ပခုက္ကူမြို့ပေါ်တွင် ရောင်းအားကောင်းလျက်ရှိသော“ စိတ်ကူးသစ် ” အီစိမ့်ကွင်းမုန့်လုပ်ငန်း

      မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့တွင် ဒေသထွက်ကုန် မုန့်မျိုးစုံလုပ်ငန်းများ လုပ်ကိုင်လျက်ရှိရာ ယခုလက်ရှိအချိန်တွင် လမ်းပန်းဆက်သွယ်ရေးအဆင်ပြေသဖြင့် မုန့်လုပ်ငန်းများ တွင်တွင်ကျယ်ကျယ် ပြန်လည်လုပ်ကိုင်လျက်ရှိကြောင်း သိရသည်။                    

    “စိတ်ကူးသစ်” မုန့်မျိုးစုံလုပ်ငန်းမှ ထုတ်လုပ်သော မုန့်များမှာ အီစိမ့်ကွင်း၊ မုန့်ကျိုးလိမ်၊ ဒါးလှီးမုန့်၊ အာလူးကြော်၊ ပေါင်မုန့်ကြော်လုပ်ငန်းများကို ထုတ်လုပ်ရောင်းချလျက်ရှိပြီး ၎င်းတို့ထဲမှ အီစိမ့်ကွင်း မုန့်သည် အများဆုံးရောင်းချရသော မုန့်အမျိုးအစားတစ်ခုဖြစ်ပါသည်။ ထို့ကြောင့် လုပ်ငန်းရှင်မှ အတွင်ကျယ်ဆုံး အီစိမ့်ကွင်း မုန့်လုပ်ငန်းဆောင်ရွက်ပုံအဆင့်ဆင့်ကို ပြောပြရာ ဂျုံမှုန့်ကို ဆေးစပ်မွှေပြီး ကြက်ဥဖြင့် နယ်ဖတ်၍ လှိမ့်ပြီး မုန့်ချောင်းလေးများ အဖြစ် ဖြတ်ရကြောင်း၊ ပြီးလျှင် မုန့်သားကို ပထမအကြိမ်  အသေး၊ ဒုတိယအကြိမ် အကြီး အကွင်းပုံစံ ပြုလုပ်၍ ကြော်ရကြောင်း၊ ကြော်ပြီးသား မုန့်အကွင်းများကို သကြားရည်ဖြင့် နစ်လူးပြီး သကြားထပ်မံဖြူးရကြောင်း၊ ၎င်းနောက် မုန့်(၅)ခုပါ(၁)တစ်ထုပ်လျှင် လက်လီ ကျပ်(၁၅၀၀)၊ လက်ကား ကျပ်(၁၂၀၀)ဖြင့် ပခုက္ကူမြို့မဈေး၊ ရပ်ကွက်အတွင်းရှိ မုန့်မျိုးစုံဆိုင်နှင့် ကုန်စုံဆိုင်များတွင် ဖြန့်ဖြူးရောင်းချကြောင်း၊ ဝန်ထမ်းအနေဖြင့် အလုပ်သမား(၇)ဦးရှိပြီး တစ်နေ့လျှင် လုပ်အားခ ကျပ်(၇၀၀၀)ပေးရကြောင်း သိရသည်။  မုန့်မျိုးစုံ လုပ်ငန်းသည် ယခင်က လမ်းပန်းဆက်သွယ်ရေးအခက်အခဲကြောင့် နားရသည်ရှိသလို ယခုလတွင် နားရက်မရှိ ပြန်လည် လုပ်ကိုင်နေပြီး  အခြားမုန့်များထပ် အီစိမ့်ကွင်း မုန့်သည် ရောင်းအား အကောင်းဆုံးနှင့် အတွင်ကျယ် ဆုံးဖြစ်၍  မိသားစုဝင်များနှင့် လုပ်သားများလည်းဝင်ငွေရှိပြီး စားဝတ်နေရေး အတွက်  အဆင်ပြေလျက်ရှိကြောင်း လုပ်ငန်းရှင်၏ပြောပြချက်အရ သိရှိရပါသည်။

DOCA(မကွေး)