ယနေ့ကမ္ဘာကြီးသည် သတင်းနှင့် နည်းပညာဖလှယ်မှု တွင် အရှိန်အဟုန်ပြင်းပြင်းဖြင့် ရှေ့သို့ ခရီးနှင်လျက်ရှိပါသည်။ အီလက်ထရွန်းနစ်ပစ္စည်းများ၊ လျှပ်စစ်ပစ္စည်းများ၊ စားသုံးကုန်ပစ္စည်းများနှင့် စက်ပစ္စည်းများတွင် ကုန်အညွှန်းအမှတ်အသားများ၏ သတင်းအချက်အလက်များသည် စားသုံးသူ များ၏ ဘေးကင်းလုံခြုံရေးကို အသိနှင့် သတိပေးနေခြင်းဖြစ်သည်။ တဖက်တွင်လည်း ကုန်အညွှန်း အမှတ်အသားများ၊ ကုန်ပစ္စည်းအမှတ်တံဆိပ်များနှင့် ရော၍ကုန်ပစ္စည်းကြော်ငြာများသည်လည်း ပါလာ ကြောင်းတွေ့လာရပါသည်။
သို့သော်လည်း စားသုံးသူပြည်သူအများစုက ကုန်အညွှန်းအမှတ်အသားကို သတိမမူသေးသ ဖြင့် အသက်အန္တရာယ်ထိခိုက်မှုများ ရှိနေပေလိမ့်မည်။ မည်သူကမျှ မှတ်တမ်းတင်၍ သတင်း မှတ်တမ်းအဖြစ် ထုတ်ပြန်ခြင်းမရှိသော်လည်း ထိခိုက်နစ်နာမှုက နေ့စဉ်နှင့်အမျှ ရှိနေလိမ့်မည်။ ထိုနည်းတူစွာ ထုတ်လုပ်သူများနှင့် ပြည်ပမှတင်သွင်းသူများကလည်း ကုန်အညွှန်းအမှတ်အသား ဖော်ပြမှုအလေးအနက်မထားကြသဖြင့် နစ်နာဆုံးရှုံးသူများ ရှိနေပါလိမ့်မည်။ ဆုံးရှုံးနစ်နာမှုများ မည်မျှရှိသည်ကို သိရှိရန်လွယ်ကူသော ကိစ္စမဟုတ်ပေ။
အဝတ်လျှော်စက်ကပေးသော သင်ခန်းစာ
ကျွန်တော့်၏ မိတ်ဆွေတစ်ဦး သိပ်မကြာမီအချိန်က အဝတ်လျှော်စက်တစ်လုံးဝယ်ယူခဲ့ ပါသည်။ အမျိုးအစားမှာ Electrolux (ELITE CARE tm 300. 10KG- EWT 1075 H2WA) ဖြစ်ပြီး ထိုင်းနိုင်ငံထုတ် ဖြစ်ပါသည်။ User Guide မှာ ထိုင်းဘာသာစကားနှင့် အင်္ဂလိပ်ဘာသာများဖြင့် ဖော်ပြထားပါသည်။ စက်ပေါ်တွင် ခလုတ်များ၏ အကြောင်းများဖော်ပြထားပြီး စာအုပ်များတွင် ခလုတ်အကြောင်းများသာ ဖော်ပြထားသော်လည်း မည်ကဲ့သို့ စက်ကိုမောင်းနှင်(Operate) ရမည်ဆို သည်ကို ဖော်ပြပေးထားခြင်းမရှိပါ။ ၎င်းအဝတ်လျှော်စက်ကို ပြည်ပမှတင်သွင်းသည့် လုပ်ငန်းရှင် သည် စားသုံး သူကာကွယ်ရေးဥပဒေ ပုဒ်မ(၄၃)ပါ “ သုံးစွဲပုံနည်းလမ်း” အား မြန်မာဘာသာဖြင့် ဖော်ပြပေးရန် ဟူ သည့် ပြဌာန်းချက်ကို ချိုးဖောက်ကြောင်း တွေ့ရမည်ဖြစ်ပါသည်။
မိတ်ဆွေက ၎င်းအဝတ်လျှော်စက်ကို ဝယ်ယူပြီး အိမ်ရောက်သည့်အခါ ကိုယ်တိုင်တပ်ဆင် ကြည့်ကြောင်းနှင့် ပိုင်ရှင်ကိုယ်တိုင် စက်မောင်းမရသည့်အဆုံးတွင် နီးစပ်ရာအပေါင်းအသင်းများအား လက်တည့်စမ်းခိုင်းရာ ရက်သတ္တပတ်(၁)ပတ်ကြာသည့်အထိ စက်မောင်းမရဖြစ်နေခဲ့ရကြောင်း ပြော လာပါသည်။
နောက်ဆုံးတွင် ဝယ်ယူသည့်ဆိုင်အား အကြောင်းကြားသည့်အခါ ၎င်းမဝတ်လျှော်စက် တပ်ဆင်ခြင်း ဝန်ဆောင်မှုပေးသူနှင့် ချိတ်ဆက်ဆောင်ရွက်ရန် တယ်လီဖုန်းနံပါတ်သာပေးပြီး ဆိုင် ရှင်က ဝန်ဆောင်မှုမပေးသဖြင့် ငွေကုန်ကြေးကျပိုမိုများခဲ့ကြောင်း သိရှိရပါသည်။ ဤနေရာ၌ အလျဉ်း သင့်၍ ဖော်ပြလိုသည်မှာ နိုင်ငံတကာတွင် စားသုံးသူများ အကောင်းဆုံးဝန်ဆောင်မှုပေးနေကြသည့် ခေတ်ကြီးသို့ရောက်နေပါသည်။ ကုန်ပစ္စည်းများထုတ်လုပ်ပြီးသောအခါတွင် ၎င်းတို့ထုတ်သည့် ကုန်ပစ္စည်းကို စားသုံးသူများက မည်သည့် အခက်အခဲတွေ့သည်၊ ထုတ်ကုန်များ၏ အားနည်းချက် များကို ရှေ့တွင်မည်ကဲ့သို့ ပြုပြင်ရမည်ဆိုသည်ကို စနစ်တကျလေ့လာသည့် After sales service Center များဖွင့်လှစ်ပြီး ဝန်ဆောင်မှု များပေးခဲ့ကြောင်း လေ့လာခဲ့ဖူးပါသည်။
ကျွန်တော်၏ မိတ်ဆွေကြီးသည် ဆိုင်ကပေးသော လိပ်စာဖြင့် ဝန်ဆောင်မှုပေးသူအား ခေါ်ခဲ့ရ ပါသည်။ ဝန်ဆောင်မှုပေးသူရောက်လာသည့်အခါ အဝတ်လျှော်စက်ကိုကြည့်ပြီး Digital auto-mechine များ တပ်ဆင်သည့်အခါ မြန်မာဘာသာလမ်းညွှန်စာအုပ်မပါခြင်းက အလွန်ဆိုးရွား ကြောင်း၊ လမ်းပန်းဆက်သွယ်ရေးခက်ခဲသည့် ကျေးလက်က စားသုံးသူများက ခေါ်သည့်အခါတွင် လိုက်သွား၍ တပ်ဆင်ပေးခဲ့ရကြောင်း၊ စားသုံးသူအတွက်လည်း ငွေကြေးကျမှုပိုများစေကြောင်း၊ တပ်ဆင်ရသည်မှာ ခက်ခဲသည့်အလုပ်မဟုတ်ကြောင်း၊ ဘာသာစကားအခက်အခဲနှင့် လုပ်ငန်းရှင်က စက်များ၏ သုံးစွဲနည်းစနစ်( Operating system)ဖော်ပြမထားခြင်းများဖြစ်ကြောင်း ရှင်းပြခဲ့သည်ကို မှတ်သားရပါသည်။ ၎င်းက ဆက်ပြောသည်မှာ ယခင်က အစိုးရဌာနများသည် စက်ပစ္စည်းများ မောင်းနှင်မှုစနစ် ဖော်ပြထားခြင်းရှိမရှိများ စက်ပစ္စည်းများတွင် ပါမပါအား စစ်ဆေးသည်ကို ကြားဘူးကြောင်း၊ ယခု နောက်ပိုင်းတွင် စစ်ဆေးသည့် အသံမကြားရတော့ကြောင်း အစရှိသည်ဖြင့် ပြောဆိုမှုအား မှတ်သားခဲ့ရပြီး ကျွန်တော်တို့ တာဝန်မကျေမှုအတွက်လည်း အတော်ရှက်မိခဲ့ပါသည်။
သိနေလျှင်အလွယ်ကလေးပါ
ဝန်ဆောင်မှုပေးသူက အဝတ်လျှော်စက်အား ရေပိုက်တပ်ဆင်ပေးခြင်းနှင့် လျှပ်စစ်မီးတပ်ဆင် ခြင်းများလုပ်ပြီးသည့်အခါ အဝတ်ညစ်များ နမူနာလျှော်ပေးသည့်အခါ အလွယ်ကလေးဖြစ်ကြောင်း မြင်တွေ့ရသည်ဟုဆိုပါသည်။ ခက်သည်မှာ ကုန်အညွှန်းတွင်ပါရှိရမည့် သုံးစွဲပုံနည်းလမ်းနှင့်ကြိုတင် သတိပေးချက် များမပါရှိခြင်းပင်ဖြစ်ကြောင်း၊ ၎င်းအချက်များကို မြန်မာ့စားသုံးသူများနားလည် အောင် မြန်မာဘာသာဖြင့် ရေးသင့်ခြင်းဖြစ်ပါသည်။ ဤသို့ရေးသားဖော်ပြနိုင်ရေးသည် စစ်ဆေးမည့် ဌာနများက ကြပ်မတ်စစ်ဆေးမှုအားနည်းခြင်းသည် အဓိကဖြစ်ပါသည်။
အနာသိလျှင်ဆေးရှိသည်
ကုန်အညွှန်းမပါခြင်းကြောင့် စားသုံးသူများနစ်နာကြောင်း ကိုယ်တိုင်မြင်တွေ့ခဲ့ရပါသည်။ ကိုယ်တိုင် နားဖြင့်ကြားခဲ့ရပြီ။ အဓိကပြဿနာမှာ အနာမသိကြခြင်းဖြစ်ပါသည်။ အနာမသိကြ ခြင်းဟုဆိုရာဝယ် အနာ၏ အတိမ်အနက်နားမလည်ခြင်းဖြစ်ကြောင်း ပြောပါက ပိုမိုမှန်ကန်မည်ဟု ယူဆပါသည်။ ဝန်ထမ်းများက ဈေးကွက်စောင့်စစ်ဆေးခြင်းများ အကြိမ်ကြိမ်စစ်ဆေးခဲ့ကြပြီ။ လုပ်ငန်းရှင်များ အကြိမ်ကြိမ်တွေ့ဆုံ ပညာပေးခဲ့ကြပြီ။ သမရိုးကျဖြစ်နေပြီလား၊ လုပ်ရိုးလုပ်စဉ်အ တိုင်းလုပ်ကြခြင်းလား၊ မြေပြင်စစ်ဆေးရေးအရာရှိများ မွေးထုတ်သော်လည်း သင်ခန်းစာ နောမကျေ ခဲ့ခြင်းလား၊ အခြားလုပ်ငန်းများ ဖိစီး၍မဆောင်ရွက်နိုင်ခြင်းလား၊ စစ်ဆေးရေးအရာရှိနှင့် တာဝန်ခံ အရာရှိများကိုယ်တိုင်က စစ်ဆေးရမည့်ဘာသာရပ်ကို မကျွမ်းကျင်၍လား အစရှိသည်ဖြင့် မေးခွန်း ပေါင်းများစွာ ကိုယ့်ကိုကိုယ် မေးခွန်းများထုတ်မိနေခဲ့ပါသည်။
အဝတ်လျှော်စက် ဝယ်ယူတပ်ဆင်သည့် ဖြစ်စဉ်အား ပြန်လည်သုံးသပ်မည်ဆိုပါလျှင် ကုန် အညွှန်းအမှတ်အသား စစ်ဆေးရမည့်ကုန်ပစ္စည်းအမျိုးအစား ရွေး ချယ်မှုမှားယွင်းမှုများကြောင့်ဟု ယူဆသည်။ အီလက်ထရွန်းနစ်ပစ္စည်းများ စစ်ဆေးလေ့မရှိကြခြင်း၏ နောက်ဆက်တွဲပြဿ နာများပင်ဖြစ်ပါသည်။ ကျွန်တော်တို့ဌာနက မကျွမ်းကျင်သည့်နယ်ပယ်ဖြစ်သဖြင့် စက်ပစ္စည်း တည်ဆောက်ပုံအား စစ်ဆေးရန်မလိုအပ်ပဲ ၎င်းစက်ပစ္စည်း၏ အသုံးပြုပုံအညွှန်းအမှတ်အသား ပါမပါ စစ်ဆေးရုံဖြင့် တာဝန်ကျေနေပြီဖြစ်ပါသည်။
မြို့ပေါ် ပညာတတ်ပေါများသည့် နေရာတွင် အင်္ဂလိပ်စာဖြင့်ဖော်ပြပေးထားသဖြင့် ဖတ်ရှု့ပြီး စမ်းသပ်လုပ်လျှင် တစ်နေ့မဟုတ်တစ်နေ့ ရနိုင်သေးသည်။ ကျေးလက်တောရွာရှိ အင်္ဂလိပ်စာ ဖတ်ရန်ခက်ခဲသည့် စားသုံးသူဖြစ်ပါက စက်ပြင်ဝန်ဆောင်မှုအတွက် ခြေကြွခမှစ၍ ပိုမိုကုန်ကျစရိတ် များလာပေမည်။ သို့အတွက်ကြောင့် အဝတ်လျှော်စက်နှင့် ၎င်းအလားတူ ကုန်ပစ္စည်းများအတွက် မဖြစ်မနေ ကုန်အညွှန်းအမှတ်အသားများကို မြန်မာဘာသာဖြင့် ကုန်ပစ္စည်းအသုံးပြုပုံနှင့် ကြိုတင်သ တိပေးချက်များ ပါမပါများအား မဖြစ်မနေစစ်ဆေးပေးသင့်ကြောင့် စစ်ဆေးရေးအရာရှိများအား တိုက်တွန်းနှိုးဆော် အကြံပြုအပ်ပါသည်။
DOCA(စစ်ကိုင်း)