စစ်ကိုင်းတိုင်းဒေသကြီး၊ ကန့်ဘလူခရိုင် ကန့်ဘလူမြို့နယ်တွင်း မျိုးသန့်စပါးမျိုးများ ဖူလုံ စေရေးနှင့် မျိုးစပါးပန်းတိုင်အထွက်နှုန်းရရှိရေးအတွက် ဒေသခံတောင်သူများ မျိုးစပါးနှင့်ပတ်သက် ပြီး လိုက်နာရမည့်အချက်များ ပျိုးသက်မှန်စိုက်ပျိုးရေးနှင့် တစ်ဧကကောက်ကွက်ပြည့်မီရေးတို့ အတွက် မြို့နယ်စိုက်ပျိုးရေးဦးစီးဌာနကကြီးမှူး၍ ဧရာမင်းစပါးမျိုးစေ့ထုတ် စိုက်ပျိုးခြင်းကွင်း သရုပ်ပြပွဲနှင့် ယူရီးယားဓာတ်မြေဩဇာပေးအပ်ပွဲကို ဩဂုတ်လ ၁၃ ရက် နံနက် (၀၉:၀၀) နာရီက တောင်သူဦးမျိုးနိုင်၏ ၂ ဧကစိုက်ကွင်း၌ ကျင်းပခဲ့ပါသည်။
အဆိုပါကွင်းသရုပ်ပြပွဲတွင် ခရိုင်စီမံအုပ်ချုပ်ရေးအဖွဲ့ဥက္ကဌ ဦးစောထွန်းဦးက ဒေသခံတောင်သူများ အနေဖြင့် ဒေသရေမြေအခြေအနေပေါ်မူတည်၍ ယခုစိုက်ပျိုးရာသီတွင် ပျိုးသက်မှန်ကန်မှုရှိပြီး ၁ဧကအထွက်နှုန်းပြည့်မီရေး၊ မျိုးကောင်းမျိုးသန့်များကို နည်းစနစ်မှန်ကန်စွာစိုက်ပျိုးကြရန်၊ အထွက်နှုန်းကောင်းမွန်ပြီး တောင်သူများ၏ လူမှုစီးပွားဘဝများလည်း ဖွံ့ဖြိုးတိုးတက်လာမည်ဖြစ် ကြောင်း ဆွေးနွေးပြောကြားခဲ့သည်။
ဆက်လက်၍ မြို့နယ်စိုက်ပျိုးရေးဦးစီးမှူး ဦးမျိုးဇော်က မိုးစပါးဧရာမင်း မျိုးစေ့ထုတ်စိုက်ပျိုး ပြသခြင်း နည်းပညာပေးကွင်းသရုပ်ပြပွဲနှင့် ယူရီးယားဓာတ်မြေဩဇာပေးအပ်ပြုလုပ်ရခြင်း၏ ရည်ရွယ်ချက်များကို ရှင်းလင်းပြောကြားပြီး ခရိုင်စီမံအုပ်ချုပ်ရေးအဖွဲ့ဥက္ကဌနှင့်တာဝန်ရှိသူများက တက်ရောက်လာသော တောင်သူများအား ယူရီးယားဓာတ်မြေဩဇာများ ပေးအပ်ကြသည်။
ထို့နောက် ကွင်းသရုပ်ပြပွဲကျင်းပရာ ခရိုင်စီမံအုပ်ချုပ်ရေးအဖွဲ့ဥက္ကဌနှင့်အဖွဲ့ဝင်များ၊ မြို့နယ် စီမံအုပ်ချုပ်ရေးအဖွဲ့ဥက္ကဌနှင့်အဖွဲ့ဝင်များ ၊ ခရိုင်နှင့်မြို့နယ်စိုက်ပျိုးရေးဦးစီးဌာနမှ တာဝန်ရှိသူများ နှင့်ဝန်ထမ်းများ၊ ဖိတ်ကြားထားသည့် ဌာနဆိုင်ရာတာဝန်ရှိသူများနှင့် ဒေသခံတောင်သူ ၁၀၀ ဦး ကြည့်ရှုအားပေးကြသည်။ ကန့်ဘလူမြို့နယ်တွင် ယခုနှစ်မိုးစပါးစိုက်ပျိုးရာသီတွင် မိုးစပါး ၁၄၂၅၅ဧက စိုက်ပျိုးရန်လျာထားပြီး လက်ရှိအချိန်ထိ ၁၀၇၁၀ဧက စိုက်ပျိုးပြီးဖြစ်ကြောင်း သိရသည်။
DOCA(စစ်ကိုင်း)