ကုန်စည်နှင့်ဝန်ဆောင်မှုများကိုသုံးစွဲရာတွင် နစ်နာဆုံးရှုံးမှုဖြစ်ပေါ်ပါက စားသုံးသူရေးရာ ဦးစီး ဌာနသို့ တိုင်ကြားနိုင်ကြောင်း စားသုံးသူများအနေဖြင့် အသိပညာရရှိနေပြီဖြစ်ရာ နေပြီဖြစ်ရာ မုံရွာမြို့ရှိ အထူးကုဆေးရုံ၏ ဝန်ဆောင်မှုနှင့် ပတ်သက်၍ ကျေနပ်မှုမရှိသဖြင့် စားသုံးသူရေးရာဦးစီးဌာန Website Complaint System မှတစ်ဆင့် စစ်ကိုင်းတိုင်းဒေသကြီးဦးစီးမှူးရုံးက ဖြေရှင်းပေးနိုင်ပါရန် တိုင်ကြားလာပါသည်။ စစ်ကိုင်းတိုင်းဒေသကြီးဦးစီးမှူးရုံးအနေဖြင့် တိုင်ကြားသူနှင့်ဆက်သွယ်ခြင်း၊ ပြေစာအထောက်အထား မှန်ကန်မှုရှိ/ မရှိစစ်ဆေးခြင်းတို့ကို ကနဦးဆောင်ရွက်ပြီးနောက် အထူးကုဆေးရုံများကို ကြီးကြပ်ရသည့် တိုင်းဒေသကြီးကျန်းမာရေးဦးစီးဌာနသို့ ညှိနှိုင်းဆွေးနွေးခြင်းများ ဆောင်ရွက်ခဲ့ပါသည်။
ဖြစ်စဉ်မှာ တိုင်ကြားသူသည်နေမကောင်းသဖြင့် တည်းခိုရာအနီးရှိ အထူးကုဆေးရုံတွင် ပြသ၍ ကုသမှုခံယူပြီးနောက် ကုန်ကျစရိတ်ငွေပေးချေရေးပြေစာတောင်းယူရာ မျှော်မှန်းထားသည်ထက် များစွာ ပိုမိုကျသင့်နေခြင်း၊ ပြေစာတောင်းရာတွင် ချက်ချင်းမပေးဘဲ အချိန်ကြာမြင့်စွာစောင့်ဆိုင်းရခြင်း၊ ရန်ကုန်မြို့ရှိအထူးကုဆေးရုံထက်ပင် ကုန်ကျစရိတ်ပိုမိုကြီးမြင့်ခြင်း၊ ပေးချေရသည့်ငွေတန်ဖိုးနှင့် ရရှိသည့် ဝန်ဆောင်မှုမှာ ထိုက်တန်မှုမရှိခြင်းတို့ကြောင့် ငွေပြန်လည်အမ်းခြင်းနည်းဖြင့် ဖြေရှင်းပေးစေလိုကြောင်း၊ ဌာနမှ ဖြေရှင်းဆောင်ရွက်ပေးသည့်အတိုင်း လက်ခံမည်ဖြစ်ကြောင်း တိုင်ကြားလာခြင်း ဖြစ်ပါသည်။
စားသုံးသူရေးရာဦးစီးဌာန ဦးစီးမှူးရုံးသည် အဆိုပါအထူးကုဆေးရုံတာဝန်ရှိသူကိုဖိတ်ခေါ်၍ စားသုံးသူကာကွယ်ရေးပတ်သတ်၍ အသိပညာပြည့်စုံသော မိတ်ဖက်ဌာနဆိုင်ရာ တာဝန်ရှိသူတစ်ဦး၏ ရှေ့တွင် စားသုံးသူကာကွယ် ရေးဥပဒေပါအချက်များကိုရှင်းလင်းခြင်းနှင့် တိုင်ကြားချက်များအပေါ် ဆွေးနွေးခဲ့ကြပါသည်။ အဆိုပါ အထူးကု ဆေးရုံတာဝန်ရှိသူက ပြန်လည်ဆွေးနွေးရာတွင် အထူးကု ဆေးရုံးများအနေဖြင့် ရောဂါကုသရာတွင် ရောဂါအခြေအနေနှင့် ကုထုံးတို့ပေါ်မူတည်ပြီး ကုန်ကျစရိတ် ကွဲပြားနိုင်ပါကြောင်း၊ ကျသင့်ငွေကို သတ်မှတ်ထားသော စံနှုန်းမရှိပါကြောင်း၊ ဘယ်ရောဂါကုလျှင် မည်မျှကုန်ကျမည်ဟူသည့်သတင်း အချက်အလက်ကိုလည်း စားသုံးသူများသိရှိနိုင်စေရန် ကြိုတင်အသိ ပေးခြင်း၊ ညှိနှိုင်းခြင်းမရှိခဲ့ပါကြောင်း၊ ပြေစာတွင် ဆေးတန်ဘိုးများနေရခြင်းမှာ ဆေးဘိုးအပြင် တစ်ခါသုံး ဆေးထိုးအပ်၊ လက်အိတ်၊ အရက်ပြန်၊ ဂွမ်းစသည်တို့ကိုအသေးစိပ်မဖော်ပြဘဲ သန့်ရှင်းရေး၊ လုံခြုံရေး ဝန်ဆောင်ခများကိုလည်း ထည့်သွင်းတွက်ချက်ထားခြင်းကြောင့်ဖြစ်ပါကြောင်း၊ ယခင်က ယခုလို တိုင်ကြားခံရဖူးခြင်းမရှိခဲ့ပါကြောင်း၊ ယခုတိုင်ကြားသူ၏ တောင်းဆိုချက်အတိုင်း ငွေပြန်လည်အမ်းပေးမည်ဖြစ်ပါကြောင်း တင်ပြပါသည်။ စီးပွားရေးလုပ်ငန်းရှင်သည် ဝန်ဆောင်မှုပေးခြင်းနှင့် စပ်လျဉ်း၍ မှန်ကန်သောသတင်းအချက်အလက်နှင့် ပြည့်စုံသော ဝန်ဆောင်မှု အဆင့်အတန်းနှင့်အညီ ပြည့်ဝစွာ ပေးခြင်းအာမခံရန် တာဝန်ရှိသည်ကိုသိရှိပါကြောင်းနှင့် ဆေးရုံ၏ကျန်းမာရေးဝန်ဆောင်မှုကိုထိုက်တန်သည့် ဝန်ဆောင်မှုဖြစ်စေရေး ဆောင်ရွက်သွားမည်ဖြစ်ပါကြောင်း ညှိနှိုင်းရရှိပါသည်။
သို့ဖြစ်ပါ၍ တိုင်ကြားသည့်စားသုံးသူအား ရရှိသင့်သည့်ပြန်အမ်းငွေရရှိရန် ဌာနက ဆောင်ရွက်ပေးနိုင်ခဲ့ပါကြောင်း တင်ပြလိုက်ရပါသည်။
DOCA(စစ်ကိုင်း)