ရန်ကုန်တိုင်းဒေသကြီး၊ သန်လျင်ခရိုင်၊ သန်လျင်မြို့နယ်တွင် နေကြာသီးနှံစပ်မျိုးနှင့် သွင်းအားစုပေးအပ်ပွဲ အခမ်းအနားကို (၂၁.၁၀.၂၀၂၂)ရက်နေ့၊ သန်လျင်မြို့နယ် အ.ထ.က(၁) ကျောင်း၌ ကျင်းပပြုလုပ်ခဲ့ပါသည်။ ယင်းအခမ်းအနားသို့ ရန်ကုန်တိုင်းဒေသကြီး ဝန်ကြီးချုပ် နှင့် အစိုးရအဖွဲ့၏ ဝန်ကြီးများ၊ တိုင်းဒေသကြီးအစိုးရအဖွဲ့ အတွင်ရေးမှူး၊ တိုင်း/ခရိုင် စီမံ အုပ်ချုပ်ရေး၊ ဥက္ကဌနှင့် ခရိုင်မြို့နယ်အဆင့် စိုက်/ကြပ်အဖွဲ့ဝင်များ၊ နေကြာသီးနှံမျိုးစိုက်ပျိုးမည့် ကျေးရွာများမှ တောင်သူများအပါအဝင် စုစုပေါင်း(၇၀၀)ဦး တက်ရောက်ခဲ့ပါသည်။
အခမ်းအနားတွင် သန်လျင်ခရိုင်မြို့နယ်များမှ ဆီဖူလုံမှုအခြေအနေနှင့် နေကြာသီးနှံ စိုက်ပျိုး မည့်အခြေအနေများကို သန်လျင်ခရိုင်အုပ်ချုပ်ရေးမှူးမှ ရှင်းလင်းတင်ပြပြီး တိုင်း ဒေသကြီးဝန်ကြီး ချုပ်မှ လိုအပ်သညများကို ပြန်လည်လမ်းညွှန်မှုပြုခဲ့ပါသည်။ ထို့နောက် အစိုးရအဖွဲ့ဝင်၊ ဝန်ကြီးများမှလည်း နေကြာစေ့စိုက်ပျိုးမည့် တောင်သူများထံ နေကြာသီးနှံ မျိုးစေ့များအား ပေးအပ်ခဲ့ကြပါသည်။ ရန်ကုန်တိုင်းဒေသကြီးတောင်ပိုင်း၊ သန်လျင်၊ တွံ့တေး ခရိုင်များအနေဖြင့် ၂၀၂၂ ခုနှစ်တွင် မြို့နယ်များအလိုက် ဆီ(၄၄.၅၀)မက်ထရစ်တန် ထုတ်လုပ် နိုင်ပြီး (၁၅၀၀၀၀) မက်ထရစ်တန် လိုအပ်မှုရှိ၍ (၀.၂၉)ရာခိုင်နှုန်းသာ ဖူလုံမှုရှိကြောင်း တွေ့ရှိရပါသည်။
ခရိုင်များအတွင်း ယခင်က ဆီထုတ်သီးနှံ နေကြာကို (၅၁)ဧကသာ စိုက်ပျိုးခဲ့သော်လည်း ပြည်တွင်းစားသုံးဆီဖူလုံရေးနှင့် စိုက်ပျိုးသူ တောင်သူများ ဝင်ငွေတိုးပွားစေရေးရည်ရွယ်ချက်များဖြင့် ဆောင်ရွက်ခြင်းဖြစ်ပါသည်။ ယခု ၂၀၂၂-၂၀၂၃ ခုနှစ် သန်လျင်ခရိုင်ရှိ သန်လျင်၊ ကျောက်တန်း၊ ခရမ်း၊ သုံးခွ မြို့နယ်များရှိ ကျေးရွာအုပ်စု (၃၄၉)အုပ်စု၊ တောင်သူ (၅၃၇)ဦးတို့မှ သီးထပ် (၁၂၆၂) ဧကသီးညှပ် (၃၈၇)ဧက စုစုပေါင်း (၁၆၄၉)ဧက စိုက်ပျိုးသွားမည်ဖြစ်ကြောင်း သိရှိရပြီး တွံတေးခရိုင်အပါအဝင် ရန်ကုန်တိုင်းဒေသကြီးတောင်ပိုင်းတွင် နေကြာသီးနှံကို (၃၈၃၆)ဧက စိုက်ပျိုးရန် လျာထားဆောင်ရွက်ထားကြောင်း သိရှိရပါသည်။
DOCA(ရန်ကုန်)