန်မာစာဖြင့် တိတိကျကျ ဖော်ပြထားသော ဓါတ်မြေဩဇာနှင့် ပိုးသတ်ဆေးများကိုသာရောင်းချကြရန်၊ စီးပွားရေးလုပ်ငန်းရှင်များအနေဖြင့် ကုန်စည်နှင့်သက်ဆိုင်သည့် ကုန်အညွှန်းအမှတ်အသားတွင် ဖော်ပြထားသည့် အချက်အလက်များနှင့် ကိုက်ညီမှုမရှိသော ကုန်စည်များကို ရောင်းချခြင်းနှင့် ကုန်သွယ်ခြင်းမပြုကြရန် လိုအပ်ကြောင်း၊ သတ်မှတ်ချက်နှင့်မကိုက်ညီသော ဓါတ်မြေဩဇာနှင့် ပိုးသတ်ဆေးများ ဈေးကွက်အတွင်းတွေ့ရှိပါက စိုက်ပျိုးရေးဦးစီးဌာန၏ ဥပဒေအရ သော်လည်းကောင်း စားသုံးသူကာကွယ်ရေး ဥပဒေအရသော်လည်းကောင်း အရေးယူခံရနိုင်ကြောင်း အသိပညာပေး ဆောင်ရွက်ခဲ့ကြောင်း သတင်းရရှိပါသည်။
DOCA(ဧရာဝတီ)