တောင်ငူခရိုင်၊ တောင်ငူမြို့နယ်၊ ငါးဖယ်အင်းကျေးရွာသည် မိရိုဖလာလုပ်ငန်းဖြစ်သော မြေအိုးလုပ်ငန်းအား လုပ်ကိုင်ကြသူ များပြားလှပါသည်။ အဓိကအားဖြင့် သောက်ရေအိုးနှင့် ပန်းအိုး အား အဓိကလုပ်ကိုင်သည်ဟုလည်း သိရှိရပါသည်။ မြေအိုးများ ပြုလုပ်ရန်အတွက် အဓိကကုန်ကြမ်းများမှာ ရွှံစေးမြေ၊ သဲ၊ မြေနီ၊ ထင်း၊ ကောက်ရိုးနှင့် စပါးခွံတို့လိုအပ်ပါသည်။
မြေအိုးပြုလုပ်ပုံအဆင့်ဆင့်မှာ ရွှံစေးမြေနှင့် မြေစေးကိုအမှုန့်ပြုလုပ်ကာ သမအောင် ရောမွှေ ရပါသည်။ အိုးတစ်လုံးစာ ရွှံစေးတောင့်များဖြစ်အောင်ပြုလုပ်ကာ အိုးကြမ်းပုံဖော်ရပါသည်။ ရရှိလာ သော အိုးကြမ်းများကို အရိပ်အောက်တွင်ထားကာ အိုး၏အောက်ခြေဖွေးလာပါက နှစ်ရက်၊ သုံးရက်ခန့် နေလှန်းရပါသည်။ ပြီးနောက် ကောက်ရိုး၊ စပါးခွံများကို အသုံးပြု၍ မီးဖုတ်ပြီးပါက ဈေးကွက်ဝင် အိုး တစ်လုံးရရှိပြီ ဖြစ်ပါသည်။
ဈေးနှုန်းဈေးကွက်အနေဖြင့် သောက်ရေအိုးတစ်လုံးလျှင် (၁၅၀၀) ကျပ်ခန့်သွင်းရကြောင်း နှင့် ဒေသတွင်း တောင်ငူခရိုင်ရှိ အနီးဝန်းကျင်မြို့များသို့ တင်ပို့ရောင်းချရကြောင်း ငါးဖယ်အင်း ကျေးရွာမှ အိုးလုပ်ငန်းလုပ်ကိုင်သူ တစ်ဦး၏ ပြောကြားချက်အရ သိရှိရပါသည်။
ခေတ်မှီတိုးတက်လာသည်နှင့်အမျှ သောက်ရေသန့်ဗူးများ ပေါများလာသော်လည်း နွေရာသီ ရောက်လျင်တော့ မြေအိုးထဲမှ ရေအေးအေးလေးကို တမ်းတမိသည်မှာ အမှန်ပင်ဖြစ်ပါသည်။ သောက်ရေသန့်ဗူးမပို့နိုင်သော မြို့ပြနှင့်ဝေးသော ကျေးလက်ဒေသများတွင် သောက်ရေအိုးများကို အသုံးပြုနေကြစမြဲဖြစ်သောကြောင့် တပိုင်တနိုင်အိုးလုပ်ငန်းများမှာ တည်မြဲနေအုံးမည်ဟု သုံးသပ်မိကြောင်း တင်ပြလိုက်ပါသည်။
DOCA(ပဲခူး)