“ သုံးခွမြို့နယ်၌စားအုန်းဆီအရောင်းဆိုင်များတွင်စားအုန်းဆီလက်လီ/လက်ကားရောင်းချနေမှု အခြေအနေကွင်းဆင်းစစ်ဆေးခြင်း ”

သုံးခွမြို့နယ် ၊ မတ်လ  (၂၅) ရက်

ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ်အတွင်းရှိ ရပ်ကွက်များတွင် စားအုန်းဆီရောင်းချပေးလျက်ရှိသော ဈေးဆိုင်များသို့ စားသုံးသူပြည်သူများ သတ်မှတ်ဈေးနှုန်း ဖြင့် အလွယ်တကူ ဝယ်ယူရရှိနိုင် စေရန်ရည်ရွယ်၍ မတ်လ (၂၅)ရက်နေ့၊နံနက် (၁၀:၀၀)နာရီ အချိန်တွင် စားသုံးသူရေးရာဦးစီးဌာနမှ ကွင်း ဆင်းစစ်ဆေးခဲ့ကြောင်း သိရသည်။

ထိုသို့ကွင်းဆင်းစစ်ဆေးခဲ့ရာတွင် မြို့နယ်စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းများ သည် ရပ်ကွက်အတွင်းရှိ စားအုန်းဆီ လက်လီ/လက်ကားရောင်းချနေသော ဆိုင်များအား စားအုန်းဆီနှင့် ပတ်သတ်၍ သုံးခွမြို့နယ်အတွင်းရှိ စားသုံးသူပြည်သူများ ဈေးနှုန်းမှန်ကန်စွာဖြင့် အခက်အခဲမရှိ ဝယ်ယူစားသုံး နိုင်စေရေး၊ ဆီဈေးနှုန်းတည်ငြိမ်စေရေး၊ သတ်မှတ်ရည်ညွှန်းဈေးအတိုင်း ဈေးကွက်အတွင်း အမှန်တကယ် ရောင်းချနေခြင်းရှိ/မရှိနှင့် ဈေးနှုန်းမြှင့်တင်ရောင်းချနေခြင်း၊ ဈေးကစားရန်ရည်ရွယ်ချက်ဖြင့် တရားမဝင် သိုလှောင် ထားရှိခြင်းများ၊ မသမာသည့်နည်းဖြင့် လုပ်ဆောင်မှုများ မရှိစေရေးနှင့် လက်ကားဖြန့်ဖြူး ရောင်းချပေးလျက်ရှိသော ဆီအရောင်းကိုယ်စားလှယ်များကိုလည်း သတ်မှတ်ရည်ညွှန်းဈေးအတိုင်း အလေးမှန်၊ ဈေးမှန်ဖြင့် ရောင်းချပေးရန်နှင့် ဈေးနှုန်းမြှင့်တင်ရောင်းချနေမှုများ မပြုလုပ်ကြရန်၊ ထိုသို့ပြုလုပ်ပါက အရေးကြီးကုန်စည် နှင့်ဝန်ဆောင်မှု ဥပဒေအရ အရေးယူဆောင်ရွက်မည် ဖြစ်ကြောင်း အသိပညာပေး ကွင်းဆင်းစစ်ဆေးခဲ့ကြောင်း သိရသည်။

DOCA(ရန်ကုန်)