“ကုန်ထုတ်စွမ်းအင်မြှင့်တင် ဈေးကွက်ချဲ့ထွင်”

မြန်မာ့စီးပွားရေးကဏ္ဍများ ပိုမိုဖွံ့ဖြိုးတိုးတက်လာစေရန်အတွက် ငွေကြေးရင်းနှီးမြှုပ်နှံမှုများ၊ ဈေးကွက်ဖော်ဆောင်မှုဆိုင်ရာ စီမံခန့်ခွဲမှုများ၊ နည်းပညာဆိုင်ရာ လုံလောက်သည့်အထောက်အပံ့များ နှင့် လူ့စွမ်းအားအရင်းအမြစ်များ များစွာ လိုအပ်လျက်ရှိပါသည်။ စီးပွားရေးလုပ်ငန်းများအား ပြည်တွင်း/ ပြည်ပဈေးကွက်များအတွင်း အရှိန်အဟုန်ဖြင့် ထိုးဖောက်နိုင်စေရန်  နယ်ပယ်အသီးသီးရှိ လူပုဂ္ဂိုလ် များ၏ အတွေးအခေါ်များဖြင့်သာမက တီထွင်ဆန်းသစ်ထားသည့် စီးပွားရေးနည်းပညာရပ် များဖြင့် ဖန်တီးအသုံးချလုပ်ကိုင်လျက်ရှိသည်။ စီးပွားရေးနယ်ပယ်တွင် ကုန်စည်များကိုလည်းကောင်း၊ ဝန်ဆောင်မှုများကိုလည်းကောင်း ဖန်တီးခြင်း၊ ထုတ်လုပ်ခြင်းနှင့်ရောင်းချခြင်းဟူသည့် ကဏ္ဍ များ အခိုင်အမာ ပါဝင်ပါသည်။

စားသုံးသူကာကွယ်ရေးဥပဒေတွင် “ကုန်စည်(Goods)ဆိုသည်မှာ စားသုံးသူကိုယ်တိုင်အတွက် သော်လည်းကောင်း၊ အခြားသူများအတွက်သော်လည်းကောင်း ရည်ရွယ်၍ ဝယ်ယူခြင်း၊ အသုံးပြုခြင်း သို့မဟုတ် စားသုံးခြင်းပြုသော အရာဝတ္ထုကိုဆိုသည်။ ယင်းစကားရပ်တွင် ငွေရေးကြေးရေးဆိုင်ရာ လွှဲပြောင်းနိုင်သော စာချုပ်စာတမ်း၊ အစုရှယ်ယာ၊ ငွေချေးလက်မှတ်၊ ငွေကြေးစသည့်  ကိစ္စရပ်များ လည်း ပါဝင်သည်” ဟု အဓိပ္ပာယ်ဖွင့်ဆိုထားပါသည်။

ကုန်ထုတ်လုပ်မှု(Manufacturing)နှင့်စပ်လျဉ်း၍ စိုက်ပျိုးရေးကို အခြေခံသည့် စိုက်ပျိုးရေးထွက် ကုန်ပစ္စည်းများ၊ လတ်ဆတ်သောစားသောက်ကုန်များ ထုတ်လုပ်ရာတွင် အရည်အသွေး ပြည့်မီသော ကုန်ကြမ်းပစ္စည်းများ(Qualified Raw Materials)ကို အသုံးပြုရန် လိုအပ်ပါသည်။ ကုန်ကြမ်း ဆိုသည်မှာ စီးပွားရေးလုပ်ငန်းတစ်ခုဆောင်ရွက်ရာ၌ လိုအပ်သည့်  စက်ကိရိယာများ၊ အခြေခံပစ္စည်း များနှင့် ဆက်စပ်ကုန်ပစ္စည်းများကို ဆိုလိုပါသည်။ အလားတူ ကုန်ထုတ်လုပ်မှုတွင် အခြေခံ လိုအပ်ချက်ဖြစ်သည့် Formula သည်လည်း စနစ်တကျရှိရန် လိုအပ်သည်။ ကုန်ထုတ်လုပ်မှုတွင် စက်ရုံများ(Industries)သည်လည်းအရေးကြီးကဏ္ဍဖြစ်ပြီးရုပ်ပိုင်းဆိုင်ရာနှင့်ဇီဝ/ဓါတုဆိုင်ရာအန္တရာယ် များမှ ကာကွယ်ရန်အတွက် ပတ်ဝန်းကျင်(Environment)ထိခိုက်မှုမရှိစေရန် (အထူး) ဂရုပြုရမည် ဖြစ်သည်။

          အဆင့်မြင့်ကုန်ထုတ်လုပ်မှုများဖြစ်ပေါ်လာရန်နှင့် ပြည်တွင်းသာမက ပြည်ပနိုင်ငံများအထိတိုင် ဈေးကွက်ကျယ်ပြန့်လာစေရန် ထုတ်လုပ်သည့်ကုန်စည်အရည်အသွေးကဏ္ဍသည် အရေးကြီးဆုံးသော အခန်းကဏ္ဍမှပါဝင်နေပြီး ကုန်ပစ္စည်းထုတ်လုပ်ရန် စက်ကိရိယာပစ္စည်းများ၊ နည်းပညာအရည်အသွေး များနှင့် လုပ်သားအင်အားများ လုံလောက်စွာ ထားရှိရန်မှာလည်း အရေးကြီးသည်။

          ထိရောက်သော ကုန်ထုတ်လုပ်မှု၊ ကုန်သွယ်မှုဖြစ်ရန် (Market Trends)သည်လည်း စီးပွားရေး လုပ်ငန်းများ၏ အရေးပါသောအခန်းကဏ္ဍမှ ပါဝင်နေပါသည်။ ကုန်သည်များ သို့မဟုတ် စီးပွားရေး လုပ်ငန်းရှင်များသည် အကျိုးအမြတ်အများဆုံး ချဲ့ထွင်နိုင်ရန် (Market Trends)ကို အသုံးပြုကြသည်။ (ဥပမာ-ကုန်ထုတ်လုပ်မှုအနေဖြင့် ဈေးကွက်အတွင်း Trends ဖြစ်နေသည့် အကြောင်းအရာများ၊ ဝန်ဆောင်မှုလုပ်ငန်းများအနေဖြင့် အကျိုးဆောင်လုပ်ငန်းများဖြစ်သည့် အိမ်ခြံမြေ လုပ်ငန်းများ၊ အိမ်တွင်းအလှဆင်ခြင်းလုပ်ငန်းများ၊ စီးပွားရေးဆိုင်ရာသင်တန်းများအပြင် စီးပွားရေး အကြံပေးခြင်း ဆိုင်ရာလုပ်ငန်းများနှင့် Online စီးပွားရေးလုပ်ငန်းများ (အဝတ်အထည်၊ စားသောက်ကုန် စသည့်)

ကုန်စည်အရည်အသွေးနှင့်ဈေးကွက်ခြယ်လှယ်ခြင်းဟုဆိုလျှင် ထုတ်ကုန်တစ်ခုသည် သုံးစွဲရန် အတွက်လုံခြုံစိတ်ချရသည့် ထုတ်ကုန်များဖြစ်ရန် လိုအပ်ပြီး စားသုံးသူနှစ်သက်နိုင်လောက်သည့် အရည်အသွေးဖြစ်ရမည့်အပြင် ငွေကြေးတန်ဖိုးအနေဖြင့် သင့်တင့်မျှတသည့် တန်ဖိုးတစ်ခုဖြစ်ရန် လိုအပ်ပါသည်။ သို့မှသာ ဈေးကွက်အတွင်း ယှဉ်ပြိုင်မှုအားကောင်းသည့် ထုတ်ကုန်များ ဖြစ်လာမည် ဖြစ်သည်။

ထုတ်ကုန်တစ်ခု၏ ဈေးကွက်အတွင်း ခိုင်ခိုင်မတ်မတ်ရပ်တည်နေနိုင်မှုသည် ကုန်ထုတ်လုပ်သူ ၏ အရည်အချင်းတစ်ရပ်ဖြစ်ကာ ၎င်း၏   စီးပွားရေးလုပ်ငန်းအပေါ် ထားရှိသည့် ပန်းတိုင်များနှင့် စနစ်များ(Goals Vs Systems)ကြောင့်ပင် ဖြစ်သည်။ ထို့အတူ စီးပွားရေးလုပ်ငန်းများ၏  ရေရှည် တည်တံ့မှုသည် နိုင်ငံ၏ စီးပွားရေးအလားအလာ ကောင်းမွန်ခြင်းနှင့် ဆက်စပ်နေပါသည်။

ယခုအခါ နိုင်ငံတော်အနေဖြင့် စက်မှုကဏ္ဍဖွံ့ဖြိုးတိုးတက်ရေးနှင့် အသေးစား၊ အငယ်စားနှင့် အလတ်စားစီးပွားရေးလုပ်ငန်းများ(Micro,Small, and Medium Enterprises-MSMEs) တွင်ကျယ်စွာ ဖြစ်ပေါ်လာရေး အလေးထား ဆောင်ရွက်လျက်ရှိပြီး ထုတ်ကုန်များ တိုးချဲ့ထုတ်လုပ်နိုင်ရေးအတွက် အစိုးရနှင့်ပုဂ္ဂလိက ပူးပေါင်းဆောင်ရွက်လျက်ရှိပါသည်။

          MSMEs လုပ်ငန်းများ ဖွံ့ဖြိုးတိုးတက်လာသည်နှင့်အညီ အလုပ်အကိုင်အခွင့်အလမ်းများ ပေါ်ပေါက်လာခြင်း၊ ဆန်းသစ်တီထွင်မှုများ အားကောင်းလာစေခြင်း၊ ဈေးကွက်ပြိုင်ဆိုင်မှုများ ကို မြှင့်တင်ပေးခြင်းနှင့် ဒေသတွင်းသာမက ကမ္ဘာ့ဈေးကွက်ထိတိုင် ရောက်ရှိအောင် စွမ်းဆောင် နိုင်ခြင်းသည် မြန်မာ့စီးပွားရေးဖွံ့ဖြိုးတိုးတက်မှုအတွက် မြန်ဆန်ထိရောက်စေနိုင်သည့် ဗျူဟာများမှ တစ်ရပ်အပါအဝင်ဖြစ်ပေသည်။

သို့တည်းဟူမူကား မြန်မာ့စီးပွားရေးဈေးကွက် ကျယ်ပြန့်စေရန် ဆွဲဆောင်မှုအားကောင်းသည့် ထုတ်ကုန်များအား များစွာ ထုတ်လုပ်လာနိုင်သည့် ဈေးကွက်ရှာဖွေမှုများ စဉ်ဆက်မပြတ် ဆောင်ရွက်နိုင်ရန် လိုအပ်လျက်ရှိပါကြောင်းနှင့် နိုင်ငံခြားဈေးကွက်ဝင်လိုမှု အခက်အခဲများအား အစိုးရနှင့်ပုဂ္ဂလိက ချိတ်ဆက်ဆောင်ရွက်ခြင်းအားဖြင့် ဖွံ့ဖြိုးဝေဆာ အလှဖြာ၍ ကမ္ဘာ့နိုင်ငံများနှင့် စီးပွားရေးမိတ်ဖက်နိုင်ငံတစ်နိုင်ငံဖြစ်လာနိုင်ပါစေကြောင်း ဆန္ဒပြုရေးသား လိုက်ရပါသည်-

“ကုန်ထုတ်စွမ်းအင် ၊ ပြည့်ဝလျှင်

စီးပွားဖွံ့ဖြိုး၊ နိုင်ငံအလှတိုး

တည်တံ့ခိုင်ကာ၊ ပြည်မြန်မာ..”။

DOCA(မန္တလေး)