ဧရာဝတီတိုင်းဒေသကြီးအတွင်းရှိ သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန၊ တိုင်းဒေသကြီး စက်မှုလက်မှုလုပ်ငန်းဦးစီးဌာနမှ ကျေးလက်နေပြည်သူများဝင်ငွေတိုးပွားစေရေးနှင့် အသေးစားကုန်ထုတ်လုပ်ငန်းများ ဖန်တီးပေးနိုင်ရေးအတွက် စီမံကိန်းများချမှတ်ပြီး အကောင် အထည်ဖော်ဆောင်ရွက်လျက်ရှိရာ ဧရာဝတီတိုင်းဒေသကြီး ကျုံပျော်ခရိုင်၊ ရေကြည်မြို့နယ် ၊ ယိုးဒယား အတက်ကျေးရွာအုပ်စု၊ယိုးဒယားတက်ကျေးရွာတွင် အခြေခံစက်ချုပ်သင်တန်းကို ၁၅.၇.၂၀၂၄ ရက်နေ့မှ ၁၃.၈.၂၀၂၄ ထိသင်တန်းကာလ ၃၀ရက်ဖွင့်လှစ်ပေးခဲ့ပြီး သင်တန်းဆင်းပွဲ အခမ်းအနားအား ဩဂုတ်လ ၁၃ရက်နေ့ နေ့လယ်ပိုင်းတွင် ကျင်းပပြုလုပ်ခဲ့ပါသည်။
အဆိုပါသင်တန်းတွင်မိန်းမဝတ်လက်မ၊အခြေခံ၊အဆင့်မြင့်ကလေးဝတ်ကျားရှပ်၊အခြေခံအဆင့်မြင့်တိုက်ပုံ၊ ဘော်လီ၊ ဘရာစီယာ၊ အခြေခံအဆင့်မြင့် ဇာထိုးပန်းထိုးစသည့်တို့ သင်ကြားခဲ့ပြီး မွမ်းမံသင်တန်းကို ၂၁.၈.၂၀၂၄ မှ ၄.၉.၂၀၂၄ရက်နေ့ထိ ၁၅ရက်ကြာဖွင့်လှစ်၍ ထပ်မံသင်ကြားသွားမှာဖြစ်ကြောင်း သိရသည်။ အိမ်တွင်းမှုပညာရပ်များဖြင့် ကျွမ်းကျင်လုပ်သားများဖြစ်ကြပြီး ကိုယ်ပိုင်ဝင်ငွေ မိသားစုဝင်ငွေများရရှိလျက် ဘဝအတွက် အကျိုးကျေးဇူးများရရှိရန် အဆိုပါသင်တန်းများကို အခမဲ့ဖွင့်လှစ် သင်ကြားပေးရခြင်းဖြစ်ကြောင်း အသေစားစက်မှုလက်မှုလုပ်ငန်းဦးစီးဌာနမှ သိရပါသည်။
DOCA(ဧရာဝတီ)