စားသုံးသူရေးရာဦးစီးဌာန၊ တောင်ငူခရိုင်၊ ဖြူးမြို့နယ်တာဝန်ခံ ဒေါ်သန္တာစိုးသည် ဇွန်လ ၃ ရက်နေ့ ၊နေ့လယ်ပိုင်းက ဖြူးမြို့နယ်တာဝန်ခံရုံး၌ ဖြူးမြို့ရှိ ကုန်စုံဆိုင်ပိုင်ရှင်များနှင့် တွေ့ဆုံ ဆွေးနွေးပါသည်။
မြို့နယ်တာဝန်ခံသည် ပဲခူးတိုင်းဒေသကြီးစားသုံးသူရေးရာကော်မတီမှ ဈေးကွက်အတွင်း ရောင်းချနေသည့် ကုန်စည်များအား လအလိုက်ဦးစားပေးစစ်ဆေးရန် ဦးစားပေးကုန်စည်များကို ချမှတ်ပေးထားပြီးဖြစ်ရာ စစ်ဆေးရေးအရာရှိများက သက်ဆိုင်ရာနယ်မြေများအလိုက် ဈေးကွက်စောင့်ကြည့် စစ်ဆေးခြင်းကို ဆောင်ရွက်လျက်ရှိသည့် အခြေအနေများ၊ ဈေးကွက်အတွင်း ရောင်းချသည့် ကုန်စည်အားလုံး၌ ကုန်အညွှန်းအမှတ်အသားများ ပြည့်စုံစွာဖော်ပြရန်ကို အသိပညာပေး ဆောင်ရွက်လျက်ရှိရာ လုပ်ငန်းရှင်များက လိုက်နာဆောင်ရွက်ခြင်းဖြင့် စားသုံးသူအကျိုးစီးပွားအတွက် ပူးပေါင်း ဆောင်ရွက်ကြရန် လိုအပ်ပုံများကို ရှင်းလင်းဆွေးနွေးပါသည်။
ထို့နောက်တက်ရောက်လာသည့် ကုန်စုံဆိုင်ပိုင်ရှင်များ၏ ဆွေးနွေးမေးမြန်းချက်များကို မြို့နယ်တာဝန်ခံက ပြန်လည်ရှင်းလင်းဆွေးနွေးခဲ့ကြောင်းနှင့် တွေ့ဆုံဆွေးနွေးပွဲသို့ ဖြူးမြို့မှ ကုန်စုံဆိုင်ပိုင်ရှင် ၂၅ ဦးတက်ရောက်ကြောင်း သိရပါသည်။
DOCA(ပဲခူး)