စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် ကုန်စည်နှင့် ဝန်ဆောင်မှုများအား စားသုံးသူများမှ ဘေးကင်းလုံခြုံစွာ သုံးစွဲနိုင်စေရန်နှင့် စားသုံးသူအခွင့်အရေးများ အပြည်အဝရရှိစေရန်ရည်ရွယ်၍ စားသုံးသူကာကွယ်ရေးဥပဒေကို ထုတ်ပြန်ပြီး ကုန်အညွှန်အမှတ်အသား ဖော်ပြခြင်းဆိုင်ရာလိုက်နာရမည့်အချက်များကို ဥပဒေ၏ အခန်း(၁၈)တွင် ဖော်ပြပါရှိပါသည်။
စားသုံးသူများအနေဖြင့် ကုန်စည်များကို ရွေးချယ်ဝယ်ယူအသုံးပြုရာတွင် လတ်ဆက်သော ကုန်စည်များရွေးချယ်ဝယ်ယူနိုင်ရန်နှင့် သတ်မှတ်သက်တမ်းအတွင်း ဘေးအန္တရာယ်ကင်းရှင်းစွာ သုံးစွဲ နိုင်ရန်အလို့ငှာ ကုန်အညွှန်းအမှတ်အသားများအား စားသုံးသူပြည်သူများ အလွယ်တကူသိရှိရန် သိသာထင်ရှားစွာဖော်ပြရပါမည်။ စားသုံးသူရေးရာဦးစီးဌာနမှ ကုန်စည်အုပ်စု(၈)ခုခွဲခြားထားပြီး ကုန်စည် အလိုက် ကုန်စည်၏ အမျိုးအမည်၊ အရွယ်အစား၊ အရေအတွက်နှင့်အသားတင်ပမာဏ၊ ထားသို သိမ်းဆည်းမှုအညွှန်း၊ သုံးစွဲမှုနည်းလမ်း၊ ပါဝင်ပစ္စည်းများ၊ ကျန်းမာရေးဆိုင်ရာဘေးထွက်ဆိုးကျိုး၊ ဓါတ်မတည့်ကြောင်းဖော်ပြချက်နှင့် ကြိုတင်သတိပေးချက်များကို မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေဖော်ပြပါရှိရန် အမိန့်ညွှန်ကြားစာများထုတ်ပြန်ပြီး ဈေးကွက်မရောက်မီနှင့် ဈေးကွက်ရောက်ပြီး ကုန်စည်များအား သက်ဆိုင်ရာအဖွဲ့များနှင့်ပူးပေါင်းစစ်ဆေးဆောင်ရွက်လျက်ရှိပါသည်။
ကုန်အညွှန်းအမှတ်အသားများဖော်ပြခြင်းသည် စားသုံးသူများဘေးအန္တရာယ်ကင်းရှင်းစွာ သုံးစွဲနိုင်ရန်အတွက်ရည်ရွယ်ခြင်းသာမက လုပ်ငန်းရှင်များအနေဖြင့် မိမိထုတ်ကုန်များအား Batch No., Manufacturing Date, Expired Dateများဖော်ပြထားခြင်းဖြင့်စားသုံးသူများမှ ကုန်စည်၏ သတ်မှတ် သက်တမ်းကာလအတွင်း ဘေးကင်းလုံခြုံစွာဝယ်ယူသုံးစွဲနိုင်သကဲ့သို စီးပွားရေးလုပ်ငန်းရှင်များမှလည်း FIFI စနစ်အတိုင်း ဖြန့်ဖြူးနိုင်သဖြင့် လေလွင့်ဆုံးရှုံးမှုများ လျှော့ချနိုင်ခြင်း၊ မိမိထုတ်ကုန်၏ အရည်အသွေး အပေါ် ယုံကြည်မှု၊ တာဝန်ယူမှု၊ အာမခံမှုကို ဖော်ပြရာရောက်သဖြင့် စားသုံးသူများ၏ ယုံကြည်မှုကိုဖမ်းဆုတ်နိုင်ပြီး စီးပွားရေးအကျိုးအမြတ်များ ပိုမိုရနိုင်သဖြင့် လုပ်ငန်းရှင်များအနေဖြင့် ကုန်အညွှန်းအမှတ်အသားဆိုင်ရာဖော်ပြချက်များကို သတ်မှတ်ချက်များနှင့်အညီ သိသာထင်ရှားစွာ ဖော်ပြပေးရန်လိုအပ်ပါသည်။
စားသုံးသူရေးရာဦးစီးဌာနအနေဖြင့် လုပ်ငန်းရှင်များ၏ ထုတ်ကုန်များတွင် ကုန်အညွှန်းအမှတ် အသားဖော်ပြချက်များသည် ဥပဒေပါသတ်မှတ်ချက်များနှင့် ကိုက်ညီမှုရှိ/မရှိကို အခမဲ့စိစစ်ပေးလျက်ရှိရာ ယခုလအတွင်း မန္တလေးတိုင်းဒေသကြီးအတွင်းရှိ ကျားမင်း(သဘာဝဇီးဖျော်ရည်စစ်စစ်)၊ Favorite Coffee (အသင့်ဖျော်ကော်ဖီချိူဆိမ့်/ခါးဆိမ့်)၊ရှိုင်းထက်ဇော်(ကြက်သွန်းပေါင်းကြော်)၊ ရှင်းသန့် (ခေါင်းလျှော်ရည်)၊ May & Zay( သုံးမြှောင့်ပူတင်း)၊ အမွှာမောင်နှမ(ကြက်သွန်ပေါင်းကြော်)၊ မိုမို (အသင့်ဖျော်ကော်ဖီချိူဆိမ့်/ခါးဆိမ့်)၊ ရွှေဒိုဝိုင်း(နို့ခရင်)ဘီစကစ်၊ အမရာ(ငါးခြောက်စပ်ကြော်၊ အသားတုကြော်)၊ သိန်းမင်း(ငရုတ်ပွအရောင်တင်မှုန့်၊ငရုတ်ပွကြော်မှုန့်၊နနွင်းမှုန့်)နှင့် လယ်ကိုင်းကြက်ဥမရွေး၊ ထောပတ်မရွေး) စသည့် (၁၁)ဦခုမှ ၎င်းတို့၏ ကုန်အညွှန်းအမှတ်အသားဖော်ပြမှုအား ပြည့်စုံမှန်ကန်မှုရှိ/မရှိ လာရောက်၍ စိစစ်လျက်ရှိကြောင်း သက်ဆိုင်ရာဌာနခွဲမှ သိရှိပါသည်။
DOCA(မန္တလေး)