စစ်ကိုင်းတိုင်းဒေသကြီး စားသုံးသူရေးရာကော်မတီအစည်းအဝေး (၄/၂၀၂၂)ကို ၂၀၂၂ခုနှစ်၊ ဇူလိုင်လ ၂၆ ရက်နေ့ နံနက် (၁၀:၀၀) နာရီတွင် စစ်ကိုင်းတိုင်းဒေသကြီးအစိုးရအဖွဲ့ရုံး အစည်းအဝေးခန်းမ၌ ကျင်းပပါသည်။
အစည်းအဝေး၌ စစ်ကိုင်းတိုင်းဒေသကြီး စားသုံးသူရေးရာကော်မတီဥက္ကဌ၊ စီးပွားရေးရာဝန်ကြီးဒေါ်ရီရီသန်းက အဖွင့်အမှာစကားပြောကြားရာတွင် ၂၀၂၂ခုနှစ် ဇွန်လအတွင်း စားသုံးသူကာကွယ်ရေးလုပ်ငန်းများကို လျှာထားချက်ပြည့်မီကျော်လွန်အောင်ဆောင်ရွက်နိုင်ခဲ့ကြောင်း၊ သက်ဆိုင်ရာ ဌာနများက တက်ကြွစွာပူးပေါင်းဆောင်ရွက်ခဲ့ကြသည့်အတွက် ကျေးဇူးတင်ပါကြောင်း၊ ဦးစားပေး ကုန်စည်အဖြစ်သတ်မှတ်ခဲ့သည့် ကုန်စည် (၇)မျိုးကို ဈေးကွက်စောင့်ကြည့်စစ်ဆေးမှုများ စဉ်ဆက် မပြတ်ဆက်လက်ဆောင်ရွက်ရန်ဖြစ်ပါကြောင်း၊ အသိပညာပေးဟောပြောပွဲများကိုလည်း ကျောင်းများ၊ ဌာနဆိုင်ရာများတွင် ဆောင်ရွက်လျက်ရှိပါကြောင်း၊ သက်ဆိုင်ရာများနှင့် ညှိနှိုင်းပေါင်းစပ်ပြီး ဆက်လက် ဆောင်ရွက်ရန်ဖြစ်ပါကြောင်း၊ စားသုံးသူအသိပညာပေးဆောင်ရွက်ရာတွင် အာဆီယံစားသုံးသူကာကွယ်ရေး ကော်မတီ Website ရှိ နယ်စပ်ဖြတ်ကျော်စားသုံးသူအငြင်းပွားမှုဖြေရှင်းရေးစနစ်နှင့် ပတ်သက်၍လည်း အသိပေးပြောကြားရန်လိုအပ်ပါကြောင်း၊ ပြည်သူများက အရည်အသွေးပြည်မီသည့်စားအုန်းဆီများကို ဈေးနှုန်းသက်သာစွာဖြင့် ဝယ်ယူရရှိနိုင်ရေးကိုလည်း ဆက်လက်ဆောင်ရွက်ပေးရန်ဖြစ်ပါကြောင်း၊ စက်သုံးဆီနှင့်ပတ်သက်၍လည်း စက်သုံးဆီဆိုင်များက သတ်မှတ်ရည်ညွှန်းစျေးဖြင့် ရောင်းချကြစေရေး၊ ပြည်သူများဝယ်ယူလိုသည့်ပမာဏအတိုင်းရောင်းချကြစေရေးနှင့် ဆီဆိုင်များ စက်သုံးဆီပြတ်လပ်မှု မရှိစေရေး ကြီးကြပ်ကူညီပံ့ပိုးမှုများဆက်လက်ဆောင်ရွက်ရန်ဖြစ်ပါကြောင်း၊ အစိုးရအဖွဲ့မှ ပံ့ပိုးကူညီရန် လိုအပ်ပါက အချိန်နှင့်တပြေးညီတင်ပြကြပါရန် ပြောကြားပါသည်။
ထို့နောက်စားသုံးသူရေးရာဦးစီးဌာန တိုင်းဒေကြီးဦးစီးမှူး ဦးကျော်ကျော်လွင်က အမှာစာများ ဖတ်ကြားတင်ပြ၍ ကော်မတီ၏အဆုံးအဖြတ်ရယူပြီး ဌာနမှဆောင်ရွက်လျှက်ရှိသည့်လုပ်ငန်းများ၊ ဆက်လက်ဆောင်ရွက်ရန် လျှာထားသည့်လုပ်ငန်းများကို ရှင်းလင်းတင်ပြပါသည်။ ဆက်လက်၍ ကော်မတီ အဖွဲ့ဝင်များက ဖြည့်စွက်ဆွေးနွေးကြရာတွင် စားသုံးသူကာကွယ်ရေးအသိပညာပေး ဗီနိုင်း၊ ဆိုင်းဘုတ်များကို လူစည်ကားရာနေရာများတွင် ထားရှိနိုင်ရေးကိစ္စများ၊ စားသုံးဆီ၊ စက်သုံးဆီတို့နှင့် ပတ်သက်သောကိစ္စများကို အကြံပြုဆွေးနွေးခဲ့ကြပါသည်။ ထို့နောက်ကော်မတီဥက္ကဌက လိုအပ်သည်များကို ညှိနှိုင်းပေါင်းစပ်ပေးခဲ့ပါသည်။
အစည်းအဝေးသို့ ကော်မတီအဖွဲ့ဝင်များ၊ ဌာနဆိုင်ရာ တာဝန်ရှိသူများတက်ရောက်ခဲ့ကြပြီး မွန်းလွဲ (၁၂:၀၀)နာရီတွင် အစည်းအဝေးကို ရုပ်သိမ်းခဲ့ကြောင်း သတင်းရရှိပါသည်။
DOCA(စစ်ကိုင်း)