မွန်ပြည်နယ်၊ မုဒုံမြို့တွင် စပါးအထွက်နှုန်း တိုးတက်မြင့်မားစေရေးအတွက် ဆည်ရေသောက်နှင့် ချောင်းပိတ်မြောင်းပိတ်စနစ်ဖြင့် ၂၀၂၅ ခုနှစ် မိုးစပါးစိုက်ပျိုးရာသီတွင် မိုးစပါး စိုက်ဧက ၇၅၆၆၅ ဧက စိုက်ပျိုးရန်လျာထားကြောင်း မြို့နယ်စိုက်ပျိုးရေးဦးစီးဌာနမှ သိရသည်။
ဒေသတွင်း စားနပ်ရိက္ခာဖူလုံစေရေးနှင့် စပါးစိုက်ပျိုးထုတ်လုပ်မှုကဏ္ဍဖွံ့ဖြိုးတိုးတက်စေရန် တောင်သူများအား နှစ်စဉ်မျိုးသန့် မျိုးစေ့ပံ့ပိုးခြင်း၊ ဘောင်ပျိုးစနစ်ဖြင့် (၆၀) ဧက၊ ပျိုးထောင်ရွေ့ပြောင်းခြင်းဖြင့် (၃၂၁၃၅) ဧက၊ ကောက်စိုက်စက်ဖြင့် (၁၀)ဧက၊ မျိုးစေ့ချ ကိရိယာဖြင့် (၂၈၂၅) ဧကနှင့် ကြဲခင်း (၄၀၆၃၅) ဧက စုစုပေါင်း မိုးစပါးစိုက်ဧက (၇၅၆၆၅) ဧကကို စိုက်ပျိုးရန်လျာထားကြောင်းနှင့် စံပြကွက်များကို ဖော်ဆောင်သွားမည်ဖြစ်ကြောင်း၊ မြေဆီလွှာတွင် အာဟာရဓာတ်ပါဝင်မှု စစ်ဆေးပြီး ဓာတ်မြေဩဇာနှုန်းထား ထောက်ခံချက်ပေးခြင်း၊ ဘက်စုံပိုးမွှားရောဂါ ကာကွယ်ခြင်း နည်းစနစ်များ လက်တွေ့ပြသခြင်းနှင့် ကင်းထောက်စစ်ဆေးခြင်း၊ သွင်းအားစု ဓာတ်မြေဩဇာများကို ဈေးနှုန်းချိုသာစွာဖြင့် ရောင်းချဖြန့်ဝေပေးခြင်း၊ စိုက်ပျိုးနည်းပညာ အသိပညာပေးခြင်းလုပ်ငန်းများကို တောင်သူများနှင့် တွေ့ဆုံ၍ ကွင်းတာဝန်ခံများက ကွင်းဆင်းဆောင်ရွက်ပေးမည်ဖြစ်ကြောင်း၊ ယခုနှစ် မိုးစပါးများကို မေလမှစတင်၍ မိုးစပါးများ ပျိုးထောင်စိုက်ပျိုးလျက်ရှိကြောင်း မြို့နယ်စိုက်ပျိုးရေးဦးစီးဌာနမှ ဦးစီးမှူး ဦးငြိမ်းချမ်း ကျော်ကပြောသည်။
မုဒုံမြို့နယ်အတွင်းရှိ တောင်သူများမှ မိုးစပါးများကို အဓိကအားထား စိုက်ပျိုးကြပြီး ယခင်နှစ် မိုးစပါးရာသီတွင် စိုက်ဧက ၇၅၁၉၆ ဧက စိုက်ပျိုးနိုင်ခဲ့ရာ တစ်ဧကလျှင် ပျမ်းမျှ အထွက်နှုန်း ၆၆ ဒသမ ၈၂ တင်းခန့် ထွက်ရှိခဲ့ကြောင်း သိရသည်။
DOCA (မွန်)