ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ ကျောက်တံခါးမြို့နယ်ဦးစီးမှူးရုံးအနေဖြင့် စားသုံးသူကာကွယ်ရေးလုပ်ငန်းများ၊ ကုန်ဈေးနှုန်းတည်ငြိမ်ရေးလုပ်ငန်းများကို အင်တိုက်အားတိုက် ဆောင်ရွက်လျက်ရှိရာ ၁၆.၅.၂၀၂၅ ရက်နေ့၌ ကျောက်တံခါးမြို့နယ်အတွင်း ရောင်းချလျက်ရှိသော စားသုံးဆီအရောင်းဆိုင်များအား သွားရောက်စစ်ဆေးခဲ့ကြောင်း သိရှိရပါသည်။
ဈေးကွက်စောင့်ကြည့် စစ်ဆေးခဲ့ရာတွင် ကျောက်တံခါးမြို့နယ်ဦးစီးမှူးရုံးမှ မြို့နယ် တာဝန်ခံ ဒေါ်တင်တင်စန်းသည် ဒုဦးစီးမှူး ဒေါ်ဇင်မာထွေးနှင့်အတူ ကျောက်တံခါးမြို့နယ်အတွင်းရှိ ကုန်စုံဆိုင် များတွင် ရောင်းချလျက်ရှိသော အသင့်ထုတ်ပိုးထားပြီးသည့် စားသုံးဆီဘူးအမျိုးမျိုး တို့အား စစ်ဆေးခဲ့ကြောင်း သိရှိရပါသည်။ မြို့နယ်တာဝန်ခံသည် စားသုံးဆီဘူးများတွင် မြန်မာ ဘာသာဖြင့် ကုန်အညွှန်းအမှတ်အသားများ ပြည့်စုံစွာ ဖော်ပြထားခြင်း ရှိ/မရှိ၊ ပါဝင်ပစ္စည်းများနှင့် သုံးစွဲပုံ အညွှန်း၊ထားသိုပုံတို့ကို မြန်မာဘာသာဖြင့် ပြည့်စုံစွာ ဖော်ပြထားခြင်း ရှိ/မရှိ၊ ကုန်အညွှန်း အမှတ်အသားမပြည့်စုံသော ကုန်ပစ္စည်းများအား ရောင်းချခြင်းမပြုရန်၊ ရောင်းချပါက စားသုံးသူကာကွယ်ရေးဥပဒေအရ အရေးယူခံရမည်ဖြစ်ကြောင်းတို့ကို အသိပညာပေးဟောပြောခဲ့ကြောင်း သတင်းရရှိပါသည်။
DOCA(ပဲခူး)