ရန်ကုန်တိုင်းဒေသကြီး၊ တွံတေးခရိုင်၊ ကွမ်းခြံကုန်းမြို့နယ် စားသုံးသူရေးရာဦးစီးဌာနအနေဖြင့် ကုန်စည်အမျိုးအစားအလိုက် လစဉ်ဈေးကွက်စောင့်ကြည့် စစ်ဆေးခြင်းများကို ဆောင်ရွက် လျှက်ရှိရာ စားသုံးသူရေးရာဦးစီးဌာ ရန်ကုန်တောင်ပိုင်းခရိုင် ဦးစီးမှူးရုံး၏ ညွှန်ကြားချက်နှင့်အညီ ယခုလအတွင်း စစ်ဆေးရမည့် သွားတိုက်ဆေးအမျိုးမျိုးတို့အား မေလ(၉)ရက်နေ့၊ နံနက် (၀၉:၃၀) နာရီအချိန်တွင် ဆက်စပ်ဌာနများဖြင့် ပူးပေါင်း၍ ကွင်းဆင်းစစ်ဆေးခဲ့ကြောင်း သိရသည်။
ထိုသို့ ဈေးကွက်စောင့်ကြည့် ကွင်းဆင်းစစ်ဆေးခဲ့ရာတွင် ကွမ်းခြံကုန်းမြို့နယ် စည်ပင်သာ ယာရေးအဖွဲ့မှ ဈေးတာဝန်ခံ ဦးဇော်မင်းအေး၊ ကျန်းမာရေးမှူး-၃ ဦးထွန်းထွန်း၊ စားသုံးသူရေးရာ ဦးစီးဌာနမှ မြို့နယ်တာဝန်ခံ ဒေါ်နွယ်နွယ်အေးနှင့် ဌာနခွဲစာရေး ဦးတင်ထွန်းဦးတို့ ပူးပေါင်း ဆောင်ရွက်ခဲ့ကြပြီး ကွမ်းခြံကုန်းမြို့နယ် မြို့မဈေးအတွင်း သွားတိုက်ဆေး အမျိုးမျိုးရောင်းချသည့် ဆိုင်များဖြစ်သည့် နွေးနွေး အလှကုန်နှင့် ကုန်မျိုးစုံ ရောင်းဝယ်ရေးဆိုင်၊ ဦးလှရှိန် ကုန်မျိုးစုံရောင်း ဝယ်ရေးဆိုင်၊ ဒေါ်ငြိမ်းငြိမ်းသူ ကုန်မျိုးစုံ ရောင်းဝယ်ရေးဆိုင်တို့မှ Signal(ဆစ်ဂနယ်)သွားတိုက် ဆေး၊ 3D သွားတိုက်ဆေး၊ လေဆာသွားတိုက်ဆေး၊ Colgate သွားတိုက်ဆေးများတွင် ပါရှိရမည့် ကုန်အညွှန်းအမှတ်အသားများ ပြည့်စုံစွာ ပါဝင်မှုရှိ/မရှိ စိစစ်ဆောင်ရွက်ခဲ့ကြသည်။
အဆိုပါ သွားတိုက်ဆေးအမျိုးမျိုးတို့တွင် ကုန်အညွှန်းအမှတ်အသားများ ပြည့်စုံမှုရှိကြောင်း တွေ့ရှိခဲ့ကြပြီး စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်နွယ်နွယ်အေးက လူတိုင်းနေ့စဉ် သုံးစွဲနေသော ကုန်စည်များတွင် သွားတိုက်ဆေးသည် သွားကျန်းမာရေးအတွက် အဓိကအရေးကြီး ကုန်စည်ဖြစ်သောကြောင့် သွားတိုက်ဆေးများကို ယခုကဲ့သို့ စစ်ဆေးရခြင်း ဖြစ်ကြောင်းနှင့် အခြား ကုန်စည်များတွင်လည်း ပါရှိရမည့် ကုန်အညွှန်းအမှတ်အသားများ ပြည့်စုံစွာပါရှိမှသာ စားသုံးသူများ ဘေးကင်းလုံခြုံ စိတ်ချရမည် ဖြစ်ကြောင်း ပိုင်ရှင်လုပ်ငန်းရှင်များနှင့် တွေ့ဆုံဆွေးနွေး ကွင်းဆင်း စိစစ်ခဲ့ကြောင်း သိရသည်။
DOCA(ရန်ကုန်)