လူနေမှုဘဝ အစဉ်တည်တံ့ဖို့ မျှတအသွင်ကူးပြောင်းစို့

 လူ့လောကတွင် လူသာမှန်လျှင် စားရေး၊ဝတ်ရေး၊နေထိုင်ရေးဟူသော အရေးသုံးပါး အတွက် ကြိုးပမ်းလုပ်ကိုင်နေကြရသည်။ ယင်းသို့ နေ့စဉ်နေ့တိုင်း လုပ်ဆောင်သလို နောက်နောင်တွင်လည်း လုပ်ကိုင်ကြရပေဦးမည်။ ဤသို့လုပ်ကိုင်နိုင်ရန်အတွက် ကျန်းမာဖို့ လိုအပ်သည်။ “အာရောဂျံ ပရမံ လာဘံ” ဆိုသော စာဆိုအရ ကျန်းမာခြင်းသည် လဒ်တစ်ပါးဖြစ်သည်။ ယနေ့ခေတ်တွင် အစားအသောက်အမျိုးမျိုး ဆန်းပြားစွာ ပေါများလာပြီး ဘေးအန္တရာယ်ဖြစ်စေနိုင်သော အစားအစာများလည်း ပေါများလာခဲ့သည်။ ထို့ကြောင့် ကျွန်ပ်တို့ သည် အစားအစာများကို အသိ/သတိဖြင့် ဆင်ချင်၍ စားသောက်ဖို့ လိုအပ်လာပေသည်။ ရောဂါဝေဒနာများ ဖြစ်တည်လာပြီဆိုပါက သက်သာပျောက်ကင်းအောင် ဆေးဝါး/ဓာတ်စာတို့ နှင့်ကုသကြရသလို ငွေကြေးတတ်နိုင်သူတို့ကလည်း ခေတ်မီဆေးရုံ၊ ဆေးခန်းများတွင် သွားရောက်ကုသမှု ခံယူသကဲ့သို့ ငွေကြေးအင်အားချို့တဲ့သူများအနေဖြင့် မိမိတတ်စွမ်းသမျှ ကုသမှုခံယူကြ၏။ ထို့ကြောင့် “အသွားမတော်တစ်လှမ်း၊ အစားမတော် တစ်လုတ်” ဆိုသည့် စကားအတိုင်းပင် အစားအသောက်အနေအထိုင် သတိကြီးစွာ ဆင်ဆင်ချင်ချင်နေထိုင် စားသောက်ရန် လိုအပ်ပြီး စားသောက်မှုပုံစံ ပြောင်းလဲကျင့်သုံးနိုင်မှသာ လူနေမှု့ဘဝတွင် အသက်ရှည်  အနာကင်းမဲ့ ကျန်းမာခြင်းနှင့် ပြည့်စုံမည်ဖြစ်ပါသည်။

ယနေ့ကမ္ဘာကြီးသည် ဘက်ပေါင်းစုံမှ ဖွံ့ဖြိုးတိုးတက်လျက်ရှိသည်။ ထုတ်လုပ်မှုပုံစံ အမျိုးမျိုး ပြောင်းလဲထုတ်လုပ်လာကြပြီး အထူးသဖြင့် ပြည်ပမှတင်သွင်းလာသော လူသုံးကုန် ပစ္စည်း၊  အလှကုန်ပစ္စည်း၊ ဆေးဝါးနှင့် အစားအစာများ စသည့်ကုန်ပစ္စည်းများ ဘေးအန္တရာယ် ကင်းရှင်းပြီး လုံခြုံမှုရှိဖို့ လိုသည်။ စားသုံးသူပြည်သူများအနေဖြင့် အစားအစာများ၊ အသုံး အဆောင်ပစ္စည်းများကို ရွေးချယ်စားသောက်၊ သုံးစွဲတတ်ရန် နှင့် ကုန်အညွှန်းအမှတ် အသား ဖော်ပြချက်တွင် ပါဝင်သည့် ပစ္စည်း၊ ဓာတ်မတည့်ကြောင်း ဖော်ပြချက်၊ ထုတ်လုပ်ရက်စွဲ၊ သက်တမ်းကုန်ဆုံးရက်၊ အလေးချိန်၊ ထားသိုသိမ်းဆည်းမှု၊ သက်မှတ်ထားသည့်ဝန်ကြီး ဌာနများ၏ ခွင့်ပြုချက် ရှိ/မရှိ စသည့်သတင်းအချက်အလက်များ စစ်ဆေးပြီးမှ ဝယ်ယူသင့်သည်။ တိုးတက်ပြောင်းလဲလာသည့် အလျောက် အရောင်း/အဝယ်ပြုရာတွင် လူချင်းတွေ့၍ ရောင်းချ မှုတွင်မက Social media များကို ဈေးကွက်သဖွယ် အသုံးပြုလာကြသည်။ အချိန်ကုန် သက်သာစေခြင်း၊ လွယ်လင့်တကူ ဝယ်ယူနိုင်၍ လူမပင်ပန်းစေခြင်းတို့ကြောင့် online အရောင်း/ အဝယ် စနစ်မှာ တိုးတက်များပြားလာသည်။ online shop လုပ်ငန်းသည် ကောင်းကျိုးများ ရှိသကဲ့သို့ စားသုံးသူပြည်သူများအနေဖြင့် သတိပြုဆောင်ရွက်ရမည့် အချက်များလည်းရှိသည်။ ယင်းကဲ့သို့ ဆိုးကျိုးအနေဖြင့် ကုန်ပစ္စည်း မှားယွင်းစွာပေးပို့မှု ငွေကြေးလိမ်လည်မှုများရှိပြီး စာသုံးသူအခွင့်အရေး ဆုံးရှုံးရသည်။ စားသုံးသူ အခွင့်အရေးများ ပြန်လည်ရရှိနိုင်ရန် ရည်ရွယ်၍ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနမှ  စားသုံးသူ ကာကွယ်ရေးဥပဒေကို  ၂၀၁၉  ခုနှစ် မတ်လ (၁၅)ရက်နေ့တွင် အတည်ပြုပြဌာန်းခဲ့သည်။ စားသုံးသူများရရှိနိုင်သည့် အခွင့်အရေး (၈)ချက်မှာ-

(၁)     စားသုံးသူများအတွက် ကုန်စည်(သို့)ဝန်ဆောင်မှုနှင့် စပ်လျဉ်း၍ အခြေခံ လိုအပ်များပေါ်တွင်   စိတ်ကျေနပ်မှု ရရှိစေခြင်း၊

(၂)      ကုန်စည်(သို့) ဝန်ဆောင်မှုကို ဘေးအန္တရာယ်ကင်းရှင်းစွာ အသုံးပြုခွင့်ရှိခြင်း၊

(၃)     ကုန်စည်နှင့်ဝန်ဆောင်မှုကို ရွေးချယ်ဝယ်ယူအသုံးပြုရာတွင် လိုအပ်သော သတင်း အချက်အလက်များ ပြည့်စုံမှန်ကန်စွာ သိရှိခွင့်နှင့်ပြေစာ (သို့) အထောက်အထား ရယူခွင့်ရှိခြင်း၊

(၄)     ဈေးကွက်အတွင်းရှိ ကုန်စည်(သို့)ဝန်ဆောင်မှုနှင့် စပ်လျဉ်း၍ စားသုံးသူ စိတ်ကြိုက်ရွေးချယ် ဝယ်ယူနိုင်ခွင့်ရှိခြင်း၊

(၅)     စားသုံးသူနစ်နာဆုံးရှုံးမှုနှင့် စပ်လျဉ်းသည့် ကိစ္စရပ်များတွင် ရှင်းလင်းတင်ပြခွင့်နှင့် တိုင်းကြားခွင့် ရရှိစေခြင်း၊

(၆)    ကုန်စည်(သို့)ဝန်ဆောင်မှုကိုဝယ်ယူအသုံးပြုခြင်းကြောင့် ဖြစ်ပေါ်လာသော နစ်နာ ဆုံးရှုံးမှုများနှင့် စပ်လျဉ်း၍ ကုစားခွင့် ရရှိခြင်း၊

(၇)     ကုန်စည်(သို့)ဝန်ဆောင်မှုနှင့်စပ်လျဉ်းသည့် အသိပညာ ဗဟုသုတများ၊ အခွင့်အရေးများနှင့် လိုအပ်သော အချက်အလက်များကို သိရှိလေ့လာနိုင်ခွင့် ရှိခြင်း၊

(၈)     ပစ္စုပ္ပန်တွင်သာမက အနာဂတ်မျိုးဆက်များအတွက်ပါ ကောင်းမွန်သာယာသော လူနေမှုအဆင့်အတန်းနှင့် ပတ်ဝန်းကျင်တွင်နေထိုင်နိုင်ခွင့် ရရှိစေခြင်း၊

တို့ဖြစ်သည်။

စားသုံးသူများသည် ကုန်စည်နှင့်ဝန်ဆောင်မှုများနှင့် စပ်လျဉ်း၍ နစ်နာဆုံးရှုံးမှု ရှိပါကစားသုံးသူရေးရာဦးစီးဌာန နီးစပ်ရာခရိုင်/မြို့နယ်ရုံးများသို့ လူကိုယ်တိုင်သော်လည်းကောင်း၊ လူထုဆက်သွယ်ရေးနည်းလမ်းဖြင့် သော်လည်းကောင်း တိုင်ကြားနိုင်ခြင်း(သို့မဟုတ်) Consumer Call Center (1535) သို့လည်းကောင်း၊ www.doca.gov.mm လူမှုကွန်ရက် စာမျက်နှာတို့မှလည်းကောင်း တို်ငကြားနိုင်သည်။ လူမှု့ဘဝဘေးအန္တရာယ်ကင်း ဖွံ့ဖြိုးတိုးတက်စေရန်အတွက် စားသုံးသူများသည် စားသုံးသူ အခွင့်အရေးရှိသကဲ့သို့ လိုက်နာဆောင်ရွက်သင့်သည့် တာဝန်များလည်းရှိသည်။ သိရှိ လိုက်နာရမည့်  တာဝန်များမှာ

(၁)     ကုန်စည်(သို့)ဝန်ဆောင်မှုနှင့်စပ်လျဉ်းသည့် သတင်းအချက်အလက်နှင့် လမ်းညွှန်းချက် များအတိုင်း လိုက်နာဆောင်ရွက်ခြင်း၊

(၂)      ကုန်စည်(သို့)ဝန်ဆောင်မှုကို ရွေးချယ်ဝယ်ယူရာတွင် သဘောတူညီထားသည့် တန်ဖိုးနှင့် အညီ ပေးချေခြင်း၊

(၃)     စီးပွားရေးလုပ်ငန်းရှင်အပေါ် ထိခိုက်နစ်နာစေရန် ရည်ရွယ်၍ မဟုတ်မမှန် စွပ်စွဲပြောဆိုမှု၊ ပြုလုပ်မှုတို့ကို ရှောင်ကြဉ်ခြင်း၊

(၄)     အငြင်းပွားမှုကို ညှိနှိုင်းဖြေရှင်းနေစဉ် လူထုဆက်သွယ်ရေးနည်းလမ်းများဖြင့်ဖြစ်စေ၊ အခြားနည်းလမ်းများဖြင့်ဖြစ်စေ သက်ဆိုင်ရာ စီးပွားရေးလုပ်ငန်းရှင်အပေါ် ထိခိုက်နစ်နာ စေရန် မဟုတ်မမှန်ပြောဆိုခြင်း၊ ရေးသားခြင်းနှင့် ပြုမှုခြင်းတို့ကို ရှောင်ကြဉ်ခြင်း၊

အဆိုပါ တာဝန်များအား စားသုံးသူများ လိုက်နာကျင့်သုံးသင့်သည်။ ထိုသို့ စားသုံးသူများ သိထားသင့်သည် စားသုံးသူအခွင့်အရေး (၈)ချက်နှင့် သိရှိလိုက်နာသင့်သည့် တာဝန်(၄)ချက်ကို အများပြည်သူ ပိုမိုသိရှိစေရန်အလိုငှာ အခြေခံစာသင်ကျောင်းများ၊ တက္ကသိုလ်ကျောင်းများ၊ သင်တန်းကျောင်းများ၊ ရပ်ကွက်ကျေးရွာများ၊ ဌာနဆိုင်ရာရုံးများ၊ အသင်းအဖွဲ့ရုံးများ၊ အများပြည်သူ သိရှိနိုင်သည့် နေရာများ၌ နစ်နာဆုံးရှုံးမှုများ လျော့နည်း၍ ဘေးအန္တရာယ်ကင်း လူမှု့ဘဝတိုးတက်မြင့်မားလာစေရန်  ဟောပြောပွဲများ ပြုလုပ်လျက်ရှိသည်။ ထိုနည်းတူစွာ ထုတ်လုပ်သူ၊ ဖြန့်ဖြူးသူ၊ ရောင်းချသူအား သိရှိလိုက်နာစေရန် အသိပညာပေးခဲ့ပါသည်။ ထုတ်လုပ်သည့် လုပ်ငန်းနေရာများသို့ ကွင်းဆင်းကြီးကြပ်စစ်ဆေး၍ စီးပွားရေးလုပ်ငန်းရှင် များအား စားသုံးသူကာကွယ်ရေး အသိပညာပေးဆွေးနွေးမှုများ ဆောင်ရွက်ကြပါသည်။

     နိုင်ငံတစ်နိုင်ငံ ဖွံ့ဖြိုးတိုးတက်မှုသည် စီးပွားရေးလုပ်ငန်ုးရှင်များအတွက် အရေးကြီး သည့် အခန်းကဏ္ဍတွင်ပါရှိနေသည်။  စားသောက်ကုန်စည်များ (သို့) ဝန်ဆောင်မှုဆိုင်ရာ ထုတ်ကုန်များကို ဘေးအန္တရာယ်ကင်းရှင်းစွာသုံးစွဲမှု အထူးဂရုပြု၍ ထုတ်လုပ်ရမည်မှာ စီးပွားရေးလုပ်ငန်းရှင်များ၏ တာဝန်ပင်ဖြစ်သည်။ စီးပွားရေးလုပ်ငန်းရှင်များ သိရှိလိုက်နာရမည့် တာဝန်များမှာ-

(၁)     ကုန်စည်(သို့)ဝန်ဆောင်မှု၏ အာမခံချက်၊ သက်မှတ်ချက်များနှင့် စပ်လျဉ်း၍ ရိုးရှင်းမှန်ကန်သော သတင်းအချက်အလက်များပေးခြင်း၊

(၂)      စားသုံးသူကို ခွဲခြားမှုမရှိဘဲ ဖြောင့်မတ်မှန်ကန်စွာ ဆက်ဆံခြင်း၊

(၃)     စီးပွားရေးလုပ်ငန်း လုပ်ကိုင်ရာတွင် စီးပွားရေးကျင့်ဝတ်၊ စည်းကမ်းနှင့်အညီ ဖြောင့်မတ်မှန်ကန်စွာ ဆောင်ရွက်ခြင်း၊

(၄)     ကုန်သွယ်မှုပြုရန်နှင့် ထုတ်လုပ်မှုပြုရန် အလိုငှာ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ သက်ဆိုင်ရာအစိုးရဌာန၊ အစိုးရအဖွဲ့အစည်းများက သက်မှတ်ထားသည့် အရည်အသွေးစံ သတ်မှတ်ချက်များ အပေါ် အခြေခံ၍ အာမခံချက်ပေးခြင်း၊

(၅)     အရည်အသွေးစမ်းသပ်ရန် လိုအပ်သော ကုန်စည်နှင့် စပ်လျဉ်း၍ ဝယ်ယူခြင်းမပြုမီ စားသုံးသူများကို စမ်းသပ်နိုင်သည့် အခွင့်အရေးပေးခြင်း၊

(၆)     ကုန်စည် သို့မဟုတ် ဝန်ဆောင်မှုနှင့် စပ်လျဉ်း၍ထပ်မံ ပေးချေရမည့် တန်ဖိုးကို စားသုံးသူက ဝယ်ယူအသုံးမပြုမီ သိရှိစေရန် အတိအလင်းဖော်ပြပေးခြင်း၊

(၇)     စားသုံးသူ နစ်နာဆုံးရှုံးမှုဖြစ်ပွားစေမည့် ကုန်စည် သို့မဟုတ် ဝန်ဆောင်မှုကို တိုက်ရိုက်ရောင်းချခြင်း သို့မဟုတ် သွယ်ဝိုက်ရောင်ချခြင်းကို ရှောင်ကြဉ်ခြင်း၊

(၈)     ကုန်စည် သို့မဟုတ် ဝန်ဆောင်မှုနှင့် စပ်လျဉ်း၍ ကတိပြုထားသော အာမခံချက်နှင့် ကိုက်ညီမှုမရှိပါက ကတိပြုထားသည့်အတိုင်း တာဝန်ယူ ဆောင်ရွက်ပေးခြင်း၊

(၉)     အငြင်းပွားမှုကို ညှိနှိုင်းဖြေရှင်းနေစဉ် လူထုဆက်သွယ်ရေးနည်းလမ်းဖြင့်ဖြစ်စေ၊ အခြားနည်းလမ်းများဖြင့် ဖြစ်စေ စားသုံးသူအပေါ် ထိခိုက်နစ်နာစေရန်၊ ခြိမ်းခြောက်ခြင်း၊ မဟုတ်မမှန်ပြောဆိုခြင်း၊ ရေးသားခြင်းနှင့် ပြုမူခြင်းတို့ကို ရှောင်ကြဉ်ခြင်း၊

(၁၀)   ထုတ်လုပ်သည့် ကုန်စည် သို့မဟုတ် ဝန်ဆောင်မှုတွင် ဘေးအန္တရာယ်ရှိကြောင်းကို  မိမိကိုယ်တိုင်သော်လည်းကောင်း၊ အခြားနည်းလမ်းတစ်ခုခုအရသော်လည်း ကောင်း သိရှိလျှင် အဆိုပါ အကြောင်းအရာအား ဦးစီးဌာနနှင့် စားသုံးသူများထံ အချိန်မီ သိရှိနိုင်စေရန် လူထုဆက်သွယ်ရေးနည်းလမ်းများဖြင့် ဖြစ်စေ၊ အခြားနည်းလမ်းများဖြင့်ဖြစ်စေ၊ အသိပေးခြင်း၊

(၁၁)   ကုန်စည် သို့မဟုတ် ဝန်ဆောင်မှုနှင့် စပ်လျဉ်း၍ အငြင်းပွားမှု ကိစ္စရပ်များ ဖြစ်ပေါ်ခဲ့ပါက သက်ဆိုင်ရာ ကော်မတီ၏ ဖြေရှင်းဆောင်ရွက်ပေးမှုနှင့် ဆုံးဖြတ်ချက်ကို အလေးထားလိုက်နာဆောင်ရွက်ခြင်းဖြင့်

လုပ်ငန်းရှင်၏ တာဝန်အတိုင်း သိရှိလိုက်နာဆောင်ရွက်ရမည်။ လုပ်ငန်းရှင်သည် လုပ်ငန်းသဘောဖြင့် ထုတ်လုပ်လိုက်သော အစားအသောက်များ အသုံးအဆောင်များတွင် စားသုံးသူပြည်သူအတွက် နစ်နာဆုံးရှုံးမှု ဖြစ်စေသည့်အခါတွင်လည်းကောင်း၊ ခင်းကျင်း ရောင်းချသည့် အချိန်ဝယ် စားသုံးသူသုံးစွဲခြင်းဖြင့် နစ်နာဆုံးရှုံးမှု ဖြစ်စေသည့် အခါတွင် လည်းကောင်း၊ ကုန်စည်/ဝန်ဆောင်မှုများအပေါ် စားသုံးသူများ သုံးစွဲခြင်းဖြင့် နစ်နာဆုံးရှုံးမှုများ လျော့နည်း၍ ပပျောက်စေရန်အလိုငှာ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနမှ တိုင်းဒေသကြီးနှင့် မြို့နယ်အလိုက် ဌာနခွဲများ ထားရှိ၍ ဖြေရှင်း ဆောင်ရွက်ပေးလျက်ရှိသည်။

လုပ်ငန်းရှင်သည် တစ်ဖက်တစ်လမ်းမှ စီးပွားရေး လုပ်ဆောင်နေသော်လည်း စားသုံးသူ၏ အခွင့်အရေးအရ စည်းမျဉ်းစည်းကမ်းများနှင့်အညီ လိုက်နာဆောင်ရွက်ခြင်းဖြင့် ပိုမိုကောင်းမွန် သော အနာဂတ်သို့ ခေါ်ဆောင်လာခြင်းဖြစ်သည်။ စားသုံးသူပြည်သူ အနေဖြင့်လည်း သုံးစွဲသည့် ကုန်စည် နှင့် ဝန်ဆောင်မှုများ အပေါ်  စိတ်ကျေ နပ်မှုရှိစေခြင်း၊ ဘေးအန္တရာယ်ကင်းမှုရှိခြင်းနှင့် စားသုံးသူအတွက် နစ်နာမှုရှိလျှင် တိုင်ကြားနိုင်ခွင့် အခွင့်အရေးများ ရှိခြင်းတို့ကြောင့် ပစ္စုပ္ပန်တွင်သာမက အနာဂတ်မျိုးဆက်အတွက်ပါ ကောင်းမွန်သာယာသော လူနေမှုအဆင့် အတန်းနှင့် ပတ်ဝန်းကျင်သို့ တစ်ဖြေးဖြေး ပြောင်းလဲလာသည်။ စားသုံးသူများအတွက် ဘေးအန္တရာယ် ကင်းရှင်းစေပြီး နစ်နာဆုံးရှုံးမှုများ မဖြစ်စေရန် စားသုံးသူရေးရာဦးစီးဌာနမှ စားသုံးသူကာကွယ်ရေးဥပဒေကို ပြဌာန်း၍ စစ်ဆေးရေးမှူးများက စဉ်ဆက်မပြက် စောင့်ကြည့် စစ်ဆေးလျက်ရှိသည်။ စားသုံးသူကာကွယ်ရေး ဥပဒေကို  ၂၀၁၉ ခုနှစ်၊မတ်လ (၁၅)ရက်နေ့တွင် အတည်ပြုပြဌာန်းခဲ့ပြီး စားသုံးသူကာကွယ်ရေး နည်းဥပဒေကို ၂၀၂၂ ခုနှစ်၊ ဇန်နဝါရီလ (၁၈)ရက်နေ့တွင် ပြည်ထောင်စု အစိုးရအဖွဲ့၏ သဘောတူညီချက်ဖြင့် အတည်ပြု ထုတ်ပြန်ခဲ့သည်။ ကမ္ဘာ့စားသုံးသူ အခွင့်အရေးများနေ့ကို အာဆီယံ အဖွဲ့ဝင် နိုင်ငံအသီးသီးမှ မတ်လ (၁၅)ရက်နေ့သည် ကမ္ဘာ့စားသုံးသူ အခွင့်အရေးများနေ့ဖြစ်ပြီး နှစ်စဉ်ကျင်းပလျက် သည်။မြန်မာနိုင်ငံသည် အာဆီယံ အဖွဲ့ဝင် နိုင်ငံတစ်နိုင်ငံဖြစ်ပြီး အာဆီယံ စားသုံးသူ ကာကွယ်ရေး ကော်မတီ အစည်းအဝေးနှင့် ဆက်စပ်အစည်းအဝေးများသို့ စားသုံးသူ ရေးရာဦးစီးဌာမှ တာဝန်ရှိသူများက တက်ရောက်ဆွေးနွေးကြသည်။၂၀၁၇ခုနှစ်၊ အောက်တို ဘာလတွင် မြန်မာနိုင်ငံမှ အိမ်ရှင်အဖြစ် တာဝန်ယူကျင်းပနိုင်ခဲ့သည်။

စားသုံးသူများ၏ နစ်နာမှုများအတွက် စာသုံးသူရေးရာဦးစီးဌာနသည် ဖြေရှင်းကူညီရန် အသင့်ရှိနေပြီး အကာအကွယ်များလည်း ပေးအပ်နေပြီ ဖြစ်ပါသည်။သို့ပါ၍ စားသုံးသူ ကာကွယ်ရေးသည် တစ်ကမ္ဘာ့လုံးရှိ လူသားအားလုံးနှင့် သက်ဆိုင်သော  အလုပ်ကြီး တစ်ခု ဖြစ်သကဲ့သို့ အမျိုးသားရေး တာဝန်ကြီးတစ်ရပ်လည်း ဖြစ်ပါသည်။  ထုတ်လုပ်သူ၊ ဖြန့်ဖြူးသူ၊ရောင်းချသူနှင့် စားသုံးသူတို့အားလုံး ပူးပေါင်းပါဝင်၍ မျှတသည့် အသွင်သို့ ကူးပြောင်းနိုင်စေရန် စားသုံးသူ ကာကွယ်ရေး လုပ်ငန်းများကို တက်ညီလက်ညီ လက်တွဲဆောင်ရွက်ကြမည်ဖြစ်ပါသည်။ သို့မှသာ မြန်မာပြည်သည် သန့်ရှင်းသော ဈေးကွက်ကြီးတစ်ခုဖြစ်လာပြီး လူနေမှုဘဝ အစဉ်မြင့်မားလာကာ ကျန်းမာပျော်ရွှင်သော ဘဝကို ပိုင်ဆိုင်လာကြမည်မှာ အေကံမုချပင်ဖြစ်ပါကြောင်း လူနေမှုဘဝ အစဉ်တည်တံ့ဖို့ မျှတအသွင်ကူးပြောင်းစို့ ဆောင်းပါးခေါင်းစဉ်ဖြင့် ရေးသားတင်ပြလိုက်ရ ပါသည်။

DOCA(ဧရာဝတီ)