ဧရာဝတီတိုင်းဒေသကြီး၏ထွက်ကုန်များတွင် ပြည်ပဈေးကွက်ဝင် ငါးရှဉ့်များကို နှစ်ပတ်လည် တင်ပို့ရောင်းချလျက်ရှိသော်လည်း ပွင့်လင်းရာသီထက် ယခုလိုမိုးတွင်းတွင် ငါးရှဉ့်များ ပိုမိုဝင် ရောက်လျှက်ရှိပြီး ဇွန်လမှနိုဝင်ဘာလအထိ ဈေးကွက်မှာတင်ပို့မှုများ၍ ဒီဇင်ဘာလ နောက်ပိုင်း ငါးရှဉ့်အဝင်နည်းသွားကြောင်း ပုသိမ်ဈေးကွက်မှတင်ပို့သော ငါးရှဉ့်များမှာ ပါးနီပါးမွဲ (၂)မျိုးသာ Export ဈေးကွက်တင်ပို့လျက် ကျန်းမာရေးအတွက် သွေးအားကောင်းပြီး ဆေးဖက်ဝင်အစားအစာ အဖြစ်ပြည်ပနိုင်ငံများတွင် လူကြိုက်များမှုရှိကြောင်း ပြည်တွင်းမှာ ပြည်တွင်းစားသုံးမှုနှင့် ဟိုတယ်စာအဖြစ် စားသုံးလျှက်ရှိကြောင်း ဈေးကွက်မှသိရသည်။
ပုသိမ်ဈေးကွက်သို့ ပုသိမ်မြို့နယ် သာပေါင်းနယ်၊ ငပုတောမြို့နယ်များရှိကျေးရွာများမှ အဝယ်ဒိုင်သို့ အဓိကလာရောက်ရောင်းချလျှက်ရှိပြီး အကောင်အကြီး/အသေးပေါ်မူတည်၍ တစ်ပိဿာလျှင် (၇၀၀ဝိ/-)၊(၉၀၀ဝိ/-)၊(၁၀၀၀ဝိ/-)ကျပ်ဈေးနှုန်းဖြင့် ဝယ်ယူလျှက် ဝယ်ယူထားသော ငါးရှဉ့်များကို ရေနှစ်ထပ်သုံးထပ်လဲလှယ်၍ ငါးရှဉ့်အသေများကိုဖယ်ပြီး ဖော့ပုံးများတွင်(၂၅)ပိဿာခန့် ထည့်သွင်း၍ ဧရာဝတီတိုင်းဆားမလောက်ငါးရှဉ့်အဝယ်ဒိုင်နှင့် ရန်ကုန်မြို့ ရှိ စံပြဈေး၊ လှိုင်သာယာ၊ အင်းစိန်မြို့နယ် ကြို့ကုန်းငါးရှဉ့်အဝယ်ဒိုင်ကြီးများသို့ တင်ပို့ရောင်းချ လျှက် ရန်ကုန်-မူဆယ်မှတဆင့် တရုတ်နိုင်ငံသို့ တင်ပို့ရောင်းချလျှက်ရှိကြောင်း ပုသိမ်မြို့ရှိ ငါးရှဉ့်လုပ်ငန်းရှင် ဦးစိုးနိုင်ထံမှ သိရသည်။
ငါးရှဉ့်မျိုးများထိန်းသိမ်းရန် ငါးလုပ်ငန်းဦးစီးဌာနမှ အရွယ်အစား သတ်မှတ်ထားပြီး (5cm) လုံးပတ်အထက်သာ ဖမ်းဆီးတင်ပို့ရောင်းချခွင့်ရှိပြီး၊ ပြည်ပဈေးကွက်တွင် 8cm အထက်သာ Export တန်းဝင်၍ ပုသိမ်ဈေးကွက်မှ တစ်လလျှင်ငါးရှဉ့်ပိဿာချိန် ၅၀၀ ဝန်းကျင် ဈေးကွက်သို့တင်ပို့ရောင်း ချလျှက်ရှိကြောင်းလုပ်ငန်းရှင်ထံမှသိရသည်။
DOCA(ဧရာဝတီ)