စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးနှင့် ခရိုင်ဦးစီးမှူး တို့၏လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ စားသုံးသူရေးရာဌာနခွဲတာဝန်ခံနှင့် ဝန်ထမ်းများအဖွဲ့ သည် (၂၁.၅.၂၀၂၅)ရက်နေ့၊ နံနက်(၁၀:၀၀)နာရီအချိန်တွင် ပခုက္ကူမြို့ပေါ်ရှိ ကုလားပဲချောင်းကြော်၊ မြေပဲဆုံဆီ နှင့် ဇီးဖျော်ရည်လုပ်ငန်းရှင်များဆီသို့ သွားရောက်၍ အသိပညာပေးဆွေးနွေးခဲ့ကြောင်း သိရသည်။
စားသုံးသူရေးရာဌာနခွဲတာဝန်ခံက ဆွေးနွေးရာတွင် လုပ်ငန်းရှင်များအနေဖြင့် စားသုံးသူ ကာကွယ်ရေးဥပဒေပါ စီးပွားရေးလုပ်ငန်းရှင်၏တာဝန်များ၊ ကုန်အညွှန်းအမှတ်အသား ဖော်ပြခြင်း နှင့်ပတ်သက်သည့်ဥပဒေပြဌာန်းချက်များ၊ စီမံခန့်ခွဲရေးနည်းဥပဒေအရအရေးယူခြင်း၊ တားမြစ်ချက်များ၊ ပြစ်မှုနှင့်ပြစ်ဒဏ်များအကြောင်း၊ မိမိတို့ထုတ်လုပ်သော ကုန်စည်အမျိုးအစားအလိုက် စားသုံးသူကာကွယ်ရေးဥပဒေ(၂၀၁၉)အခန်း(၁၈)ပါကုန်အညွှန်းအမှတ်အသားဖော်ပြချက်များနှင့် ကိုက်ညီသည့် ကုန်စည်များကို စားသုံးသူရေးရာဦးစီးဌာန၏ စိစစ်ခွင့်ပြုချက်ရရှိရန် လျှောက်ထားနိုင်ကြောင်း၊ မိမိတို့ထုတ်လုပ်သော ထုတ်ကုန်များတွင် ဓာတုဆိုးဆေးများ၊ ပွဆေးများ သုံးစွဲမှုအား သတ်မှတ်ထားသည့် ပမာဏကိုသာ ထည့်သွင်းအသုံးပြုစေလိုကြောင်း၊ မြေပဲဆုံဆီများ ကြိတ်ခွဲရာတွင် မှိုဆိပ်ပါဝင်မှုမဖြစ်ပွားအောင် စနစ်တကျ သန့်စင်အခြောက်ခံပြီးမှ ထုတ်လုပ်ရန်နှင့် အရည်အသွေးမပြည့်မီသော မြေပဲဆံများအားရောနှော၍ အသုံးမပြုရန်လိုအပ်ကြောင်းဆွေးနွေးခဲ့ပြီး စားသုံးသူအသိပညာ ပေးလက်ကမ်းစာစောင်များဖြန့်ဝေခဲ့ကြောင်း သိရှိရသည်။
DOCA(မကွေး)