ကျောက်ဖရုံသီးစိုက်ပျိုးရာတွင် ဒေသမျိုးတွင် အလုံးလတ်(၁-၂) ပေနှင့်အလုံးကြီး (၂)ပေ အထက်ဟူ၍ ရှိသည် အလုံးလတ်မျိုးများကိုစီးပွားဖြစ် မြေလွတ်စိုက်ကြသည်။ အလုံးကြီးမျိုးများကို အချို့ဒေသများတွင် စင်တင်၍ စိုက်ကြပြီး ဧရာဝတီတိုင်းမှ ပန်းတနော် / ဟင်္သာတ အလုံးကြီးမျိုးများသည် ထင်ရှားသည်။ မျိုးအားလုံးသည် အပြင်ခွံတွင်ဖရောင်းပါဝင်မှုများ၍ အဖြူရောင်ပိုတောက်သည်။ ကျောက်ဖရုံကို မိုးနှောင်းတွင် မြေလွတ်စိုက်ကြပြီး စင်တင်စိုက်ပါက တစ်နှစ်ပတ်လုံးစိုက်ပျိုးနိုင်သည် ။ အချို့ဒေသများတွင် သစ်ပင်ကြီးများနှင့်တဲများပေါ်တွင် တင်၍ နှစ်ပတ်လည် စိုက်ပျိုးထားတတ်ပြီး အလုံးလတ်မျိုးများကို ယိုလုပ်ငန်းအတွက် စီးပွားဖြစ် မြေလွတ်၍ စိုက်ပျိုးကြသည်။ကျောက်ဖရုံ တစ်ဧကလျှင် သဘာဝ မြေဩဇာ လှည်း (၁၀-၂၀)စီး ၊ပုလဲ (၁-၂) အိတ်၊ တီစူပါ (၂-၄) အိတ် ပိုတတ် မြေဩဇာ (၁-၂) အိတ် ထည့်ပေးရမည်။ ဒေသမျိုးအားလုံးသည် စိုက်ပြီးရက် ၁၀၀ ကျော်မှ စတင်ခူးဆွတ်နိုင်သည်။ စိုက်ပြီးအရွက်ခုနှစ်ရွက် ထွက်ချိန်တွင် ခေါင်းနှိမ့်ပေးသင့်သည်။ အစေ့ချပြီး ရက်ပေါင်း၁၀၀ကျော်တွင် စတင်၍ ခူးယူစားသုံးနိုင်သည်။ မျိုးစေ့ထုတ်ယူလိုပါက ပန်းပွင့် ၆၅ ရက်ကျော်မှ ခူးဆွတ်သင့်သည်။ ကျောက်ဖရုံသီးသည် တာရှည်အထားခံသဖြင့် အလုံးလိုက် အရိပ်ထဲတွင် နှစ်ပတ်လည် ထားသင့်သည်။ကျောက်ဖရုံတွင် မျိုးစေ့ကိုအလုံးလိုက် သဘာဝအတိုင်း သိုလှောင်ခြင်းဖြင့် အပင်ပေါက်ရာခိုင်နှုန်း ပိုမိုကောင်းမွန်စေသည်။
DOCA(ဧရာဝတီ)