မကွေးတိုင်းဒေသကြီး၊စားသုံးသူရေးရာဦးစီးဌာန၊ မင်းဘူးခရိုင်ဦးစီးမှူးရုံးမှ ဒု-ခရိုင်ဦးစီးမှူး (မင်းဘူးမြို့ နယ်တာဝန်ခံ) ဦးမြင့်ကြည်နှင့် ခရိုင်ဦးစီးမှူးရုံးမှ ဝန်ထမ်းများသည် (၆.၁၀.၂၀၂၂)ရက်နေ့ နံနက်(၁၀:၀၀) အချိန်တွင် ကုန်သွယ်မှုလုပ်ငန်း ဖွံ့ဖြိုးတိုးတက်စေရေးအတွက် မင်းဘူးမြို့နယ်၊ ထောက်ရှာပင် ကျေးရွာရှိ “အောင်” အမှတ်တံဆိပ်ပါ ဆေးရှောက်ယိုလုပ်ငန်းသို့ ကွင်းဆင်းလေ့လာခဲ့ပါသည်။
ပထမဦးစွာ ကုန်ကြမ်းဖြစ်သော ရှောက်သီးအခွံများကိုလှီးထုတ်ရပါကြောင်း၊ ကျန်ရှိသည့် အနှစ်များကို အရည်ညှစ်ကြောင်း ၊ အရည်ညစ်၍ရရှိလာသော ရှောက်ရည်များအား သကြားထည့်၍ ရောကြိုရပါကြောင်း၊ လှီးထုတ်ထားသောရှောက်ခွံများအားလည်း အိုးတစ်လုံးဖြင့်ကြိုရကြောင်း၊ အရည်ညှစ်ပြီးသောအဖတ်များအား မသုံးပါကြောင်း၊ ပြုတ်ထားသောရှောက်ခွံ နူးအိလာပါက သကြားရည်ထဲ ထည့်၍ ထပ်မံကြိုရပါကြောင်း၊ အနေတော်ဖြစ်လာသည့်အခါတွင် အအေးခံပြီး ပလပ်စတစ်ဗူးများတွင် ထည့်သွင်း၍ ရောင်းချပါကြောင်း၊ ကုန်ကျစရိတ်အနေဖြင့် ရှောက်သီးအလုံး (၅၀)၊ သကြား(၃)ပိဿာနှင့် ဆားအထုပ်သေး (၁)ထုပ်လျှင် ရှောက်ယိုဗူး(၃၀) ထွက်ရှိပါကြောင်း၊ ရှောက်သီးအလုံး(၅၀)ကို (၂၅၀၀)ကျပ်၊ သကြား (၁)ပိဿာကို (၃၀၀၀)ကျပ်၊ ဆားအထုပ်သေး(၁)ထုပ်ကို (၁၀၀)ကျပ်နှင့် ရှောက်ယိုထည့်သည့်ဗူးခွံ (၃၀) ကို (၂၄၀၀)ကျပ် ဖြင့် စုစုပေါင်း ကုန်ကျငွေ (၁၄၀၀၀)ကျပ် ကုန်ကျပါကြောင်း၊ ရှောက်ယို(၁)ဗူးလျှင် (၇၀၀)ကျပ် ရောင်းရသဖြင့်ဗူး(၃၀)လျှင် (၂၁၀၀၀)ကျပ်ရရှိပါကြောင်း မိသားစုလုပ်အားခ အပါအဝင် အသားတင်အကျိုးအမြတ် (၇၀၀၀)ကျပ် ကျန်ရှိပါကြောင်း လေ့လာသိရှိခဲ့ရပါသည်။
DOCA(မကွေး)