တောင်ငူခရိုင်၊ ဖြူးမြို့နယ်၊ လင်းယောခင်ကျေးရွာရှိ တောင်သူများသည် မိရိုးဖလာ လယ်ယာလုပ်ငန်းကို အသက်မွေးဝမ်းကြောင်းလုပ်ငန်းအဖြစ် အဓိကလုပ်ကိုင်ကြသော်လည်း တစ်ဖက်တစ်လမ်းမှ စားဝတ်နေရေး ပြေလည်စေရန်အတွက် တောင်းလုပ်ငန်းကိုလည်း လုပ်ကိုင်လျှက် ရှိပါသည်။
တောင်းတစ်လုံးပြုလုပ်ရန်အတွက် လိုအပ်သောကုန်ကြမ်းပစ္စည်းများမှာ တင်းဝါး၊ ကြက် သောင်းဝါးနှင့် ကြိမ်တို့ ဖြစ်ပါသည်။ တင်းဝါး၊ ကြက်သောင်းဝါး (၂) လုံးစီနှင့် ကြိမ် (၁)ထုပ် ကုန်လျှင် တောင်း (၈) လုံးခန့်ရရှိကြောင်း သိရှိရပါသည်။ အများအားဖြင့် မိသားစုများ ဝိုင်းဝန်းလုပ်ကိုင်ကြ သော တပိုင်တနိုင် မိသားစုလုပ်ငန်းဖြစ်ပြီး မိသားစုဦးရေနည်းသောသူများတွင် တစ်နေ့လုပ်အားခ (၉၀၀၀) ကျပ်နှုန်းဖြင့် လုပ်သား (၂) ဦးခန့် ခေါ်ယူသုံးစွဲရကြောင်းလည်း သိရပါသည်။
တောင်ငူခရိုင်၏ ဒေသအတွင်းတွင် လယ်ယာမြေလုပ်ကိုင်ကြသော တောင်သူများ များပြားသောကြောင့် တောင်းများမှာလည်း ဈေးကွက်အတွင်း သုံးစွဲကြသူ များပြားလျက်ရှိပါသည်။ ဖြူးမြို့နယ်၊ လင်းယောခင်ကျေးရွာသည် တောင်းလုပ်ငန်းကို ဘိုးစဉ်ဘောင်ဆက် ပြုလုပ်လာသော လုပ်ငန်းဖြစ်သဖြင့် ဒေသတွင်းဈေးကွက်တွင် နာမည်ရလျက်ရှိသော ကုန်ပစ္စည်းများဖြစ်ပါသည်။ လင်းယောခင်ကျေးရွာမှ တောင်းများအား တောင်ငူ၊ ရေတာရှည်၊ အုတ်တွင်း၊ ဖြူး၊ ကျောက်တံခါး၊ ညောင်လေးပင်မြို့နယ်များသို့ ဖြန့်ဖြူးရောင်းချလျက်ရှိကြောင်း လင်းယောခင်ကျေးရွာရှိ တောင်းလုပ်ငန်း လုပ်ကိုင်သူ တစ်ဦး၏ ပြောကြားချက်အရ သိရှိရပါသည်။
DOCA(ပဲခူး)