ကလေးမြို့သည် လွန်ခဲ့သော နှစ်ပေါင်းများစွာကတည်းက မြို့လယ်အတွင်း ဖွင့်လှစ်ရောင်းချနေသည့် ကလေးမြို့အရှေ့ဘက် ညောင်ပင်သာရပ်ကွက်တွင် မီးခွက်ထွန်းဈေးဟု အမည်တွင်သည့် နံနက်ပိုင်း ( ၂:၀၀ ) နာရီခန့်မှစတင်၍ နံနက် ( ၆:၀၀ ) နာရီခန့် အချိန်ထိ အနယ်နယ်အရပ်ရပ်မှ လာရောက်ရောင်းချကြသော စားဖိုဆောင် သီးနှံများ၊ အသား၊ ငါးများ စုံလင်စွာနှင့် ဆား၊ သကြား၊ ဟင်းချိုမှုန့်များအပြင်၊ လူသုံးကုန်ပစ္စည်းများကိုပါ ဖယောင်းတိုင်များ ထွန်းညှိကာဖြင့် လက်လီ/ လက်ကား ရောင်းချပေးနေသော ဈေးသည်များဖြင့် စည်ကားလျက်ရှိ ပါသည်။
အဆိုပါဈေးတွင် တဆင့်ခံပြန်လည်ရောင်းချသည့် ဈေးသည်များ ပိုမိုလာရောက်ကာဝယ်ယူ လျက်ရှိပါသည်။ ထိုဈေးသည်များအနက် ဆိုင်ကယ်များဖြင့် နယ်လှည့်ရောင်းချသည့် ကလေး မြို့ပေါ်ရပ်ကွက်များနှင့် ကျေးရွာများအပြင်၊ ကလေးဝ၊ မင်းကင်း၊ ခမ်းပတ်၊ တမူးမြို့များအထိ စားဖိုဆောင်သီးနှံမျိုးစုံနှင့် အသား/ငါးများကို အထုပ်များအစီအရီဖြင့် ချိတ်ဆွဲကာ နွေ၊ မိုး၊ ဆောင်း ရာသီမရွေး အိမ်တိုင်ရာရောက် သွားရောက်ရောင်းချနေသည့် Mobile Market ဆိုင်ကယ် ဈေးသည်များအနေဖြင့် နေ့စဉ်လုပ်ငန်းတွင်ကျယ်ကာ အရောင်းအဝယ်များဖြစ်လျက်ရှိပါသည်။
ဆိုင်ကယ်ဖြင့် လိုက်လံရောင်းချသော ဦးမောင်ကြီးထံသို့ မေးမြန်းရာတွင် မိမိအနေဖြင့် အိမ်တိုင်ရာအရောက် လှည့်လည်ရောင်းချနေသည့် လုပ်ငန်းကို ၂၀၁၉ ခုနှစ်မှ စတင်၍ လုပ်ကိုင်လျက် ရှိပါကြောင်းနှင့် မိမိဝယ်ယူရောင်းချသည့် သီးနှံများ၊ အသား/ငါးများနှင့် သီးသန့်မှာယူသည့် စားသောက်ကုန်များရောင်းချမှုအနေဖြင့် မိမိသယ်ယူနိုင်သည့် အခြေအနေပေါ်မူတည်၍ တစ်နေ့လျင် ဝင်ငွေ ( ၁၅၀၀၀ - ၂၀၀၀၀ ) ကျပ်ခန့်ထိ ဝင်ငွေရရှိလျက်ရှိပါကြောင်း၊ ယခုကဲ့သို့ အိမ်တိုင်ရာရောက် သွားရောက်ရောင်းချခြင်းအားဖြင့် ဝယ်ယူသူများအနေဖြင့် အဆင်ပြေကာ ရောင်းချသူများ အနေဖြင့်လည်း ပိုမိုရောင်းချနိုင်လေလေ မိသားစုအတွက်ဝင်ငွေရရှိလေဖြစ်ပြီး လုပ်ငန်းတွင်ကျယ်လာသော Mobile Market ဆိုင်ကယ်ဖြင့် ရောင်းဝယ်ကြသောလုပ်ငန်းမှာ တွင်ကျယ်လာပြီး အချိန်တိုအတွင်း နေ့စဉ် ဝင်ငွေရရှိလျက်ရှိပါကြောင်း သတင်းရရှိပါသည်။
DOCA(စစ်ကိုင်း)