ပဲခူးတိုင်းဒေသကြီး၊စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံးမှ ဝန်ထမ်းများသည် ပြန်ကြားရေးနှင့် ပြည်သူ့ဆက်ဆံရေးဦးစီးဌာနနှင့် အားကစားနှင့် ကာယပညာဦးစီးရေးဌာနမှ ဝန်ထမ်းများနှင့် ပူးပေါင်း၍ တောင်ငူမြို့ ပန်းဘဲတန်း အခြေခံပညာအလယ်တန်းလွန်ကျောင်းခွဲတွင် ကျောင်းသား ကျောင်းသူများ သိသင့်သိထိုက်သည့် အသိပညာဗဟုသုတများ ရရှိစေရန်ရည်ရွယ်၍ အသိပညာပေး ဟောပြောပွဲကို စက်တင်ဘာလ ၁၅ ရက်နေ့နံနက်ပိုင်းက ကျင်းပပြုလုပ်ရာ သက်ဆိုင်ရာ ဌာန ဆိုင်ရာများက မိမိတို့ ဌာနအလိုက် အသိပညာပေးဟောပြောကြပါသည်။
ဟောပြောပွဲတွင် ကျောင်းအုပ်ဆရာကြီး ဦးညွှန့်ဝင်းက အဖွင့်အမှာစကားပြောကြားပြီး စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံးမှ ဦးစီးမှူး ဦးစောသန်းထိုက်ကျော်က စားသုံးသူ ရေးရာဦးစီးဌာန ပေါ်ပေါက်လာပုံ၊ စားသုံးသူ၏ အခွင့်အရေးနှင့်တာဝန်များ၊ စားသုံးသူရေးရာဦးစီးဌာန၏ ဆောင်ရွက်ချက်များ၊ စားသုံးသူနစ်နာဆုံးရှုံးမှုကို တိုင်ကြားနိုင်ခြင်းနှင့် ကုန်စည်များ ဝယ်ယူရာတွင် ကုန်အညွှန်းအမှတ်အသားများကို ဦးစားပေးဖတ်ရှုသင့်သည့် အကြောင်းများကို ဆွေးနွေးဟောပြောပါသည်။
ထို့အတူ ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဒေါ်ခင်သူဇာဝင်းက စာဖတ်ခြင်း၏ အကျိုးကျေးဇူးကိုလည်းကောင်း၊ အားကစားနှင့်ကာယပညာဦးစီးဌာနမှ ဒေါ်သူဇာထွေးက လူငယ်နှင့် အားကစားအကြောင်းကို လည်းကောင်း ဟောပြောခဲ့ပါသည်။
ဟောပြောပွဲသို့ ဆရာ၊ ဆရာမနှင့် ကျောင်းသား/ကျောင်းသူ ၁၁၀ ဦး တက်ရောက်ကြောင်း သိရှိရပါသည်။
DOCA(ပဲခူး)