ခရမ်းမြို့နယ်၊ မတ်လ (၅) ရက်
ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်၌ ယခုဆောင်းသီးနှံစိုက်ပျိုးရာသီ တွင် ပဲမျိုးစုံ (၁၀၅၀၉၉)ဧက စိုက်ပျိုးခဲ့ပြီး စောလျင်စွာ စိုက်ပျိုးခဲ့သည့် ပဲစိုက်ခင်းများကို ဖေဖော်ဝါရီလမှ စတင်ခူးဆွတ်လျက်ရှိရာ လက်ရှိအချိန်ထိ ပဲမျိုးစုံ (၆၀၄၆၁)ဧက ခူးဆွတ်ပြီးစီး သွားပြီးဖြစ်ကြောင်း သိရသည်။
ခရမ်းမြို့နယ်ရှိ ပဲစိုက်တောင်သူများအနေဖြင့် “သီးနှံစိုက်ပျိုးစွမ်းအား တိုးတက်အောင် ပဲမျိုး စုံတိုးချဲ့စိုက်ပျိုးကြစို့၊ စိုက်နည်းစနစ်မှန်ကန်စေဖို့၊ စိုက်ပျိုးရေးသွင်းအားစုတွေ စနစ်တကျ သုံးစွဲဖို့နဲ့ ပိုးမွှားရောဂါကင်းဝေးစေဖို့ တောင်သူပညာပေးလုပ်ငန်းတွေ မြို့နယ်စိုက်ပျိုးကြီးကြပ်မှု အဖွဲ့အနေ ဖြင့်ဆောင်ရွက်ပေးလျက်ရှိကြောင်း” သိရသည်။
ပဲမျိုးစုံစိုက်ပျိုးပြီးစီးမှုအနေဖြင့် ပဲတီစိမ်း (၁၀၄၄၉၄)ဧက၊ ပဲလွန်းဖြူ (၆၈)ဧက၊ မတ်ပဲ(၅၃၇) ဧက စုစုပေါင်း (၁၀၅၀၉၉)ဧက စိုက်ပျိုးနိုင်ခဲ့ကြောင်း အဆိုပါပဲမျိုးစုံအနက် ပဲတီစိမ်း (၆၀၄၄၁)ဧက၊ ပဲလွန်းဖြူ (၂၇)ဧက စုစုပေါင်း (၆၀၄၆၈)ဧက ခူးဆွတ်ပြီးစီး ပြီးဖြစ်ကြောင်း အထွက်နှုန်းအနေဖြင့် တစ်ဧကလျှင် ပဲတီစိမ်း (၅၆.၆၉)တင်း၊ ပဲလွန်းဖြူ (၅၀.၅၉)တင်းခန့် ထွက်ရှိကြောင်း သိရှိရပြီး ပဲမျိုးစုံကို တစ်ဧကပန်းတိုင်အထွက်နှုန်းရရှိအောင် စိုက်ပျိုးနိုင်မည်ဆိုပါက ဒေသအတွင်းစားသုံးမှု ဖူလုံစေမည့်အပြင် ပြည်ပပို့ကုန်အဖြစ်ပါ ထုတ်လုပ်နိုင်မည်ဖြစ်သောကြောင့် ပြည်ပပို့ကုန်ကဏ္ဍ တိုးတက်လာနိုင်မည်ဖြစ်သည်။ ထို့ပြင် ဝယ်လိုအားမျှတလာပြီး ပဲမျိုးစုံဈေးကွက်၌ ဈေးနှုန်းတည်ငြိမ်စေ ရေးတို့ကိုလည်း အထောက် အကူဖြစ်စေမည်ဖြစ်ကြောင်း သိရသည်။
DOCA(ရန်ကုန်)